Cʼuxbibil bʌ xsubtʼañob:

Laʼcu lac ñaʼtan chaʼan joñonla jiñi chaʼtiqui uxtiquil apóstolob i yaʼañonla ti Olivo wits. Jesús miʼ pʌs i bʌ ti lac tojlel i cheʼ bʌ mi caj i letsel majlel ti panchan miʼ subeñonla: «Mi caj laʼ taj laʼ pʼʌtʌlel cheʼ bʌ jiñi chʼujul bʌ espíritu miʼ tilel ti laʼ tojlel. I mi caj laʼ sujtel tic testigo ti Jerusalén, tiʼ petol Judea yicʼot ti Samaria, i cʼʌlʌlto ti ñajt bʌ pañimil» (Hech. 1:8). ¿Bajcheʼ yubil mi caj la cubin?

Tajol mi lac bʌcʼñan ili eʼtel i mi laj cʼajtiben lac bʌ: «Pero ¿bajcheʼ mi caj lac sub jiñi wen tʼan ‹cʼʌlʌlto ti ñajt bʌ pañimil› cheʼ mach wen cabʌloñicla?». Tajol mi laj cʼajtesan tsaʼ bʌ i yʌlʌ Jesús cheʼ bʌ muqʼuix caj i chʌmel: «Jiñi xyaj eʼtel mach ñumen ñuquic bajcheʼ i yum. Mi tsaʼʌch i contrajiyoñob, mi caj i contrajiñetla jaʼel, mi tsaʼʌch i jacʼʌyob jiñi c tʼan, mi caj i jacʼob laʼ tʼan jaʼel. Pero mi caj i melob pejtelel iliyi ti laʼ tojlel tiʼ caj jiñi j cʼabaʼ, come mach i cʌñʌyobic jiñi tsaʼ bʌ i chocoyon tilel» (Juan 15:20, 21). Tiʼ caj ili tsaʼ bʌ ajli, tajol mi la cʌl: «¿Bajcheʼ mi caj lac sub jiñi wen tʼan cheʼ an tsa’ laj contrajob mi’ cajel?».

Laʼ la cʌl chaʼan bʌ ili ora. Jiñi i testigojonbʌla Jehová lʌcʼʌ lajal chuqui woliʼ yujtel ti lac tojlel come an ti lac wenta chaʼan mi lac suben «quixtañujob tiʼ pejtelel tejclum» jiñi wen tʼan «cʼʌlʌlto ti ñajt bʌ pañimil» (Mat. 28:19, 20). ¿Bajcheʼ mi caj lac tsʼʌctesan mi jiñi Biblia tsiʼ wʌn alʌ chaʼan mi caj laj contrajintel?

Jiñi libro chaʼan Hechos miʼ pʌsbeñonla bajcheʼ jiñi apóstolob yicʼot xñoptʼañob cheʼ ti ñaxam bʌ siglo tsaʼʌch mejliyob ti subtʼan come Jehová tsiʼ coltayob. Ili libro tsaʼ mejli chaʼan miʼ coltañonla lac tsajin yicʼot lac chumtan jiñi relato tac. Mi caj i toj sajtel lac pusicʼal cheʼ mi laj qʼuel chuqui tac lajal tiʼ tojlel jiñi xñoptʼañob cheʼ ti ñaxam bʌ siglo yicʼot jiñi añoʼ bʌ ili ora. Mi caj laj qʼuel chaʼan mach jin jach lajal jiñi eʼtel muʼ bʌ lac mel, yicʼotʌch bajcheʼ chajpʌbil ili eʼtel. Cheʼ bʌ mi laj qʼuel pejtelel iliyi, mi caj i coltañonla lac ñumen ñop chaʼan Jehová jiñʌch woli bʌ i bej qʼuel jiñi i yorganización am bʌ ila ti Lum.

Mic chaʼlen lojon oración ti laʼ tojlel chaʼan cheʼ bʌ mi laʼ tsajin jiñi libro chaʼan Hechos mi laʼ ñumen ñop chaʼan Jehová mi caj i cʼʌn jiñi chʼujul bʌ i yespíritu chaʼan miʼ coltañetla. Mic ñop lon chaʼan ili libro mi caj i coltañetla chaʼan mi laʼ sub «ti tsʼʌcʌl chaʼan bʌ jiñi i Yumʌntel Dios» yicʼot chaʼan mi laʼ coltan jiñi lac piʼʌlob chaʼan miʼ yochelob ti jiñi bij muʼ bʌ i yʌqʼueñob i taj i cuxtʌlel (Hech. 28:23; 1 Tim. 4:16).