CɅNTESɅNTEL 12
¿Chuqui mi caj i coltañet chaʼan maʼ chʌn pejcan jiñi Biblia?
Anquese mucʼʌch i coltañonla cheʼ bʌ mi lac pejcan jiñi Biblia, an i tajol wocolʌch mi la cubin chaʼan mi lac pejcan. An i tajol maʼ cʼajtiben a bʌ mi mucʼʌch caj a mejlel a bej pejcan. Pero ¿chucoch yomʌch maʼ chʌn chaʼlen wersa? ¿Chuqui mi caj i coltañet chaʼan maʼ bej pejcan anquese maʼ ñusan wocol tac?
1. ¿Chucoch ñucʌch i cʼʌjñibal cheʼ mi lac pejcan jiñi Biblia?
«Jiñi i tʼan Dios cuxulʌch i wen pʼʌtʌl» (Hebreos 4:12). Jiñi Biblia jumpʼejlʌch libro wen ñuc bʌ i cʼʌjñibal come miʼ subeñonla chuqui miʼ ñaʼtan Dios yicʼot chuqui miʼ yubin ti lac tojlel. Mach cojach mi caj i coltañet chaʼan maʼ ñumen taj a ñaʼtʌbal, cheʼ jaʼel mi caj i coltañet chaʼan wen chuqui maʼ yajcan a mel yicʼot chaʼan maʼ taj wem bʌ a pijtaya ti talto bʌ qʼuin. I jiñi ñumen ñuc bʌ i cʼʌjñibal jiñʌch cheʼ jiñi Biblia mi caj i coltañet chaʼan maʼ sujtel tiʼ yamigo Dios. Cheʼ bʌ maʼ chʌcʌ pejcan, woli (choncol) a wʌcʼ chaʼan miʼ coltañet ti a cuxtʌlel.
2. ¿Chucoch yomʌch mi laj qʼuel ti ñuc jiñi i sujmlel am bʌ ti Biblia?
Jiñi i sujmlel tac muʼ bʌ i yʌl jiñi Biblia lajalʌch bajcheʼ wen letsem tac bʌ i tojol. Jin chaʼan jiñi Biblia miʼ subeñonla: «Mʌñʌ i sujmlel i maʼañic baʼ ora maʼ chon» (Proverbios 23:23, TNM). Mi mucʼʌch lac chʌn cʼajtesan chaʼan wen ñuc i cʼʌjñibal jiñi sujmlel tac am bʌ ti Biblia, mi caj lac chaʼlen wersa chaʼan mi lac bej pejcan anquese mi lac taj wocol tac (pejcan Proverbios 2:4, 5).
3. ¿Chuqui mi caj i mel Jehová ti a tojlel chaʼan maʼ bej chaʼlen estudio?
Come Jehová jiñʌch tsaʼ bʌ i meleyonla (pʌtʌyonla) i a wamigojix, wen i cʌñʌyet yicʼot yom i coltañet chaʼan maʼ ñumen cʌn. Dios miʼ mejlel i yʌqʼueñet a «pʼʌtʌlel yicʼot jiñi i mulʌntel i melol chuqui miʼ mulan» (pejcan Filipenses 2:13). Jin chaʼan, mi an i tajol a wom ñumen coltʌntel chaʼan maʼ pejcan jiñi Biblia o chaʼan maʼ mel chuqui maʼ cʌn, Jehová mi caj i coltañet. Cheʼ jaʼel, mi caj i yʌqʼueñet a pʼʌtʌlel chaʼan maʼ cuch jumpʼejl wocol o a contrajintel. Mach a cʌy a cʼajtiben i coltaya Jehová chaʼan maʼ bej pejcan jiñi Biblia (1 Tesalonicenses 5:17).
LAʼ LAC ÑUMEN ÑAʼTAN
Laʼ laj qʼuel chuqui yom maʼ mel chaʼan maʼ bej cʌn muʼ bʌ i yʌl jiñi Biblia anquese jiñi yambʌlob mach yomobic chaʼan maʼ mel o wocol maʼ wubin chaʼan maʼ tajben i yorajlel. Cheʼ jiñi, mi caj laj qʼuel chuqui mi caj i mel Jehová chaʼan miʼ coltañet.
4. Wen qʼuele chaʼan ñucʌch i cʼʌjñibal a chaʼan jiñi estudio
An i tajol cabʌl chuqui mi lac mel i wocol mi la cubin chaʼan mi lac tajben i yorajlel chaʼan mi lac chaʼlen estudio. ¿Chuqui miʼ mejlel a mel? Pejcanla Filipenses 1:10 i tem alʌla iliyi:
-
Ixcu jatet, ¿«chuqui tac jiñi ñumen ñuc bʌ i cʼʌjñibal» maʼ wʌl?
-
¿Chuqui miʼ mejlel a mel chaʼan wen ñuc i cʼʌjñibal maʼ qʼuel jiñi estudio?
-
Mi ñaxan maʼ wotsan jiʼ ti jumpʼejl vaso i cheʼ jiñi maʼ ñop a wotsan xajlel tac maʼañic mi caj i luʼ ochel.
-
Pero mi ñaxan maʼ wotsan jiñi xajlel tac, mi caj a mejlel a wotsan lʌcʼʌl tiʼ pejtelel jiñi jiʼ. Cheʼ jaʼel, mi jiñʌch ñaxan maʼ wʌcʼ chuqui tac «jiñi ñumen ñuc bʌ i cʼʌjñibal» mi caj i mejlel a tsʼʌctesan, i cheʼ jaʼel mi caj a tajben i yorajlel chaʼan maʼ mel jiñi yan tac bʌ.
Cheʼ bʌ mi lac pejcan jiñi Biblia miʼ coltañonla chaʼan mi laj cʌñeʼ Dios yicʼot chaʼan mi lac chʼujutesan. Pejcanla Mateo 5:3 i tem alʌla iliyi:
-
¿Bajcheʼ miʼ coltañonla cheʼ bʌ jiñʌch ñumen ñuc i cʼʌjñibal mi laj qʼuel cheʼ bʌ mi lac pejcan jiñi Biblia?
5. Chʌn chaʼlen wersa anquese jiñi yambʌlob maʼañic miʼ mulañob
An i tajol an muʼ bʌ caj i subeñetob chaʼan yom maʼ cʌy a chʼʌm estudio. Cʌñʌ tiʼ tojlel Francesco. Qʼuelela jiñi VIDEO i tem alʌla iliyi:
-
Cheʼ bʌ Francesco tiʼ sube jiñi i familia yicʼot jiñi i yamigojob chuqui woli bʌ i cʌn majlel, ¿chuqui tsiʼ meleyob?
-
¿Chucoch weñʌch cheʼ bʌ tsiʼ chʌn chaʼle wersa?
Pejcanla 2 Timoteo 2:24, 25 i tem alʌla iliyi:
-
¿Chuqui miʼ yʌlob jiñi a familia yicʼot jiñi a wamigojob chaʼan jiñi woli bʌ a cʌn majlel?
-
Cheʼ bajcheʼ miʼ yʌl ili versículo tac, ¿chuqui yom maʼ mel cheʼ baʼ ora an majqui mach yomic chaʼan maʼ chaʼlen estudio? ¿Chucoch?
6. Ñopo chaʼan Jehová mi caj i coltañet
Cheʼ bʌ maʼ ñumen lʌcʼtesan a bʌ ti Dios, ñumento mi caj a mulan a tijicñesʌben i pusicʼal. Pero an i tajol wocol mi la cubin chaʼan mi lac mel muʼ bʌ i mulan Jehová. Mi cheʼ maʼ wubin a bʌ bajcheʼ jiñi, mach lujbʼaquet, Jehová mi caj i coltañet. Qʼuelela jiñi VIDEO i tem alʌla iliyi:
-
Cheʼ bajcheʼ tsaʼ laj qʼuele ti jiñi video, ¿chuqui tsiʼ cʌyʌ i mel Jim chaʼan utsʼat miʼ qʼuejlel ti Jehová?
-
¿Chuqui tsaʼ bʌ a ñumen mulaj ti jiñi tsaʼ bʌ i mele?
Pejcanla Hebreos 11:6 i tem alʌla iliyi:
-
¿Chuqui mi caj i mel Jehová tiʼ tojlel «jiñi muʼ bʌ i wen sʌclañob», jiñi muʼ bʌ i chaʼleñob wersa chaʼan miʼ cʌñob yicʼot chaʼan miʼ melob chuqui yom?
-
¿Bajcheʼ yubil miʼ yubin i bʌ Jehová maʼ wʌl cheʼ bʌ miʼ qʼuel chaʼan woli a chaʼlen wersa chaʼan maʼ cʌn muʼ bʌ i yʌl jiñi Biblia?
AN MUʼ BɅ I CAJTIBEÑOÑOBLA: «¿Chuquito yeʼtel maʼ chaʼlen estudio?».
-
¿Bajcheʼ mi caj a jacʼ?
TSAʼ BɅ LAJ CɅÑɅ
Anquese wocolʌch chaʼan maʼ cʌn muʼ bʌ i yʌl jiñi Biblia, mi caj i coltañet chaʼan tijicña maʼ chumtʌl tiʼ pejtelel ora. Mi mucʼʌch a chʌn acʼ a bʌ tiʼ wenta Jehová, mi caj i yʌqʼueñet a majtan.
¿Chuqui tsaʼ cʌñʌ?
-
¿Chucoch ñuc i cʼʌjñibal maʼ qʼuel jiñi i sujmlel tac am bʌ ti Biblia?
-
Cheʼ bʌ tsaʼix a qʼuele «chuqui tac jiñi ñumen ñuc bʌ i cʼʌjñibal», ¿chuqui yom maʼ mel?
-
¿Chucoch mach yomic maʼ cʌy a cʼajtiben i coltaya Jehová chaʼan maʼ bej chaʼlen estudio?
CɅÑɅ YAN TAC BɅ
Qʼuele chʌmpʼejl ticʼojel am bʌ i colta yonlel lac piʼʌlob chaʼan wen miʼ cʼʌñob jiñi ora am bʌ i chaʼañob.
Juntiquil xʼixic yom chaʼan wen miʼ qʼuejlel ti Dios, pero jiñi i ñoxiʼal maʼañic tsiʼ chʼʌmbe i sujm pejtelel jiñi woli bʌ i mel. Qʼuele bajcheʼ Jehová tsiʼ colta.
Jehová mi caj i coltañonla lac lʌtʼ jiñi lac wocol tac (5:05)
Qʼuele bajcheʼ juntiquil xʼixic tsiʼ colta i ñoxiʼal chaʼan miʼ ñop i sujmlel.
An i tajol miʼ yʌjlel chaʼan jiñi i testigojob Jehová miʼ tʼoxob jiñi familia tac. ¿Pero i sujmʌch ba?