1, 2. ¿Chuqui yom i ñaʼtan cabʌl quixtañujob?

TI JUJUMPʼEJL qʼuin mi la cubin ti alol jiñi wocol tac woli bʌ ti ujtel. Jumpʼejl yujquel lum miʼ tsʌnsan cabʌl wiñicob xʼixicob (quixtañujob). Juntiquil wiñic miʼ tsʌnsan yambʌ mach bʌ añic i mul. Juntiquil ñaʼʌl miʼ chʌmel (sajtel) tiʼ caj cáncer i miʼ cʌy joʼtiquil i yalobilob.

² Cheʼ bʌ miʼ yujtel wocol tac bajcheʼ iliyi, cabʌlob miʼ cʼajtibeñob i bʌ chucoch an cabʌl tsʼaʼlentel yicʼot wocol ila ti pañimil (mulawil). ¿Am baʼ melbe a bʌ ili cʼajtiya?

3, 4. a) ¿Baqui bʌ cʼajtiya tsaʼ melbenti Jehová ti Habacuc? b) ¿Baqui bʌ i jacʼbal tsiʼ yʌqʼue Jehová?

³ Jiñi Biblia miʼ taj ti tʼan chaʼtiquil uxtiquil i wiñicob Dios tsaʼ bʌ i melbeyob i bʌ ili cʼajtiya. Jumpʼejl ejemplo, jiñi xʼaltʼan Habacuc tsiʼ cʼajtibe Jehová: «¿Chucoch maʼ wʌqʼueñon j qʼuel ili jontolil, yicʼot i maña winicob? Jini jach mulil wolij qʼuel ti pejtelel ora. Miʼ ticʼlañob i bʌ winicob. Baqui jach mic majlel an aʼleya yicʼot leto» (Habacuc 1:3).

⁴ Jiñi Biblia miʼ yʌl chaʼan Jehová tiʼ sube Habacuc chaʼan mucʼʌch caj i tojʼesan jiñi wocol tac (Habacuc 2:2, 3). Jehová miʼ wen cʼuxbin quixtañujob. Jiñi Biblia miʼ yʌl tiʼ tojlel: «Woliʼ cʌntañetla» (1 Pedro 5:7). Cheʼ bʌ Dios miʼ qʼuel jiñi wocol tac ñumen cʼux miʼ yubin bajcheʼ joñonla (Isaías 55:8, 9). Cheʼ jiñi, ¿chucoch an cabʌl wocol tac ila ti pañimil? Laʼ laj qʼuel.

5. a) ¿Chuqui miʼ yʌl cabʌl xcʌntesajob ti ñopbalʌl chaʼan jiñi wocol tac? b) ¿I chuqui miʼ yʌl jiñi Biblia?

⁵ Cheʼ bʌ miʼ yujtel jumpʼejl wocol o an chuqui miʼ  chaʼlen juntiquil quixtañu, an muʼ bʌ i yʌlob chaʼan cheʼix wʌn ñaʼtʌbil. I cheʼ bʌ an majqui miʼ ñusan wocol jiñi xmotomajob, pastorob yicʼot xcʌntesajob ti ñopbalʌl miʼ yʌlob chaʼan cheʼʌch yom Dios. Tajol miʼ yʌlob jeʼel chaʼan Dios miʼ yʌl chuqui miʼ yujtel ti lac tojlel, bajcheʼ jiñi wocol tac. Miʼ yʌlob jaʼel chaʼan maʼañic ba ora mi caj lac ñaʼtan chucoch mi lac ñusan wocol. Yambʌ miʼ yʌlob chaʼan cheʼ bʌ mi lac chʌmel chaʼañʌch mi lac majlel ti panchan. Cheʼʌch miʼ yʌlob jaʼel cheʼ bʌ miʼ chʌmel juntiquil alʌl. Pero jiñi mach i sujmic. Jehová maʼañic miʼ choc tilel mach bʌ weñic. Jiñi Biblia miʼ yʌl: «Tiʼ pejtelel ora maʼanic miʼ wis chaʼlen mulil Dios. Jini Pʼʌtʌl bʌ Mach bʌ Anic i Pʼisol i Pʼʌtʌlel mach yujilic jontolil» (Job 34:10).

6. ¿Chucoch cabʌl quixtañujob miʼ yʌqʼueñob tiʼ mul Dios jiñi wocol tac?

⁶ Cabʌl quixtañujob miʼ yʌqʼueñob tiʼ mul Dios jiñi wocol tac come miʼ ñopob chaʼan jiñʌch woli (choncol) i yuman ili pañimil. Pero yaʼ ti cʌntesʌntel 3 tsaʼ laj cʌñʌ chaʼan Satanás jiñʌch woli (yʌquel) bʌ i yuman.

7, 8. ¿Chucoch an cabʌl wocol ti pañimil?

⁷ Jiñi Biblia miʼ yʌl chaʼan «pejtelel i chaʼañoʼ bʌ pañimil añob tiʼ cʼʌb jini xjontolil» (1 Juan 5:19). Satanás jiñʌch woliʼ yuman ili pañimil, juntiquil wen jontol bʌ yicʼot yujil bʌ ticʼlaya. Woliʼ lotin «pejtel winicob ti pañimil» (Apocalipsis [Revelación] 12:9). Cabʌl quixtañujob woliʼ lajibeñob i melbal. Ili jiñʌch ñaxam bʌ junchajp chucoch an cabʌl lotintel, tsʼaʼlentel yicʼot tʌcʼlʌntel.

⁸ Laʼ laj qʼuel jiñi i chaʼchajplel. Cheʼ bʌ tsaʼ sujtiyob tiʼ contra Dios, Adán yicʼot Eva tsiʼ ñusʌbeyob mulil jiñi i yalobilob. Jiñi quixtañujob xmulilob jin chaʼan miʼ yʌcʼob ti wocol yambʌlob. An qʼuiñil ñumen ñuc yom i yubiñob i bʌ tiʼ tojlel yambʌlob. Jin chaʼan, miʼ contrajiñob i bʌ, miʼ majlelob ti guerra yicʼot miʼ tʌcʼlan yambʌlob  (Eclesiastés 4:1; 8:9). I yuxchajplel jiñʌch cheʼ «maʼanic majqui yujil baqui ora mi caj i chujquel ti wocol» (Eclesiastés 9:11, 12). An qʼuiñil mi lac tajtʌl ti wocol o an chuqui miʼ yujtel ti lac tojlel tiʼ caj mach ñaʼtʌbilic lac chaʼan chuqui mi caj i yujtel ti jiñi bʌ ora o mach weñic baqui añonla.

9. ¿Yom ba Dios chaʼan mi lac ñusan wocol?

⁹ Jehová maʼañic miʼ yʌqʼueñonla wocol. Mach i mulic cheʼ an guerra, tsʌnsa, jontolil yicʼot toʼol tʌcʼlʌntel. Mach i mulic jaʼel cheʼ an yujquel lum, icʼ jaʼal, butʼjaʼ yicʼot yan tac bʌ. Dios mucʼʌch i wen cʼuxbiñonla. Maʼañic miʼ mulan cheʼ mi lac ñusan wocol, pero woliyixto lac ñusan. Muʼto caj laj cʌn yaʼ ti yan tac bʌ párrafo chucoch miʼ yʌcʼ ti ujtel jiñi wocol (1 Juan 4:8).

10. ¿Chuqui tsiʼ yʌlʌ Satanás tiʼ tojlel Jehová?

¹⁰ Yaʼ ti pʌcʼʌbʌl Edén jiñi Diablo tsaʼ mejli i mel (chaʼlen) chaʼan Adán yicʼot Eva miʼ ñusʌbeñob i tʼan Dios. Tsiʼ yʌlʌ chaʼan Jehová juntiquil jontol bʌ yumʌl. Tsiʼ yʌlʌ chaʼan an chuqui wem bʌ mach bʌ yomic i yʌqʼueñob. Yom bʌ Satanás chaʼan miʼ ñopob jiñʌch chaʼan jin ñumen wem bʌ yumʌl yicʼot mach cʼʌñʌlic miʼ coltʌntelob ti Dios (Génesis 3:2-5; qʼuele jiñi nota 26).

11. ¿Baqui bʌ cʼajtiya yom mi la cʌqʼuen i jacʼbal?

¹¹ Adán yicʼot Eva tsiʼ ñusʌbeyob i tʼan Jehová i tsaʼ sujtiyob tiʼ contra. Tsiʼ ñaʼta añob tiʼ wenta i yajcan chuqui wen yicʼot mach bʌ weñic. ¿Chuqui tsaʼ mejli i mel Jehová chaʼan miʼ pʌs chaʼan mach weñic tsaʼ bʌ i meleyob yicʼot jin jach an tiʼ wenta chuqui wem bʌ tiʼ tojlelob?

12, 13. a) ¿Chucoch Jehová mach ti orajic tsiʼ jisa Adán yicʼot Eva? b) ¿Chucoch woliʼ yʌcʼ chaʼan Satanás miʼ yuman ili pañimil yicʼot chaʼan miʼ bajñel yumañob i bʌ jiñi quixtañujob?

¹² Jehová yom chaʼan ili Pañimil miʼ sujtel ti jumpʼejl  paraíso yicʼot miʼ bujtʼel tiʼ yalobilob Adán yicʼot Eva. Jehová mi caj i tsʼʌctesan jiñi ñaʼtʌbil bʌ i chaʼan anquese Satanás miʼ jopʼ i mʌctan (Génesis 1:28; Isaías 55:10, 11). Jin chaʼan, Jehová mach ti orajic tsiʼ jisa Adán yicʼot Eva, tsaʼto i yʌcʼʌ chaʼan miʼ pʼolob i bʌ. Cheʼ jiñi, jiñi i yalobilob miʼ mejlel i yajcañob majqui mi caj i yumañob.

¹³ Satanás tsiʼ yʌlʌ chaʼan Dios mach weñic bʌ yumʌl ti wut cabʌl ángelob (Job 38:7; Apocalipsis 5:11). Jin chaʼan, Jehová woliʼ yʌqʼuen i yorajlel chaʼan miʼ pʌs miʼ sujmʌch tsaʼ bʌ i yʌlʌ. Cheʼ jaʼel, woliʼ yʌcʼ chaʼan jiñi quixtañujob miʼ bajñel yumañob i bʌ ila ti pañimil am bʌ tiʼ cʼʌb Satanás. Cheʼ bajcheʼ iliyi, miʼ mejlel i pʌsob mi mach cʼʌñʌlic i coltaya Dios chaʼan miʼ yumañob i bʌ.

14. Cheʼ ñumeñix tilel cabʌl jab, ¿chuqui miʼ cʼotel laj cʌn?

¹⁴ Cabʌlix jab i cajel i bajñel yumañob i bʌ jiñi quixtañujob, pero maʼañic miʼ mejlelob. Ili miʼ pʌs chaʼan Satanás juntiquilʌch xlot yicʼot chaʼan jiñi quixtañujob cʼʌñʌlʌch miʼ coltʌntelob ti Dios. I sujmʌch tsaʼ bʌ i yʌlʌ jiñi xʼaltʼan Jeremías: «C Yum, cujil maʼanic i ñaʼtʌbal winic chaʼan miʼ bajñel tojʼesan majlel i bʌ. Mach mejlic i bajñel yajcan i bijlel» (Jeremías 10:23).

15, 16. a) ¿Chucoch Jehová woliʼ bej acʼ ti ujtel jiñi wocol tac? b) ¿Chucoch maʼañic miʼ tojʼesan jiñi wocol tac muʼ bʌ i mel Satanás?

¹⁵ ¿Chucoch Jehová woliʼ bej acʼ ti ujtel wocol tac? ¿Chucoch maʼañic miʼ mʌctan? Cʼʌñʌlʌch chaʼan Satanás miʼ yʌqʼuentel i yorajlel chaʼan miʼ pʌs chaʼan jiñi i yumʌntel maʼañic i cʼʌjñibal. Jiñi quixtañujob cabʌl bajcheʼ an i ñopoyob i mel i yumʌntel, pero mach weñic miʼ melob. Anquese jiñi ciencia yicʼot tecnología cabʌlix  chuqui an i meleyob, ili ora ñumen an toʼol tʌcʼlʌntel, pʼumpʼuñiyel, tsʌnsʌntel yicʼot guerra. Mi maʼañic mi laj coltʌntel ti Dios mach mejlic lac bajñel yuman lac bʌ.

¹⁶ Cheʼ jaʼel, Jehová maʼañic woliʼ tojʼesan jiñi wocol tac muʼ bʌ i mel Satanás. Cheʼ muqʼuic i mel, woliyʌch i coltʌben i yumʌntel Satanás, i Dios maʼañic ba ora miʼ mel jiñi. Cheʼ jaʼel, jiñi quixtañujob mi caj i ñaʼtañob chaʼan mucʼʌch i mejlel i yumañob i bʌ. Pero Dios maʼañic miʼ coltan jiñi come lot jach, i maʼañic miʼ chaʼlen lot (Hebreos 6:18).

17, 18. ¿Chuqui mi caj i mel Jehová chaʼan miʼ tojʼesan jiñi wocol tac tsaʼ bʌ i mele Satanás?

¹⁷ ¿Muʼ ba i mejlel Jehová i laj tojʼesan jiñi wocol tac tsaʼ bʌ i yʌcʼʌ ti ujtel Satanás yicʼot jiñi quixtañujob tiʼ caj i ñusatʼañob? Mucʼʌch. Maʼañic chuqui mach bʌ mejlic i mel Jehová, yujilʌch baqui ora luʼ jacʼbilix jiñi lot tac tsaʼ bʌ i yʌlʌ Satanás. Cheʼ jiñi mi caj i sujtesan ili Pañimil ti jumpʼejl paraíso bajcheʼ tsiʼ mulaj ti ñaxan. Tiʼ pejtelel «jini añoʼ bʌ ti mucoñibʌl» mi caj i chʼojyelob (Juan 5:28, 29). Jiñi quixtañujob maʼañix mi caj i cʼamʼañob yicʼot maʼañix mi caj i chʌmelob. Jehová mi caj i cʼʌn Jesús «chaʼan miʼ jisʌben i yeʼtel xiba» (1 Juan 3:8). Cheʼ bʌ wolito lac pijtan, mi la cʌqʼuen wocolix i yʌlʌ Jehová chaʼan woliyixto i chʌn pijtañonla. Cheʼ bajcheʼ ili muʼto i mejlel laj cʌn yicʼot lac ñaʼtan mi jiñʌch la com miʼ yumañonla (pejcan 2 Pedro 3:9, 10). Anquese mi lac ñusan wocol, Jehová miʼ coltañonla lac lʌtʼ (pejcan Isaías 40:29).

¹⁸ Jehová maʼañic miʼ xicʼonla chaʼan jin miʼ yumañonla. Tsiʼ yʌqʼueyonla wem bʌ lac majtan: Jiñʌch cheʼ mi lac bajñel ñaʼtan chuqui la com lac mel. Laʼ laj qʼuel bajcheʼ miʼ cʼʌjñibʌyel lac chaʼan ili majtañʌl.

19. a) ¿Baqui bʌ jiñi lac majtan wen utsʼat bʌ tsiʼ yʌqʼueyonla Jehová? b) ¿Chucoch yom mi la cʌqʼuen wocolix i yʌlʌ chaʼan ili majtañʌl?

¹⁹ Jehová tsiʼ yʌqʼueyonla lac bajñel ñaʼtan chuqui la com lac mel. Wocolix i yʌlʌ chaʼan ili lac majtan miʼ mejlel lac yajcan chuqui mi lac mel ti laj cuxtʌlel yicʼot lac yajcan lac melben i yeʼtel o maʼañic. Mach cheʼic melbilonla (pʌtbilonla) bajcheʼ añimal tac, come maʼañic miʼ ñaʼtañob chuqui miʼ melob. Cheʼ jaʼel, mach lajaloñicla bajcheʼ robot mucʼ jach bʌ i melob chuqui miʼ subentel. Miʼ mejlel lac yajcan bajcheʼ yilal bʌ quixtañu la com sujtel, majqui mi caj lac yajcan ti la camigojob yicʼot chuqui mi caj lac mel ti laj cuxtʌlel. Jehová yom chaʼan tijicñayonla.

20, 21. ¿Chuqui jiñi ñumen wem bʌ miʼ mejlel a yajcan a mel ili ora?

²⁰ Jehová yom chaʼan mi laj cʼuxbin (Mateo 22:37, 38). Cheʼ bajcheʼ juntiquil tatʌl tijicña miʼ yubin cheʼ jiñi i yalobil miʼ suben chaʼan miʼ cʼuxbin come loqʼuem tiʼ pusicʼal i mach chaʼan wersa xicʼbil. Jehová tsiʼ yʌqʼueyonla lac yajcan mi mucʼʌch caj lac melben i yeʼtel o maʼañic. Satanás, Adán yicʼot Eva tsiʼ yajca i ñusʌbeñob i tʼan Jehová. Ixcu jatet, ¿bajcheʼ mi caj a cʼʌn jiñi a majtan chaʼan maʼ bajñel yajcan a wom bʌ a mel?

²¹ Ñumen wem bʌ miʼ mejlel a yajcan jiñʌch i melol i yeʼtel Jehová. An millón quixtañujob tsaʼix bʌ i yajcayob i melbeñob i yeʼtel Jehová i mach jiñic i chaʼan Satanás (Proverbios 27:11). Cheʼ bajcheʼ tsaʼix laj qʼuele, Dios mi caj i jisan jiñi wocol tac yicʼot mi caj i sujtesan ili Pañimil ti jumpʼejl paraíso. ¿Chuqui yom maʼ mel chaʼan maʼ wajñel yaʼi? Yaʼ ti yambʌ cʌntesʌntel mi caj lac tajben i jacʼbal.