Cheʼ miʼ yilan pañimil (chʼocʼan) juntiquil alʌl, tijicña miʼ yubiñob jiñi tatʌlob pero tajol mi cʼojoʼtañob jaʼel come cojax to bʌ yalobilob. Tajol wocol mi laʼ wubin cheʼ cabʌl ora mi laʼ wʌcʼ chaʼan mi laʼ cʌntan jiñi laʼ walobil yicʼot cheʼ maʼañix mi caj laʼ wen cʼaj laʼ wo come mach chʌn lajalix bajcheʼ ti ñaxan. Jin chaʼan, ti laʼ chaʼticlel yom mi laʼ ñaʼtan bajcheʼ mi caj laʼ cʌntan laʼ walobil yicʼot laʼ ñujpuñijel. ¿Bajcheʼ miʼ mejlel i coltañetla jiñi ticʼojel tac am bʌ ti Biblia chaʼan mi laʼ ñusan jiñi wocol tac?

MUʼ BɅ YɅL JIÑI BIBLIA: «Jiñi yujil bʌ cʼuxbiya jal miʼ cuchben i mul yañoʼ bʌ, wen uts i pusicʼal. [...] Maʼañic miʼ sajcan chuqui yom tiʼ bajñel pusicʼal. Maʼañic miʼ bʌcʼ michʼan» (1 Corintios 13:4, 5). Come jiñʌch ñaxan bʌ a walobil, jin chaʼan i tilelʌch cheʼ maʼ ñumen ñusan ora a wicʼot. Tajol mi caj yubin a ñoxiʼal chaʼan i bajñel jachix, jin chaʼan mach yomic miʼ ñajʌyel a qʼuel chuqui yom jaʼel. Mi a wujil pijt yicʼot mi maʼ pʌs a wutslel, miʼ mejlel a pʌsben a piʼʌl (ñoxiʼal o a wijñam) chaʼan ñucʌch maʼ qʼuel yicʼot chaʼan mucʼʌch a qʼuel ti ñuc i coltaya cheʼ miʼ cʌntan jiñi alʌl.

«Cheʼ jaʼel wiñicob, ajñenla ti utsʼat yicʼot laʼ wijñam [yicʼot laʼ ñaʼtʌbal, TNM].» (1 Pedro 3:7.) Mi cojax to bʌ tatʌlet yom maʼ ñaʼtan chaʼan jiñi a wijñam mi caj i ñumen aqʼuen yorajlel i qʼuel jiñi alʌl, i an tajol mi caj i lujbʼan o mi caj i cʼojoʼtan jiñi yeʼtel (troñel). Tajol an yorajlel mi caj i michʼan yicʼotet, pero mach yomic ora maʼ michʼan jaʼel, come «jiñi mach bʌ orajic yujil michʼajel ñumen ñucʌch bajcheʼ ñuc bʌ soldado» (Proverbios 16:32). Cʼʌñʌ a ñaʼtʌbal yicʼot aqʼuen chuqui yom a wijñam (Proverbios 14:29).

MUʼ BɅ MEJLEL A MEL:

• Mi jatet tatʌlet: Coltan a wijñam chaʼan miʼ cʌntan jiñi laʼ walobil, ti qʼuiñil yicʼot cheʼ ti acʼʌlel. Ñumen locʼsʌben i yorajlel chaʼan maʼ wajñel a wicʼot a wijñam yicʼot a walobil

• Mi jatet ñaʼʌlet: Jacʼʌ cheʼ bʌ miʼ subeñet a ñoxiʼal chaʼan miʼ coltañet a qʼuel jiñi alʌl. Mi maʼañic miʼ mejlel, mach a wʌʼlen, cʌntesan bajcheʼ yom miʼ mel ti wen

MUʼ BɅ YɅL JIÑI BIBLIA: «Jiñi chaʼtiquil miʼ yochelob ti juntiquil jach» (Génesis 2:24). Anquese añix yambʌ ti laʼ familia pero yom cʼajal a chaʼan jatet yicʼot a wijñam chaʼan chʌn ‹juntiquilet jach la›. Chaʼlen la wersa laʼ pʼʌtʼesan laʼ nujpuñijel.

Jatet xʼixic, aqʼuen wocolix yʌlʌ a ñoxiʼal chaʼan i coltaya muʼ bʌ i pʌs ti a tojlel. Jiñi uts bʌ tʼan «i wentajʌch tsʼac muʼ bʌ i lajmesañonla» (Proverbios 12:18). Jatet wiñic, suben a wijñam chaʼan maʼ wen qʼuel ti ñuc, chaʼan maʼ wen cʼuxbin yicʼot chaʼan maʼ wen qʼuel ti ñuc muʼ bʌ i mel chaʼan a familia (Proverbios 31:10, 28).

«Mach i lon sʌclan i bajñel wenlel mi juntiquilic. Laʼ i ñaʼtan i wenlel yañoʼ bʌ.» (1 Corintios 10:24.) Chʌn mele chuqui utsʼat tiʼ tojlel a piʼʌl yicʼot qʼuele ti ñuc chuqui miʼ mel. Locʼsʌbenla i yorajlel chaʼan mi laʼ chaʼlen tʼan yicʼot mi laʼ ñʌchʼtʌben laʼ bʌ. Mach a bajñelic jach yom maʼ ñaʼtan a bʌ cheʼ bʌ a wom a piʼlen (totsʼtʌl a wicʼot) a piʼʌl, ñaʼtan jaʼel bajcheʼ yubil miʼ yubin a piʼʌl ti jiñi bʌ ora. Jiñi Biblia mi yʌl: «Mach laʼ cʌy laʼ piʼlen laʼ bʌ, cojach mi laʼ wom ti laʼ chaʼticlel» (1 Corintios 7:3-5). Jin chaʼan, ñaxan chaʼlenla tʼan cheʼ bʌ laʼ wom laʼ piʼlen laʼ bʌ. Mi caj i pʼʌtʼan a ñujpuñijel mi a wujilʌch pijt yicʼot mi mucʼʌch a chʼʌmben isujm.

MUʼ BɅ MEJLEL A MEL:

• Yom maʼ locʼben i yorajlel chaʼan maʼ wajñel ti a bajñel a wicʼot a piʼʌl

• Maʼ mejlel a wʌqʼuen anquese alʌ majtañʌl chaʼan maʼ pʌsben chaʼan mucʼʌch a cʼuxbin

MUʼ BɅ YɅL JIÑI BIBLIA: «Cʼʌlʌl cheʼ alʌlet to, cʌmbilix a chaʼan jiñi Chʼujul bʌ i Tsʼijbujel Dios, muʼ bʌ i cʌntesañet [...]chaʼan maʼ coltʌntel» (2 Timoteo 3:15). Chajpan bajcheʼ mi caj a cʌntesan a walobil. Wen pʼipʼix jiñi alʌl cheʼ bʌ muʼto caj i yilan pañimil, miʼ mejlel i cʌn a tʼan yicʼot miʼ yubin cheʼ bajcheʼ maʼ wubin a bʌ jaʼel. Ñʌntesan a pejcʌben i chaʼan bʌ Dios cʼʌlʌl cheʼ alʌl to, anquese maxto añic miʼ chʼʌmben isujm, mucʼʌch mejlel i coltan chaʼan miʼ mulan i pejcan jaʼel cheʼ bʌ ñuquix.

Mach a ñaʼtan chaʼan maxto muqʼuic mejlel a suben chaʼan bʌ Dios come alʌl to. Chaʼlen oración a wicʼot (Deuteronomio 11:19). Cheʼ bʌ maʼ chaʼlen alas a wicʼot, suben chuqui tac melbil bʌ i chaʼan Dios (Salmo 78:3, 4). Cheʼ bʌ choncol ti colel a walobil, mi caj i qʼuel chaʼan mucʼʌch a wen cʼuxbin Jehová i mucʼʌch caj i cʌn i cʼuxbin jaʼel.

MUʼ BɅ MEJLEL A MEL:

• Cʼajtin ti oración bajcheʼ yom maʼ cʌntesan a walobil

• Mach a cʌy a suben a walobil chuqui ñuc tac bʌ i cʼʌjñibal chaʼan orajach miʼ cʌn majlel