1, 2. a) ¿Chucoch maʼ ñaʼtan chaʼan jiñi oración jumpʼejlʌch ñuc bʌ majtañʌl? b) ¿Chucoch ñuc i cʼʌjñibal cheʼ mi laj cʌn chuqui miʼ yʌl jiñi Biblia chaʼan jiñi oración?

CHEʼ mi lac lajeʼ jiñi ecʼ tac yicʼot ili Pañimil, ili Pañimil ñumen chut. Tiʼ tojlel Jehová, pejtelel wiñicob xʼixicob (quixtañujob) cheʼob jach bajcheʼ juntʼujy jaʼ (Salmo 115:15; Isaías 40:15). Anquese ñumen chutonla bajcheʼ jiñi ecʼ tac, jiñi Biblia miʼ yʌl: «Lʌcʼʌl an lac Yum tiʼ tojlel pejtel muʼ bʌ i pejcañob tiʼ pejtelel i pusicʼal. Miʼ yʌqʼueñob chuqui yomob jini muʼ bʌ i cʼuxbiñob Dios. Miʼ yubibeñob i tʼan cheʼ miʼ pejcañob. Miʼ coltañob» (Salmo 145:18, 19). An wen ñuc bʌ lac majtan. Jehová jiñʌch wen pʼʌtʌl bʌ tsaʼ bʌ i Meleyonla i yom sujtel ti la camigo yicʼot yom i ñʌchʼtan la coración. Jiñi oración jumpʼejlʌch lac majtan tsaʼ bʌ i yʌqʼueyonla.

² Jehová mi caj i ñʌchʼtañonla mi cheʼʌch mi lac chaʼlen oración cheʼ bajcheʼ miʼ mulan. ¿Bajcheʼ miʼ mejlel lac mel jiñi? Laʼ laj qʼuel chuqui miʼ cʌntesañonla Biblia chaʼan jiñi oración.

3. ¿Chucoch ñuc i cʼʌjñibal cheʼ maʼ melben oración Jehová?

³ Jehová yom chaʼan maʼ melben oración, chaʼan maʼ pejcan. ¿Bajcheʼ mi lac ñaʼtan? Wen ñaʼtan jiñi utsʼatax bʌ a pʌyol am bʌ ti Filipenses 4:6, 7 (pejcan). Jiñi tsaʼ bʌ i Mele panchan yicʼot pañimil (mulawil) miʼ qʼuelet  ti ñuc yicʼot yom chaʼan maʼ suben bajcheʼ yubil maʼ wubin yicʼot a wocol tac.

4. ¿Bajcheʼ mi caj la cajñel la quicʼot Jehová mi bele ora mi lac chaʼlen oración, i chucoch?

⁴ Jiñi oración miʼ coltañonla chaʼan ñumen lʌcʼʌl mi la cajñel la quicʼot Jehová. Cheʼ bʌ chaʼtiquil wem bʌ i yamigojob i bʌ miʼ yʌlob chuqui miʼ ñaʼtañob, bajcheʼ yubil miʼ yubiñob i bʌ yicʼot muʼ bʌ i pensaliñob, ñumen lʌcʼʌl miʼ yajñelob. Lʌcʼʌ lajal Jehová jaʼel, tsaʼix i subeyet yaʼ ti Biblia muʼ bʌ i ñaʼtan, bajcheʼ yubil miʼ yubin i bʌ yicʼot chuqui mi caj i mel ti talto bʌ qʼuin. Miʼ mejlel a suben chuqui an ti a pusicʼal. Mi mucʼʌch a bele chaʼlen oración, ñumen lʌcʼʌl mi caj a wajñel a wicʼot (Santiago 4:8).

5. ¿Bajcheʼ la cujil chaʼan Jehová maʼan miʼ laj ñʌchʼtan jiñi oración?

⁵ ¿Muʼ ba i laj ñʌchʼtan Jehová jiñi oración? Maʼañic. Tiʼ yorajlel jiñi xʼaltʼan Isaías Jehová tiʼ sube jiñi israelob: «Anquese cabʌl mi laʼ chaʼlen oración, mi wisilic mi caj c jacʼbeñetla chaʼan tiʼ caj stsʌnsajetla, xbecʼ chʼichʼetla»  (Isaías 1:15). Mi maʼañic mi laj cʌntan lac bʌ, tajol mi lac mel muʼ bʌ i jem bajcheʼ añonla la quicʼot Jehová. Cheʼ bajcheʼ jiñi, maʼañic mi caj i ñʌchʼtañonla.

6. a) ¿Chucoch ñuc i cʼʌjñibal lac ñopoñel? b) ¿Bajcheʼ mi lac pʌs chaʼan an lac ñopoñel?

⁶ Mi la com chaʼan Jehová miʼ ñʌchʼtañonla, yom mi lac ñop tiʼ tojlel (Marcos 11:24). Pablo tsiʼ yʌlʌ: «Mi maʼanic mi lac ñop Dios, mach mejlic i qʼuelonla ti utsʼat. Come majqui jach yom i cʌn Dios, wersa miʼ ñop mi an Dios, come jiñʌch muʼ bʌ i yʌqʼuen i chobejtʌbal majqui jach miʼ tsajcan» (Hebreos 11:6). Mach jasʌl mi la cʌl an lac ñopoñel. Yom mi lac pʌs cheʼ mi lac jacʼben i tʼan Jehová ti bele ora (pejcan Santiago 2:26).

7. a) ¿Chucoch yom an lac pecʼlel yicʼot wen jach bajcheʼ mi lac pejcan Jehová? b) ¿Bajcheʼ mi lac pʌs chaʼan loqʼuemʌch ti lac pusicʼal muʼ bʌ la cʌl ti oración?

⁷ Cheʼ bʌ mi lac melben oración Jehová, yom an lac pecʼlel yicʼot wen jach mi lac mel. ¿Chucoch? Cheʼ muqʼuic lac pejcan juntiquil rey o presidente, wen jach mi lac mel. Jehová jiñʌch Dios mach bʌ añic i pʼisol i pʼʌtʌlel, jin chaʼan yom ñumen wen bajcheʼ mi lac pejcan yicʼot mi lac pʌs lac pecʼlel (Génesis 17:1; Salmo 138:6). Cheʼ jaʼel, yom loqʼuem ti lac pusicʼal, mach junsujm jach yom bʌ mi la cʌl (Mateo 6:7, 8).

8. ¿Chuqui yom mi lac mel cheʼ bʌ an chuqui mi laj cʼajtin ti oración?

⁸ Cheʼ jaʼel, cheʼ bʌ an chuqui mi laj cʼajtin ti oración, yom mi lac chaʼlen wersa chaʼan cheʼʌch mi lac mel. Jumpʼejl ejemplo, tajol mi laj cʼajtin coltʌntel chaʼan mi lac taj chuqui i cʼʌjñibal lac chaʼan. Pero mach yomic tsʼuʼbonla yicʼot mi lac pijtan chaʼan Jehová miʼ luʼ aqʼueñonla chuqui la com. Mi mucʼʌch lac mejlel, laʼ lac jacʼ yicʼot laʼ lac mel baqui jach bʌ eʼtel (troñel) (Mateo 6:11; 2 Tesalonicenses 3:10). Mi tsaʼ laj cʼajtibe Jehová chaʼan  mi laj cʌy lac mel mach bʌ wen, laʼ lac tʌtsʼ lac bʌ tiʼ pejtelel chuqui miʼ mejlel i yʌcʼonla ti yajlel ti wocol (Colosenses 3:5). Laʼ laj qʼuel chaʼpʼejl uxpʼejl cʼajtiya tac muʼ bʌ i melbeñob i bʌ jiñi quixtañujob chaʼan jiñi oración.

9. a) ¿Majqui yom mi lac melben oración? b) ¿Chuqui miʼ cʌntesañonla Juan 14:6 chaʼan jiñi oración?

⁹ ¿Majqui yom mi lac melben oración? Jesús tsiʼ cʌntesa ti oración jiñi xcʌntʼañob i chaʼan: «C Tat lojon añet bʌ ti panchan» (Mateo 6:9). Jin chaʼan, cojach Jehová yom mi lac melben oración. Jesús tsiʼ yʌlʌ jaʼel: «Joñon i bijlelon i sujmlelon, i cuxtʌlelon. Maʼanic majch miʼ cʼotel baʼan c Tat, jini jach am bʌ tic wenta» (Juan 14:6). Ili miʼ cʌntesañonla chaʼan tiʼ cʼabaʼ Jesús yom mi lac mel oración. ¿Chuqui yom i yʌl iliyi? Mi la com chaʼan Jehová miʼ chʼʌm la coración yom mi laj qʼuel ti ñuc jiñi eʼtel tsaʼ bʌ i yʌqʼue i Yalobil. Cheʼ bajcheʼ tsaʼix laj cʌñʌ, Jesús tsaʼ tili ti pañimil chaʼan miʼ locʼsañonla ti mulil yicʼot chʌmel (Juan 3:16; Romanos 5:12). Cheʼ jaʼel, Jehová tsiʼ waʼchoco Jesús bajcheʼ Ñuc bʌ xMotomaj muʼ bʌ i mejlel i yʌcʼ ti ñusʌntel lac sajtemal yicʼot lac mul, i tsiʼ waʼchoco bajcheʼ xMeloñel (Juan 5:22; Hebreos 6:20).

10. ¿Junsujm jach ba bajcheʼ yom añonla cheʼ mi lac mel oración? Tsictesan.

¹⁰ ¿Junsujm jach ba bajcheʼ yom añonla? Maʼañic. Jehová maʼañic miʼ yʌl chaʼan ñocol, buchul o waʼal mi lac mel oración. Jiñi Biblia miʼ pʌs chaʼan bajcheʼ jach añonla miʼ mejlel lac mel, cojach yom miʼ pʌs chaʼan mucʼʌch laj qʼuel ti ñuc Dios (1 Reyes 8:22, 23; Nehemías 8:6; Daniel 6:10). Ñumen ñuc bʌ miʼ qʼuel Jehová jin cheʼ wen jach mi lac pejcan yicʼot loqʼuem ti lac pusicʼal, i mach jiñic bajcheʼ añonla. Miʼ mejlel lac mel ti cʼam o ti mucul bʌ tʼan, baqui jach añonla yicʼot bajcheʼ jach ora, ti qʼuiñil o  ti acʼʌlel. Cheʼ bʌ mi lac mel oración, yom mi lac ñop chaʼan Jehová wolʌch (choncolʌch) i ñʌchʼtañonla anquese maʼañic miʼ yubin yambʌlob (Nehemías 2:1-6).

11. ¿Chuqui tac miʼ mejlel la cʌl ti oración?

¹¹ ¿Chuqui tac miʼ mejlel la cʌl? Miʼ mejlel la cʌl wen tac bʌ miʼ qʼuel Jehová. Jiñi Biblia miʼ yʌl: «La cujil miʼ yubibeñonla chuqui jach mi laj cʼajtiben cheʼ bajcheʼ yom i pusicʼal» (1 Juan 5:14). ¿Muʼ ba i mejlel la cʌl chuqui jach i cʼʌjñibal bʌ lac chaʼan? Mucʼʌch. Cheʼ mi lac pejcan Jehová cheʼʌch yom mi lac pejcan bajcheʼ juntiquil wem bʌ la camigo. Miʼ mejlel lac suben muʼ bʌ lac ñaʼtan yicʼot bajcheʼ yubil mi la cubin lac bʌ (Salmo 62:8). Miʼ mejlel laj cʼajtiben jaʼel chaʼan miʼ yʌqʼueñonla chʼujul bʌ i yespíritu chaʼan mi lac mel chuqui wen (Lucas 11:13). Cheʼ jaʼel, weñʌch cheʼ mi laj cʼajtiben lac ñaʼtʌbal chaʼan mi lac yajcan chuqui wen yicʼot lac pʼʌtʌlel chaʼan mi laj cuch wocol tac (Santiago 1:5). Yom mi lac wersa cʼajtiben Jehová jaʼel chaʼan miʼ ñusan lac mul (Efesios 1:3, 7). Cheʼ jaʼel, yom mi lac mel oración tiʼ tojlel yambʌlob, bajcheʼ jiñi lac familia yicʼot hermanojob ti congregación (Hechos 12:5; Colosenses 4:12).

12. ¿Baqui bʌ ñumen ñuc bʌ i cʼʌjñibal yom mi la cʌl ti la coración?

¹² ¿Baqui bʌ jiñi ñumen ñuc bʌ i cʼʌjñibal yom bʌ mi la cʌl ti la coración? Jehová yicʼot chuqui yom bʌ. Tiʼ pejtelel lac pusicʼal yom mi la cʌqʼuen wocolix i yʌlʌ chaʼan jiñi melbil bʌ i chaʼan ti lac tojlel (1 Crónicas 29:10-13). Cheʼ bʌ Jesús tsiʼ pʌsbe bajcheʼ yom miʼ melob oración jiñi xcʌntʼañob, tsiʼ pʌsʌ baqui bʌ ñumen ñuc bʌ i cʼʌjñibal mi la cʌl (pejcan Mateo 6:9-13). Jesús tsiʼ yʌlʌ chaʼan ñaxan yom mi laj cʼajtin chaʼan miʼ chʼujutesʌntel i cʼabaʼ Jehová, yom i yʌl, chaʼan sʌc miʼ qʼuejlel. Cheʼ jiñi, tsiʼ yʌlʌ chaʼan yom mi laj cʼajtin miʼ tilel i Yumʌntel Dios yicʼot miʼ mejlel  chuqui yom ila ti Pañimil. Tsiʼ yʌlʌ chaʼan mi tsaʼix la cʌlʌ jiñi ñuc tac bʌ i cʼʌjñibal muqʼuix i mejlel laj cʼajtin i cʼʌjñibal bʌ lac chaʼan. Cheʼ bʌ mi lac ñaxan taj ti tʼan Jehová yicʼot chuqui yom bʌ, mi lac pʌs chaʼan jiñʌch ñumen ñuc bʌ i cʼʌjñibal lac chaʼan.

13. ¿Bajcheʼ jalel yom jiñi oración?

¹³ ¿Bajcheʼ jalel yom jiñi oración? Jiñi Biblia maʼañic miʼ yʌl. Jal o mach jalic miʼ mejlel ti melol o yaʼʌch tsiquil ti chuqui mi caj la cʌl. Jumpʼejl ejemplo, cheʼ bʌ mi laj  cajel ti uchʼel miʼ mejlel lac mel jumpʼejl oración mach bʌ wen jalic, pero cheʼ bʌ mi la cʌqʼuen wocolix i yʌlʌ Jehová o mi lac suben jumpʼejl wocol jal miʼ mejlel lac mel (1 Samuel 1:12, 15). Mach lac mel jal bʌ oración chaʼan jach mi laj qʼuejlel, cheʼ bajcheʼ tsiʼ meleyob chaʼtiquil uxtiquil tiʼ yorajlel Jesús (Lucas 20:46, 47). Jehová mach toj sajtelic miʼ qʼuel cheʼ bʌ oración bajcheʼ jiñi. Yom chaʼan loqʼuem ti lac pusicʼal muʼ bʌ lac suben.

14. a) ¿Jaysujtel yom mi lac chaʼlen oración? b) ¿Chuqui miʼ cʌntesañonla tiʼ tojlel Jehová iliyi?

¹⁴ ¿Jaysujtel yom mi lac chaʼlen oración? Jehová miʼ subeñonla chaʼan bele ora yom mi lac pejcan. Jiñi Biblia miʼ yʌl: «Pejcanla Dios tiʼ pejtelel ora», «chʌn chaʼlenla oración» yicʼot ‹chʌn chaʼlenla oración ti qʼuiñil yicʼot ti acʼʌlel› (Romanos 12:12; 1 Tesalonicenses 5:17; 1 Timoteo 5:5). Jehová chʌn chajpʌbil chaʼan miʼ ñʌchʼtañonla.  Tiʼ pejtelel ora miʼ mejlel la cʌqʼuen wocolix i yʌlʌ chaʼan i cʼuxbiya yicʼot chaʼan aqʼuebilonbʌla i chaʼan. Cheʼ jaʼel, miʼ mejlel laj cʼajtiben chaʼan miʼ pʌsbeñonla bij, miʼ yʌqʼueñonla i pʼʌtʌlel yicʼot miʼ ñuqʼuesan lac pusicʼal. Mi mucʼʌch laj qʼuel jiñi oración bajcheʼ ñuc bʌ lac majtan, bele ora mi caj lac pejcan Jehová.

15. ¿Chucoch yom mi la cʌl «amén» tiʼ yujtibal la coración?

¹⁵ ¿Chucoch yom mi la cʌl «amén» tiʼ yujtibal la coración? Ili tʼan yom i yʌl «cheʼʌchi» o «cheʼʌch yom». Cheʼ bʌ mi la cʌl, mi lac pʌs chaʼan loqʼuemʌch ti lac pusicʼal woli (yʌquel) bʌ la cʌl (Salmo 41:13). Cheʼ jaʼel, jiñi Biblia miʼ pʌsbeñonla chaʼan tiʼ yujtibal oración muʼ bʌ i mejlel baqui an cabʌl quixtañujob yom miʼ yʌjlel «amén», ti cʼam bʌ tʼan o ti mucul jach. Cheʼ bajcheʼ jiñi, mi lac pʌs chaʼan mucʼʌch lac ñop tsaʼ bʌ ajli (1 Crónicas 16:36; 1 Corintios 14:16).

16. ¿Muʼ ba i jacʼ Dios la coración? Tsictesan.

¹⁶ ¿Muʼ ba i jacʼ Dios la coración? Mucʼʌch. Jiñi Biblia miʼ yʌl chaʼan miʼ ñʌchʼtan la coración yicʼot mucʼʌch i jacʼ (Salmo 65:2; Isaías 30:19). Jehová miʼ ñʌchʼtʌben i yoración millón quixtañujob yicʼot cabʌl bajcheʼ miʼ jacʼ.

17. ¿Bajcheʼqui miʼ cʼʌn Jehová i yángelob yicʼot i wiñicob chaʼan miʼ jacʼ la coración?

¹⁷ Jehová miʼ cʼʌn ángelob yicʼot i wiñicob chaʼan miʼ jacʼ la coración (Hebreos 1:13, 14). Cabʌl quixtañujob an i meleyob oración chaʼan miʼ cʼajtiñob i coltʌntel tiʼ chʼʌmbentel i sujm jiñi Biblia, i mach cabʌl ora miʼ ñumel i miʼ cʼotel jiñi Testigojob. Ili miʼ pʌs chaʼan jiñi ángelob woliyob ti coltaya chaʼan miʼ sujbel «jini wen tʼan» tiʼ petol Pañimil (pejcan Apocalipsis 14:6). Cheʼ jaʼel, an lac melbe oración Jehová tiʼ caj wocol o an chuqui i cʼʌjñibal lac  chaʼan, i an lac taja laj coltʌntel ti juntiquil la quermaño yaʼ ti congregación (Proverbios 12:25; Santiago 2:16).

18. ¿Bajcheʼ miʼ cʼʌn Jehová chʼujul bʌ i yespíritu yicʼot jiñi Biblia chaʼan miʼ jacʼ la coración?

¹⁸ Jehová miʼ cʼʌn chʼujul bʌ i yespíritu jaʼel. Cheʼ mi laj cʼajtiben i coltaya chaʼan mi lac lʌtʼ jumpʼejl wocol, tajol miʼ cʼʌn chʼujul bʌ i yespíritu chaʼan miʼ pʌsbeñonla chuqui yom mi lac mel yicʼot miʼ pʼʌtʼesañonla (2 Corintios 4:7). Cheʼ jaʼel, Jehová miʼ cʼʌn jiñi Biblia chaʼan miʼ jacʼ la coración yicʼot chaʼan miʼ coltañonla lac ñaʼtan chuqui yom mi lac mel. Cheʼ mi lac pejcan tajol mi lac taj texto tac muʼ bʌ i coltañonla. Jehová miʼ mejlel i mel chaʼan juntiquil miʼ yʌl tiʼ comentario com bʌ lac ñʌchʼtan. Miʼ mejlel i cʼʌn jaʼel juntiquil anciano chaʼan miʼ pʌsbeñonla junchajp am bʌ yaʼ ti Biblia (Gálatas 6:1).

19. ¿Chucoch an qʼuiñil mi lac ñaʼtan chaʼan Jehová maʼañic woliʼ jacʼ la coración?

¹⁹ Mi an a cʼajtibe a bʌ chucoch Jehová maʼañic woliʼ jacʼ a woración, cʼajtesan chaʼan jin miʼ ñaʼtan jala yicʼot bajcheʼ mi caj i mel. Jehová wen yujil chuqui i cʼʌjñibal lac chaʼan. Pero tajol yom mi lac bej chaʼlen oración chaʼan mi lac pʌsben i cʼʌjñibalʌch jiñi woli bʌ laj cʼajtiben yicʼot chaʼan añʌch lac ñopoñel (Lucas 11:5-10). An qʼuiñil mach pijtʌbilic lac chaʼan bajcheʼ miʼ jacʼ. Jumpʼejl ejemplo, tajol mi lac melben oración tiʼ caj tsʌts bʌ lac wocol, pero maʼañic miʼ jisan, mucʼ jach i yʌqʼueñonla lac pʼʌtʌlel chaʼan mi laj cuch (pejcan Isaías 40:28, 29).

20. ¿Chucoch yom mi lac bej mel oración?

²⁰ Tiʼ sujm, jiñi oración ñucʌch bʌ lac majtan tsiʼ yʌqʼueyonla Jehová. Miʼ mejlel lac ñop chaʼan mucʼʌch i ñʌchʼtañonla (Salmo 145:18). Cheʼ tiʼ pejtelel lac pusicʼal mi lac bej melben oración, ñumen lʌcʼʌl mi caj la cajñel tiʼ tojlel.