1, 2. ¿Chuqui yom Jehová chaʼan jiñi familia tac?

JEHOVÁ tsiʼ waʼchoco jiñi ñujpuñel. Jiñi Biblia miʼ yʌl chaʼan tsiʼ mele (pʌtʌ) jiñi ñaxam bʌ xʼixic i tsiʼ pʌyʌ majlel baʼan jiñi wiñic. Wen tijicña tsiʼ yubi Adán i tsiʼ yʌlʌ tiʼ tojlel jiñi xʼixic: «Jiñʌch c bʌquel loqʼuem bʌ tic bʌquel yicʼot c bʌcʼtal loqʼuem bʌ tic bʌcʼtal» (Génesis 2:22, 23). Jehová yom chaʼan tijicñayob jiñi ñujpuñemoʼ bʌ.

² Ili ora cabʌl wiñicob xʼixicob (quixtañujob) mach tijicñayobic tiʼ familia. Pero jiñi Biblia miʼ chʼʌm tilel principio yicʼot ticʼojel tac muʼ bʌ i mejlel i coltañob chaʼan wen yicʼot tijicña miʼ yajñelob (Lucas 11:28). Cheʼ jaʼel, miʼ pʌsbeñonla i melbal (chaʼlibal) tac Jehová yicʼot Jesús i jiñi familia tac tijicña mi caj i yajñelob mi mucʼʌch i lajiñob (Efesios 5:1, 2).

3, 4. a) ¿Bajcheʼ yom miʼ mel jiñi wiñic tiʼ tojlel i yijñam? b) ¿Chucoch ñuc i cʼʌjñibal cheʼ miʼ ñusʌbeñob i bʌ i mul?

³ Jiñi Biblia miʼ yʌl chaʼan juntiquil wem bʌ ñoxiʼalʌl yom miʼ cʼuxbin yicʼot miʼ qʼuel ti ñuc i yijñam (pejcan Efesios 5:25-29). Yom uts yicʼot i yijñam tiʼ pejtelel ora. Cheʼ jaʼel, yom miʼ cʌntan i mach yomic miʼ ticʼlan.

⁴ ¿Chuqui yom miʼ mel jiñi wiñic cheʼ bʌ miʼ taj i sajtemal i yijñam? Jiñi Biblia miʼ yʌl: «Winicob [«chʌn», TNM] cʼuxbin laʼ wijñam. Mach tsʌtsic yom mi laʼ pejcan» (Colosenses 3:19). Ñoxiʼalʌlob, cʼajtesanla chaʼan mi laʼ taj laʼ sajtemal jaʼel. Cheʼ jaʼel, mi laʼ wom chaʼan Dios miʼ ñusan laʼ mul yom mi laʼ ñusʌben i mul laʼ wijñam (Mateo 6:12, 14, 15). Mi jiñi wiñic yicʼot  xʼixic miʼ ñusʌbeñob i bʌ i mul, tijicña mi caj i yajñelob tiʼ ñujpuñel.

5. ¿Chucoch yom miʼ qʼuel ti ñuc i yijñam jiñi wiñic?

⁵ Jehová yom chaʼan jiñi ñoxiʼalʌl miʼ qʼuel ti ñuc i yijñam. Jiñi wiñic yom miʼ wen qʼuel bajcheʼ miʼ coltan. Yom miʼ yʌqʼuen i pislel yicʼot i bʌl i ñʌcʼ. Yom miʼ sʌclʌben i yorajlel chaʼan miʼ chaʼleñob tʼan yicʼot miʼ ñop i chʼʌmben i sujm. Wen ñucʌch i cʼʌjñibal cheʼ miʼ mel iliyi. Mi juntiquil wiñic maʼañic miʼ cʌntan i yijñam tajol maʼañic miʼ ñʌchʼtʌbentel i yoración (1 Pedro 3:7). Jehová junlajal miʼ qʼuel jiñi wiñic yicʼot xʼixic. Ñuc i cʼʌjñibal miʼ qʼuel jiñi quixtañujob muʼ bʌ i cʼuxbiñob.

6. ¿Chuqui yom i yʌl cheʼ jiñi wiñic yicʼot jiñi xʼixic ‹juntiquilob jachix›?

⁶ Jesús tsiʼ yʌlʌ chaʼan jiñi ñoxiʼalʌl yicʼot i yijñam ‹mach chʌn chaʼtiquilobix, juntiquilob jachix› (Mateo 19:6). Jiñi ñujpuñemoʼ bʌ yom xucʼulob tiʼ tojlel i piʼʌl i maʼañic miʼ lotiñob yicʼot yambʌ (Proverbios 5:15-21; Hebreos 13:4). Cheʼ bʌ mi piʼleñob i bʌ, yomʌch ti chaʼticlel miʼ tijicñesañob i bʌ mach cojach yom miʼ bajñel ñaʼtan i bʌ juntiquil (1 Corintios 7:3-5). Jiñi wiñic yom miʼ cʼajtesan chaʼan «maʼanic [...] muʼ bʌ i tsʼaʼlen i bʌcʼtal», mucʼʌch i «weʼesan, miʼ cʌntan ti utsʼat». Jin chaʼan, yom miʼ wen cʼuxbin i yijñam yicʼot miʼ pʌsben i yutslel. Muʼ bʌ i ñumen mulan juntiquil xʼixic jiñʌch cheʼ jiñi i ñoxiʼal wen uts yicʼot miʼ cʼuxbin (Efesios 5:29).

7. ¿Chucoch yomʌch an juntiquil i jol jiñi familia?

⁷ Pejtelel jiñi familia añʌch majqui yom miʼ tojʼesan chaʼan miʼ mejlel i tsʼʌctesañob i yeʼtel (troñel) ti jujuntiquil, yomʌch juntiquil i jol jiñi familia. Jiñi Biblia miʼ yʌl: «Com mi laʼ ñaʼtan, i jol pejtelel wiñicob jiñʌch  Cristo, i jol xʼixic jiñʌch wiñic, i jol Cristo jiñʌch Dios» (1 Corintios 11:3, Jiñi tsijiʼ bʌ wen tʼañ chaʼañ estudio).

8. ¿Bajcheʼ miʼ pʌs juntiquil xʼixic chaʼan mucʼʌch i qʼuel ti ñuc i ñoxiʼal?

⁸ I sujmʌch chaʼan pejtelel jiñi ñoxiʼalʌlob miʼ tajob i sajtemal. Pero mi jiñi ijñamʌl miʼ jacʼ muʼ bʌ i yʌl yicʼot miʼ coltan, jiñi i familia miʼ taj i wenlel (1 Pedro 3:1-6). Jiñi Biblia miʼ yʌl: «Jini xʼixic laʼ i qʼuel ti ñuc i ñoxiʼal» (Efesios 5:33). Pero ¿ixcu mi mach xñoptʼañic? Jiñi xʼixic yomʌch miʼ qʼuel ti ñuc jaʼel. Jiñi Biblia miʼ chaʼ al: «Xʼixicob, yom mi laʼ wʌcʼ laʼ bʌ ti utsʼat tiʼ wenta laʼ ñoxiʼal. Cheʼ jini, mi maʼanic miʼ ñopob laʼ ñoxiʼal, mi caj i ñopob chaʼan utsʼat bʌ laʼ melbal, mach chaʼanic laʼ tʼan. Mi caj i qʼuelob toj bʌ laʼ melbal cheʼ mi laʼ jacʼbeñob ti utsʼat» (1 Pedro 3:1, 2). Jiñi wem bʌ i melbal jiñi ijñamʌl miʼ mejlel i coltan chaʼan i ñoxiʼal miʼ chʼʌmben i sujm yicʼot miʼ qʼuel ti ñuc chuqui miʼ ñop.

9. a) ¿Chuqui miʼ mejlel i mel jiñi xʼixic mi maʼañic miʼ mulan chuqui miʼ ñaʼtan i ñoxiʼal? b) ¿Baqui bʌ ticʼojel chaʼan jiñi ijñamʌlob mi lac taj ti Tito 2:4, 5?

⁹ ¿Chuqui miʼ mejlel i mel jiñi xʼixic mi maʼañic miʼ  mulan chuqui miʼ ñaʼtan i ñoxiʼal? Miʼ mejlel i yʌl, pero wen jach yom miʼ mel. Jumpʼejl ejemplo, Sara an chuqui tiʼ sube Abrahán maʼañic bʌ tsiʼ mulaj. Pero Jehová tiʼ sube Abrahán: «Mele cheʼ bajcheʼ tsiʼ subeyet» (Génesis 21:9-12). Mi jiñi muʼ bʌ i yajcan i mel jiñi ñoxiʼalʌl maʼañic tiʼ contra muʼ bʌ i yʌl jiñi Biblia jiñi i yijñam yomʌch miʼ coltan (Hechos 5:29; Efesios 5:24). Cheʼ jaʼel, juntiquil wem bʌ ijñamʌl yomʌch miʼ cʌntan i familia (pejcan Tito 2:4, 5). Cheʼ bʌ jiñi i ñoxiʼal yicʼot i yalobilob miʼ qʼuelob chuqui miʼ mel tiʼ tojlelob, mi caj i ñumen cʼuxbiñob yicʼot i qʼuelob ti ñuc (Proverbios 31:10, 28).

10. ¿Chuqui miʼ yʌl jiñi Biblia chaʼan jiñi cʌy bʌ yicʼot divorcio?

¹⁰ An xñujpuñelob ti ora bʌ miʼ cʌyob i bʌ o miʼ chaʼleñob i bʌ ti divorciar. Pero jiñi Biblia miʼ yʌl chaʼan «jini xʼixic mach i lon cʌy i ñoxiʼal» i jiñi wiñic mach yomic miʼ cʌy i yijñam (1 Corintios 7:10, 11). I sujmʌch chaʼan an wen tsʌts tac bʌ wocol baqui tajol yom miʼ cʌyob i bʌ, pero yomʌch miʼ ñaxan wen ñaʼtañob. * ¿I chuqui miʼ yʌjlel chaʼan jiñi divorcio? Jiñi Biblia miʼ yʌl chaʼan juntiquil ñujpuñem bʌ cojach miʼ mejlel i chaʼlen i bʌ ti divorciar mi jiñi i piʼʌl miʼ chaʼlen tsʼiʼlel yicʼot yambʌ mach bʌ i yijñamic o i ñoxiʼalic (Mateo 19:9).

11. ¿Chuqui jiñi ñumen ñuc bʌ i cʼʌjñibal chaʼan jiñi alpʼeñelob?

¹¹ Tatʌlob, aqʼuenla bajcheʼ cʼamel i yorajlel chaʼan mi laʼ wajñel laʼ wicʼot laʼ walobilob come i cʼʌjñibalʌch i chaʼañob. Jiñi ñumen ñuc bʌ i cʼʌjñibal jiñʌch cheʼ mi laʼ pʌsben i chaʼan bʌ Jehová (Deuteronomio 6:4-9).

12. ¿Chuqui yom miʼ mel jiñi tatʌlob chaʼan miʼ cʌntan i yalobilob?

 ¹² Ti jujumpʼejl qʼuin ñumen an jontolil ila tiʼ pañimil (mulawil) Satanás. An quixtañujob yom bʌ i ticʼlañob la calobilob. Jiñi alpʼeñelob tajol miʼ wersa piʼlentelob. An tatʌlob wocol bʌ miʼ yubiñob chaʼan miʼ yʌlob yicʼot i yalobil iliyi. Pero yomʌch miʼ wʌn subeñob chaʼan ili jontol bʌ quixtañujob yicʼot miʼ pʌsbeñob i cʌntañob i bʌ. Tatʌlob, yom mi laʼ cʌntan laʼ walobilob (1 Pedro 5:8). *

13. ¿Bajcheʼ yom miʼ cʌntesan i yalobilob jiñi tatʌlob?

¹³ Jiñi tatʌlob añob tiʼ wenta i pʌsben jiñi i yalobilob  chaʼan yom wen i melbalob. ¿Bajcheʼ miʼ mejlel a mel? Anquese jiñi alʌlob yomʌch miʼ tijqʼuelob, mach yomic cʌlʌx tsʌts bajcheʼ maʼ mel (Jeremías 30:11). Jin chaʼan, mach a ticʼob ti a michʼajel. Tiʼ sujm mach laʼ womic laʼ low ti laʼ tʼan bajcheʼ jumpʼejl espada (Proverbios 12:18). Coltañob i ñaʼtan chucoch yomʌch miʼ jacʼob tʼan (Efesios 6:4; Hebreos 12:9-11; qʼuele jiñi nota 29).

14, 15. ¿Chucoch jiñi alpʼeñelob yomʌch miʼ jacʼbeñob i tʼan i tatob?

¹⁴ Jesús tiʼ pejtelel ora tsiʼ jacʼbe i tʼan i Tat, jinto jaʼel cheʼ bʌ wocol ti melol (Lucas 22:42; Juan 8:28, 29). Jehová yom chaʼan jiñi alobob miʼ jacʼbeñob i tʼan i tatob (Efesios 6:1-3).

¹⁵ Mi alpʼeñelet, tajol wocol maʼ wubin chaʼan maʼ jacʼben i tʼan a tatob. Pero cʼajtesan: Mi mucʼʌch a jaqʼueʼ tʼan, tijicña mi caj i yubin Jehová yicʼot a tatob (Proverbios 1:8; 6:20; 23:22-25). *

16. a) ¿Bajcheʼ miʼ ñop Satanás i yʌqʼueñob i mel chuqui mach bʌ weñic jiñi xcolelob? b) ¿Chucoch ñuc i cʼʌjñibal cheʼ jiñi a wamigojob miʼ cʼuxbiñob Jehová?

¹⁶ Satanás miʼ mejlel i cʼʌn a wamigojob yicʼot yambʌ xcolelob chaʼan maʼ mel mach bʌ weñic. Yujil chaʼan wocol mi caj a wubin chaʼan maʼañic maʼ jacʼ jiñi a xicʼol. Laʼ laj qʼuel jiñi ejemplo i chaʼan Dina, i yixicʼal (yixicpʼeñal) Jacob. Tsiʼ taja i yamigojob maʼañic bʌ miʼ cʼuxbiñob Jehová i jiñi tsiʼ yʌqʼue cabʌl wocol yicʼot tiʼ familia (Génesis 34:1, 2). Mi jiñi a wamigojob maʼañic miʼ cʼuxbiñob Jehová tajol mi caj i subeñetob a mel mach bʌ weñic. Mi tsaʼ mele, wen cʼux mi caj a wubin  jatet, a familia yicʼot Jehová (Proverbios 17:21, 25). Jin chaʼan, wen ñuc i cʼʌjñibal cheʼ jiñi a wamigojob mucʼʌch i cʼuxbiñob Jehová (1 Corintios 15:33).

17. ¿Chuqui añob tiʼ wenta jujuntiquil añoʼ bʌ ti familia?

¹⁷ Cheʼ bʌ yaʼ ti familia miʼ jacʼbeñob i ticʼojel tac Dios, maʼañic miʼ wen tajob wocol. Jin chaʼan, mi ñoxiʼalʌlet, cʼuxbin a wijñam yicʼot yom utset. Mi ijñamʌlet, qʼuele ti ñuc a ñoxiʼal, coltan ti chuqui miʼ ñaʼtan i mel yicʼot tsajcan jiñi ejemplo chaʼan jiñi xʼixic muʼ bʌ i yʌjlel ti Proverbios 31:10-31. Mi an a walobilob, pʌsbeñob i cʼuxbin Jehová (Proverbios 22:6). Mi ñoxiʼalʌlet yicʼot tatʌlet, yom wen maʼ mel a weʼtel bajcheʼ i jol jiñi familia (1 Timoteo 3:4, 5; 5:8). I jatetla alpʼeñeletbʌla, jacʼbenla i tʼan laʼ tatob (Colosenses 3:20). Yom mi laj cʼajtesan chaʼan jujuntiquil mi lac taj lac sajtemal, jin chaʼan yom an lac pecʼlel i mi laj cʼajtin i ñusʌntel lac mul. Bajcheʼ tsaʼix laj qʼuele, jiñi Biblia miʼ chʼʌm tilel i ticʼojel tac Jehová chaʼan miʼ tojʼesan jujuntiquil yaʼ ti familia.