CɅNTESɅNTEL 01
¿Bajcheʼ miʼ mejlel i coltañet jiñi Biblia?
Cabʌlonla mi laj cʼajtiben lac bʌ chucoch cuxulonla, chucoch mi la cubin wocol, chucoch mi lac chʌmel (sajtel) yicʼot chuqui mi caj i yujtel ti talto bʌ qʼuin. I ti jujumpʼejl qʼuin mi laj cʼojoʼtan bajcheʼ miʼ mejlel lac taj taqʼuin chaʼan mi lac mʌcʼlan lac familia o chaʼan tijicña mi la cajñel. Cabʌl lac piʼʌlob an i qʼueleyob chaʼan jiñi Biblia miʼ jacʼ ili cʼajtiya tac yicʼot an i tajayob wen tac bʌ ticʼojel. ¿Muʼ ba mejlel i coltañonla maʼ wʌl jiñi Biblia?
1. ¿Chuqui ti cʼajtiya tac miʼ jacʼ jiñi Biblia?
Jiñi Biblia miʼ jacʼ ili cʼajtiya tac: ¿Am ba majqui tsiʼ mele (pʌtʌ) pejtelel chuqui an?, ¿chucoch cuxulonla?, ¿chucoch mi lac ñusan wocol?, ¿chuqui mi lac chaʼlen cheʼ mi lac chʌmel?, ¿chucoch an cabʌl guerra?, ¿muʼ ba caj i jilel ili Lum? Cabʌl lac piʼʌlob an i tajbeyob i jacʼbal ili cʼajtiya tac yaʼ ti Biblia, jatet jaʼel miʼ mejlel a tajben i jacʼbal.
2. ¿Bajcheʼ miʼ coltañonla jiñi Biblia chaʼan tijicña mi lac ñusan ti jujumpʼejl qʼuin?
Jiñi Biblia miʼ yʌqʼueñonla wen tac bʌ ticʼojel. Jumpʼejl ejemplo, miʼ cʌntesañonla bajcheʼ miʼ mejlel lac taj lac tijicñʌyel ti lac familia. Cheʼ jaʼel, miʼ subeñonla chuqui yom mi lac mel chaʼan maʼañic mi laj cʌlʌx chaʼlen pensar yicʼot chaʼan wen mi lac ñusan ti la queʼtel (lac troñel). Ili yicʼot yan tac bʌ jiñʌch muʼ bʌ caj a cʌn majlel cheʼ woli (choncol) a chʼʌm jiñi estudio yicʼot ili jun. Mi caj a cʼotel a qʼuel chaʼan «pejtelel jiñi Tsʼijbujel [pejtelel muʼ bʌ i yʌl jiñi Biblia] [...] i cʼʌjñibal» (2 Timoteo 3:16).
Ili jun mach bibliajic, pero mi caj i coltañet a cʌn muʼ bʌ i yʌl jiñi Biblia. Jin chaʼan, pejcan jiñi texto tac muʼ bʌ i tilel ti jujumpʼejl cʌntesʌntel i laja muʼ bʌ i yʌl jiñi texto tac yicʼot jiñi woli (yʌquel) bʌ a cʌn majlel.
LAʼ LAC ÑUMEN ÑAʼTAN
Laʼ laj qʼuel bajcheʼ an i colta yambʌ lac piʼʌlob jiñi Biblia, chuqui miʼ mejlel lac mel chaʼan mi lac mulan lac pejcan i chuqui ti wenlel mi lac taj cheʼ bʌ an majqui miʼ coltañonla lac chʼʌmben i sujm.
3. Jiñi Biblia miʼ pʌsbeñonla wem bʌ bij
Jiñi Biblia lajalʌch bajcheʼ jumpʼejl foco wen chʌc bʌ i cʼʌcʼal muʼ bʌ i pʌsbeñonla jiñi lac bijlel. Miʼ coltañonla chaʼan wen chuqui mi lac yajcan lac mel yicʼot miʼ coltañonla lac ñaʼtan chuqui miʼ cajel ti ujtel ti talto bʌ qʼuin.
Pejcanla Salmo 119:105 i tem alʌla iliyi:
-
¿Chuqui tsiʼ yʌlʌ chaʼan jiñi Biblia jiñi tsaʼ bʌ i tsʼijbu ili salmo?
-
¿Chuqui maʼ wʌl jatet chaʼan jiñi Biblia?
4. Jiñi Biblia miʼ jacʼ jiñi laj cʼajtiya tac
Juntiquil xʼixic tsiʼ taja yaʼ ti Biblia jiñi i jacʼbal jiñi i cʼajtiya tac añix bʌ ora cajel i sʌclan. Qʼuelela jiñi VIDEO i tem alʌla iliyi:
-
¿Chuqui tac tsiʼ cʼajtibe i bʌ jiñi xʼixic tsaʼ bʌ laj qʼuele ti jiñi video?
-
¿Bajcheʼ tsiʼ colta cheʼ bʌ tsiʼ cʌñʌ chuqui miʼ yʌl jiñi Biblia?
Jiñi Biblia miʼ subeñonla chaʼan yom mi lac mel cʼajtiya tac. Pejcanla Mateo 7:7 i tem alʌla iliyi:
-
Bajcheʼ a wʌlʌ jatet, ¿muʼ ba mejlel i jacʼbeñet a cʼajtiya tac jiñi Biblia? Mi cheʼʌchi, ¿baqui tac bʌ?
5. Miʼ mejlel lac ñusan lac bʌ tiʼ pejcʌntel jiñi Biblia
Cabʌlob miʼ mulañob i pejcan jiñi Biblia i miʼ tajbeñob i wenlel. Qʼuelela jiñi VIDEO i tem alʌla iliyi:
-
¿Chuqui miʼ yʌl jiñi xcolelob chaʼan i pejcʌntel jiñi Biblia?
-
Anquese maʼañic miʼ mulañob i pejcan jun, ¿chucoch miʼ mulañob i pejcan jiñi Biblia?
Jiñi muʼ bʌ i yʌl jiñi Biblia miʼ ñuqʼuesʌbeñonla lac pusicʼal i miʼ yʌqʼueñonla lac pijtaya. Pejcanla Romanos 15:4 i tem alʌla iliyi:
-
¿A wom baʼ ñumen cʌn bajcheʼ miʼ ñuqʼuesan lac pusicʼal jiñi Biblia yicʼot baqui bʌ jiñi pijtaya muʼ bʌ i yʌl?
6. Yicʼot i coltaya yambʌlob miʼ mejlel lac chʼʌmben i sujm jiñi Biblia
Anquese weñʌch cheʼ maʼ bajñel pejcan jiñi Biblia, yonlelob an i qʼueleyob chaʼan ñumen wen cheʼ an yambʌ majqui miʼ coltañonla lac chʼʌmben i sujm. Pejcanla Hechos 8:26-31 i tem alʌla iliyi:
-
¿Chuqui mi caj i coltañonla chaʼan mi lac chʼʌmben i sujm jiñi Biblia? (Qʼuelela jiñi versículo 30 yicʼot 31).
Jiñi wiñic chʼoyol bʌ ti Etiopía tsaʼ coltʌnti chaʼan miʼ chʼʌmben i sujm jiñi Tsʼijbujel tac. Ili ora, yonlelob an i qʼueleyob chaʼan ñumen wen cheʼ an yambʌ majqui miʼ coltañonla lac chʼʌmben i sujm jiñi Biblia.
AN MUʼ BɅ I YɅLOB: «Cheʼ mi lac pejcan jiñi Biblia sʌtqʼuin jachix».
-
Ixcu jatet, ¿chuqui maʼ wʌl? ¿Chucoch?
TSAʼ BɅ LAJ CɅÑɅ
Jiñi Biblia miʼ yʌqʼueñonla wen tac bʌ ticʼojel, miʼ jacʼ ñuc tac bʌ cʼajtiya, miʼ ñuqʼuesʌbeñonla lac pusicʼal yicʼot miʼ yʌqʼueñonla lac pijtaya.
¿Chuqui tsaʼ cʌñʌ?
-
¿Chuqui ti ticʼojel tac mi lac taj yaʼ ti Biblia?
-
¿Chuqui ti cʼajtiya tac miʼ jacʼ jiñi Biblia?
-
Ixcu jatet, ¿chuqui a wom a cʌn yaʼ ti Biblia?
CɅÑɅ YAN TAC BɅ
Qʼuele chucoch mucʼʌch i cʼʌjñibʌyel lac chaʼan jiñi ticʼojel tac am bʌ ti Biblia.
«I cʌntesa tac jiñi Biblia maʼañic baʼ ora miʼ jilel» (Lac Tsictesʌbentel, núm. 1 2018)
Qʼuele bajcheʼ tsiʼ colta jiñi Biblia juntiquil wiñic wocol jax bʌ tsiʼ ñusa cʼʌlʌl cheʼ bʌ chutto.
Cʌñʌ jiñi wem bʌ ticʼojel tac muʼ bʌ i yʌqʼueñonla jiñi Biblia chaʼan tijicña miʼ yajñel lac familia.
«12 ticʼojel chaʼan tijicña miʼ yajñel a familia» (¡Jamʌx a wut!, núm. 2 2018)
Qʼuele chuqui miʼ yʌl jiñi Biblia chaʼan majqui ñoj an tiʼ cʼʌb ili Pañimil.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
