1-3. ¿Chuqui ti cʼajtiya tac miʼ melbeñob i bʌ jiñi quixtañujob cheʼ bʌ an majqui miʼ chʌmel, i baqui bʌ i jacʼbal miʼ yʌjqʼuel ti cabʌl ñopbalʌl?

JIÑI Biblia miʼ yʌl chaʼan ti talto bʌ qʼuin «maʼanix majch miʼ caj ti chʌmel» (Apocalipsis [Revelación] 21:4). Yaʼ ti cʌntesʌntel 5 tsaʼ laj cʌñʌ chaʼan miʼ mejlel lac taj laj cuxtʌlel mach bʌ yujilic jilel come tsaʼ ajqʼui i tojol laj coltʌntel. Pero wolito (choncolto) lac chʌmel (Eclesiastés 9:5). Jin chaʼan, jumpʼejl ñuc bʌ cʼajtiya muʼ bʌ lac melben lac bʌ jiñʌch: ¿Baqui mi lac majlel cheʼ mi lac chʌmel?

² Ñuc i cʼʌjñibal cheʼ mi laj cʌmben i jacʼbal ili cʼajtiya, ñumento cheʼ miʼ chʌmel juntiquil lac familia o la camigo. Tajol mi laj cʼajtiben lac bʌ: ¿Baqui tsaʼ majli? ¿Woli (yʌquel) ba i qʼuelonla? ¿Woli ba i yilan wocol? ¿Muʼ ba i coltañonla o i ticʼlañonla? ¿Muʼ ba caj lac chaʼ qʼuel?

³ Jiñi ñopbalʌl tac wen qʼuexel bajcheʼ miʼ jacʼob ili cʼajtiya tac. An muʼ bʌ i pʌsob chaʼan jiñi weñoʼ bʌ miʼ majlelob ti panchan, i jiñi jontoloʼ bʌ miʼ majlelob ti cʼajc. Yambʌ miʼ yʌlob chaʼan mi lac sujtel ti espíritu i mi lac majlel yaʼ baqui an yambʌ lac piʼʌlob chʌmeñobix bʌ.

4. ¿Chuqui ti cʌntesa chaʼan jiñi chʌmel miʼ pʌs cabʌl ñopbalʌl?

⁴ Anquese jiñi ñopbalʌl tac wen qʼuexel chuqui miʼ yʌlob chaʼan jiñi chʌmel, an jumpʼejl cʌntesa junlajal bʌ miʼ pʌsob: Chaʼan an chuqui cuxul miʼ cʌytʌl ti lac tojlel cheʼ mi lac chʌmel. Pero ¿i sujm ba jiñi?

5, 6. ¿Chuqui mi lac chaʼlen cheʼ mi lac chʌmel?

⁵ Jehová yujil chuqui mi lac chaʼlen cheʼ mi lac chʌmel.  Yaʼ ti Biblia miʼ pʌsbeñonla chaʼan cheʼ mi lac chʌmel miʼ jilel laj cuxtʌlel. Maʼañix chuqui mi laj qʼuel, la cubin yicʼot lac ñaʼtan. Miʼ jilel jaʼel jiñi lac ñaʼtʌbal yicʼot pejtelel chuqui la cujil. Maʼañic jumpʼejl lac chʼujlel anto bʌ baqui miʼ majlel ti chumtʌl. *

⁶ Jiñi Biblia miʼ yʌl chaʼan «maʼanix chuqui yujilob jini chʌmeñobix bʌ». Jin chaʼan, maʼañix mucʼob ti cʼuxbiya o tsʼaʼleya. Cheʼ jaʼel, miʼ yʌl: «Maʼanix eʼtel baʼ maʼ majlel. Maʼanix chuqui maʼ wis ñaʼtan a mel» (pejcan Eclesiastés 9:5, 6, 10). Ti Salmo 146:4 miʼ yʌl jaʼel chaʼan jiñi muʼ bʌ i chʌmelob miʼ «jilel chuqui tsiʼ ñaʼtayob i mel».

7. ¿Bajcheʼ tsiʼ laji Jesús jiñi chʌmel?

⁷ Cheʼ bʌ jiñi i yamigo Jesús, i cʼabaʼ Lázaro, tsaʼ chʌmi, tiʼ sube jiñi xcʌntʼañob i chaʼan: «Wʌyʌlix lac piʼʌl Lázaro. Mic majlel c ñijcan chaʼan miʼ chʼojyel ti wʌyel». ¿Chuqui yom i yʌl iliyi? Jesús tiʼ wiʼil tsictesa: «Chʌmenix Lázaro» (Juan 11:11-14). Jesús tsiʼ laji jiñi chʌmel bajcheʼ tam bʌ wʌyel. Maʼañic tsiʼ yʌlʌ chaʼan Lázaro tsaʼ majli ti panchan o yaʼ baqui an i piʼʌlob. Cheʼ jaʼel, maʼañic tsiʼ yʌlʌ chaʼan tsajñi i wen ubin wocol ti cʼajc. Tsaʼ bʌ i yʌlʌ jiñʌch chaʼan Lázaro tsaʼ ochi wen tam bʌ i wʌyel. An yan tac bʌ texto muʼ bʌ i lajin jiñi chʌmel bajcheʼ wʌyel. Cheʼ bʌ Jesús tsiʼ chʼojyesʌbe i yixicʼal Jairo, tsiʼ yʌlʌ: «Mach chʌmenic. Woli jach ti wʌyel» (Lucas 8:52, 53).

8. ¿Bajcheʼ la cujil chaʼan Dios maʼañic tsiʼ meleyonla chaʼan mi lac chʌmel?

⁸ ¿Chaʼan ba mi lac chʌmel tsiʼ meleyonla Dios? Maʼañic. ¿Bajcheʼ mi lac ñaʼtan? Jehová tsiʼ mele Adán yicʼot Eva chaʼan miʼ chumtʌlob tiʼ pejtelel ora tiʼ cʼocʼlel yicʼot  chaʼan cheʼʌch miʼ mulañob jaʼel. Mi juntiquilic tatʌl miʼ mulan chaʼan miʼ cʼamʼan yicʼot miʼ chʌmel i yalobil. Lajalʌch jaʼel jiñi lac Tat Jehová, maʼañic miʼ mulan cheʼ mi laj cʼamʼan yicʼot mi lac chʌmel. Pero mi Dios tsiʼ meleyonla chaʼan mi lac chumtʌl tiʼ pejtelel ora, ¿chucoch mi lac chʌmel?

9. ¿Chucoch mach tsʌtsic ti chʼujbintel jiñi mandar tsaʼ bʌ aqʼuenti Adán yicʼot Eva?

⁹ Jiñi wocol tsaʼ tejchi yaʼ ti pʌcʼʌbʌl Edén. Jehová tiʼ sube Adán: «Miʼ mejlel a cʼux i wut pejtelel teʼ am bʌ ti pʌcʼʌbʌl.  Cojach jini teʼ muʼ bʌ i yʌqʼueñet a cʌn chuqui utsʼat yicʼot chuqui jontol mach a cʼux, come ti jini qʼuin cheʼ maʼ cʼuxben i wut wersa mi caj a chʌmel» (Génesis 2:9, 16, 17). Jiñi mandar wen tsiquilʌch i mach tsʌtsic ti chʼujbintel. Jehová jiñʌch tsaʼ bʌ i mele Adán yicʼot Eva, jin chaʼan miʼ mejlel i subeñob chuqui wem yicʼot mach bʌ weñic. Cheʼ tsaʼic i chʼujbibeyob i tʼan Jehová, tsiʼ pʌsʌyob chaʼan choncolʌch i qʼuelob ti ñuc i chaʼan miʼ yʌqʼueñob wocolix i yʌlʌ chaʼan pejtelel chuqui tsaʼ aqʼuentiyob.

10, 11. a) ¿Bajcheʼ tsiʼ mele Satanás chaʼan Adán yicʼot Eva miʼ ñusʌbeñob i tʼan Dios? b) ¿Chucoch wen yujilobʌch chuqui tsiʼ meleyob Adán yicʼot Eva?

¹⁰ Chʼijiyemtic jax, pero Adán yicʼot Eva tsiʼ ñusʌbeyob i tʼan Jehová. Satanás tiʼ sube Eva: «¿Isujm ba tsiʼ yʌlʌ Dios: ‹Mach yomic mi laʼ cʼuxben i wut pejtel jini teʼ am bʌ ti jini pʌcʼʌbʌl?›». Eva tsiʼ yʌlʌ: «Miʼ mejlel j cʼux lojon i wut jini teʼ tac am bʌ ti pʌcʼʌbʌl. Pero Dios tsiʼ yʌlʌ: ‹Mach yomic mi laʼ cʼux i wut jini teʼ am bʌ ti yojlil jini pʌcʼʌbʌl. Mach laʼ tʌl ame chʌmiquetla›» (Génesis 3:1-3).

¹¹ Cheʼ jiñi, Satanás tiʼ sube Eva: «I lot. Maʼanic mi caj laʼ chʌmel. Yujil Dios mux i cajñel laʼ wut cheʼ mi laʼ cʼuxben i wut jini teʼ. Lajal mi caj laʼ wajñel bajcheʼ Dios. Mi caj laʼ cʌn chuqui tac utsʼat yicʼot chuqui tac jontol» (Génesis 3:4-6). Satanás yom i yʌqʼuen i ñop Eva chaʼan miʼ mejlel i bajñel yajcan chuqui wen yicʼot mach bʌ weñic. Pero tsiʼ loti chaʼan chuqui mi caj i chaʼlen mi tsiʼ ñusʌbe i tʼan Jehová. Tiʼ sube chaʼan maʼañic mi caj i chʌmel mi tsiʼ cʼuxu i wut jiñi teʼ, jin chaʼan Eva tsiʼ cʼuxu. Cheʼ jiñi, tsiʼ yʌqʼue i ñoxiʼal jaʼel. Adán yicʼot Eva yujilob chaʼan tsaʼ subentiyob ti Jehová chaʼan maʼañic miʼ cʼuxob i wut jiñi teʼ. Cheʼ bʌ tsiʼ cʼuxuyob, tsiʼ ñusayob jumpʼejl mandar wen tsiquil bʌ yicʼot mach bʌ ñumeñic ti pʼis. Cheʼ  bajcheʼ jiñi, Adán yicʼot Eva tsiʼ pʌsʌyob chaʼan maʼañic miʼ qʼuelob ti ñuc jiñi i Tat am bʌ ti panchan. ¡Wen yujilobʌch chuqui tsiʼ meleyob!

12. ¿Chucoch tsaʼ michʼa Jehová tiʼ tojlel Adán yicʼot Eva?

¹² Tiʼ sujm, Jehová tsaʼ wen michʼa tiʼ tojlel Adán yicʼot Eva. Jehová jiñʌch i Tat, pero tsiʼ pʌsʌyob chaʼan maʼañic miʼ qʼuelob ti ñuc. Ñaʼtancu chaʼan maʼ chaʼlen wersa a cosan juntiquil a walobil o a wixicʼal. Pero miʼ chanʼesañob i bʌ ti a tojlel yicʼot miʼ melob chuqui jach yomob. ¿Mach ba wen cʼuxic mi caj a wubin?

13. ¿Chuqui tsiʼ yʌcʼʌ ti ñaʼtʌntel Jehová cheʼ tsiʼ yʌlʌ chaʼan Adán mi caj i chaʼ sujtel ti tsʼubejn?

¹³ Cheʼ bʌ Adán yicʼot Eva tsiʼ ñusʌbeyob i tʼan Jehová, maʼañix tsaʼ mejliyob ti chumtʌl tiʼ pejtelel ora. Jehová tiʼ sube Adán: «Tsʼubeñet. Mi caj a chaʼ sujtel ti tsʼubejn» (pejcan Génesis 3:19). Jehová tsiʼ yʌlʌ chaʼan mi caj i chaʼ sujtel ti tsʼubejn, lajal bajcheʼ maʼañic tsaʼ wis mejli. Cheʼ bʌ tsaʼ chʌmi, tsaʼ jili.

14. ¿Chucoch mi lac chʌmel?

¹⁴ Adán yicʼot Eva bej cuxulobto cheʼ tsaʼic i jacʼbeyob i tʼan Dios. Pero cheʼ tsiʼ ñusʌbeyob i tʼan, tsiʼ chaʼleyob mulil yicʼot tsaʼ chʌmiyob. Jiñi mulil lajal bajcheʼ jumpʼejl tsʌts bʌ cʼamʌjel tsaʼ bʌ i ñusʌbeyonla jiñi ñaxam bʌ lac tatob. Jin chaʼan, ti lac pejtelel mi lac chʌmel come xmuliloñixla mi la quilan pañimil (chʼocʼan) (Romanos 5:12). Pero  Jehová mach yomic tsiʼ yʌlʌ chaʼan jiñi wiñicob xʼixicob (quixtañujob) miʼ chʌmelob. Jin chaʼan, jiñi Biblia miʼ yʌl chaʼan jiñi chʌmel juntiquilʌch laj «contra» (1 Corintios 15:26).

15. ¿Baqui bʌ lot tac mi laj cʌy lac ñop cheʼ mi laj cʌn i sujmlel chaʼan jiñi chʌmel?

¹⁵ Cabʌl ñopbalʌl miʼ pʌs chaʼan jiñi muʼ bʌ i chʌmelob bej cuxulobto i miʼ mejlel laj coltañob. Cheʼ bʌ an majqui miʼ chʌmel, jiñi i piʼʌlob miʼ yʌqʼueñob taqʼuin jiñi ñucoʼ bʌ i yeʼtel ti ñopbalʌl tac chaʼan miʼ melbeñob oración chaʼan poj chʼujul miʼ qʼuejlel jiñi tsaʼ bʌ chʌmi. Pero jiñi Biblia miʼ cʌntesañonla chaʼan jiñi chʌmeñobix bʌ maʼañix miʼ yubiñob wocol, mi muqʼuic i yubiñob i chʼijiyemlel. Maʼañix miʼ mejlel lac pejcañob yicʼot laj coltañob. Cheʼ jaʼel, maʼañic miʼ mejlel i pejcañoñobla, i coltañoñobla o i ticʼlañoñobla. Jin chaʼan, mach yomic mi lac bʌcʼñañob. Cheʼ mi laj cʌn i sujmlel chaʼan jiñi chʌmeñoʼ bʌ miʼ locʼsañonla ti lotintel tac.

16. ¿Baqui bʌ lot tiʼ tojlel jiñi chʌmeñoʼ bʌ miʼ pʌs cabʌl ñopbalʌl?

¹⁶ Satanás miʼ cʼʌn jiñi mach bʌ i sujmic ñopbalʌl chaʼan miʼ lotiñonla yicʼot miʼ yʌqʼueñonla lac ñaʼtan chaʼan jiñi chʌmeñoʼ bʌ bej cuxulobto. Jumpʼejl ejemplo, an ñopbalʌl tac muʼ bʌ i pʌsob chaʼan cheʼ mi lac chʌmel anto chuqui cuxul miʼ cʌytʌl lac chaʼan i yambʌlix baqui miʼ majlel ti chumtʌl. ¿Jimba miʼ pʌs a ñopbal iliyi o jin muʼ bʌ i yʌl jiñi Biblia? Satanás miʼ cʼʌn ili lot yicʼot yan tac bʌ chaʼan miʼ ñajtʼesan ti Dios jiñi quixtañujob.

17. ¿Chucoch miʼ pʼaj Jehová jiñi cʌntesa chaʼan mi caj i pulelob ti cʼajc jiñi jontoloʼ bʌ?

¹⁷ Jiñi i cʌntesa tac cabʌl ñopbalʌl chaʼan jiñi chʌmeñoʼ bʌ miʼ pʼaj Jehová. Jumpʼejl ejemplo, an  muʼ bʌ i yʌlob chaʼan jiñi jontoloʼ bʌ mi caj i pulelob ti cʼajc tiʼ pejtelel ora. Pero ili mach i sujmic. Jehová maʼañic baʼ ora miʼ ticʼlan quixtañujob bajcheʼ jiñi (pejcan 1 Juan 4:8). ¿Chuqui mi caj a ñaʼtan tiʼ tojlel juntiquil tatʌl muʼ bʌ i pulben i cʼʌb i yalobil chaʼan miʼ yʌqʼuen i toj i mul? Tajol mi caj a ñaʼtan chaʼan wen jontol yicʼot maʼañic mi caj a mulan sujtel tiʼ yamigo. Jiñʌch yom bʌ Satanás chaʼan mi lac ñaʼtan tiʼ tojlel Jehová.

18. ¿Chucoch mach yomic mi lac bʌcʼñan jiñi chʌmeñoʼ bʌ?

¹⁸ An ñopbalʌl tac muʼ bʌ i pʌsob chaʼan mi lac sujtel ti espíritu cheʼ mi lac chʌmel. Cheʼ jaʼel, miʼ yʌlob chaʼan yom mi laj qʼuelob ti ñuc yicʼot mi lac bʌcʼñañob come miʼ mejlelob ti sujtel ti wen pʼʌtʌloʼ bʌ la camigo o ti bʌbʌqʼuen bʌ laj contrajob. Cabʌl muʼ bʌ i bʌcʼñañob jiñi chʌmeñoʼ bʌ come miʼ ñopob ili lotintel. Jin chaʼan, cabʌl muʼ bʌ i chʼujutesañob jiñi chʌmeñoʼ bʌ i mach jiñic Jehová. Pero yom cʼajal a chaʼan chaʼan maʼañix chuqui miʼ yubiñob mi añic chuqui miʼ mejlelob i mel. Jin chaʼan, mach yomic mi lac bʌcʼñan. Jiñi tsaʼ bʌ i Meleyonla jiñʌch Jehová, i jiñʌch jiñi i sujm bʌ Dios. Cojach yom bʌ mi lac chʼujutesan (Apocalipsis 4:11).

19. ¿Bajcheʼ miʼ coltañonla cheʼ mi laj cʌn i sujmlel chaʼan jiñi chʌmeñoʼ bʌ?

¹⁹ Cheʼ mi laj cʌn i sujmlel chaʼan jiñi chʌmeñoʼ bʌ miʼ locʼsañonla tiʼ lot jiñi ñopbalʌl tac. Cheʼ jaʼel, miʼ coltañonla lac ñumen chʼʌmben i sujm chuqui tac albil i chaʼan Jehová chaʼan jiñi talto bʌ qʼuin.

20. ¿Chuqui ti cʼajtiya mi caj i jajqʼuel yaʼ ti yambʌ cʌntesʌntel?

²⁰ Ti wajali, juntiquil i wiñic Dios i cʼabaʼ Job tsiʼ cʼajti: «Cheʼ mic chʌmel [...], ¿muʼ ba caj c chaʼ cuxtiyel?» (Job 14:14). Yaʼ ti yambʌ cʌntesʌntel mi caj laj qʼuel i jacʼbal muʼ bʌ i yʌcʼ jiñi Biblia chaʼan ili cʼajtiya.