Cheʼ miʼ yujtel jiñi ñujpuñel, miʼ tejchel jumpʼejl familia. Anquese maʼañic mi caʼ cʌy a cʼuxbin yicʼot a qʼuel ti ñuc a tat a ñaʼ pero jiñi ñumen ñuc bʌ i cʼʌjñibal a chaʼan wʌle jiñʌch a piʼʌl (ñoxiʼal o a wijñam). Tajol an a piʼʌlob mach bʌ cheʼic mi caj i ñaʼtañob bajcheʼ jiñi. Pero jiñi principio tac am bʌ ti Biblia, miʼ mejlel i coltañet chaʼan ñʌchʼʌl maʼ wajñel a wicʼotob yicʼot chaʼan miʼ pʼʌtʼan a ñujpuñijel.

MUʼ BɅ YɅL JIÑI BIBLIA: «Qʼuele ti ñuc a tat a ñaʼ» (Efesios 6:2). Mach yʌlʌyic jaypʼejl a jabilel, tiʼ pejtelel ora yom maʼ qʼuelob ti wen yicʼot maʼ qʼuelob ti ñuc jiñi a tat a ñaʼ. Pero yom maʼ ñaʼtan chaʼan jiñi a piʼʌl yom miʼ yʌqʼuen yorajlel chaʼan miʼ qʼuel i tat i ñaʼ jaʼel. «Jiñi yujil bʌ cʼuxbiya mach [jontolic] i pusicʼal», jin chaʼan mach yomic maʼ michʼan cheʼ bʌ a piʼʌl miʼ julaʼtan i familia (1 Corintios 13:4; Gálatas 5:26).

MUʼ BɅ MEJLEL A MEL:

• Mach a wʌl tʼan tac cheʼ bʌ bajcheʼ iliyi: «A familia tiʼ pejtelel ora michʼ miʼ qʼueloñob» o «A mamá maʼañic ba ora wen miʼ qʼuel chuqui mic mel»

• Ñopo a ñaʼtan bajcheʼ yubil mi yubin a piʼʌl

MUʼ BɅ YɅL JIÑI BIBLIA: «Jin chaʼan, wiñicob miʼ cʌyob i tat i ñaʼ. Miʼ chʌn ajñelob yicʼot i yijñam. Jiñi chaʼtiquil miʼ yochelob ti juntiquil jach» (Génesis 2:24). Cʼʌlʌl cheʼ ñujpuñemetix, tajol jiñi a tat a ñaʼ chʌn añet to tiʼ wenta miʼ yubiñob yicʼot yom to i wen otsañob i bʌ ti a ñujpuñijel.

An ti laʼ wenta chaʼan mi laʼ suben ti wen baqui jaxʌl yom miʼ yotsañob i bʌ. Maʼ mejlel a suben ti wem bʌ tʼan (Proverbios 15:1). Jiñi pecʼlel, uts bʌ tʼan yicʼot cheʼ a wujil pijt mi caj i coltañet chaʼan utsʼat maʼ wajñel a wicʼot a piʼʌlob yicʼot chaʼan mi laʼ «chʌn cuchbeñob i sajtemal (ñajʌyel) laʼ piʼʌlob ti laʼ cʼuxbiya» (Efesios 4:2).

MUʼ BɅ MEJLEL A MEL:

• Mi maʼ cʼojoʼtan cheʼ miʼ yotsañob i bʌ ti a ñujpuñijel jiñi a piʼʌlob, alʌ a wicʼot a piʼʌl chuqui yom mi laʼ mel cheʼ bʌ laʼ bajñel añetla

• Ñaʼtanla ti wen chuqui mi caj laʼ mel