CɅNTESɅNTEL 09
Jiñi oración miʼ lʌcʼtesañet ti Dios
¿Am ba qʼuiñil a wom a coltʌntel maʼ wubin? ¿Am baʼ cʼajtiya tac maxto bʌ a tajbe i jacʼbal? ¿Ñuc ba i cʼʌjñibal a chaʼan i ñuqʼuesʌntel a pusicʼal? ¿Ñumen lʌcʼʌl ba a wom a wubin a bʌ tiʼ tojlel Jehová? Jiñi oración miʼ mejlel i coltañet a taj pejtelel iliyi. Pero ¿bajcheʼ yom maʼ chaʼlen oración? ¿Muʼ ba i ñʌchʼtan Dios pejtelel jiñi oración tac? ¿Bajcheʼ miʼ mejlel a ñaʼtan chaʼan Dios mucʼʌch i ñʌchʼtan jiñi a woración tac? Laʼ laj qʼuel.
1. ¿Majqui yom mi lac pejcan ti oración? ¿Chuqui yom mi lac taj ti tʼan ti oración?
Jesús tsiʼ yʌlʌ chaʼan cojach yom mi lac pejcan jiñi lac Tat am bʌ ti panchan. Jesús tsaʼʌch i wen pejca ti oración Jehová jaʼel. Ti jumpʼejl bʌ qʼuin tsiʼ yʌlʌ: «Cheʼ yom mi laʼ chaʼlen oración bajcheʼ ili: ‹C Tat lojon añet bʌ ti panchan›» (Mateo 6:9). Cheʼ bʌ mi lac pejcan ti oración Jehová mi lac ñumen lʌcʼtesan lac bʌ tiʼ tojlel.
Chuqui jach miʼ mejlel lac taj ti tʼan ti la coración tac. Pero mi la com chaʼan Dios miʼ jacʼbeñonla, mach yomic mi laj cʼajtin jiñi maʼañic bʌ miʼ mulan. Jiñi Biblia miʼ yʌl chaʼan «miʼ mejlel laj cʼajtiben chuqui jach la com mi lajalʌch yicʼot jiñi muʼ bʌ i mulan i mucʼʌch i ñʌchʼtañonla» (1 Juan 5:14). Jesús tsiʼ yʌlʌ chuqui tac miʼ mejlel lac taj ti tʼan ti oración (pejcan Mateo 6:9-13). Anquese mi lac suben Dios chuqui tac la com, mach ñajʌyic lac chaʼan la cʌqʼuen wocolix yʌlʌ chaʼan am bʌ i mele ti lac tojlel yicʼot laj cʼajtiben chaʼan miʼ coltan yambʌlob.
2. ¿Bajcheʼ yom mi lac chaʼlen oración?
Jiñi Biblia miʼ yʌl: «Cʼajtibenla Dios ti wocol tʼan pejtel chuqui wolaʼ ñaʼtan ti a pusicʼal» (Salmo 62:8). Jin chaʼan, cheʼ bʌ mi lac pejcan ti oración Jehová, yom mi lac suben jiñi am bʌ ti lac pusicʼal. Miʼ mejlel lac pejcan ti cʼam bʌ tʼan o ti cʼunteʼ jach, cheʼ waʼalonla, cheʼ ñocolonla o jin jach bajche’i. Pero yom mi lac pʌs chaʼan mi laj qʼuel ti ñuc Jehová. Cheʼ jaʼel, miʼ mejlel lac pejcan ti bajcheʼ jach ora yicʼot baqui jach añonla.
3. ¿Bajcheʼ miʼ jacʼbeñonla Dios jiñi la coración?
Cabʌl bajcheʼ miʼ mel. Lʌcʼʌl tiʼ pejtelel ora miʼ cʼʌn jiñi Biblia chaʼan miʼ jacʼ jiñi laj cʼajtiya tac. Cheʼ bʌ mi lac pejcan i Tʼan Dios mi lac taj lac ñaʼtʌbal (Salmo 19:7, TNM; pejcan Santiago 1:5). I cheʼ bʌ an lac wocol tac Jehová miʼ mejlel i yʌqʼueñonla lac ñʌchʼtʌlel. Cheʼ jaʼel, miʼ mejlel i ñijcʌben i pusicʼal jiñi i wiñicob chaʼan miʼ coltañoñobla cheʼ i cʼʌjñibal lac chaʼan.
LAʼ LAC ÑUMEN ÑAʼTAN
Laʼ laj qʼuel bajcheʼ yom mi lac mel oración loqʼuem bʌ ti lac pusicʼal cheʼ bajcheʼ yom Dios i bajcheʼ miʼ coltañonla jiñi oración tac.
4. Añʌch chuqui tac yom mi lac mel cheʼ bʌ mi lac chaʼlen oración
¿Chuqui yom mi lac mel chaʼan Dios miʼ ñʌchʼtan jiñi la coración tac? Qʼuelela jiñi VIDEO.
Jehová yom chaʼan jin jach mi lac melben oración. Pejcanla Salmo 65:2 i tem alʌla iliyi:
-
¿Yom ba jiñi Dios muʼ bʌ i ñʌchʼtan jiñi oración tac chaʼan maʼ pejcan? ¿Chucoch?
Mi la com chaʼan Dios miʼ ñʌchʼtan jiñi la coración tac yom mi lac chaʼlen wersa lac mel muʼ bʌ i subeñonla. Pejcanla Miqueas 3:4 yicʼot 1 Pedro 3:12, i tem alʌla iliyi:
-
¿Bajcheʼ miʼ mejlel lac ñaʼtan mi Dios mucʼʌch i ñʌchʼtan jiñi la coración?
Tajol chaʼmojt soldadojob i contrajoʼ bʌ i bʌ miʼ cʼajtibeñob Dios chaʼan miʼ mʌlob jiñi guerra, ¿pero muʼ ba caj i ñʌchʼtan Dios jiñi oración tac?
5. Yom mi la cʌl jiñi am bʌ ti lac pusicʼal cheʼ mi lac chaʼlen oración
Cabʌlob an cʌntesʌntiyob chaʼan jin jach bʌ tʼan yom miʼ teñe alob ti oración. Pero ¿muʼ ba i mulan Dios jiñi oración tac? Pejcanla Mateo 6:7 i tem alʌla iliyi:
-
¿Chuqui yom mi lac mel chaʼan mach «jin jach bʌ tʼan» mi lac chʌcʌ al ti la coración tac?
Ixcu cheʼ muqʼuic a mel iliyi, ñaʼtan junchajp chuqui wem bʌ maʼ ñusan ti jujumpʼejl qʼuin, i cheʼ jiñi aqʼuen wocolix i yʌlʌ Jehová. Mi tsaʼ mele bajcheʼ iliyi, ti jumpʼejl semana mi caj i cʼotel a qʼuel chaʼan mach junsujm jach chuquiyes tsaʼ sube Jehová ti oración.
Juntiquil wem bʌ tatʌl yom chaʼan jiñi i yalobil miʼ suben chuqui an tiʼ pusicʼal. Cheʼ jaʼel, Jehová yom chaʼan ti jiñi la coración tac mi lac suben jiñi am bʌ ti lac pusicʼal.
6. Jiñi oración lac majtañʌch tsaʼ bʌ i yʌqʼueyonla Jehová
¿Bajcheʼ miʼ mejlel i yʌqʼueñonla lac pʼʌtʌlel jiñi oración, ñumento cheʼ wocol jax woli lac ñusan? Qʼuelela jiñi VIDEO.
Jiñi Biblia miʼ yʌl chaʼan jiñi oración miʼ yʌqʼueñonla i ñʌchʼtʌlel lac pusicʼal. Pejcanla Filipenses 4:6, 7 i tem alʌla iliyi:
-
Anquese jiñi oración maʼañic miʼ tojʼesan pejtelel lac wocol, ¿bajcheʼ miʼ coltañonla?
-
¿Chuqui a wom a wʌl ti oración?
¿A wujilix ba?
Jiñi tʼan amén yom i yʌl «cheʼʌchi». Cʼʌlʌl ti wajali miʼ yʌjlel «amén» cheʼ bʌ miʼ mejlel oración tac (1 Crónicas 16:36).
7. Aqʼuen i yorajlel chaʼan maʼ chaʼlen oración
An i tajol cʌlʌxix chuqui mi lac mel i miʼ ñajʌyel lac chaʼan lac mel oración. ¿Am ba i cʼʌjñibal tsiʼ qʼuele Jesús jiñi oración? Pejcanla Mateo 14:23 yicʼot Marcos 1:35, i tem alʌla iliyi:
-
¿Chuqui tsiʼ mele Jesús chaʼan miʼ tajben i yorajlel chaʼan miʼ mel oración?
-
Ixcu jatet, ¿bajcheʼ miʼ mejlel a tajben i yorajlel chaʼan maʼ mel oración?
AN MUʼ BɅ I YɅLOB: «Lolom jachix mi lac chaʼlen oración, Dios maʼañic baʼ ora miʼ jacʼbeñonla».
-
¿Chuqui maʼ wʌl jatet?
TSAʼ BɅ LAJ CɅÑɅ
Cheʼ ti jumpʼejl lac pusicʼal mi lac chaʼlen oración, miʼ lʌcʼtesañonla ti Dios. Cheʼ jaʼel, miʼ yʌqʼueñonla ñʌchʼtʌlel yicʼot lac pʼʌtʌlel i cʼʌjñibal bʌ lac chaʼan chaʼan mi lac mel chuqui miʼ subeñonla.
¿Chuqui tsaʼ cʌñʌ?
-
¿Majqui yom mi lac pejcan ti oración?
-
¿Bajcheʼ yom mi lac chaʼlen oración?
-
¿Bajcheʼ tac miʼ coltañonla jiñi oración?
CɅÑɅ YAN TAC BɅ
Qʼuele baqui bʌ i jacʼbal jiñi cʼajtiya tac am bʌ i melbeyob i bʌ jiñi lac piʼʌlob chaʼan jiñi oración.
«Siete cʼajtiya tac chaʼan bʌ jiñi oración» (Lac Tsictesʌbentel, 1 i chaʼan octubre, 2010)
Pejcan chucoch ñuc i cʼʌjñibal maʼ chaʼlen oración yicʼot bajcheʼ miʼ mejlel a weñʼesan.
«¿Chucoch ñuc i cʼʌjñibal jiñi oración?» (Tema am bʌ ti jw.org)
Qʼuele chuqui miʼ yʌl jiñi Biblia chaʼan majqui yom mi lac pejcan ti oración.
«¿Wem ba cheʼ mi lac melben oración jiñi imagen tac?» (Tema am bʌ ti jw.org)
Qʼuele ti ili video yicʼot bʌ música mi an jach i yorajlel bajcheʼ yom mi lac chaʼlen oración yicʼot mi junsujm jach baqui yom añonla.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
