Ejemplo tac muʼ bʌ i coltañonla:

• 1 R. 19:1-18. Cheʼ bʌ jiñi xʼaltʼan Elías woliʼ contrajintel tiʼ sube Jehová bajcheʼ yubil woliʼ yubin, i Jehová tsaʼʌch i colta.

• Hch 7:9-15. Jiñi i yerañob José tsiʼ contrajiyob, pero Jehová tsiʼ colta i tsiʼ cʼʌñʌ chaʼan miʼ coltan i familia.

Ejemplo tac muʼ bʌ i coltañonla:

• 2 R. 18:17-35. Jiñi rabsaqué, juntiquil i wiñic jiñi rey ti Asiria, tsiʼ pʼaja Jehová yicʼot tsiʼ wajle jiñi añoʼ bʌ ti Jerusalén.

• Lu 22:63-65; 23:35-37. Jiñi i contrajob Jesús cʌlʌxix chuqui tiʼ ñiqʼuisubeyob yicʼot tsiʼ yʌcʼʌyob ti quisin cheʼ chucul i chaʼañob yicʼot cheʼ bʌ yaʼ jichʼil ti teʼ.

Ejemplo tac muʼ bʌ i coltañonla:

• Hch 7:57–8:1. Cheʼ bʌ Esteban muqʼuix caj i chʌmel, tiʼ sube Jehová chaʼan miʼ ñusʌbeñob i mul jiñi woli bʌ i ticʼlañob, juntiquil yaʼ bʌ an jiñʌch Saulo chʼoyol bʌ ti Tarso.

• Hch 16:22-34. Anquese jiñi apóstol Pablo tsaʼ wen jajtsʼi yicʼot tsiʼ yotsʌbeyob i yoc ti tocol bʌ teʼ, tsiʼ pʌsbe i yutslel jiñi xcʌnta cárcel. Jiñi tsiʼ colta chaʼan jiñi xcʌnta cárcel yicʼot i familia miʼ sujtelob ti xñoptʼan.

Ejemplo tac muʼ bʌ i coltañonla:

• 2 Cr. 32:1-22. Cheʼ bʌ jiñi i soldadojob jiñi rey Senaquerib tsaʼ cʼotiyob ti Jerusalén, jiñi rey Ezequías tsiʼ cʼajtibe i coltaya Jehová i tsiʼ pʼʌtʼesa jiñi tejclum, i tsaʼʌch coltʌntiyob.

• Heb 12:1-3. Jiñi i contrajob Jesús tsiʼ ñopoyob i junyajl jisʌbeñob i cʼʌjñibal, pero Jesús maʼañic tsiʼ yʌcʼʌ chaʼan jiñi miʼ cʼuñʼesan.

 Ejemplo tac muʼ bʌ i coltañonla:

• Job 1:6-22; 2:1-10. Job xucʼul tsaʼ ajñi ti Jehová anquese mach yujilic chaʼan Satanás jiñʌch woli bʌ i yʌqʼuen wocol, cheʼ bajcheʼ jiñi tsiʼ yʌqʼue i ñuclel Dios i tsiʼ pʌsʌ chaʼan Satanás juntiquilʌch xlot.

• Dn. 1:6, 7; 3:8-30. Hananías, Misael yicʼot Azarías (Sadrac, Mesac yicʼot Abednego) xucʼul tsaʼ ajñiyob ti Jehová i maʼañic tsiʼ bʌcʼña miʼ tsʌnsʌntelob. Jin chaʼan, ti wiʼil jiñi rey Nabucodonosor tsiʼ jamʌ aqʼue i ñuclel Jehová.

Ejemplo tac muʼ bʌ i coltañonla:

• Hch 11:19-21. Jiñi xñoptʼañob tsaʼ pam pujquiyob tiʼ caj jiñi contrajintel, i jiñi tsiʼ yʌcʼʌ chaʼan miʼ sujbel jiñi wen tʼan ti yan tac bʌ parte.

• Flp 1:12, 13. Jiñi apóstol Pablo wen tijicña tsiʼ yubi come jiñi wen tʼan tsaʼ ñumen cʌjñi anquese an ti cárcel.

Ejemplo tac muʼ bʌ i coltañonla:

• Hch 19:24-29. Jiñi xñoptʼañob tsaʼ caji i subob chaʼan mach weñic miʼ chʼujutesʌntel yambʌ dios tac, jin chaʼan jiñi muʼ bʌ i melob alʌ templo tac chaʼan Ártemis yaʼ ti Éfeso tsaʼ caji i contrajiñob come tsaʼ caji i wen sʌtob i taqʼuin.

• Gál 1:13, 14. Cheʼ bʌ Pablo (Saulo) maxto xñoptʼañic tsiʼ wen colta jiñi i cʌntesa judíojob, jin chaʼan tsiʼ wen contraji jiñi xcʌntʼañob i chaʼan Cristo.