1. ¿Majqui miʼ mejlel i subeñonla bajcheʼ yom mi lac chʼujutesan Dios?

LɅCʼɅ tiʼ pejtelel ñopbalʌl tac miʼ yʌlob chaʼan miʼ pʌsob i sujmlel tiʼ tojlel Dios. Pero mach cheʼiqui, come yʌñʌl tac chuqui miʼ pʌsob yicʼot chaʼan bajcheʼ yom mi lac chʼujutesan. Cheʼ jiñi, ¿bajcheʼ miʼ mejlel lac ñaʼtan baqui bʌ jiñi i sujm bʌ ñopbalʌl? Cojach Jehová miʼ mejlel i subeñonla bajcheʼ yom mi lac chʼujutesan.

2. ¿Chuqui yom maʼ mel chaʼan maʼ ñaʼtan bajcheʼ yom miʼ chʼujutesʌntel Dios?

² Jehová tsiʼ yʌqʼueyonla jiñi Biblia chaʼan mi lac ñaʼtan bajcheʼ yom mi lac chʼujutesan, jin chaʼan weñʌch cheʼ maʼ pejcan. Dios mi caj i coltañet a tajben i wenlel jiñi i cʌntesa tac come mucʼʌch i chʼʌmet ti ñuc (Isaías 48:17).

3. ¿Chuqui miʼ pijtan Dios ti lac tojlel?

³ An wiñicob xʼixicob (quixtañujob) muʼ bʌ i yʌlob chaʼan Dios miʼ chʼʌm tiʼ pejtelel ñopbalʌl tac, pero Jesús mach cheʼic tsiʼ pʌsʌ. Tsiʼ yʌlʌ: «Mach tiʼ pejtelobic muʼ bʌ i pejcañoñob tiʼ yum mi caj i yochelob tiʼ yumʌntel jini am bʌ ti panchan. Jini jach muʼ bʌ i melob bajcheʼ yom c Tat». Jin chaʼan, Dios miʼ pijtan chaʼan mi laj cʌn chuqui yom yicʼot mi lac mel (chaʼlen). Ili yomʌch mi lac chʼʌm ti ñuc, Jesús tsiʼ yʌlʌ chaʼan jiñi maʼañic bʌ miʼ jacʼbeñob i tʼan Dios miʼ cʌjñelob bajcheʼ muʼ bʌ i chaʼleñob jontolil (Mateo 7:21-23).

4. ¿Chuqui tsiʼ wʌn alʌ Jesús mi la com lac melben i yeʼtel Dios?

⁴ Jesús tsiʼ yʌlʌ chaʼan mi la com lac melben i yeʼtel Dios, mi caj lac taj wocol tac. Tsiʼ wʌn alʌ: «Ochenla ti chʼoʼchʼoc bʌ i tiʼ, come colem i tiʼ, ñuc i bijlel muʼ bʌ  i majlel ti tojmulil. Cabʌlob miʼ yochelob yaʼi. Come chʼoʼchʼoc i tiʼ, chʼoʼchʼoc i bijlel baʼ mi laʼ taj laʼ cuxtʌlel. Tsʼitaʼ jax jini muʼ bʌ i yochelob i taj i cuxtʌlel» (Mateo 7:13, 14). Jiñi chʼoʼchʼoc bʌ bij yom i yʌl jiñi i sujm bʌ ñopbalʌl i miʼ yʌqʼueñonla lac taj laj cuxtʌlel maʼañic bʌ miʼ jilel. Jiñi colem bʌ bij yom i yʌl jiñi mach bʌ i sujmic ñopbalʌl i miʼ yʌcʼonla ti chʌmel (sajtel). Pero Jehová mach yomic cheʼ an majqui miʼ chʌmel, jin chaʼan wolito (choncolto) i yʌcʼ i yorajlel chaʼan miʼ cʌñob (2 Pedro 3:9).

5. ¿Bajcheʼ miʼ mejlel a cʌn jiñi i sujm bʌ ñopbalʌl?

⁵ Jesús tsiʼ yʌlʌ chaʼan miʼ mejlel laj cʌn majquiyob jiñi añoʼ bʌ tiʼ sujm bʌ ñopbalʌl. Yom mi lac wen tsajin chuqui miʼ ñopob yicʼot miʼ melob. Tsiʼ yʌlʌ: «Tiʼ wut jach mi laʼ cʌn». Jesús tsiʼ laji jiñi i sujm bʌ ñopbalʌl bajcheʼ juntejc wem bʌ teʼ, tsiʼ yʌlʌ: «Pejtelel utsʼat bʌ teʼ miʼ yʌcʼ utsʼat bʌ i wut» (Mateo 7:16, 17). Ili mach yomic i yʌl chaʼan tojob jiñi muʼ bʌ i chʼujutesañob Dios. Pero mucʼʌch i chaʼleñob wersa i melob chuqui tac wen. Laʼ laj qʼuel bajcheʼ miʼ mejlel laj cʌn jiñi i sujm bʌ ñopbalʌl.

6, 7. a) ¿Chucoch jiñi i sujm bʌ ñopbalʌl yaʼʌch chucul i cʌntesa ti Biblia? b) ¿Chuqui miʼ pʌsbeñonla jiñi ejemplo i chaʼan Jesús?

⁶ Jiñi i sujm bʌ ñopbalʌl chucul i cʌntesa ti Biblia. Jiñi Biblia miʼ yʌl: «Chʼoyol ti Dios pejtelel i Tsʼijbujel. An i cʼʌjñibal ti cʌntesa chaʼan lac ticʼol, yicʼot chaʼan lac tojʼesʌntel, chaʼan mi lac mel chuqui toj, chaʼan chajpʌbil i winic Dios tiʼ pejtelel chuqui wen, chaʼan utsʼat miʼ mel i yeʼtel ti pejtelel» (2 Timoteo 3:16, 17). Jiñi apóstol Pablo tiʼ tsʼijbube jiñi xñoptʼañob: «Come cheʼ bʌ tsaʼ laʼ ñopo i tʼan Dios, tsaʼ bʌ laʼ wubi tic tojlel lojon, tsaʼ laʼ ñopo mach i tʼanic winicob, pero i tʼañʌch Dios»  (1 Tesalonicenses 2:13). Jiñi i sujm bʌ ñopbalʌl miʼ chuc i cʌntesa ti Biblia, come i Tʼañʌch Dios. Mach chuculic tiʼ ñaʼtʌbal quixtañujob o ti costumbre tac.

⁷ Pejtelel tsaʼ bʌ i pʌsʌ Jesús yaʼʌch chucul tiʼ Tʼan Dios (pejcan Juan 17:17). Ti bele ora tsiʼ taja ti tʼan jiñi Tsʼijbujel (Mateo 4:4, 7, 10). Jiñi i sujm bʌ xñoptʼañonla mi lac lajin Jesús i pejtelel chuqui mi lac pʌs yaʼʌch chucul ti Biblia.

8. ¿Chuqui tsiʼ pʌsʌ Jesús chaʼan bajcheʼ yom mi lac chʼujutesan Jehová ti wen?

⁸ Cojach Jehová yom mi lac chʼujutesan. Salmo 83:18 (TNM) miʼ yʌl: «A cʼabaʼ jiñʌch Jehová, come jatet jach jiñi Cʼax ñuquet bʌ tiʼ pejtelel Pañimil». Jesús yom chaʼan jiñi quixtañujob miʼ ñaʼtañob ti wen majqui jiñi i sujm bʌ Dios. Jin chaʼan tsiʼ pʌsbeyob chuqui i cʼabaʼ (pejcan Juan 17:6). Jesús tsiʼ yʌlʌ: «Yom maʼ chʼujutesan a Yum Dios. Cojach jini yom maʼ yuman» (Mateo 4:10). Jin chaʼan, jiñi i wiñiconbʌla Dios mi lac tsajcʌben i melbal Jesús. Cojach Jehová mi lac chʼujutesan, mi laj cʼʌmben i cʼabaʼ yicʼot mi lac suben yambʌlob. Cheʼ jaʼel, mi lac pʌs chuqui mi caj i mel Dios ti lac tojlel.

9, 10. ¿Bajcheʼ mi lac pʌsben cʼuxbiya yambʌlob?

⁹ Yom mi lac pʌsben i sujm bʌ cʼuxbiya yambʌlob. Jesús tsiʼ cʌntesa i cʼuxbiñob i bʌ jiñi xcʌntʼañob i chaʼan (pejcan Juan 13:35). Jiñi cʼuxbiya tiʼ tojlel yambʌlob yom miʼ yʌcʼ chaʼan juntemelonla la quicʼot la quermañojob, mach yʌlʌyic baqui tilemonla, laj cultura, mi an lac taqʼuin o maʼañic (Colosenses 3:14). Jin chaʼan, maʼañic mi lac majlel ti guerra i maʼañic mi lac tsʌnsan yambʌlob. Jiñi Biblia miʼ yʌl: «Tsiquil majqui i yalobilob Dios yicʼot majqui i yalobilob xiba. Jini mach bʌ anic miʼ chaʼlen chuqui toj, mach i chaʼanic Dios. Cheʼ jaʼel  jini mach bʌ anic miʼ cʼuxbin i yermano, mach i chaʼanic Dios». I miʼ bej al: «Yom mi laj cʼuxbin lac bʌ ti lac pejtelel. Mach yomic lajalonla bajcheʼ Caín tsaʼ bʌ i tsʌnsa i yijtsʼin» (1 Juan 3:10-12; 4:20, 21).

¹⁰ Mi laj cʼʌn jiñi i yorajlel am bʌ lac chaʼan, lac pʼʌtʌlel yicʼot chuqui tac an lac chaʼan chaʼan mi laj coltan yicʼot lac pʼʌtʼesan yambʌlob (Hebreos 10:24, 25). Mi laj «coltan pejtelel winicob» (Gálatas 6:10).

11. ¿Chucoch mi lac jacʼben i tʼan Jesús?

¹¹ Yom mi lac jacʼben i tʼan Jesús, come yaʼ jach mi lac taj laj coltʌntel. Jiñi Biblia miʼ yʌl: «Maʼanic laj coltʌntel ti yambʌ, cojach tiʼ cʼabaʼ Jesús. Maʼanic yambʌ ti yebal panchan aqʼuebiloʼ bʌ winicob muʼ bʌ mejlel i coltañonla» (Hechos 4:12). Yaʼ ti cʌntesʌntel 5 tsaʼ laj cʌñʌ chaʼan Jehová tsiʼ choco tilel Jesús chaʼan miʼ yʌcʼ i cuxtʌlel tiʼ tojlel muʼ bʌ i jacʼbeñob i tʼan (Mateo 20:28). Jehová tsiʼ yajca Jesús bajcheʼ Rey chaʼan ili Pañimil. Jin chaʼan, jiñi Biblia miʼ yʌl chaʼan mi la com chumtʌl tiʼ pejtelel ora, yom mi lac jacʼben i tʼan Jesús (pejcan Juan 3:36).

12. ¿Chucoch maʼañic mi la cotsan lac bʌ ti política?

¹² Mach yomic mi la cotsan lac bʌ ti política. Jesús maʼañic tsiʼ yotsa i bʌ ti política. Cheʼ bʌ woli ti mejlel, tiʼ sube jiñi yumʌl i chaʼan Roma i cʼabaʼ Pilato: «Mach wʌʼic chʼoyol c yumʌntel ti pañimil» (pejcan Juan 18:36). Cheʼ bajcheʼ Jesús, xucʼulonla tiʼ Yumʌntel Dios jaʼel. Jin chaʼan maʼañic mi la cotsan lac bʌ ti política, mach yʌlʌyic baqui chumulonla. Pero jiñi Biblia miʼ subeñonla chaʼan mi lac jacʼben i tʼan «jini añoʼ bʌ i yeʼtel ti pañimil», yom i yʌl jiñi yumʌlob (Romanos 13:1). Mi lac jacʼ jiñi mandar tac am bʌ yaʼ ti país baqui chumulonla. Pero mi an jumpʼejl mandar am bʌ tiʼ contra i mandar  Dios mi lac lajin jiñi apóstolob. Tsiʼ yʌlʌyob: «Wersa mic jacʼben lojon i mandar Dios anquese miʼ ñusʌntel i mandar winicob» (Hechos 5:29; Marcos 12:17).

13. ¿Chuqui mi lac sub chaʼan jiñi i Yumʌntel Dios?

¹³ Yom mi lac sub chaʼan cojach i Yumʌntel Dios miʼ mejlel i jisan jiñi wocol tac. Jesús tsiʼ yʌlʌ chaʼan «jini wen tʼan chaʼan i yumʌntel Dios» mi caj i sujbel tiʼ petol pañimil (mulawil) (pejcan Mateo 24:14). Mi juntiquilic yumʌl miʼ mejlel i mel muʼ bʌ caj i mel i Yumʌntel Dios ti lac tojlel (Salmo 146:3). Jesús tsiʼ cʌntesayonla laj cʼajtin ti la coración jiñi Yumʌntel cheʼ bʌ tsiʼ yʌlʌ: «Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:10). Jiñi Biblia miʼ yʌl chaʼan jiñi Yumʌntel mi caj i jisan jiñi yumʌlob ti pañimil, i cojach muʼ bʌ caj i yuman ili Pañimil tiʼ pejtelel ora (Daniel 2:44).

14. ¿Baqui bʌ jiñi i sujm bʌ ñopbalʌl maʼ ñaʼtan jatet?

¹⁴ Cheʼ bʌ tsaʼix laj qʼuele ili jujunchajp, cʼajtiben a bʌ: «¿Majqui muʼ bʌ i chucob i cʌntesa ti Biblia? ¿Majqui miʼ yʌcʼob ti cʌjñel i cʼabaʼ Dios? ¿Majqui miʼ cʼuxbiñob i bʌ tiʼ sujm? ¿Majqui miʼ ñopob chaʼan Dios tsiʼ choco tilel Jesús chaʼan miʼ coltañonla? ¿Majqui maʼañic bʌ miʼ yotsañob i bʌ ti política? ¿Majqui miʼ subob chaʼan cojach i Yumʌntel Dios miʼ mejlel i jisan jiñi wocol tac?». Cojach jiñi i testigojob Jehová miʼ melob iliyi (Isaías 43:10-12).

15. ¿Chuqui yom mi lac mel mi la com chaʼan Dios miʼ chʼʌm jiñi lac chʼujutesaya?

¹⁵ Mach jasʌlic mi lac ñop chaʼan añʌch Dios. Jiñi xibajob mucʼʌch i ñopob jaʼel, pero maʼañic miʼ jacʼbeñob i tʼan (Santiago 2:19). Mi la com chaʼan Dios miʼ chʼʌm  lac chʼujutesaya, yomʌch mi lac mel chuqui miʼ yʌl, mach cojach mi lac ñop chaʼan añʌch.

16. ¿Chucoch yom mi laj cʌy jiñi mach bʌ i sujmic ñopbalʌl?

¹⁶ Chaʼan Dios miʼ chʼʌm lac chʼujutesaya, yom mi laj cʌy jaʼel jiñi mach bʌ i sujmic ñopbalʌl. Jiñi xʼaltʼan Isaías tiʼ tsʼijbu: «Loqʼuenla ti Babilonia. [...] Mach yomic mi laʼ tʌl chuqui tac bibiʼ. Sʌqʼuesan laʼ bʌ» (Isaías 52:11; 2 Corintios 6:17). Jehová bibiʼ miʼ qʼuel jiñi mach bʌ i sujmic ñopbalʌl. Jin chaʼan, yom mi laj cʌy pejtelel i chaʼan bʌ jiñi mach bʌ i sujmic ñopbalʌl.

17, 18. a) ¿Chuqui jiñi «Ñuc bʌ Babilonia»? b) ¿Chucoch yom maʼ cʌy ti ora?

¹⁷ ¿Chuqui jiñi mach bʌ i sujmic ñopbalʌl? Yaʼ ochem pejtelel ñopbalʌl muʼ bʌ i pʌs bajcheʼ miʼ chʼujutesʌntel Dios pero mach cheʼic bajcheʼ miʼ yʌl jiñi i Tʼan. Jiñi Biblia miʼ suben ti «Ñuc bʌ Babilonia» pejtelel ñopbalʌl mach bʌ i sujmic (Apocalipsis [Revelación] 17:5). ¿Chucoch? Cheʼ ñumeñix jiñi ñuc bʌ Butʼjaʼ, yaʼ tiʼ tejclum Babilonia tsaʼ pʼojli cabʌl cʌntesa mach bʌ i sujmic. Jiñi cʌntesa tac tsaʼ pujqui tiʼ pejtelel pañimil. Jumpʼejl ejemplo, jiñi quixtañujob ti Babilonia mi chʼujutesañob jiñi uxtiquil bʌ dios. Ili ora, cabʌl ñopbalʌl tac miʼ pʌsob chaʼan an uxtiquil dios pero jiñi Biblia jamʌl tsiquil miʼ pʌs chaʼan cojach Jehová jiñi i sujm bʌ Dios i Jesús jiñʌch i Yalobil (Juan 17:3). Jiñi babiloniojob tsiʼ ñopoyob jaʼel chaʼan anto chuqui cuxul miʼ cʌytʌl cheʼ bʌ miʼ chʌmel juntiquil quixtañu i miʼ mejlel i yilan wocol yaʼ ti cʼajc. Pero jiñi mach i sujmic (qʼuele jiñi nota 14 yicʼot 17).

¹⁸ Dios wʌn albilix i chaʼan chaʼan lʌcʼʌlix mi caj i jisan jiñi mach bʌ i sujmic ñopbalʌl (Apocalipsis 18:8). ¿Muʼ baʼ ñaʼtan chucoch yom maʼ loqʼuel ti ora? Jehová yom chaʼan maʼ tʌtsʼ a bʌ cheʼ anto i yorajlel (Apocalipsis 18:4).

19. ¿Bajcheʼ mi caj i cʌntañet Dios mi tsaʼ yajca a melben i yeʼtel?

 ¹⁹ Mi maʼ cʌy jiñi mach bʌ i sujmic ñopbalʌl i maʼ melben i yeʼtel (troñel) Jehová, tajol an a familia o a wamigojob maʼañic bʌ mi caj i chʼʌmbeñob i sujm i miʼ contrajiñetob, miʼ yʌqʼuetob ti quisin o maʼañix miʼ ñochtañetob. Pero Jehová mi caj i cʌntañet. Mi caj i yʌqʼueñet jumpʼejl a familia am bʌ tiʼ petol pañimil baʼan yonlel quixtañujob miʼ cʼuxbiñob i bʌ tiʼ sujm yicʼot jiñi a pijtaya chaʼan maʼ chumtʌl tiʼ pejtelel ora ti tsijiʼ bʌ pañimil (Marcos 10:28-30). Tajol jiñi a familia o a wamigojob mach bʌ yomobic chaʼan maʼ melben i yeʼtel Jehová ili ora, ti wiʼil miʼ pejcañob jaʼel jiñi Biblia.

20. ¿Chucoch ñuc i cʼʌjñibal maʼ wochel yaʼ ti i sujm bʌ ñopbalʌl?

²⁰ Dios lʌcʼʌlix mi caj i jisan jontolil, i jiñi i Yumʌntel mi caj i yuman pejtelel Pañimil (2 Pedro 3:9, 13). Wen utsʼatax miʼ cajel. Tiʼ pejtelelob mi caj i chʼujutesañob Jehová cheʼ bajcheʼ miʼ mulan. Jin chaʼan, ñuc i cʼʌjñibal chaʼan ili ora maʼ mel woli (yʌquel) bʌ a cʌn i maʼ wochel yaʼ ti i sujm bʌ ñopbalʌl.