1. Cheʼ bʌ añix ora cajel a chajpan ili libro, ¿chuqui ti cʼajtiya tajol maʼ melben a bʌ?

TI ILI libro tsaʼix a cʌñʌ i sujmlel tac am bʌ ti Biblia, bajcheʼ jiñi wʌn albil bʌ i chaʼan Dios chaʼan laj cuxtʌlel mach bʌ añic i jilibal, chuqui mi lac chaʼlen cheʼ mi lac chʌmel (sajtel) yicʼot jiñi pijtaya chaʼan chaʼ chʼojyel (Eclesiastés 9:5; Lucas 23:43, TNM; Juan 5:28, 29; Apocalipsis [Revelación] 21:3, 4). Tajol muqʼuix a wajñel tiʼ tempa bʌ tac i testigojob Jehová i maʼ ñop chaʼan jiñʌch jiñi i sujm bʌ ñopbalʌl (Juan 13:35). O wolix (choncolix) a chaʼlen wersa a pʼʌtʼesan  bajcheʼ añet a wicʼot Jehová i tsaʼix a ñaʼta a melben i yeʼtel (troñel). Jin chaʼan, tajol maʼ cʼajtiben a bʌ: «¿Chuqui yambʌ yom mic mel (chaʼlen) chaʼan mic melben i yeʼtel Dios?».

2. ¿Chucoch tsiʼ mulaj i chʼʌmjaʼ juntiquil wiñic chʼoyol bʌ ti Etiopía?

² Jiñʌch tsaʼ bʌ i cʼajtibe i bʌ juntiquil wiñic chʼoyol bʌ ti Etiopía tsaʼ bʌ chumle ti ñaxam bʌ siglo. Cheʼ bʌ añix ora i chʼojyel majlel Jesús ti panchan, juntiquil xcʌntʼan i chaʼan i cʼabaʼ Felipe tiʼ sube jiñi wen tʼan i tsiʼ pʌsbe chaʼan Jesús jiñʌch jiñi Mesías. Jiñi etíope toj sajtel i pusicʼal chaʼan tsaʼ bʌ i cʌñʌ i ti ora tsiʼ yʌlʌ: «Qʼuele, wʌʼan jaʼ. ¿Am ba chuqui miʼ mʌctañon chaʼan mic chʼʌm jaʼ?» (Hechos 8:26-36).

3. a) ¿Chuqui tiʼ sube Jesús jiñi xcʌntʼañob? b) ¿Bajcheʼ yom miʼ chaʼlen chʼʌmjaʼ juntiquil quixtañu?

³ Jiñi Biblia jamʌ tsiquil miʼ yʌl chaʼan mi a wom a melben i yeʼtel Jehová yom maʼ chaʼlen chʼʌmjaʼ. Jesús tiʼ sube jiñi xcʌntʼañob i chaʼan: «Sutqʼuiñob ti xcʌntʼañob winicob xʼixicob tiʼ pejtelel pañimil. Aqʼuenla chʼʌmjaʼ» (Mateo 28:19). Cheʼʌch tsiʼ pʌsʌ cheʼ bʌ tsiʼ chaʼle chʼʌmjaʼ. Pero mach cheʼic tsiʼ mele bajcheʼ lamital ñopbalʌl ti ili ora, mach cheʼic jach tiʼ tsijcayob ti jaʼ o tiʼ tsʼitaʼ mulbeyob i jol, tsiʼ junyajl supʼuyob (Mateo 3:16). Ili ora, cheʼ bʌ juntiquil xñoptʼan miʼ chʼʌmjaʼ, yom miʼ junyaj sujpʼel ti jaʼ jaʼel.

4. ¿Chuqui miʼ yʌcʼ ti cʌñol jiñi chʼʌmjaʼ?

⁴ Jiñi chʼʌmjaʼ miʼ pʌsben yambʌlob chaʼan juntiquil quixtañu yom sujtel tiʼ yamigo Dios yicʼot i melben i yeʼtel tiʼ sujm (Salmo 40:7, 8). Jin chaʼan, tajol maʼ cʼajtiben a bʌ: «¿Chuqui yom mic mel chaʼan mic chaʼlen chʼʌmjaʼ?».

5. a) ¿Chuqui yom maʼ mel cheʼ bʌ maxto a chʼʌmʌjaʼ? b) ¿Chucoch ñuc i cʼʌjñibal jiñi tempa bʌ tac?

⁵ Cheʼ bʌ muʼto a cajel ti chʼʌmjaʼ, yom maʼ cʌn Jehová yicʼot Jesús. Tsaʼix a teche a cʌn come wolix (yʌquelix) a chajpan jiñi Biblia (pejcan Juan 17:3). Pero anto yambʌ yom bʌ maʼ mel. Jiñi Biblia miʼ yʌl chaʼan yom an ‹wem bʌ a ñaʼtʌbal› chaʼan chuqui yom bʌ Dios (Colosenses 1:9). Jiñi tempa bʌ tac i chaʼan i testigojob Jehová mi caj i coltañet a pʼʌtʼesan bajcheʼ añet a wicʼot Jehová. Ili jiñʌch junchajp ñuc bʌ i sujmlel chucoch mach yomic maʼ cʌy a bʌ (Hebreos 10:24, 25).

6. ¿Bajcheʼ cʼamel yom a wujil chaʼan Biblia chaʼan maʼ mejlel ti chʼʌmjaʼ?

⁶ Jehová maʼañic miʼ pijtan chaʼan luʼ a wujilix muʼ bʌ i pʌs jiñi Biblia chaʼan maʼ chaʼlen chʼʌmjaʼ. Maʼañic tsiʼ pijta chaʼan jiñi etíope miʼ ñaxan luʼ cʌn chaʼan miʼ mejlel ti chʼʌmjaʼ (Hechos 8:30, 31). Maʼañic baʼ ora mi caj i yujtel laj cʌn tiʼ tojlel Jehová (Eclesiastés 3:11). Pero chaʼan maʼ mejlel ti chʼʌmjaʼ, yom maʼ cʌn jiñi ñuc tac bʌ i cʼʌjñibal am bʌ ti Biblia yicʼot maʼ chʼʌm ti ñuc (Hebreos 5:12).

7. ¿Bajcheʼ an i coltayet cheʼ maʼ chajpan jiñi Biblia?

⁷ Jiñi Biblia miʼ tsictesan chaʼan «mi maʼanic mi lac ñop Dios, mach mejlic i qʼuelonla ti utsʼat» (Hebreos 11:6). Jin chaʼan, yom an a ñopoñel (chʼujbiya) chaʼan maʼ mejlel ti chʼʌmjaʼ. Jiñi Biblia miʼ yʌl chaʼan ti wajali, ti jiñi tejclum Corinto, an wiñicob xʼixicob (quixtañujob) tsaʼ bʌ i ñʌchʼtayob jiñi xcʌntʼañob i chaʼan Jesús i «tsiʼ ñopoyob. Tsiʼ chʼʌmʌyob jaʼ» (Hechos 18:8). Lʌcʼʌ cheʼʌch jatet jaʼel, cheʼ woli a chajpan jiñi Biblia an i coltayet a taj a ñopoñel ti jiñi albil tac bʌ i chaʼan Dios yicʼot tiʼ cuxtʌlel Jesús, muʼ bʌ i locʼsañonla  ti mulil yicʼot chʌmel (Josué 23:14; Hechos 4:12; 2 Timoteo 3:16, 17).

8. ¿Chuqui mi caj i ñijcañet a sub woli bʌ a cʌn?

⁸ Cheʼ maʼ bej cʌn muʼ bʌ i pʌs jiñi Biblia yicʼot maʼ qʼuel bajcheʼ miʼ coltañet, jiñi a ñopoñel mi caj i ñumen pʼʌtʼan. Mi caj a mulan a wʌl jiñi woli bʌ a cʌn (Jeremías 20:9; 2 Corintios 4:13). Pero ¿majqui miʼ mejlel a subeñob?

9, 10. a) ¿Majqui miʼ mejlel a tech a subeñob woli bʌ a cʌn? b) ¿Chuqui yom maʼ mel mi a womix subtʼan yicʼot jiñi congregación?

⁹ Tajol miʼ mejlel a subeñob chuqui woli a cʌn jiñi a familia, a wamigojob, a piʼʌlob ti chumtʌl, a piʼʌlob ti clase o ti eʼtel. I weñʌch jiñi. Pero yom utset yicʼot wen jach maʼ mel tiʼ pejtelel ora. Ti wiʼil, mi caj a mejlel ti subtʼan yicʼot jiñi congregación. Cheʼ chajpʌbiletix maʼ wubin a bʌ, miʼ mejlel a pejcan jiñi Testigo woli bʌ i yʌqʼueñet estudio i maʼ suben chaʼan a wom subtʼan a wicʼot jiñi congregación. Mi jiñi Testigo miʼ ñaʼtan chaʼan chajpʌbiletix i wolʌch a chumtan jiñi mandar tac am bʌ ti Biblia, mi caj laʼ tempan laʼ bʌ yicʼot chaʼtiquil anciano yaʼ ti congregación.

¹⁰ Ti jiñi alʌ tempa bʌ, jiñi ancianojob mi caj i pejcañetob chaʼan miʼ qʼuelob mi mucʼʌch a chʼʌmben i sujm yicʼot maʼ ñop jiñi i sujmlel ñuc tac bʌ i cʼʌjñibal ti Biblia yicʼot mi woliyʌch a chumtan jiñi mandar tac. Mi caj i qʼuelob jaʼel mi tiʼ sujm a wom sujtel tiʼ testigo Jehová. Cʼajtesan chaʼan jiñi ancianojob miʼ cʌntañob jujuntiquil hermanojob, i yaʼʌch ochemet jaʼel. Jin chaʼan, mach a bʌcʼñan a pejcañob (Hebreos 13:17; 1 Pedro 5:2, 3). Cheʼ miʼ yujtel jiñi alʌ tempa bʌ, jiñi ancianojob  mi caj i subeñetob mi muqʼuix a mejlel ti subtʼan a wicʼot jiñi congregación

11. ¿Chucoch ñuc i cʼʌjñibal mi laj qʼuextan lac melbal cheʼ mi caj lac loqʼuel ti subtʼan?

¹¹ Tajol jiñi ancianojob miʼ subeñetob chaʼan anto chuqui yom maʼ qʼuextan chaʼan maʼ mejlel ti subtʼan. ¿Chucoch ñucʌch i cʼʌjñibal maʼ qʼuextan? Cheʼ bʌ mi lac chaʼlen subtʼan, woli la cʌcʼ ti cʌjñel Dios. Jin chaʼan, jiñi laj cuxtʌlel yomʌch miʼ yʌqʼuen i ñuclel (1 Corintios 6:9, 10; Gálatas 5:19-21).

12. ¿Chucoch ti lac pejtelel yom mi laj cʌy lac mul?

¹² Anto yambʌ yom bʌ maʼ mel cheʼ muʼto a cajel ti chʼʌmjaʼ. Jiñi apóstol Pedro tsiʼ yʌlʌ: «Jini chaʼan cʌyʌ laʼ mul. Sutqʼuin laʼ bʌ chaʼan miʼ yajpel laʼ mul» (Hechos 3:19). ¿Chuqui yom i yʌl cheʼ mi laj cʌy lac mul? Jin cheʼ mi lac wen ubin lac chʼijiyemlel chaʼan pejtelel mach bʌ weñic tsaʼ lac mele. Jumpʼejl ejemplo, mi tsaʼ mele tsʼiʼlel, yom maʼ cʌy a mul. ¿Ixcu mi tsaʼ chaʼle wersa a mel chuqui wen tiʼ pejtelel ora? Wersa yom maʼ cʌy a mul, come ti lac pejtelel mi lac taj lac sajtemal i la com chaʼan Dios miʼ ñusʌbeñonla (Romanos 3:23; 5:12).

13. ¿Chuqui yom i yʌl cheʼ mi lac sutqʼuin lac bʌ?

¹³ ¿Jasʌl ba yom mi lac wen ubin lac chʼijiyemlel chaʼan tsaʼ bʌ lac mele? Maʼañic. Jiñi apóstol Pedro tsiʼ yʌlʌ jaʼel: «Sutqʼuin laʼ bʌ». Ili yom i yʌl chaʼan yom maʼ tsʼaʼlen pejtelel mach bʌ weñic a melbal i maʼ tech a mel chuqui wen. Ñaʼtancu iliyi: Jatet woli a majlel ti jumpʼejl tejclum baʼ maxto ajñemetic. Tiʼ jumujcʼlel maʼ qʼuel chaʼan mach tojic baqui woli a majlel. ¿Chuqui mi caj a mel? Tiʼ sujm ñumen cʼunteʼ mi caj a majlel, mi caj a waʼtʌl, i mi caj a chaʼ sujtel chaʼan maʼ majlel ti toj bʌ  bij. Lʌcʼʌ cheʼʌch jaʼel cheʼ maʼ chajpan jiñi Biblia, tajol mi caj a qʼuel chaʼan anto chuqui yom maʼ qʼuextan ti a cuxtʌlel. Jin chaʼan, yomʌch maʼ chaʼ sujtel, yom i yʌl, maʼ qʼuextan jiñi mach bʌ tojic i maʼ tech a mel chuqui wen.

14. ¿Chuqui yom mi lac mel chaʼan mi la cʌcʼ lac bʌ ti Dios?

¹⁴ Yambʌ junchajp ñuc bʌ i cʼʌjñibal yom bʌ maʼ mel cheʼ muʼto a cajel ti chʼʌmjaʼ jiñʌch cheʼ maʼ wʌcʼ a bʌ ti Dios. Cheʼ bʌ an majqui yom i yʌcʼ i bʌ, miʼ melben jumpʼejl oración Jehová baqui miʼ yʌqʼuen i tʼan chaʼan cojach mi caj i chʼujutesan i jiñi ñumen ñuc bʌ i cʼʌjñibal tiʼ cuxtʌlel jin cheʼ miʼ melben i yeʼtel (Mateo 4:10).

15, 16. ¿Chuqui miʼ ñijcan chaʼan juntiquil miʼ yʌcʼ i bʌ ti Dios?

¹⁵ Cheʼ maʼ wʌqʼuen a tʼan Jehová chaʼan cojach mi caj a melben i yeʼtel lajal bajcheʼ maʼ suben juntiquil muʼ bʌ a wen cʼuxbin chaʼan mi caj a wajñel a wicʼot tiʼ pejtelel ora. Ñaʼtancu tiʼ tojlel i noviojoʼ bʌ i bʌ. Cheʼ jiñi wiñic miʼ ñumen cʌn i novia, miʼ cʼotel i cʼuxbin i miʼ mulan ñujpuñel yicʼot. Anquese ili yomʌch miʼ wen ñaʼtan, mucʼʌch i ñujpuñel yicʼot come miʼ cʼuxbin.

¹⁶ Cheʼ bʌ maʼ ñumen cʌn Jehová, miʼ cʼotel a wen cʼuxbin i a wom a mel chuqui jach chaʼan maʼ melben i yeʼtel. Ili mi caj i ñijcañet chaʼan maʼ wʌcʼ a bʌ ti Dios. Jesús tiʼ sube jiñi xcʌntʼañob i chaʼan: «Mi an majqui yom i tsajcañon, laʼ i len cʌy chuqui yom i bajñel pusicʼal» (Marcos 8:34). Cheʼ mi laj cʌy chuqui bajñel yom lac pusicʼal, yom i yʌl chaʼan cojach mi caj lac jacʼben i tʼan Jehová. Ñumen ñuc bʌ mi caj a qʼuel jiñʌch chuqui yom i mach jiñic chuqui maʼ bajñel mulan o a wom bʌ a taj (pejcan 1 Pedro 4:2).

17. ¿Chucoch an quixtañujob maʼañic bʌ miʼ yʌcʼob i bʌ ti Jehová?

¹⁷ An quixtañujob maʼañic bʌ miʼ yʌcʼob i bʌ ti Jehová come miʼ bʌcʼñañob chaʼan maʼañic miʼ tsʼʌctesañob i tʼan. Tajol mach yomobic i yʌqʼuen i chʼijiyemlel. O miʼ ñaʼtañob chaʼan maʼañic mi caj i mejlelob tiʼ caj chuqui tac miʼ melob come maxto i yʌcʼʌyob i bʌ tiʼ tojlel.

18. ¿Chuqui mi caj i coltañet a mʌlben jiñi a bʌqʼuen chaʼan maʼ wʌqʼuen i chʼijiyemlel Jehová?

¹⁸ Jiñi a cʼuxbiya ti Jehová mi caj i coltañet a mʌlben (jotben) jiñi a bʌqʼuen chaʼan maʼ wʌqʼuen i chʼijiyemlel. Cheʼ jaʼel, mi caj i coltañet a chaʼlen wersa a tsʼʌctesan a tʼan (Eclesiastés 5:4; Colosenses 1:10). I mach wen wocolic mi caj a wubin tiʼ melol chuqui yom. Jiñi apóstol Juan tsiʼ yʌlʌ: «Come i cʼuxbintel Dios jiñʌch i chʼujbibentel i mandar. Mach wocolic i mandar» (1 Juan 5:3).

19. ¿Chucoch mach yomic maʼ bʌcʼñan a wʌcʼ a bʌ ti Jehová?

¹⁹ Mach cʼʌñʌlic tojonla chaʼan mi la cʌcʼ lac bʌ ti Jehová. Maʼañic miʼ pijtan chaʼan mi lac mel mach bʌ mejlic lac mel (Salmo 103:14). Cheʼ jaʼel, Jehová mi caj i coltañet a mel chuqui wen (Isaías 41:10). Cheʼ bajcheʼ miʼ yʌl jiñi Biblia: «Mux caj i chajpʌbeñet a bijlel». Jin chaʼan, ñopo Jehová tiʼ pejtelel a pusicʼal (Proverbios 3:5, 6).

20. ¿Chuqui yom maʼ mel mi tsaʼix a wʌcʼʌ a bʌ ti Jehová?

²⁰ ¿Chajpʌbiletix ba maʼ ñaʼtan chaʼan maʼ wʌcʼ a bʌ ti Jehová? Mi tsaʼix a wʌcʼʌ a bʌ, chajpʌbiletix chaʼan jiñi yambʌ ñuc bʌ i cʼʌjñibal: Jiñi chʼʌmjaʼ.

21, 22. ¿Bajcheʼ miʼ mejlel a sub ñopol bʌ a chaʼan tiʼ tojlel cabʌlob?

 ²¹ Suben jiñi coordinador i chaʼan ancianojob chaʼan tsaʼix a wʌcʼʌ a bʌ ti Jehová i a womix chʼʌmjaʼ. Mi caj i chʼʌm tiʼ wenta chaʼan miʼ yajcan yambʌ ancianojob chaʼan mi laʼ qʼuel jiñi cʌntesʌntel tac ñuc bʌ i cʼʌjñibal ti Biblia. Mi tsiʼ qʼueleyob chaʼan chajpʌbiletix, mi caj i subeñetob chaʼan maʼ mejlel ti chʼʌmjaʼ ti jiñi yambʌ colem tempa bʌ i chaʼan i testigojob  Jehová. Yaʼi mi caj i ñusʌntel jumpʼejl discurso baʼ miʼ tsictesʌntel chuqui i sujmlel jiñi chʼʌmjaʼ. Jiñi hermano muʼ bʌ i yʌcʼ jiñi discurso mi caj i mel chaʼpʼejl cʼajtiya mach bʌ wocolic tiʼ tojlel muʼ bʌ i cajelob ti chʼʌmjaʼ. Cheʼ maʼ jacʼ ili cʼajtiya tac, woli a sub ñopol bʌ a chaʼan tiʼ tojlel cabʌlob (Romanos 10:10).

²² Cheʼ jiñi, maʼ cajel ti chʼʌmjaʼ. Mi caj i supʼetob ti jaʼ. Jiñi mi caj i pʌsben jiñi yaʼ bʌ añob chaʼan tsaʼix  a wʌcʼʌ a bʌ ti Jehová i chaʼan ti jimbʌ ora i testigojetix Jehová.

23. ¿Chuqui yom i yʌl cheʼ mi lac chaʼlen chʼʌmjaʼ «tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu»?

²³ Jesús tsiʼ yʌlʌ chaʼan jiñi xcʌntʼañob i chaʼan mi caj i chʼʌmob jaʼ «tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu» (pejcan Mateo 28:19). ¿Chuqui yom i yʌl ili tʼan tac? Chaʼan mi laj qʼuel ti ñuc i yeʼtel Jehová, mi laj qʼuel ti ñuc bajcheʼ miʼ cʼʌn Jesús chaʼan miʼ tsʼʌctiyel ñaʼtʌbil bʌ i chaʼan yicʼot bajcheʼ miʼ cʼʌn chʼujul bʌ i yespíritu chaʼan miʼ tsʼʌctesan chuqui yom (Salmo 83:18, TNM; Mateo 28:18; Gálatas 5:22, 23; 2 Pedro 1:21).

24. ¿Chuqui i sujmlel jiñi chʼʌmjaʼ?

²⁴ Wen ñuc i sujmlel jiñi chʼʌmjaʼ. Cheʼ maʼ sujpʼel ti jaʼ, miʼ «chʌmel» jiñi a melbal tac ti ñaxan, yom i yʌl chaʼan maʼ cʌy. Cheʼ maʼ loqʼuel yaʼ ti jaʼ, muqʼuix a tech tsijiʼ bʌ a cuxtʌlel chaʼan maʼ mel chuqui yom Jehová. Cheʼ bajcheʼ jiñi, maʼ pʌs chaʼan ti jimbʌ ora i wiñiquetix Dios. Cʼajtesan chaʼan maʼañic tsaʼ wʌcʼʌ a bʌ tiʼ tojlel juntiquil quixtañu, jumpʼejl organización o jumpʼejl eʼtel. Tsaʼ wʌcʼʌ a bʌ tiʼ tojlel Jehová.

25. ¿Chuqui mi caj laj qʼuel ti jiñi cojix bʌ cʌntesʌntel?

²⁵ Cheʼ tsaʼ wʌcʼʌ a bʌ ti Jehová mi caj i coltañet a pʼʌtʼesan bajcheʼ añet a wicʼot (Salmo 25:14). Pero jiñi chʼʌmjaʼ mach yomic i yʌl chaʼan tsaʼix coltʌntiyonla. Jesús tsiʼ yʌlʌ: «Jini muʼ bʌ i cuch i wocol cʼʌlʌl tiʼ jilibal mi caj i coltʌntel» (Mateo 24:13). Jiñi chʼʌmjaʼ i tejchibal jaxto chaʼan miʼ mejlel lac taj laj coltʌntel. Cheʼ jiñi ¿chuqui miʼ mejlel a mel chaʼan chʌn i yamigojet Jehová? Jiñi cojix bʌ cʌntesʌntel mi caj i jacʼ ili cʼajtiya.