CɅNTESɅNTEL 17
¿Bajcheʼ yilal jiñi Jesús?
Cheʼ bʌ mi laj cʌn majlel chuqui tsiʼ mele yicʼot chuqui tsiʼ yʌlʌ Jesús cheʼ bʌ tsajñi wʌʼ ti Pañimil, mi laj cʌn i melbal (chaʼlibal) tac muʼ bʌ i ñumen lʌcʼtesañonla tiʼ tojlel yicʼot tiʼ tojlel Jehová, jiñi i Tat. ¿Baqui bʌ jiñi wen tac bʌ i melbal Jesús? ¿I chuqui miʼ mejlel lac mel chaʼan mi lac lajin?
1. ¿Bajcheʼqui lajal Jesús yicʼot jiñi i Tat?
Jesús an chumle yonlel jab yaʼ ti panchan i an i qʼuele jiñi cʼuxbibil bʌ i Tat yicʼot an i cʌñʌ tiʼ tojlel. Jin chaʼan, cheʼ miʼ ñaʼtan, cheʼ miʼ yubin i bʌ yicʼot cheʼ i melbal bajcheʼ Jehová (pejcan Juan 5:19). Jesús miʼ pʌs bajcheʼ yilal jiñi i melbal i Tat come tsiʼ yʌlʌ: «Jiñi tsaʼix bʌ i qʼueleyon tsaʼix i qʼuele jiñi Tatʌl jaʼel» (Juan 14:9). Jin chaʼan mi tsaʼ ñumen cʌñʌ Jesús, mi caj a ñumen cʌn Jehová. Jumpʼejl ejemplo, cheʼ bʌ Jesús tsiʼ pʼunta wiñicob xʼixicob (quixtañujob), tsiʼ pʌsʌ bajcheʼ miʼ yubin i bʌ Jehová ti a tojlel.
2. ¿Bajcheʼ tsiʼ pʌsʌ Jesús chaʼan miʼ cʼuxbin jiñi i Tat?
Jesús tsiʼ yʌlʌ: «Chaʼan jiñi pañimil miʼ ñaʼtan chaʼan mij cʼuxbin jiñi Tatʌl, tsʼʌcʌl mic mel tsaʼ bʌ i subeyon jiñi Tatʌl» (Juan 14:31). Cheʼ bʌ tsajñi wʌʼ ti Pañimil, Jesús tsiʼ pʌsʌ chaʼan miʼ wen cʼuxbin jiñi i Tat come tsiʼ jacʼbe i tʼan cʼʌlʌl cheʼ bʌ woli (choncol) i ñusan tsʌts bʌ wocol tac. Cheʼ jaʼel, Jesús tsiʼ wen mulaj i yʌl tiʼ tojlel i Tat yicʼot i coltan jiñi yambʌlob chaʼan miʼ sujtelob tiʼ yamigo Dios (Juan 14:23).
3. ¿Bajcheʼ an i pʌsʌ Jesús chaʼan miʼ cʼuxbiñonla?
Jiñi Biblia miʼ yʌl chaʼan Jesús miʼ wen cʼuxbin jiñi i yalobilob jiñi wiñicob (Proverbios 8:31, TNM). Ili cʼuxbiya tsiʼ pʌsʌ cheʼ bʌ tsiʼ ñuqʼuesʌbe i pusicʼal yicʼot cheʼ bʌ tsiʼ colta jiñi lac piʼʌlob i maʼañic tsiʼ pijta chaʼan miʼ chaʼ qʼuextʌbentel. Cheʼ bʌ tsiʼ mele milagro tac mach cojach tsiʼ pʌsʌ chaʼan an i pʼʌtʌlel, tsiʼ pʌsʌ jaʼel chaʼan an i pʼuntaya (Marcos 1:40-42). Tsiʼ pʌsʌ chaʼan uts yicʼot chaʼan junlajal miʼ qʼuel jiñi yambʌlob. Jiñi tsaʼ bʌ i yʌlʌ tsiʼ ñuqʼuesʌbe i pusicʼal yicʼot tsiʼ yʌqʼue i pijtaya pejtelel jiñi lac piʼʌlob tsaʼ bʌ i ñʌchʼtayob yicʼot weñoʼ bʌ i pusicʼal. Cheʼ jaʼel, tsiʼ ñusa wocol yicʼot tsiʼ yʌcʼʌ i bʌ ti chʌmel (sajtel) come miʼ cʼuxbiñonla. Pero ñumento miʼ cʼuxbin jiñi muʼ bʌ i jacʼbeñob i cʌntesa tac (pejcan Juan 15:13, 14).
LAʼ LAC ÑUMEN ÑAʼTAN
Laʼ lac ñumen cʌn bajcheʼ yilal jiñi i melbal tac Jesús yicʼot bajcheʼ miʼ mejlel lac lajiben jiñi i cʼuxbiya yicʼot i yutslel.
4. Jesús miʼ cʼuxbin jiñi i Tat
Jesús tsiʼ pʌsbeyonla bajcheʼ miʼ mejlel lac pʌsben cʼuxbiya jiñi Dios. Pejcanla Lucas 6:12 yic’ot Juan 15:10 i 17:26. Cheʼ bʌ tsaʼix laʼ pejca jiñi texto tac, tem alʌla iliyi:
-
Cheʼ bʌ mi lac ñaʼtan tsaʼ bʌ i mele Jesús, ¿bajcheʼ miʼ mejlel lac pʌsben Jehová chaʼan mi laj cʼuxbin?
Jesús tsiʼ cʼuxbi jiñi i Tat am bʌ ti panchan yicʼot tsiʼ pejca ti oración tiʼ pejtelel ora.
5. Jesús tsiʼ chʼʌmʌ ti ñuc jiñi yomoʼ bʌ coltʌntel
Jesús maʼañic tsiʼ bajñel ñaʼta i bʌ, tsiʼ ñumen chʼʌmʌ ti ñuc yambʌlob. I cheʼ bʌ lujbix tsaʼʌch i colta jiñi yambʌlob. Pejcanla Marcos 6:30-44 i tem alʌla iliyi:
-
Cheʼ bajcheʼ miʼ yʌl ili relato, ¿bajcheʼ tsiʼ chʼʌmʌ ti ñuc Jesús jiñi yambʌlob? (Qʼuelela jiñi versículo 31, 34, 41 yicʼot 42).
-
¿Chucoch tsiʼ colta Jesús jiñi wiñicob xʼixicob? (Qʼuelela jiñi versículo 34).
-
Come Jesús miʼ lajiben jiñi i melbal tac i Tat, ¿chuqui miʼ cʌntesañet pejtelel iliyi tiʼ tojlel Jehová?
-
Cheʼ bajcheʼ tsiʼ mele Jesús, ¿bajcheʼ miʼ mejlel lac pʌs chaʼan mi lac chʼʌm ti ñuc jiñi yambʌlob?
6. Jesús wen an i yutslel
Anquese Jesús mach cabʌlic i chubʌʼan, tsiʼ pʌsʌ i yutslel. Jesús yom chaʼan cheʼ mi lac mel jaʼel. Pejcanla Hechos 20:35 i tem alʌla iliyi:
-
Cheʼ bajcheʼ tsiʼ yʌlʌ Jesús, ¿chuqui miʼ yʌqʼueñonla lac tijicñʌyel?
Qʼuelela jiñi VIDEO i tem alʌla iliyi:
-
¿Bajcheʼ miʼ mejlel lac pʌs la cutslel anquese mach wen cabʌlic chuqui an lac chaʼan?
¿A wujilix ba?
Jiñi Biblia miʼ yʌl chaʼan yom mi lac pejcan Jehová ti oración tiʼ cʼabaʼ Jesús (pejcanla Juan 16:23, 24). Cheʼ bajcheʼ iliyi mi lac pʌs chaʼan mi laj qʼuel ti ñuc jiñi tsaʼ bʌ i mele Jesús chaʼan mi lac mejlel ti sujtel tiʼ yamigo Jehová.
AN MUʼ BɅ I YɅLOB: «Dios mach i wentajoñicla cheʼ bʌ mi lac ñusan wocol».
-
Come Jesús miʼ pʌs jiñi i melbal i Tat, ¿bajcheʼ miʼ pʌsbeñonla jiñi i yejemplo chaʼan i wentajoñʌchla Jehová?
TSAʼ BɅ LAJ CɅÑɅ
Jesús miʼ cʼuxbin Jehová yicʼot miʼ cʼuxbiñonla jaʼel. Come Jesús lajal bajcheʼ i Tat, mi tsaʼ ñumen cʌñʌ Jesús, mi caj a ñumen cʌn Jehová.
¿Chuqui tsaʼ cʌñʌ?
-
¿Bajcheʼ miʼ mejlel lac pʌs chaʼan mi laj cʼuxbin Jehová cheʼ bajcheʼ tsiʼ mele Jesús?
-
¿Bajcheʼ miʼ mejlel lac pʌs chaʼan mi laj cʼuxbin jiñi lac piʼʌlob cheʼ bajcheʼ tsiʼ mele Jesús?
-
¿Baqui bʌ i melbal Jesús maʼ ñumen mulan?
CɅÑɅ YAN TAC BɅ
Qʼuele jiñi i melbal tac Jesús mejl bʌ lac lajin.
Qʼuele chucoch ñuc i cʼʌjñibal mi la cʌlben i cʼabaʼ Jesús cheʼ bʌ mi lac chaʼlen oración.
¿Muʼ ba i yʌl jiñi Biblia bajcheʼ yilal i ñiʼ i wut Jesús cheʼ bʌ tsajñi wʌʼ ti Pañimil?
¿Chuqui mi laj cʌn chaʼan bajcheʼ tsiʼ pʌsʌ i melbal Jesús tiʼ tojlel jiñi xʼixicob?
«Dios miʼ qʼuel ti ñuc jiñi xʼixicob» (Lac Tsictesʌbentel, 1 i chaʼan septiembre, 2012)
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
