1, 2. ¿Chuqui tac ti cʼajtiya tajol mi lac melben lac bʌ?

JIÑI xbiʼtalob cabʌl cʼajtiya miʼ melob. Cheʼ bʌ an chuqui mi lac tsictesʌbeñob, miʼ cʼajtiñob: «¿Chucoch?». Anquese mi lac subeñob, miʼ bej cʼajtiñob: «¿I chucoch?».

² Ti lac pejtelel mi lac melben lac bʌ cʼajtiya tac, anquese xcolelontola o añix lac jabilel. Tajol mi laj cʼajtiben lac bʌ: «¿Chuqui mi caj j cʼux wʌle? ¿Baqui bʌ c pislel mi caj c xoj? O ¿chuqui mi caj c mʌn?». O tajol mi lac melben lac bʌ cʼajtiya tac chaʼan bʌ laj cuxtʌlel o jiñi talto bʌ qʼuin. Pero cheʼ maʼañic mi lac taj wem bʌ i jacʼbal tajol mi laj cʌy lac sʌclan.

3. ¿Chucoch cabʌl maʼañic bʌ miʼ sʌclʌbeñob i jacʼbal jiñi cʼajtiya tac am bʌ i chaʼañob?

³ Cabʌl wiñicob xʼixicob (quixtañujob) añob i chaʼan ñuc tac bʌ cʼajtiya. Pero maʼañic miʼ sʌclʌbeñob i jacʼbal. ¿Chucoch? An muʼ bʌ i ñopob chaʼan mucʼʌch lac tajben i jacʼbal yaʼ ti Biblia, pero miʼ ñaʼtañob chaʼan wen wocol ti chʼʌmbentel i sujm. Tajol miʼ ñaʼtañob chaʼan cojach yujil jiñi maestrojob yicʼot motomajob o pastorob. An muʼ bʌ i quisñiñob chaʼan mach yujilobic i jacʼbal, jin chaʼan maʼañic miʼ ñop i sʌclʌbeñob i sujmlel.

4, 5. a) ¿Chuqui ti cʼajtiya tac an a chaʼan? b) ¿Chucoch yom maʼ chʌn sʌclʌben i jacʼbal?

⁴ Tajol maʼ melben a bʌ ili cʼajtiya tac: «¿Chucoch wʌʼañonla ti pañimil (mulawil)? ¿Baqui mi lac majlel cheʼ mi lac chʌmel (sajtel)? ¿Bajcheʼ yilal Dios?». Jesucristo, juntiquil ñuc bʌ xcʌntesa, tsiʼ yʌlʌ: «Cʼajtinla. Mi caj laʼ wʌqʼuentel. Sajcanla. Mi caj laʼ taj. Pejcanla i yum otot. Mi caj laʼ jambentel» (Mateo 7:7). Jin chaʼan, mach yomic maʼ lujbʼan. Chʌn sʌclan jinto maʼ tajben wem bʌ i jacʼbal.

 ⁵ Cheʼ maʼ chʌn sʌclʌben i jacʼbal jiñi cʼajtiya tac, mucʼʌch caj a taj yaʼ ti Biblia (Proverbios 2:1-5). Mi caj a qʼuel chaʼan mach wocolic ti chʼʌmbentel i sujm. Cheʼ jaʼel, mi caj i coltañet chaʼan ñumen tijicña maʼ wajñel. Mi caj i yʌqʼueñet utsʼatax bʌ a pijtaya chaʼan ti talto bʌ qʼuin. Laʼ lac tsajin jumpʼejl cʼajtiya muʼ bʌ i wen melbeñob i bʌ jiñi quixtañujob.

6. ¿Chucoch cabʌl muʼ bʌ i ñaʼtañob chaʼan Dios mach i wentajoñicla?

⁶ Cabʌl muʼ bʌ i ñaʼtañob chaʼan Dios mach i wentajoñicla. Miʼ yʌlob: «Cheʼ i wentajoñicla Dios, wen qʼuexel ili pañimil». Ili ora, baqui jach an guerra, tsʼaʼleya yicʼot pʼumpʼuñiyel. Jiñi quixtañujob miʼ cʼamʼañob, miʼ ñusañob wocol yicʼot miʼ chʌmelob. Jin chaʼan, an muʼ bʌ i cʼajtibeñob i bʌ: «Cheʼ i wentajoñicla Dios, ¿chucoch maʼañic miʼ jisan pejtelel ili wocol?».

7. a) ¿Chucoch cabʌl muʼ bʌ i ñopob chaʼan Dios wen jontol? b) ¿Chucoch mi lac ñop chaʼan Dios maʼañic ba ora miʼ yʌqʼueñonla la quilan wocol?

⁷ Cheʼ miʼ yujtel jumpʼejl wocol, jiñi ñaxañoʼ bʌ ti ñopbalʌl tac an qʼuiñil miʼ yʌlob chaʼan cheʼʌch yom Dios o jumpʼejlʌch i yilʌntel lac pusicʼal tilem bʌ tiʼ tojlel. Tiʼ sujm, cheʼ miʼ yʌlob iliyi woli (choncol) i yʌqʼueñob tiʼ mul Dios. Jin chaʼan cabʌlob miʼ ñopob chaʼan wen jontol. Pero Dios maʼañic ba ora miʼ yʌqʼueñonla la quilan wocol. ¿Chucoch mi lac ñop iliyi? Come jiñi Biblia miʼ pʌs chaʼan maʼañic ba ora miʼ mel mach bʌ weñic chaʼan miʼ qʼuelbeñonla lac pusicʼal. Santiago 1:13 miʼ yʌl: «Cheʼ an majqui woliʼ pʌjyel ti mulil, ñaʼtanla mach pʌybilic i chaʼan Dios. Come Dios mach mejlic i pʌjyel ti mulil. Maʼanic baʼ ora miʼ pʌy ti mulil winicob». Melelʌch, Dios maʼañic miʼ mʌctan chaʼan maʼañic miʼ tajonla wocol, pero maʼañic ba ora miʼ yʌqʼueñonla wocol tac  (pejcan Job 34:10-12). Laʼ laj qʼuel jumpʼejl lajiya muʼ bʌ i coltañonla lac chʼʌmben i sujm.

8, 9. Alʌ jumpʼejl lajiya muʼ bʌ i pʌs chaʼan mach weñic cheʼ mi la cʌqʼuen tiʼ mul Dios jiñi lac wocol tac.

⁸ Ñaʼtancu juntiquil tatʌl muʼ bʌ i wen cʼuxbin i yalobil yicʼot miʼ cʌntesan chaʼan wen miʼ ñaʼtan chuqui yom i mel. Cheʼ bʌ añix i jabilel, miʼ ñusʌben i tʼan i tat i miʼ loqʼuel majlel tiʼ yotot. Miʼ tech i mel mach bʌ weñic i miʼ yotsan i bʌ ti wocol. ¿Muʼ ba caj a wʌl chaʼan i mul i tat come maʼañic tsiʼ mʌcta cheʼ bʌ tsaʼ loqʼui tiʼ yotot? Maʼañic (Lucas 15:11-13). Lajalʌch jaʼel tiʼ tojlel Dios, mach weñic cheʼ mi la cʌqʼuen tiʼ mul pejtelel lac wocol. Cheʼ bajcheʼ jiñi tatʌl, Dios maʼañic tsiʼ mʌcta chaʼan jiñi quixtañujob miʼ ñusʌbeñob i tʼan i miʼ melob (chaʼleñob) mach bʌ weñic. Jin chaʼan, cheʼ bʌ mi lac taj wocol, yom mi laj cʼajtesan chaʼan mach tilemic ti Dios.

⁹ I sujmʌch, Dios miʼ cʌy chaʼan miʼ yujtel mach bʌ weñic, pero añʌch chucoch miʼ mel. Yaʼ ti cʌntesʌntel 11 mi caj a ñumen cʌn muʼ bʌ i yʌl jiñi Biblia chaʼan ili temaj. Pero miʼ mejlel a ñop chaʼan Dios mucʼʌch i cʼuxbiñonla yicʼot mach jiñic miʼ yʌqʼueñonla wocol tac. Tiʼ sujm, cojach Dios miʼ mejlel i jisan jiñi wocol (Isaías 33:2).

10. ¿Chucoch miʼ mejlel lac ñop chaʼan Dios mucʼʌch caj i tojʼesan pejtelel chuqui melbil i chaʼan jiñi quixtañujob?

¹⁰ Dios chʼujulʌch (Isaías 6:3). Sʌc yicʼot wen pejtelel chuqui miʼ mel. Jin chaʼan, miʼ mejlel lac ñop tiʼ tojlel. Pero mach cheʼic tiʼ tojlel quixtañujob. Ti lac pejtelel an qʼuiñil mi lac mel mach bʌ weñic. Anquese an juntiquil yumʌl yom bʌ i mel chuqui wen, maʼañic miʼ mejlel come maʼañic i pʼʌtʌlel chaʼan miʼ tojʼesan pejtelel chuqui melbil i chaʼan jiñi quixtañujob. Cojach Dios an i pʼʌtʌlel chaʼan miʼ mel jiñi. Jin chaʼan, miʼ mejlel lac ñop chaʼan Dios mucʼʌch i mejlel yicʼot yomʌch i tojʼesan pejtelel chuqui melbil  i chaʼan jiñi quixtañujob. Mi caj i junyajl jisan jiñi mach bʌ weñic (pejcan Salmo 37:9-11).

11. ¿Bajcheʼ yubil miʼ yubin Dios cheʼ mi lac ñusan wocol tac?

¹¹ ¿Bajcheʼ yubil miʼ yubin Dios cheʼ miʼ qʼuel pejtelel chuqui woli (yʌquel) ti ujtel yicʼot jiñi lac wocol tac? Jiñi Biblia miʼ pʌsbeñonla chaʼan Dios miʼ cʼuxbin chuqui toj (Salmo 37:28). Woliʼ qʼuel pejtelel chuqui wen yicʼot mach bʌ weñic miʼ yujtel. Cʼux miʼ yubin cheʼ miʼ qʼuel bajcheʼ mi lac ñusan wocol. Jiñi Biblia miʼ yʌl chaʼan «chʼijiyem i pusicʼal» tsiʼ yubi cheʼ bʌ tsiʼ qʼuele bajcheʼ tsaʼ bujtʼi ti jontolil ili pañimil ti wajali (Génesis 6:5, 6). Dios maʼañic qʼuextʌyem (Malaquías 3:6). Jiñi Biblia miʼ yʌl chaʼan mucʼʌch i qʼuelonla ti ñuc (pejcan 1 Pedro 5:7).

12, 13. a) ¿Chucoch mi laj cʼuxbin yambʌlob? b) ¿Bajcheʼ yubil mi la cubin cheʼ mi laj qʼuel miʼ ñusañob wocol jiñi quixtañujob? c) ¿Chucoch miʼ mejlel lac ñop chaʼan Dios mi caj i jisan jiñi wocol tac yicʼot toʼol ticʼlʌntel?

¹² Jiñi Biblia miʼ yʌl jaʼel chaʼan Dios tsiʼ meleyonla (pʌtʌyonla) tiʼ yejtal (Génesis 1:26). Ili yom i yʌl chaʼan lajal lac melbal bajcheʼ i chaʼan. Jumpʼejl ejemplo, jiñi Biblia miʼ yʌl chaʼan «cʼuxbiyajʌch Dios» (1 Juan 4:8). Pejtelel chuqui miʼ mel Dios chaʼañʌch i cʼuxbiya. La cujil cʼuxbiya come Dios xcʼuxbiyajʌch jaʼel. Jin chaʼan, mi joñonla mi la cubin lac chʼijiyemlel cheʼ mi laj qʼuel quixtañujob muʼ bʌ i toʼol ñusañob wocol, Dios ñumento miʼ yubin i chʼijiyemlel.

¹³ Ñaʼtancu iliyi: Cheʼ añic a pʼʌtʌlel chaʼan maʼ jisan jiñi wocol tac yicʼot toʼol ticʼlʌntel, ¿mucʼʌch baʼ mel? Mucʼʌch, come maʼ cʼuxbin jiñi quixtañujob. ¿Ixcu Dios? Jiñʌch mi caj i jisan pejtelel wocol yicʼot toʼol ticʼlʌntel come miʼ cʼuxbiñonla yicʼot añʌch i pʼʌtʌlel chaʼan miʼ mel. Miʼ mejlel a ñop chaʼan pejtelel chuqui albil i chaʼan tsaʼ bʌ laj qʼuele  tiʼ tejchibal ili libro mi caj i tsʼʌctiyel. Pero chaʼan miʼ mejlel a ñop albil bʌ i chaʼan Dios yomʌch maʼ ñumen cʌn.

14. ¿Baqui bʌ i cʼabaʼ Dios, i bajcheʼ mi lac ñaʼtan chaʼan yomʌch mi laj cʼʌn?

¹⁴ ¿Chuqui maʼ ñaxan suben juntiquil a wom bʌ a cʌn? Mi lac ñaxan suben laj cʼabaʼ. Pero ¿am ba i cʼabaʼ Dios? An ñopbalʌl tac muʼ bʌ i yʌlob chaʼan i cʼabaʼ jiñʌch Dios o Yum, pero jiñi mach cʼabaʼʌlic. Lajal bajcheʼ mi lac suben juntiquil quixtañu ti rey o presidente, pero mach laj cʌmbeyic i cʼabaʼ. Dios miʼ subeñonla chaʼan i cʼabaʼ jiñʌch Jehová. Jiñi Biblia miʼ yʌl: «Laʼ i cʌñob chaʼan a cʼabaʼ jiñʌch Jehová, come jatet jach jiñi Cʼax ñuquet bʌ tiʼ pejtelel Pañimil» (Salmo 83:18, TNM). Yaʼ ti Biblia chʼol cojach miʼ cʼʌjñel i cʼabaʼ Dios ti Jueces 6:24 baqui miʼ yʌl «Jehová-Salom», ti hebreo yom i yʌl «Jehová jiñʌch ñʌchʼtʌlel». Dios yom chaʼan mi laj cʌn yicʼot mi laj cʼʌmben i cʼabaʼ. ¿Bajcheʼ la cujil? Come jiñi tsaʼ bʌ i tsʼijbuyob jiñi Biblia ñumen ti 7,000 tsiʼ cʼʌmbeyob i cʼabaʼ. Dios miʼ subeñonla i cʼabaʼ chaʼan mi lac mejlel ti sujtel tiʼ yamigo.

15. ¿Chuqui yom i yʌl jiñi i cʼabaʼ Jehová?

¹⁵ Jiñi i cʼabaʼ Jehová añʌch ñuc bʌ i sujmlel. Yom i yʌl chaʼan Dios miʼ mejlel i tsʼʌctesan chuqui albil i chaʼan yicʼot miʼ mejlel i mel chuqui tac  yom. Maʼañic chuqui miʼ mejlel i mʌctan. Cojach Jehová yom miʼ cʼʌn ili cʼabaʼʌl. *

16, 17. a) ¿Chucoch miʼ subentel Jehová bajcheʼ Mach bʌ Añic i Pʼisol i Pʼʌtʌlel yicʼot ti Rey am bʌ tiʼ pejtelel ora? b) ¿Bajcheʼ yambʌ miʼ cʌjñel Jehová?

¹⁶ Cheʼ bajcheʼ tsaʼix laj qʼuele, Salmo 83:18 miʼ yʌl tiʼ tojlel Jehová: «Jatet jach jiñi Cʼax ñuquet bʌ». Jiñi Biblia miʼ cʼʌn yan tac bʌ tʼan chaʼan miʼ tsictesan bajcheʼ yilal Jehová. Jumpʼejl ejemplo, Apocalipsis o Revelación 15:3 miʼ yʌl: «Wen ñuc, wen utsʼat pejtelel a melbal  c Yum Dios, jatet Mach bʌ Anic i Pʼisol a Pʼʌtʌlel». ¿Chuqui yom i yʌl jiñi tʼan «Mach bʌ Anic i Pʼisol a Pʼʌtʌlel»? Yom i yʌl chaʼan maʼañic yambʌ ñumen pʼʌtʌl bʌ bajcheʼ Jehová. Yaʼ ti 1 Timoteo 1:17 miʼ yʌl chaʼan Jehová jiñʌch jiñi «Rey am bʌ tiʼ pejtelel ora». Ili yom i yʌl chaʼan Jehová cʼʌlʌl an jach. Cheʼ jaʼel, ti Salmo 90:2 miʼ yʌl chaʼan Dios mi caj i yajñel tiʼ pejtelel ora. ¿Mach ba añic miʼ yʌcʼ ti toj sajtel lac pusicʼal iliyi?

¹⁷ Jiñi Biblia miʼ cʌntesañonla jaʼel chaʼan cojach Jehová tsiʼ Mele pejtelel chuqui an. Ti Apocalipsis 4:11 miʼ yʌl: «Utsʼat c Yum lojon. Yom miʼ sujbel a ñuclel yicʼot a cʼuxbintel yicʼot a pʼʌtʌlel, come jatet tsaʼ mele pejtelel chuqui tac an. Tiʼ pejtelel tsaʼ mejli chaʼan cheʼʌch a wom. Tsaʼ laj aqʼue i cuxtʌlel». Cheʼʌchi, Jehová tsiʼ mele pejtelel chuqui an: Jiñi ángelob, ecʼ tac, i wut teʼ tac yicʼot añimal tac.

18. a) ¿Chucoch an muʼ bʌ i ñaʼtañob chaʼan maʼañic mi lac wis mejlel ti sujtel tiʼ yamigo Dios? b) ¿I chuqui miʼ yʌl jiñi Biblia?

¹⁸ An mucʼoʼ bʌ ti bʌqʼuen cheʼ miʼ cʌñob bajcheʼ yilal i melbal tac Jehová. Miʼ ñaʼtañob chaʼan mach i wentajonla come wen pʼʌtʌl, wen chʼujul yicʼot cʌlʌx ñajt an ti lac tojlel. Pero Dios mach yomic chaʼan cheʼ mi la cubin bajcheʼ jiñi. Yom sujtel ti la camigo. Jiñi Biblia miʼ yʌl chaʼan Dios «mach ñajtic an [...] ti lac tojlel ti jujuntiquilonla» (Hechos 17:27). Dios yom chaʼan maʼ cʌn. Mi cheʼʌch maʼ mel, miʼ yʌcʼ i tʼan chaʼan «mi caj i lʌcʼtesan i bʌ» yicʼot mi caj i sujtel ti a wamigo (Santiago 4:8).

19. a) ¿Chuqui miʼ mejlel a mel chaʼan maʼ sujtel tiʼ yamigo Dios? b) ¿Baqui tac bʌ i melbal Dios maʼ ñumen mulan?

¹⁹ ¿Chuqui miʼ mejlel a mel chaʼan maʼ sujtel tiʼ yamigo Dios? Jesús tsiʼ yʌlʌ: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3). Cheʼ maʼ bej cʌn i chaʼan bʌ Jehová yicʼot Jesús, mi caj a ñumen cʌñob yicʼot mi caj i sujtelob ti a wamigo. Cheʼ jaʼel, mi caj a mejlel a taj jiñi cuxtʌlel mach bʌ añic miʼ jilel. Ili ora tsaʼix a cʌñʌ chaʼan Dios «xcʼuxbiyajʌch» (1 Juan 4:16). Pero anto cabʌl wen tac bʌ i melbal. Jiñi Biblia miʼ pʌsbeñonla chaʼan Jehová ‹yujil pʼuntaya, uts, jal miʼ michʼan, cabʌl miʼ pʼuntañonla, xucʼul› yicʼot miʼ yʌl chuqui i sujm (Éxodo 34:6; Salmo 31:5, TNM). Cheʼ jaʼel, yujil pijt yicʼot xucʼul (2 Pedro 3:9; Salmo 18:25). Jehová utsʼat chuqui miʼ mel yicʼot ‹miʼ ñusʌbeñonla lac mul› (Salmo 86:5). Cheʼ bʌ maʼ pejcan jiñi Biblia mi caj a ñumen cʌn chaʼan jiñi utsʼatax bʌ i melbal tac.

20, 21. ¿Bajcheʼ maʼ mejlel ti sujtel tiʼ yamigo Dios cheʼ maʼañic miʼ mejlel a qʼuel?

²⁰ ¿Bajcheʼ maʼ mejlel ti sujtel tiʼ yamigo Dios cheʼ maʼañic miʼ mejlel a qʼuel? (Juan 1:18; 4:24). Cheʼ maʼ pejcan jiñi Biblia, mi caj a qʼuel chaʼan Jehová juntiquilʌch  cuxul bʌ Dios utsʼatax bʌ i melbal tac (Salmo 27:4; Romanos 1:20). Cheʼ maʼ ñumen cʌn Jehová, mi caj a ñumen cʼuxbin yicʼot ñumen lʌcʼʌl mi caj a wubin a bʌ tiʼ tojlel.

²¹ Cheʼ jaʼel, mi caj a cʌn chaʼan Jehová jiñʌch lac Tat wen am bʌ i cʼuxbiya (Mateo 6:9). Jin tsiʼ yʌqʼueyonla laj cuxtʌlel yicʼot yom chuqui wen ti lac tojlel. Juntiquil tatʌl muʼ bʌ i cʼuxbin i yalobilob yom chuqui wem bʌ tiʼ tojlelob (1 Timoteo 6:13). Jiñi Biblia miʼ pʌsbeñonla chaʼan maʼ mejlel ti sujtel tiʼ yamigo Dios (Santiago 2:23). ¡Ñaʼtancu jiñi! Jiñi tsaʼ bʌ i Mele panchan yicʼot pañimil yom sujtel ti a wamigo.

22. ¿Chuqui yom maʼ mel mi an majqui miʼ ñop i mʌctañet chaʼan maʼ pejcan jiñi Biblia?

²² Tajol an yomoʼ bʌ chaʼan maʼ cʌy a pejcan jiñi Biblia. Tajol miʼ ñaʼtañob chaʼan mi caj a qʼuextan a ñopbal. Pero ¿muʼ ba caj a wʌcʼ chaʼan jiñi yambʌlob miʼ mʌctañetob chaʼan maʼ sujtel tiʼ yamigo Dios? Mach yomic. Dios jiñʌch jiñi ñumen wem bʌ a wamigo miʼ mejlel a taj.

23, 24. a) ¿Chucoch yom maʼ bej mel cʼajtiya tac? b) ¿Chuqui mi caj laj cʌn yaʼ ti yambʌ cʌntesʌntel?

²³ Cheʼ maʼ pejcan jiñi Biblia, an maʼañic bʌ mi caj a chʼʌmben i sujm. Mele cʼajtiya tac yicʼot cʼajtin a coltʌntel mi cʼʌñʌlʌch. Jesús tsiʼ yʌlʌ chaʼan yom mi lac pʌs lac pecʼlel bajcheʼ jiñi xbiʼtalob. Cheʼ bajcheʼ tsaʼ laj qʼuele ti ñaxam bʌ párrafo, jiñi xbiʼtalob miʼ melob cabʌl cʼajtiya tac (Mateo 18:2-4). Dios yom chaʼan maʼ tajben i jacʼbal jiñi a cʼajtiya tac. Jin chaʼan, wen pejcan jiñi Biblia yicʼot wen qʼuele mi i sujmʌch jiñi woli bʌ a cʌn majlel (pejcan Hechos 17:11).

²⁴ Jiñi ñumen wem bʌ bajcheʼ miʼ mejlel laj cʌn Jehová jiñʌch cheʼ mi lac pejcʌben jiñi i Tʼan. Yaʼ ti yambʌ cʌntesʌntel mi caj laj cʌn chucoch jiñi Biblia wen qʼuexel bajcheʼ yan tac bʌ libro.