Cheʼ bajcheʼ tsaʼix laj qʼuele, Dios mach tiʼ pejtelelic jiñi ñopbalʌl utsʼat miʼ qʼuel. Pero mucʼʌch i mejlel lac chʼujutesan Dios cheʼ bajcheʼ miʼ mulan. ¿Bajcheʼ yilal jiñi «chʼujutesaya» o «ñopbalʌl» utsʼat bʌ miʼ qʼuel? (Santiago 1:​27; nota). Laʼ laj qʼuel muʼ bʌ i yʌl jiñi Biblia.

1. ¿Bajcheʼ miʼ mejlel lac ñaʼtan bajcheʼ yom mi lac chʼujutesan Dios?

Yaʼ ti Biblia miʼ mejlel lac ñaʼtan bajcheʼ yom mi lac chʼujutesan Dios. Jesús tsiʼ yʌlʌ tiʼ tojlel Dios: «Jiñi a tʼan jiñʌch i sujmlel» (Juan 17:​17). An ñopbalʌl tac maʼañic bʌ miʼ chʼʌmob ti ñuc muʼ bʌ i yʌl jiñi Biblia, cojach miʼ tsajcañob i cʌntesa yicʼot i ñaʼtʌbal wiñicob. Pero Jehová maʼañic miʼ mulan cheʼ miʼ ñusʌbentel i mandar tac (pejcan Marcos 7:9). Pero cheʼ mucʼʌch lac wen acʼ ti ñuc muʼ bʌ i yʌl jiñi Biblia i mi lac jacʼben i ticʼojel tac, mi lac tijicñesʌben i pusicʼal.

2. ¿Bajcheʼ yom mi lac chʼujutesan Jehová?

Jehová jiñʌch tsaʼ bʌ i meleyonla (pʌtʌyonla), jin chaʼan jin jach yom mi lac chʼujutesan (Apocalipsis 4:​11). Ili yom i yʌl chaʼan cojach Jehová yom mi laj cʼuxbin yicʼot mi lac chʼujutesan, i mach yomic mi laj cʼʌn imagen tac (pejcan Isaías 42:8).

Yom mi lac chʼujutesan Jehová ti sʌc yicʼot cheʼ bajcheʼ miʼ mulan (Romanos 12:1). Ili yom i yʌl chaʼan yom mi lac jacʼ muʼ bʌ i subeñonla chaʼan bajcheʼ yom mi lac chumtʌl. Jumpʼejl ejemplo, jiñi muʼ bʌ i cʼuxbiñob Jehová miʼ qʼuelob ti ñuc yicʼot miʼ jacʼob muʼ bʌ i yʌl chaʼan bʌ jiñi ñujpuñel. Cheʼ jaʼel, maʼañic miʼ melob muʼ tac bʌ mejlel i ticʼlañob bajcheʼ jiñi droga, i ñucʼol cigarro yicʼot jiñi cʌlʌx jap lembal. a

3. ¿Chucoch yom mi lac chʼujutesan Jehová yicʼot yambʌ lac piʼʌlob yomoʼ bʌ i jacʼbeñob i tʼan?

Ti jiñi tempa bʌ tac muʼ bʌ i mejlel ti jujumpʼejl semana miʼ mejlel la cʌqʼuen i ñuclel Jehová la quicʼot jiñi congregación (Salmo 111:​1, 2). Junchajp bajcheʼ mi lac mel jiñʌch cheʼ bʌ mi laj cʼʌyin (pejcan Salmo 104:​33). Mi Jehová miʼ subeñonla chaʼan yom mi lac tempan lac bʌ chaʼañʌch miʼ cʼuxbiñonla i yujil chaʼan jiñʌch muʼ bʌ caj i coltañonla chaʼan tijicña mi lac chumtʌl tiʼ pejtelel ora. Cheʼ bʌ mi la cajñel ti tempa bʌ, mi lac ñuqʼuesʌbentel lac pusicʼal i mi lac ñuqʼuesʌben i pusicʼal yambʌlob.

 LAʼ LAC ÑUMEN ÑAʼTAN

4. Mach weñic cheʼ mi laj cʼʌn imagen tac chaʼan mi lac chʼujutesan Dios

5. Mi cojach Jehová mi lac chʼujutesan, mi laj cʌy jiñi mach bʌ i sujmic cʌntesa tac

 6. Yaʼ ti tempa bʌ tac mi lac chʼujutesan Dios

Cheʼ mi lac chaʼlen cʼay yicʼot mi la cʌcʼ laj comentario yaʼ ti tempa bʌ mi la cʌqʼuen i ñuclel Jehová yicʼot mi lac tem ñuqʼuesʌben lac bʌ lac pusicʼal. Pejcanla Salmo 22:​22 i tem alʌla iliyi:

• ¿Muʼ baʼ mulan jiñi comentario tac muʼ bʌ i yʌjqʼuel yaʼ ti tempa bʌ?

• ¿A wom baʼ chajpan jumpʼejl a comentario jaʼel chaʼan maʼ wʌcʼ yaʼ ti tempa bʌ?

7. Jehová miʼ wen mulan cheʼ mi lac suben yambʌlob chuqui woli bʌ laj cʌn

Cabʌl bajcheʼ miʼ mejlel lac suben yambʌlob muʼ bʌ i yʌl jiñi Biblia. Pejcanla Salmo 9:1 yicʼot 34:1, i tem alʌla iliyi:

• Ti jiñi cʌmbil bʌ a chaʼan yaʼ ti Biblia, ¿baqui bʌ a wom a suben yambʌlob?

 TSAʼ BɅ LAJ CɅÑɅ

Mi la cʌqʼuen i tijicñʌyel Dios cheʼ bʌ jin jach mi lac chʼujutesan, cheʼ mi la cʌqʼuen i ñuclel yaʼ ti tempa bʌ tac yicʼot cheʼ mi lac suben yambʌlob chuqui cʌmbil lac chaʼan.

¿Chuqui tsaʼ cʌñʌ?

• ¿Bajcheʼ miʼ mejlel lac ñaʼtan chaʼan bajcheʼ yom Dios chaʼan mi lac chʼujutesan?

• ¿Chucoch jin jach Jehová yom mi lac chʼujutesan?

• ¿Chucoch yom mi lac chʼujutesan Jehová yicʼot yambʌ lac piʼʌlob yomoʼ bʌ i jacʼbeñob i tʼan?