1, 2. ¿Majqui tsaʼ sujtiyob tiʼ yamigo Jehová?

¿MAJQUI maʼ yajcan jatet bajcheʼ a wamigo? Juntiquil quixtañu wem bʌ maʼ qʼuel a bʌ a wicʼot, juntiquil uts bʌ o an tac bʌ wem bʌ i melbal (chaʼleya).

² Jehová an i yajca chaʼtiquil uxtiquil quixtañu bajcheʼ i yamigo. Jumpʼejl ejemplo, Abrahán tsaʼ sujti tiʼ yamigo Jehová (Isaías 41:8; Santiago 2:23). Jiñi rey David tsaʼ sujti tiʼ yamigo Dios jaʼel. Jehová wen utsʼatax tsiʼ qʼuele (Hechos 13:22). Jiñi xʼaltʼan Daniel tsaʼ cʼuxbinti ti Jehová jaʼel, yom i yʌl chaʼan tsaʼ qʼuejli ti ñuc (Daniel 9:23).

3. ¿Chucoch tsaʼ sujtiyob tiʼ yamigo Jehová Abrahán, David yicʼot Daniel?

³ ¿Chucoch tsaʼ sujti tiʼ yamigo Jehová Abrahán, David yicʼot Daniel? Jehová tiʼ sube Abrahán: «Tsaʼ jacʼbeyon c tʼan» (Génesis 22:18). Jehová i yamigo jiñi añoʼ bʌ i pecʼlel yicʼot muʼ bʌ i jacʼbeñob i tʼan. Muʼto i mejlel ti sujtel tiʼ yamigo jumpʼejl tejclum. Tiʼ sube jiñi i tejclum Israel: «Jacʼʌla c tʼan. Cheʼ jini laʼ Dioson, c winiquetla» (Jeremías 7:23). Mi a wom sujtel tiʼ yamigo Jehová jaʼel, yomʌch maʼ jacʼben i tʼan.

4, 5. ¿Bajcheʼ miʼ coltan Jehová jiñi i yamigojob?

⁴ Jiñi Biblia miʼ yʌl chaʼan Jehová miʼ sʌclan «jini xucʼuloʼ bʌ i pusicʼal muʼ bʌ i ñopob, chaʼan miʼ pʌsbeñob ñuc bʌ i coltaya» (2 Crónicas 16:9). Yaʼ ti Salmo 32:8,  Jehová miʼ suben i yamigojob chaʼan mi caj i yʌqʼueñob i ñaʼtʌbal yicʼot wem bʌ ticʼojel tac.

⁵ An juntiquil pʼʌtʌl bʌ laj contra mach bʌ yomic chaʼan mi lac sujtel tiʼ yamigo Dios. Pero Jehová yom i coltañonla (pejcan Salmo 55:22). Come i yamigojonla, tiʼ pejtelel lac pusicʼal mi lac melben i yeʼtel yicʼot xucʼulonla tiʼ tojlel anquese mi lac ñusan tsʌts tac bʌ wocol. Cheʼ jaʼel, añʌch lac ñopoñel bajcheʼ David, tsaʼ bʌ i tsʼijbu tiʼ tojlel Jehová: «An ti ñoj bʌ j cʼʌb. Maʼanic majqui mi mejlel i tʌtsʼon tiʼ bijlel» (Salmo 16:8; 63:8). ¿Bajcheʼ miʼ mʌctañonla Satanás chaʼan maʼañic mi lac sujtel tiʼ yamigo Jehová?

6. ¿Chuqui miʼ yʌl Satanás tiʼ tojlel quixtañujob?

⁶ Yaʼ ti cʌntesʌntel 11 tsaʼ laj cʌñʌ chaʼan Satanás tsiʼ contraji Jehová i tsiʼ yʌlʌ chaʼan juntiquil xlot. Cheʼ jaʼel, tsiʼ yʌlʌ chaʼan mach tojic come maʼañic miʼ yʌcʼ chaʼan Adán yicʼot Eva miʼ yajcañob chuqui wen yicʼot mach bʌ weñic. Jiñi libro i chaʼan Job miʼ pʌsbeñonla chaʼan Satanás miʼ jopʼben i mul jiñi yomoʼ bʌ sujtel tiʼ yamigo Dios. Miʼ yʌl chaʼan jiñi wiñicob xʼixicob (quixtañujob) miʼ melbeñob i yeʼtel (troñel) Dios tiʼ caj chuqui miʼ yʌqʼueñob i mach chaʼañic miʼ cʼuxbiñob. Cheʼ jaʼel, miʼ yʌl chaʼan miʼ mejlel i mel chaʼan majqui jach miʼ ñusʌben i tʼan Dios. Laʼ laj qʼuel chuqui miʼ mejlel laj cʌn tiʼ tojlel Job yicʼot bajcheʼ tsaʼ coltʌnti ti Jehová.

7, 8. a) ¿Chucoch yʌñʌl Job tiʼ tojlel jiñi yambʌ quixtañujob? b) ¿Chuqui tsiʼ yʌlʌ Satanás tiʼ tojlel Job?

⁷ ¿Majqui jiñi Job? Juntiquil wem bʌ wiñic lʌcʼʌ añix bʌ 3,600 jab tsaʼ chumle. Jehová tsiʼ yʌlʌ chaʼan ti jimbʌ ora maʼañic yambʌ bajcheʼ Job ila ti Pañimil.  Job tsiʼ qʼuele ti ñuc Jehová i tiʼ tsʼaʼle jontolil (Job 1:8). Jehová tsiʼ qʼuele Job bajcheʼ i sujm bʌ i yamigo.

⁸ Satanás tsiʼ yʌlʌ chaʼan Job woli (choncol) i melben i yeʼtel Dios chaʼan jach i wenlel. Tiʼ sube Jehová: «Wen qʼuelel a chaʼan jini Job yicʼot pejtel i piʼʌlob yicʼot pejtel i chubʌʼan. Maʼanic i ticʼlʌntel. Tijicña miʼ ñusan qʼuin. Maʼ coltan tiʼ yeʼtel. Maʼ pʼojlesʌben i yʌlacʼ tiʼ joytilel. Pero sʌtsʼʌx a cʼʌb a chilben i chubʌʼan. Cheʼ jini mux caj a qʼuel mi caj i pʼajet Job tiʼ tojel a wut» (Job 1:10, 11).

9. ¿Chuqui tsiʼ yʌqʼue i mel Satanás jiñi Jehová?

⁹ Satanás tsiʼ yʌlʌ chaʼan Job woli (yʌquel) i melben i yeʼtel Jehová tiʼ caj chuqui tac miʼ yʌqʼuentel. Tsiʼ yʌlʌ chaʼan miʼ mejlel i mel chaʼan Job miʼ cʌy i melben i yeʼtel Jehová. Anquese Jehová maʼan tsiʼ mulaj tsaʼ bʌ i yʌlʌ Satanás, tsiʼ yʌcʼʌ chaʼan miʼ yilʌbentel i pusicʼal Job. Cheʼ bajcheʼ jiñi mi caj i pʌstʌl mi Job woliyʌch i melben i yeʼtel Jehová yicʼot cʼuxbiya.

10. a) ¿Bajcheʼ tsiʼ ticʼla Job jiñi Satanás? b) ¿Chuqui tsiʼ mele Job?

¹⁰ Satanás tsiʼ ñaxan acʼʌ chaʼan miʼ lamital xujchʼibentel i wacax Job i jiñi i colobal tsaʼ chʌmi. Cheʼ jiñi tsiʼ yʌcʼʌ chaʼan miʼ tsʌnsʌntel lʌcʼʌl tiʼ pejtelel i wiñicob. Job tiʼ sʌtʌ pejtelel chuqui an i chaʼan. Ti wiʼil, Satanás tsiʼ mele chaʼan jiñi lujuntiquil i yalobilob miʼ chʌmelob (sajtelob) ti jumpʼejl icʼ jaʼal. Pero Job xucʼul tsaʼ ajñi ti Jehová. Jiñi Biblia miʼ yʌl chaʼan «maʼanic tsiʼ chaʼle mulil Job» mi tsaʼic i yʌqʼue i mulin Dios (Job 1:12-19, 22).

11. a) ¿Chuqui yambʌ tsiʼ melbe Satanás jiñi Job? b) ¿Chuqui tsiʼ mele Job?

¹¹ Satanás mach jasʌlic tsiʼ yubi jiñi. Tiʼ sube Dios:  «Sʌtsʼʌx a cʼʌb chaʼan maʼ wʌqʼuen i chʌmel. Yaʼto maʼ wilan, mi caj i pʼajet tiʼ tojel a wut». Cheʼ jiñi, Satanás tsiʼ yʌqʼue jumpʼejl tsʌts bʌ cʼamʌjel (Job 2:5, 7). Pero Job xucʼul tsaʼ chaʼ ajñi ti Jehová yicʼot «maʼanic tsiʼ chaʼle mulil» (Job 2:10).

12. ¿Bajcheʼ tsiʼ pʌsʌ Job chaʼan Satanás juntiquilʌch xlot?

¹² Job mach yujilic chuqui tsiʼ yʌlʌ Satanás yicʼot chucoch woliʼ wen ñusan wocol. Tsiʼ ñaʼta chaʼan Jehová woliʼ yilʌben i pusicʼal (Job 6:4; 16:11-14). Pero chʌn xucʼul tsaʼ ajñi ti Jehová. Tsaʼ tsictiyi chaʼan maʼañic woliʼ sʌclan i bajñel wenlel. I yamigojʌch Dios come miʼ cʼuxbin. Pejtelel tsaʼ bʌ i yʌlʌ Satanás mach i sujmic.

13. ¿Chuqui tsiʼ pʌsʌ Job chaʼan i xucʼtʌlel?

¹³ Anquese Job mach yujilic chuqui woliʼ yujtel ti panchan, xucʼul tsaʼ ajñi ti Dios i tsiʼ pʌsʌ chaʼan Satanás wen jontol. Jehová tsiʼ yʌqʼue i chobejtʌbal come juntiquilʌch xucʼul bʌ i yamigo (Job 42:12-17).

14, 15. ¿Chuqui tsiʼ yʌlʌ Satanás tiʼ tojlel pejtelel quixtañujob?

¹⁴ Ili ora, Satanás woliʼ jopʼben i mul pejtelel i wiñicob Dios. Miʼ yʌl chaʼan woli jach lac melben i yeʼtel Dios chaʼan lac wenlel. Satanás tsiʼ yʌlʌ: «Junlajal winicob, miʼ bajñel cʼuxbiñob i bʌ» (Job 2:4). Tsiʼ yʌlʌ chaʼan pejtelel quixtañujob i bajñel wenlel jach miʼ ñaʼtañob, mach cojicach Job. Cheʼ cabʌlix jab i chʌmel Job, Satanás wolito i pʼaj Jehová yicʼot i jopʼben i mul i wiñicob. Ili mi laj cʌn yaʼ ti Proverbios 27:11, yaʼi mi laj qʼuel chaʼan Jehová miʼ cʼajtin: «Yom pʼipʼ a pusicʼal calobil. Ñuqʼuesʌbeñon c pusicʼal. Cheʼ jini utsʼat mi caj i qʼuelon jini tsaʼ bʌ i pʼajayon».

¹⁵ Jatet miʼ mejlel a yajcan a melben i yeʼtel Jehová  i maʼ sujtel ti xucʼul bʌ i yamigo. Cheʼ bajcheʼ jiñi mi caj a pʌs chaʼan Satanás juntiquil xlot. Tajol cabʌl chuqui yom maʼ qʼuextan ti a cuxtʌlel chaʼan maʼ sujtel tiʼ yamigo Dios, pero jiñʌch ñumen wem bʌ miʼ mejlel a yajcan. Ili wen ñucʌch i cʼʌjñibal come Satanás miʼ yʌl chaʼan jatet mach xucʼulic mi caj a wajñel ti Jehová cheʼ bʌ an a wocol. Cabʌl chuqui miʼ mel chaʼan mi lac ñusʌben i tʼan Dios. ¿Chuqui?

16. ¿Chuqui tac miʼ cʼʌn Satanás chaʼan jiñi quixtañujob miʼ cʌy i melbeñob i yeʼtel Jehová?

¹⁶ Satanás cabʌl chuqui miʼ cʼʌn chaʼan mi laj cʌy sujtel tiʼ yamigo Dios. Miʼ contrajiñonla «bajcheʼ colem bajlum woli bʌ ti jujuj tʼan» (1 Pedro 5:8). Jin chaʼan, mach yomic toj sajtelet mi jiñi a wamigojob, a familia o yambʌ quixtañujob yomob chaʼan maʼ cʌy a pejcan jiñi Biblia yicʼot a mel chuqui wen. Cheʼ woli lac ñusan bajcheʼ jiñi tajol mi lac ñaʼtan chaʼan Satanás woliʼ ñijcʌbeñob i pusicʼal chaʼan miʼ sujtelob ti laj contra (Juan 15:19, 20). * Cheʼ jaʼel, Satanás «miʼ cuy i bʌ ti ángel muʼ bʌ i pʌs i cʼʌcʼal». Jin chaʼan, miʼ ñop i lotiñonla chaʼan mi lac ñusʌben i tʼan Jehová (2 Corintios 11:14).

17. ¿Chucoch mi lac jacʼben i tʼan Jehová?

¹⁷ Cheʼ mi lac jacʼben i tʼan Jehová mi lac pʌs chaʼan Satanás juntiquilʌch xlot. ¿Chuqui mi caj i coltañonla chaʼan mi lac jacʼben i tʼan? Jiñi Biblia miʼ yʌl: «Cʼuxbin  lac Dios tiʼ pejtelel laʼ pusicʼal, tiʼ pejtelel laʼ chʼujlel [cuxtʌlel, TNM], yicʼot tiʼ pejtelel laʼ pʼʌtʌlel» (Deuteronomio 6:5). Mi lac jacʼben i tʼan Jehová come mi laj cʼuxbin. Cheʼ miʼ colel majlel laj cʼuxbiya tiʼ tojlel, mi caj lac mulan lac mel pejtelel chuqui miʼ cʼajtibeñonla. Jiñi apóstol Juan tiʼ tsʼijbu: «Come i cʼuxbintel Dios jiñʌch i chʼujbibentel i mandar. Mach wocolic i mandar» (1 Juan 5:3).

18, 19. a) ¿Chuqui tac jiñi muʼ bʌ i yʌl Jehová chaʼan mach weñic? b) ¿Bajcheʼ la cujil chaʼan Jehová maʼañic mi cʼajtibeñonla mach bʌ mejlic lac mel?

¹⁸ Jehová miʼ yʌl chaʼan an chuqui tac mach bʌ weñic. Mi caj a taj chaʼpʼejl uxpʼejl ejemplo yaʼ ti recuadro « Tsʼaʼlen muʼ bʌ i tsʼaʼlen Jehová». Ti ñaxan, tajol mi caj a ñaʼtan chaʼan mach cʌlʌx lecojic. Pero cheʼ bʌ maʼ pejcan yicʼot maʼ wen ñaʼtan jiñi texto tac, mi caj a cʌn chucoch ñuc i cʼʌjñibal mi lac jacʼben i mandar Dios. Cheʼ  jaʼel, tajol mi caj a qʼuel chaʼan an chuqui tac yom maʼ qʼuextan ti a cuxtʌlel. An qʼuiñil wocolʌch, pero mi mucʼʌch a mel mi caj a taj a ñʌchʼtʌlel yicʼot a tijicñʌyel bajcheʼ jiñi xucʼul bʌ i yamigojob Jehová (Isaías 48:17, 18). ¿Bajcheʼ la cujil chaʼan mucʼʌch i mejlel laj qʼuextan lac bʌ?

¹⁹ Jehová maʼañic miʼ cʼajtibeñonla mach bʌ mejlic lac mel (Deuteronomio 30:11-14). Jiñʌch i sujm bʌ la camigo yicʼot i ñumen i cʌñʌyonla bajcheʼ joñonla. Yujil baqui tac bʌ wem bʌ lac melbal yicʼot laj cʼunlel (Salmo 103:14). Jiñi apóstol Pablo tsiʼ yʌlʌ ili utsʼatax bʌ tʼan tac: «Xucʼul i pusicʼal Dios. Maʼanic miʼ yʌqʼueñetla laʼ taj laʼ pʌyol ti mulil mach bʌ mejlic laʼ cuch. Cheʼ mi laʼ pʌjyel ti mulil, Dios miʼ yʌqʼueñetla laʼ pʼʌtʌlel chaʼan mi laʼ cuch. Cheʼ jini mi mejlel laʼ loqʼuel baʼ pʌybilet ti mulil» (1 Corintios 10:13). Miʼ mejlel lac ñop chaʼan Jehová mi caj i yʌqʼueñonla lac pʼʌtʌlel chaʼan mi lac mel chuqui  wen. I mi caj i yʌqʼueñet ‹jini ñuc bʌ a pʼʌtʌlel› chaʼan maʼ lʌtʼ jiñi wocol tac (2 Corintios 4:7).

20. ¿Baqui tac bʌ i melbal Dios yom mi lac lajiben i chucoch?

²⁰ Mi la com sujtel tiʼ yamigo Jehová, mach cojach yom mi laj cʌy lac mel chuqui tac mach weñic. An yambʌ yom bʌ mi lac mel (Romanos 12:9). Jiñi i yamigojob Dios miʼ cʼuxbiñob chuqui miʼ cʼuxbin. Miʼ lajibeñob i melbal i miʼ pʌsob «cʼuxbiya, tijicñʌyel, ñʌchʼtʌlel, pijt, wenlel, i yutslel lac pusicʼal, ñopoñel, utslel, i ticʼol lac bʌ» (Gálatas 5:22, 23, TNM). Chaʼan maʼ ñaʼtan bajcheʼ yilal jiñi i yamigojob Dios, pejcan Salmo 15:1-5.

21. ¿Chuqui mi caj i coltañet a pʌs jiñi melbalʌl tac muʼ bʌ i cʼuxbin Dios?

²¹ ¿Chuqui mi caj i coltañet a pʌs jiñi utsʼatax bʌ melbal tac? Jiñʌch cheʼ maʼ cʌn chuqui tac miʼ cʼuxbin Jehová. Jin chaʼan, ñʌntesan a bʌ a pejcan yicʼot a chajpan jiñi Biblia (Isaías 30:20, 21). Cheʼ jiñi, mi caj i colel majlel jiñi a cʼuxbiya ti Jehová i mi caj a mulan a jacʼben i tʼan.

22. ¿Chuqui mi caj lac pʌs mi mucʼʌch lac jacʼben i tʼan Jehová?

²² Cheʼ mi laj qʼuextan laj cuxtʌlel miʼ lajintel cheʼ bajcheʼ mi lac joch jiñi ñoxix bʌ lac pislel i mi lac lʌp tsijiʼ bʌ. Jiñi Biblia miʼ yʌl chaʼan yom mi lac joch ‹jini tsucul bʌ lac pusicʼal› i mi lac lʌp ‹tsijiʼ bʌ lac pusicʼal› (Colosenses 3:9, 10). Anquese mach cʼuñic, Jehová miʼ subeñonla chaʼan mi caj i yʌqʼueñonla lac chobejtʌbal mi mucʼʌch laj qʼuextan lac bʌ yicʼot mi lac jacʼben i tʼan (Salmo 19:11). Jacʼben i tʼan Jehová chaʼan a cʼuxbiya i mach chaʼañic chuqui mi caj a taj. Cheʼ bajcheʼ jiñi mi caj a pʌs chaʼan Satanás juntiquilʌch xlot i mi caj a sujtel tiʼ sujm bʌ i yamigo Jehová.