1, 2. ¿Chuqui tsaʼ ujti tiʼ tojlel Pablo yicʼot Bernabé ti Listra?

 TI LISTRA, Pablo yicʼot Bernabé tsaʼ ujti i tsʼʌcañob juntiquil wiñic mach bʌ añic miʼ mejlel ti xʌmbal cʼʌlʌl tsiʼ yila pañimil (tsaʼ chʼocʼa), i wʌle muqʼuix i tijpʼel tiʼ tijicñʌyel. Tiʼ caj iliyi, jiñi lac piʼʌlob wen tijicñayob i tsaʼ caji i yʌlob chaʼan diosob. Jiñi i sacerdote Zeus tsiʼ chʼʌmʌ tilel corona tac chaʼan miʼ yʌqʼueñob tiʼ jol yicʼot tsiʼ tujcʼayob tilel wacax come yom i tsʌnsʌbeñob. Tiʼ caj ñajtto tsiquil juʼucñayob jiñi lac piʼʌlob yicʼot i yuqʼuel jiñi wacax, Pablo yicʼot Bernabé ti cʼam bʌ tʼan tsaʼ caji i subeñob chaʼan maʼañic miʼ chʼujutesʌntelob. Tiʼ tsiliyob i pislel, ti ajñel tsaʼ ochiyob yaʼ baqui an jiñi yonlel lac piʼʌlob i cheʼ bʌ tsaʼ ujti i wen cʼajtiñob ti wocol tʼan, jiñi lac piʼʌlob maʼañix tsaʼ caji i chʼujutesañob.

² Cheʼ jiñi tsaʼ cʼotiyob judíojob tilemoʼ bʌ ti Iconio yicʼot ti Antioquía de Pisidia añoʼ bʌ tiʼ contra jiñi wen tʼan i tsaʼ caji i yʌlob lot tac tiʼ tojlel Pablo yicʼot Bernabé. Jiñi añoʼ bʌ ti Listra tsaʼʌch i ñopoyob i tsaʼto i ñopoyob i tsʌnsan. ¡Ti ora jach tsaʼ luʼ qʼuextʌyi! ¡Jiñi yomoʼ bʌ i chʼujutesan Pablo ti ñaxan, wʌle yomobix i tsʌnsan! Jin chaʼan, tsiʼ joyoyob i tsaʼ caji i julob ti xajlel jinto chʌmeñix yilal. Cheʼ bʌ tsaʼ ujti i julob ti xajlel, tsiʼ ñaʼtayob chaʼan chʌmeñix i tsiʼ tujcʼayob loqʼuel yaʼ ti tejclum.

3. ¿Chuqui ti cʼajtiya tac mi caj i jajqʼuel ti ili capítulo?

³ ¿Chucoch cheʼ tsaʼ ujtiyob bajcheʼ iliyi? ¿Chuqui mi laj cʌn ti tsaʼ bʌ ujti tiʼ tojlel Pablo, Bernabé yicʼot jiñi chumuloʼ bʌ ti Listra? ¿Bajcheʼ miʼ mejlel jiñi ancianojob i lajiñob bajcheʼ tsiʼ cuchuyob wocol ili chaʼtiquil wiñicob tsaʼ bʌ i tsʼʌctesayob yicʼot i chʼejlel jiñi eʼtel (troñel) tsaʼ bʌ i yʌqʼueyob Jehová? (Hech. 14:3). Laʼ laj qʼuel.

4, 5. ¿Chucoch tsaʼ majli Pablo yicʼot Bernabé ti Iconio, i chuqui tsaʼ ujti yaʼi?

⁴ Cheʼ bajcheʼ tsaʼix laj qʼuele, Pablo yicʼot Bernabé tsaʼ chojquiyob loqʼuel  chaʼpʼej uxpʼejl qʼuin yaʼ ti Antioquía de Pisidia tiʼ mul jiñi judíojob añoʼ bʌ tiʼ contra jiñi wen tʼan. Pero maʼañic tsiʼ yubiyob i chʼijyemlel, «tsiʼ tijcayob i tsʼubenlel i yoc» tiʼ tojlel jiñi lac piʼʌlob maʼañic bʌ tsiʼ mulayob jiñi i sujmlel (Hech. 13:50-52; Mat. 10:14). Cheʼ jiñi, tsaʼ loqʼuiyob yaʼ ti tejclum i tsaʼ jax i yʌqʼueyob tiʼ wenta Dios (Hech. 18:5, 6; 20:26). Pero maʼañic tiʼ sʌtʌyob i tijicñʌyel i tsiʼ xʌñʌyob majlel cheʼ bʌ 150 kilómetro yaʼ ti sureste, jinto tsaʼ cʼotiyob ti jumpʼejl joctʌl am bʌ tiʼ tʼejl jiñi bujtʌl Tauro yicʼot jiñi wits Sultán.

⁵ Tsaʼ ñaxan ñumiyob ti Iconio, jumpʼejl colem tejclum am bʌ ti Galacia chuculto bʌ ti Roma, i maʼañic cʌyʌl i chaʼañob jiñi i culturajob griego bʌ. a Yaʼi cabʌl judíojob yicʼot muʼ bʌ i tsajcʌbeñob i cʌntesa judíojob. Pablo yicʼot Bernabé tsaʼ majliyob ti subtʼan ti sinagoga cheʼ bajcheʼ ñʌmʌlob i mel (chaʼlen) (Hech. 13:5, 14). «Cabʌl judíojob yicʼot griegojob tsaʼ sujtiyob ti xñoptʼan chaʼan bajcheʼ tsiʼ chaʼleyob tʼan» (Hech. 14:1).

6. ¿Chucoch Pablo yicʼot Bernabé wem bʌ xcʌntesajob, i bajcheʼ miʼ mejlel lac lajiñob?

⁶ ¿Chucoch Pablo yicʼot Bernabé wem bʌ xcʌntesajob? Pablo wen i cʌñʌ muʼ bʌ i yʌl jiñi Biblia. Wen yujil bajcheʼ miʼ tsictesan jiñi relato tac, texto tac yicʼot jiñi profecía tac chaʼan miʼ pʌs chaʼan Jesús jiñʌch jiñi Mesías tsaʼ bʌ wʌn ajli (Hech. 13:15-31; 26:22, 23). I Bernabé juntiquilʌch muʼ bʌ i wen chʼʌm ti ñuc yañoʼ bʌ (Hech. 4:36, 37; 9:27; 11:23, 24). Tiʼ chaʼticlelob miʼ chaʼleñob tʼan come «jiñʌch Jehová tsaʼ bʌ i yʌqʼueyob i yeʼtel», i mach jiñic miʼ yʌlob chuqui miʼ bajñel ñaʼtañob. ¿Bajcheʼ miʼ mejlel a lajiñob cheʼ bʌ maʼ chaʼlen subtʼan? Mele iliyi: Wen tsajin muʼ bʌ i yʌl jiñi i Tʼan Dios, yajcan texto tac muʼ bʌ i mejlel i mulan jiñi lac piʼʌlob, qʼuele bajcheʼ maʼ mejlel a ñuqʼuesʌben i pusicʼal jiñi muʼ bʌ i ñʌchʼtañetob i yom chucul ti Biblia jiñi a cʌntesa, mach jiñic ti chuqui maʼ bajñel ñaʼtan.

7. a) ¿Chuqui miʼ yujtel cheʼ bʌ jiñi lac piʼʌlob miʼ yubiñob jiñi wen tʼan? b) ¿Chuqui yom maʼ cʼajtesan mi an a familia mach bʌ yomic chaʼan maʼ jacʼben i tʼan Jehová?

⁷ Lucas miʼ yʌl chaʼan yaʼ ti Iconio mach tiʼ pejtelelobic tsiʼ jacʼʌyob jiñi wen tʼan: «Jiñi judíojob mach bʌ añic tsiʼ ñopoyob tsiʼ ñijcʌbeyob i pusicʼal jiñi lac piʼʌlob ti tejclum tac i tsiʼ yʌcʼʌyob tiʼ contra jiñi hermanojob». Pero Pablo yicʼot Bernabé tsiʼ ñaʼtayob chaʼan miʼ bej cʌlelob ti subtʼan. Jiñi relato miʼ yʌl chaʼan «cabʌl ora tsiʼ chaʼleyob tʼan yicʼotob i chʼejlel», i tiʼ caj jiñi, «jiñi lac piʼʌlob yaʼ ti tejclum tsiʼ tʼoxoyob i bʌ: An muʼ bʌ i coltañob jiñi judíojob i an yambʌlob muʼ bʌ i coltañob jiñi apóstolob» (Hech. 14:2-4). Ili ora jaʼel, cheʼ bʌ mi lac sub jiñi wen tʼan, an lac piʼʌlob muʼ bʌ i temob i bʌ i an muʼ bʌ i tʼoxob i bʌ (Mat. 10:34-36). ¿Am ba a familia mach bʌ yomic chaʼan maʼ jacʼben i tʼan Jehová? Mi añʌch, cʼajtesan chaʼan an i tajol cheʼob bajcheʼ jiñi tiʼ caj miʼ ñopob chuqui tac miʼ yʌjlel o jiñi lot tac muʼ bʌ i yʌjlel ti lac tojlel. Pero jiñi wem bʌ a melbal (chaʼlibal) mi caj i pʌsbeñob chaʼan mach i sujmic pejtelel jiñi i ti wiʼil tajol weñix miʼ caj i qʼueletob (1 Ped. 2:12; 3:1, 2).

8. ¿Chucoch tsaʼ loqʼuiyob majlel Pablo yicʼot Bernabé yaʼ ti Iconio, i chuqui mi laj cʌn?

 ⁸ Ti wiʼil, jiñi añoʼ bʌ ti Iconio añoʼ bʌ tiʼ contra Pablo yicʼot Bernabé tsaʼ caji i ñaʼtañob bajcheʼ miʼ mejlel i tsʌnsañob. Pero cheʼ bʌ Pablo yicʼot Bernabé tsiʼ yubiyob, tsaʼ majliyob ti subtʼan ti yambʌ tejclum (Hech. 14:5-7). Joñonla jaʼel tsajaloñʌchla (mij cʌntan lac bʌ). Cheʼ bʌ mi lac ñiqʼui subentel, maʼañic mi lac bʌcʼñan laj coltan lac bʌ (Filip. 1:7; 1 Ped. 3:13-15). Pero mi tsaʼ laj qʼuele chaʼan mi caj i tejchel jumpʼejl wocol, maʼañic mi lac mel muʼ bʌ i mejlel i yʌcʼonla ti wocol joñonla o la quermañujob (Pr. 22:3).

9, 10. ¿Baqui cʌylem jiñi tejclum Listra, i bajcheʼ yilal jiñi chumuloʼ bʌ yaʼi?

⁹ Wʌle tsaʼix majliyob ti Listra. Ili tejclum am bʌ 30 kilómetro i ñajtlel tiʼ suroestejlel Iconio, wen ñʌmʌlob yicʼotob jiñi añoʼ bʌ ti Antioquía de Pisidia, pero ti Listra mach cabʌlic judíojob. Jiñi chumuloʼ bʌ ilayi yujilob jiñi tʼan griego, pero ñoj i tʼañoʼ bʌ jiñʌch licaonio. Pablo yicʼot Bernabé tsaʼ cajiyob ti subtʼan baqui an yonlel lac piʼʌlob, tajol tiʼ caj maʼañic jumpʼejl sinagoga. Cheʼ jaʼel, Pablo tsiʼ mele jumpʼejl milagro tsaʼix bʌ i mele Pedro yaʼ ti Jerusalén: Tiʼ tsʼʌca juntiquil wiñic mach bʌ tojic i yoc cʼʌlʌl tsiʼ yila pañimil (Hech. 14:8-10). Chaʼan jiñi milagro tsaʼ bʌ i mele Pedro yonlel lac piʼʌlob tsaʼ sujtiyob ti xñoptʼan, pero mach cheʼic tsaʼ ujti yicʼot jiñi tsaʼ bʌ i mele Pablo (Hech. 3:1-10).

¹⁰ Jiñi añoʼ bʌ ti Listra miʼ chʼujutesañob cabʌl dios. Jin chaʼan, cheʼ bʌ tsiʼ qʼueleyob chaʼan tsaʼ cʼoqʼuesʌnti jiñi wiñic, tsiʼ ñaʼtayob chaʼan Pablo yicʼot Bernabé diosob. Tsiʼ ñaʼtayob chaʼan Bernabé jiñʌch Zeus, jiñi ñumen ñuc bʌ dios muʼ bʌ i chʼujutesañob jiñi griegojob, i chaʼan Pablo jiñʌch i yalobil i cʼabaʼ Hermes, muʼ bʌ i majlel i ñusʌben tʼan jiñi yambʌ diosob (qʼuele jiñi recuadro « Listra yicʼot i chʼujutesʌntel Zeus yicʼot Hermes»). Pero Pablo yicʼot Bernabé yomʌch i jamʌ tsictesañob chaʼan mach diosobic, tsaʼ bʌ i yʌqʼueyob i chʼejlel yicʼot i pʼʌtʌlel chaʼan miʼ chaʼleñob tʼan yicʼot miʼ melob milagro tac jiñʌch Jehová, jiñi i sujm bʌ Dios (Hech. 14:11-14).

11-13. a) ¿Chuqui tsiʼ yʌlʌyob Pablo yicʼot Bernabé? b) ¿Chuqui mi laj cʌn ti tsaʼ bʌ i yʌlʌ Pablo yicʼot Bernabé?

¹¹ Anquese mach ñoj weñic tsaʼ bʌ i meleyob jiñi lac piʼʌlob, Pablo yicʼot Bernabé tsaʼʌch i sʌclayob bajcheʼ miʼ mejlelob ti cʼotel tiʼ pusicʼalob. Tsiʼ yʌlʌyob: «Wiñicob, ¿chucoch woli (choncol) laʼ mel iliyi? Wiñicon jach lon jaʼel i an lon j cʼunlel bajcheʼ laʼ chaʼan. Woli (yʌquel) lon c subeñetla jiñi wen tʼan chaʼan mi laʼ cʌy jiñi mach bʌ añic tac i cʼʌjñibal i mi laʼ sujtel tiʼ tojlel jiñi cuxul bʌ Dios, jiñi tsaʼ bʌ i mele panchan, lum, mar yicʼot pejtelel chuqui an yaʼi. Ti wajali, Dios tsiʼ yʌcʼʌ chaʼan jujumpʼejl tejclum miʼ chʼʌm i bijlel, anquese maʼañic tsiʼ cʌyʌ i yʌcʼ i bʌ ti cʌjñel cheʼ tsiʼ mele chuqui tac wen. Tsiʼ yʌqʼueyob jaʼal yicʼot cabʌl i wut i pʌcʼʌʼob, tsiʼ yʌqʼueyob cabʌl i bʌl i ñʌcʼ i tsiʼ butʼbeyob i pusicʼal tiʼ tijicñʌyel» (Hech. 14:15-17). Ili texto tsaʼ bʌ i tsʼijbu Lucas miʼ pʌsbeñonla bajcheʼ miʼ mejlel lac subeñob wen tʼan jiñi mach bʌ xñoptʼañobic.

¹² ¿Chuqui jiñi muʼ bʌ lac ñaxan cʌn? Pablo yicʼot Bernabé maʼañic tsiʼ ñopo i pʌsob chaʼan ñumen ñucob. Tsiʼ pʌsʌyob i pecʼlel come tsiʼ yʌlʌyob chaʼan wiñicob jach jaʼel yicʼot chaʼan añob i cʼunlel. I sujmʌch chaʼan tsaʼix i cʌyʌyob jiñi mach tac bʌ i sujmic cʌntesa, tsaʼ aqʼuentiyob jiñi chʼujul bʌ espíritu yicʼot añob i pijtaya chaʼan miʼ chaʼleñob yumʌntel yicʼot Cristo ti panchan. Pero yujilob jaʼel chaʼan jiñi chumuloʼ bʌ ti Listra miʼ mejlel i tajob jaʼel ili bendición tac mi mucʼʌch i jacʼbeñob i tʼan Cristo.

¹³ Ixcu joñonla, ¿chuqui mi lac ñaʼtan tiʼ  tojlel jiñi muʼ bʌ lac subeñob wen tʼan? ¿Lajalob jach ba mi laj qʼuelob bajcheʼ joñonla? Mi jiñi muʼ bʌ lac pʌsbeñob jiñi i Tʼan Dios miʼ tech i yʌqʼueñoñobla lac ñuclel, ¿muʼ ba lac mʌctañob cheʼ bajcheʼ tsiʼ mele Pablo yicʼot Bernabé? Charles Russell, tsaʼ bʌ i qʼuele jiñi subtʼan tiʼ yujtibal majlel jiñi siglo 19 yicʼot tiʼ tejchibal jiñi siglo 20, tsiʼ cʌybeyonla wem bʌ ejemplo. Anquese wen yujil cʌntesa, ti jumpʼejl bʌ qʼuin tiʼ tsʼijbu: «Mach comic lojon chaʼan mi cʌqʼuentel lon c ñuclel, mi jiñicto jiñi muʼ bʌ lon c tsʼijbun. Cheʼ jaʼel, mach comic lojon chaʼan mic subentel lon ti reverendo o maestro». Tiʼ sujm, tsaʼʌch i wen pʌsʌ i pecʼlel bajcheʼ Pablo yicʼot Bernabé. Cheʼ bʌ mi lac chaʼlen subtʼan mach la comic chaʼan mi lac taj lac ñuclel, la com bʌ jiñʌch chaʼan mi laj coltan lac piʼʌlob chaʼan miʼ sujtelob tiʼ tojlel jiñi cuxul bʌ Dios.

14-16. ¿Chuqui yambʌ chaʼchajp mi laj cʌn ti tsaʼ bʌ i yʌlʌ Pablo yicʼot Bernabé ti Listra?

¹⁴ Laʼ laj qʼuel jiñi i chaʼchajplel muʼ bʌ laj cʌn. Pablo yicʼot Bernabé tsiʼ tajayob tiʼ tʼan chuqui tac i cʌñʌyobix bʌ jiñi lac piʼʌlob. Jiñi judíojob yicʼot jiñi muʼ bʌ i tsajcʌbeñob i cʌntesa judíojob ti Iconio i cʌñʌyobix jiñi tsʼijbujel yicʼot chaʼan Dios tsiʼ yajca jiñi tejclum Israel, pero jiñi chumulob bʌ ti Listra mach i wis cʌñʌyobic ili. Pero i cʌñʌyobʌch chaʼan bʌ jiñi pʌcʼʌbʌl tac. Wen jiñi clima yaʼ ti tejclum yicʼot wen yujil acʼol i wut jiñi pʌcʼʌbʌl. Jin chaʼan, mach wocolic mi caj i qʼuelob jiñi melbalʌl tac am bʌ i chaʼan Dios cheʼ tiʼ yorajlel miʼ lotbeñob i wut i pʌcʼʌʼob, jin chaʼan Pablo yicʼot Bernabé tsiʼ tajayob ti tʼan ili chaʼan miʼ subeñob jiñi wen tʼan (Rom. 1:19, 20).

¹⁵ Joñonla jaʼel miʼ mejlel lac mel bajcheʼ iliyi. Anquese jiñi xpacʼ junsujm jach chuqui miʼ pʌcʼ ti cabʌl lum, mach junlajalic bajcheʼ mi caj i tojʼesan jiñi lum. An lum tac cʼuñix bʌ i muqʼuix i mejlel i cʼʌn ti pacʼ, pero an yan tac bʌ yomto bʌ miʼ tojʼesan. Cheʼʌch miʼ yujtel ti lac subtʼan jaʼel. Junsujm jach jiñi muʼ bʌ lac sub: Jiñʌch jiñi i Yumʌntel Dios am bʌ yaʼ tiʼ Tʼan. Pero cheʼ bajcheʼ Pablo yicʼot Bernabé, yom mi laj qʼuel bajcheʼ yilal lac piʼʌlob yicʼot chuqui miʼ ñopob, i jiñʌch muʼ bʌ laj cʼʌn chaʼan mi lac tech jiñi lac subtʼan (Luc. 8:11, 15).

¹⁶ Jiñi i yuxchajplel muʼ bʌ laj cʌn jiñʌch chaʼan mach yomic mi lac lujbʼan mi jiñi lac piʼʌlob maʼañic miʼ jacʼob jiñi i sujmlel. ¿Chucoch? Come anquese mi lac wen chaʼlen wersa lac sub jiñi wen tʼan, tajol tsʌts i pusicʼal jiñi muʼ bʌ i yubin o an majqui miʼ suben chaʼan maʼañic miʼ ñop (Mat. 13:18-21). Cheʼ bajcheʼ tiʼ tsʼijbube Pablo jiñi xñoptʼañob ti Roma, «ti jujuntiquilonla mi caj lac waʼtʌl tiʼ tojlel Dios chaʼan miʼ yujtel meloñel ti lac tojlel», i yaʼʌch ochemob jaʼel muʼ bʌ lac subeñob muʼ bʌ i yʌl jiñi Biblia (Rom. 14:12).

17. ¿Baqui tsaʼ majliyob Pablo yicʼot Bernabé cheʼ bʌ tsaʼ loqʼuiyob ti Derbe, i chucoch?

¹⁷ Cheʼ bajcheʼ tsaʼix laj qʼuele, jiñi añoʼ bʌ ti Listra tsiʼ ñopo i tsʌnsañob Pablo. I come tsiʼ ñaʼtayob chaʼan chʌmeñix, tsiʼ tujcʼayob loqʼuel yaʼ  ti tejclum i tsiʼ jʌp chocoyob. ¿Chuqui tsaʼ ujti ti wiʼil? Jiñi xcʌntʼañob tsaʼ cʼoti i qʼuelob, Pablo tsaʼ chʼojyi i tsaʼ ochi yaʼ ti tejclum chaʼan miʼ ñusan acʼʌlel. Tiʼ yijcʼʌlel, tsaʼ majli yicʼot Bernabé yaʼ ti Derbe, am bʌ 100 kilómetro i ñajtlel. Anquese wen cʼuxto miʼ yubin baqui tsaʼ jajtsʼi, tsaʼʌch majli i cʼunteʼ cʼunteʼ tsaʼ cʼotiyob ti Derbe. Cheʼ bʌ yaʼix añob yaʼi, tiʼ «sujtesayob ti xcʌntʼan yonlel lac piʼʌlob». Cheʼ jiñi tsaʼ chaʼ «majliyob ti Listra, ti Iconio yicʼot ti Antioquía» de Pisidia, i maʼañic tsaʼ sujtiyob majlel ti Antioquía de Siria. ¿Chucoch tsaʼ chaʼ majliyob yaʼi? Chaʼañʌch miʼ pʼʌtʼesañob jiñi «xcʌntʼañob cheʼ bʌ tiʼ subeyob chaʼan miʼ chʌn ñopob lac Yum» (Hech. 14:20-22). Cheʼ bajcheʼ jiñi tsiʼ pʌsʌyob chaʼan maʼañic miʼ bajñel ñaʼtañob i bʌ, jiñʌch miʼ ñaʼtañob jiñi congregación. ¡Jumpʼejlʌch wem bʌ ejemplo! Ili ora cabʌlʌch misionerojob yicʼot superintendentejob chaʼan circuito muʼ bʌ i lajiñob.

18. ¿Bajcheʼ miʼ yajcʌntel jiñi ancianojob?

¹⁸ Pablo yicʼot Bernabé mach tsaʼ jach i pʼʌtʼesayob jiñi xcʌntʼañob tiʼ tʼan yicʼot tiʼ melbal, «tsiʼ waʼchocoyob ancianojob ti jujumpʼejl congregación». Anquese chocbilob «majlel ti chʼujul bʌ espíritu», tsaʼʌch i chaʼleyob oración yicʼot chʼajb cheʼ bʌ «tsiʼ yʌcʼʌyob tiʼ wenta Jehová» jiñi ancianojob (Hech. 13:1-4; 14:23). Lʌcʼʌ cheʼʌch miʼ mejlel jaʼel ili ora. Cheʼ bʌ jiñi ancianojob muʼto caj i waʼchocoñob juntiquil hermano, miʼ ñaxan melob oración yicʼot miʼ qʼuelob mi mucʼʌch i tsʼʌctesan jiñi muʼ bʌ i cʼajtintel (1 Tim. 3:1-10, 12, 13; Tito 1:5-9; Sant. 3:17, 18; 1 Ped. 5:2, 3). Mach jiñic ñumen ñuc i cʼʌjñibal bajcheʼix jalel an tiʼ sujmlel. Muʼ bʌ i qʼuelob jiñʌch bajcheʼ yilal miʼ chaʼlen tʼan, bajcheʼ yilal i melbal yicʼot chuqui miʼ yʌjlel tiʼ tojlel chaʼan miʼ ñaʼtañob mi wolʌch i yʌcʼ chaʼan jiñi chʼujul bʌ espritu miʼ tojʼesan majlel tiʼ cuxtʌlel. Jiñi hermano chajpʌbil mi caj i yajñel chaʼan miʼ cʌntan jiñi congregación mi mucʼʌch i tsʼʌctesan muʼ bʌ i yʌl jiñi Biblia (Gál. 5:22, 23). Jiñi superintendente chaʼan circuito jiñʌch an tiʼ wenta chaʼan miʼ yʌcʼ ili nombramiento tac (laja yicʼot 1 Timoteo 5:22).

19. ¿Chuqui yujilob jiñi ancianojob, i bajcheʼ miʼ lajiñob Pablo yicʼot Bernabé?

¹⁹ Jiñi ancianojob yujilob chaʼan miʼ cajelob ti meloñel tiʼ tojlel Dios chaʼan bajcheʼ miʼ cʌntañob jiñi congregación (Heb. 13:17). Cheʼ bajcheʼ Pablo yicʼot Bernabé, miʼ yʌcʼob wem bʌ ejemplo ti subtʼan, miʼ pʼʌtʼesañob jiñi hermanojob tiʼ tʼan yicʼot cabʌl chuqui miʼ melob tiʼ tojlel jiñi congregación (Filip. 2:3, 4).

20. ¿Chuqui miʼ ñijcañonla lac mel jiñi tsaʼ bʌ i meleyob Pablo yicʼot Bernabé?

²⁰ Cheʼ bʌ Pablo yicʼot Bernabé tsaʼ chaʼ majliyob ti Antioquía de Siria, tsiʼ yʌlʌyob «pejtelel chuqui tsiʼ yʌqʼueyob i mel Dios yicʼot chaʼan tsiʼ jamʌ jiñi puerta chaʼan miʼ ñopob jiñi mach bʌ judíojobic» (Hech. 14:27). Cheʼ bʌ mi laj qʼuel pejtelel chuqui tsiʼ meleyob yicʼot jiñi bendición tsaʼ bʌ i yʌqʼueyob Jehová, ¿mach ba añic mi lac mulan lac bej sub jiñi i sujmlel cheʼ Jehová woliʼ yʌqʼueñonla lac chʼejlel?