Cheʼ bʌ Jehová tsiʼ mele jiñi familia, tsiʼ yʌqʼue tiʼ wenta jiñi tatʌlob chaʼan miʼ cʌntan i yalobilob (Colosenses 3:20). Cheʼ bajcheʼ tatʌl, an ti a wenta maʼ pʌsben a walobilob chaʼan miʼ cʼuxbiñob Jehová yicʼot chaʼan wen chajpʌbilob cheʼ bʌ ñucobix (2 Timoteo 1:5; 3:15). Cheʼ jaʼel, yom maʼ cʌn chuqui añob tiʼ pusicʼal. Ti isujm, wen ñuc i cʼʌjñibal jiñi ejemplo muʼ bʌ a pʌsbeñob. Chaʼan maʼ mejlel a cʌntesan a walobilob chaʼan bʌ i Tʼan Dios, ñumen wen cheʼ jatet maʼ ñaxan acʼ ti a pusicʼal (Salmo 40:8).

MUʼ BɅ YɅL JIÑI BIBLIA: «Yom pʼipʼetla cheʼ mi laʼ ñʌchʼtan tʼan. Mach yomic ora mi laʼ chaʼlen tʼan» (Santiago 1:19). I tilelʌch cheʼ maʼ mulan chaʼan a walobil wen miʼ chaʼleñob tʼan yicʼotet. Jin chaʼan, yom maʼ ñʌchʼtan cheʼ bʌ an chuqui yom i subeñetob yicʼot yom tijicñayet chaʼan utsʼat miʼ mejlelob ti tʼan yicʼotet (Santiago 3:18). Mi tsʌts a tʼan miʼ yubiñob o michʼet miʼ qʼueletob, tajol maʼañic mi caj i luʼ subeñetob chuqui yomob i yʌl. Yom a wujil pijt yicʼot chʌn subeñob chaʼan mucʼʌch a cʼuxbiñob (Mateo 3:17; 1 Corintios 8:1).

MUʼ BɅ MEJLEL A MEL:

• Ñʌchʼtan a walobilob cheʼ bʌ an chuqui yom i subeñetob

• Chaʼlen tʼan tiʼ pejtelel ora a wicʼotob i mach cojic jach cheʼ an wocol

MUʼ BɅ YɅL JIÑI BIBLIA: «Jiñi muʼ bʌ i chʼʌmben isujm jiñi wen tʼan miʼ taj i wenlel» (Proverbios 16:20). An i tajol yom maʼ melbeñob yambʌ cʼajtiya tac chaʼan maʼ ñaʼtan bajcheʼ yubil miʼ yubiñob. Jiñi xcolelob an tajol mi yʌlob chuqui mach bʌ ñoj isujmic o mach bʌ cheʼic bajcheʼ woliʼ (yʌquel) ñaʼtañob. «Jiñi muʼ bʌ i jacʼ tʼan cheʼ maxto ubibilic i chaʼan miʼ caj ti quisin chaʼan i tontojlel.» (Proverbios 18:13.) Jin chaʼan, mach orajic yom maʼ michʼan (Proverbios 19:11).

MUʼ BɅ MEJLEL A MEL:

• Ñʌchʼtʌben chuqui woli yʌl a walobil yicʼot mach yomic ora maʼ michʼan anquese maʼañic maʼ mulan chuqui woli yʌl

• Cʼajtesan bajcheʼ yubil tsaʼ wubi yicʼot chuqui ñuc bʌ i cʼʌjñibal a chaʼan cheʼ bʌ xcolelet to jaʼel

MUʼ BɅ YɅL JIÑI BIBLIA: «Calobil, chʼujbiben i cʌntesa a tat. Mach a cʌy a jacʼben i mandar a ñaʼ» (Proverbios 1:8). Jehová tsiʼ yʌqʼue tiʼ cʼʌb i yalobilob jiñi tatʌl yicʼot ñaʼʌl. Ti laʼ chaʼticlel yom mi laʼ cʌntesan laʼ walobilob chaʼan miʼ qʼueletla ti ñuc yicʼot chaʼan miʼ jacʼob tʼan (Efesios 6:1-3). Jiñi alobob miʼ cʌñob cheʼ mach «junlajal [...] laʼ ñaʼtʌbal» (1 Corintios 1:10). Jin chaʼan, mi an chuqui mach lajalic mi laʼ ñaʼtan, mach laʼ chaʼlen aʼleya tiʼ wut laʼ walobilob come tajol maʼañix mi caj i qʼueletla ti ñuc cheʼ bʌ an chuquia wom laʼ suben.

MUʼ BɅ MEJLEL A MEL:

• Temel yom mi laʼ ñaʼtan bajcheʼ mi caj laʼ ticʼ laʼ walobilob

• Mi mach lajalic a tʼan a wicʼot a piʼʌl (ñoxiʼal o a wijñam) chaʼan bajcheʼ mi caj laʼ tic laʼ walobilob, chʼʌmben isujm chucoch cheʼ miʼ ñaʼtan bajcheʼ jiñi

MUʼ BɅ YɅL JIÑI BIBLIA: «Cʌntesan alʌlob ti jiñi bij yom bʌ miʼ xʌñob majlel» (Proverbios 22:6). Mi a wom chaʼan toj miʼ loqʼuel a walobilob, yom maʼ cʌntesañob. Yom maʼ wen chajpan bajcheʼ miʼ caj a ticʼob (Salmo 127:4; Proverbios 29:17). Jiñi ticʼojel mach cojach yom yʌl cheʼ maʼ chaʼlen jatsʼ, yom yʌl chaʼan maʼ chaʼlen tʼan a wicʼotob chaʼan miʼ chʼʌmbeñob isujm chucoch cheʼ maʼ mel bajcheʼ jiñi (Proverbios 28:7). Cʌntesañob chaʼan miʼ chʼʌmob ti ñucʼ jiñi Biblia yicʼot chaʼan miʼ cʌñob jiñi principio tac yaʼ bʌ an yaʼi (Salmo 1:2). Cheʼ bajcheʼ jiñi, tijicña mi caj i yajñelob i conciencia (Hebreos 5:14).

MUʼ BɅ MEJLEL A MEL:

• Chaʼlen wersa a coltan i cʌn a walobilob chaʼan Jehová jiñʌch i yamigo muʼ bʌ mejlel i ñop

• Coltañob i cʌn yicʼot chaʼan maʼañic miʼ ñopob muʼ bʌ mejlel i yotsañob ti wocol, cheʼ bajcheʼ an tac bʌ yaʼ ti internet. Suben chaʼan maʼañic miʼ jacʼbeñob i tʼan jiñi yomoʼ bʌ totsʼtʌl yicʼotob chaʼan miʼ piʼleñob