CɅNTESɅNTEL 22
¿Bajcheʼ miʼ mejlel a sub jiñi wen tʼan?
Cheʼ bʌ woli (choncol) a cʌn majlel muʼ bʌ i yʌl jiñi Biblia, tajol maʼ ñaʼtan: «¡Yom mic suben yambʌlob iliyi!». I weñʌch jiñi woli (yʌquel) bʌ a ñaʼtan, yomʌch mi lac suben yambʌlob. Pero tajol maʼ bʌcʼñan a suben yambʌlob jiñi woli bʌ a cʌn majlel. Laʼ laj qʼuel bajcheʼ miʼ mejlel a sʌt a bʌqʼuen yicʼot chaʼan maʼ wubin a tijicñʌyel cheʼ bʌ maʼ suben yambʌlob chaʼan bʌ jiñi Biblia.
1. ¿Bajcheʼ miʼ mejlel a suben a cʌñʌyoʼ bʌ jiñi woli bʌ a cʌn majlel?
Jiñi xcʌntʼañob i chaʼan Jesús tsiʼ yʌlʌyob: «Maʼañic miʼ mejlel j cʌy lon cʌl jiñi tsaʼ bʌ lon j qʼuele yicʼot tsaʼ bʌ lon cubi» (Hechos 4:20). Tsiʼ wen qʼueleyob ti ñuc jiñi i sujmlel, jin chaʼan yomob i suben jiñi yambʌlob. ¿Cheʼ ba yubil maʼ wubin a bʌ jaʼel? Mi cheʼʌchi, chaʼlen wersa a qʼuel bajcheʼ miʼ mejlel a subeñob ti wen jach bʌ tʼan jiñi a familiajob yicʼot a wamigojob jiñi woli bʌ a cʌn majlel (pejcan Colosenses 4:6).
Muʼ bʌ mejlel a wʌl cheʼ bʌ mi caj a pejcañob
-
Cheʼ bʌ mi caj a suben chaʼan bʌ Biblia juntiquil ti a familia, miʼ mejlel a tech a wʌl: «Ti ili semana an chuqui wen ñuc bʌ i cʼʌjñibal tsaʼ j cʌñʌ», cheʼ bajcheʼ jiñi miʼ mejlel a tech a suben chaʼan bʌ jiñi Biblia.
-
Cheʼ bʌ juntiquil a wamigo cʼam o woli ti pensar, pʌsben jumpʼejl texto mejl bʌ i ñuqʼuesʌben i pusicʼal.
-
Cheʼ bʌ jiñi a piʼʌlob ti eʼtel miʼ cʼajtibeñetob bajcheʼ yilal tsaʼ ñusa ti yambʌ semana, subeñob chuqui tsaʼ bʌ a cʌñʌ cheʼ bʌ tsaʼ chʼʌmʌ estudio o ti jiñi tempa bʌ.
-
Pʌsben jiñi a wamigojob bajcheʼ miʼ mejlelob ti ochel ti jiñi página chaʼan internet jw.org.
-
Pʌyʌ yambʌlob cheʼ bʌ mi caj a chʼʌm estudio o pʌsbeñob bajcheʼ miʼ mejlel i cʼajtiñob jumpʼejl estudio ti jw.org.
2. ¿Chucoch yomʌch maʼ chaʼlen subtʼan a wicʼot jiñi hermanojob?
Jiñi xcʌntʼañob i chaʼan Jesús mach cojach tiʼ subeyob wen tʼan jiñi i cʌñʌyoʼ bʌ. Jesús tsiʼ chocoyob majlel «ti chaʼchaʼtiquil tiʼ pejtelel tejclum yicʼot alʌ tejclum tac» chaʼan miʼ chaʼleñob subtʼan yaʼi (Lucas 10:1). Cheʼʌch tsiʼ meleyob bajcheʼ jiñi chaʼan ñumen cabʌl jiñi lac piʼʌlob miʼ ñʌchʼtañob jiñi wen tʼan. Jiñi xcʌntʼañob tijicña tsiʼ yubiyob i bʌ cheʼ bʌ temel tsiʼ chaʼleyob subtʼan (Lucas 10:17). ¿Ixcu cheʼ muqʼuic a loqʼuel jaʼel ti subtʼan a wicʼot jiñi hermanojob?
LAʼ LAC ÑUMEN ÑAʼTAN
Laʼ laj qʼuel bajcheʼ miʼ mejlel a sʌt a bʌqʼuen yicʼot chaʼan maʼ wubin a tijicñʌyel cheʼ bʌ maʼ suben yambʌlob chaʼan bʌ jiñi Biblia.
3. Jehová mi caj i yajñel yicʼotet
An yomoʼ bʌ subtʼan, pero miʼ bʌcʼñañob bajcheʼ yilal mi caj i qʼuejlelob o chuqui mi caj i ñaʼtʌntel tiʼ tojlelob.
-
Ixcu jatet, cheʼ maʼ ñaʼtan a suben yambʌlob chuqui woli bʌ a cʌn majlel, ¿muʼ ba a chaʼlen bʌqʼuen, o maʼañic? ¿Chucoch?
Qʼuelela jiñi VIDEO i tem alʌla iliyi:
-
¿Bajcheʼ tiʼ sʌtʌyob i bʌqʼuen jiñi xcolelob ti ili video?
Pejcanla Isaías 41:10 i tem alʌla iliyi:
-
¿Chucoch yom maʼ mel oración cheʼ maʼ bʌcʼñan subtʼan?
¿A wujilix ba?
Cabʌlob i testigojoʼ bʌ Jehová ili ora tsiʼ ñaʼtayob chaʼan maʼañic baqui ora mi caj i mejlelob ti subtʼan. Jumpʼejl ejemplo, juntiquil wiñic i cʼabaʼ Sergey maʼañic i cʼʌjñibal tsiʼ yubi i bʌ i wocol tsiʼ yubi chaʼan miʼ chaʼlen tʼan yicʼot yambʌlob. Pero ti jumpʼejl bʌ qʼuin tsaʼ caji i chʼʌm estudio. Miʼ yʌl: «Anquese mic wen chaʼlen bʌqʼuen, tsaʼʌch caji c suben yambʌlob jiñi woli bʌ j cʌn. Jiñi tsiʼ coltayon chaʼan añix j cʼʌjñibal mi cubin c bʌ yicʼot chaʼan mij cʌy tic pusicʼal jiñi cʌntesa tac am bʌ ti Biblia».
4. Pʌsʌ chaʼan maʼ qʼuelob ti ñuc
Cheʼ bʌ an majqui mi caj a suben jiñi wen tʼan mach cojach yom maʼ ñaʼtan chuqui mi caj a suben, ñaʼtan jaʼel bajcheʼ mi caj a suben. Pejcanla 2 Timoteo 2:24 yicʼot 1 Pedro 3:15, i tem alʌla iliyi:
-
Cheʼ bʌ an majqui mi caj a suben muʼ bʌ i yʌl jiñi Biblia, ¿bajcheʼ miʼ mejlel a mel muʼ bʌ i yʌl ili versículo tac?
-
Tajol an a familia o a wamigojob mach bʌ cheʼic mi caj i ñaʼtañob bajcheʼ jatet. ¿Chuqui miʼ mejlel a mel? ¿I chuqui mach bʌ yomic maʼ mel?
-
¿Chucoch ñumen wen cheʼ wen jach mi lac chaʼlen tʼan yicʼotob i mach jiñic cheʼ mi lac subeñob chuqui yom miʼ ñopob?
5. Mi la cubin lac tijicñʌyel cheʼ mi lac sub jiñi wen tʼan
Jehová tiʼ sube Jesús chaʼan miʼ chaʼlen subtʼan. ¿Bajcheʼ yilal tsiʼ qʼuele Jesús jiñi subtʼan? Pejcanla Juan 4:34 i tem alʌla iliyi:
-
Cheʼ mi laj cʼux wen tac bʌ i bʌl lac ñʌcʼ miʼ coltañonla chaʼan cuxulonla yicʼot chaʼan tijicñayonla. ¿Chucoch tsiʼ yʌlʌ Jesús chaʼan lajal bajcheʼ i bʌl i ñʌcʼ cheʼ bʌ miʼ melben i yeʼtel Dios, yaʼ bʌ ochem jaʼel cheʼ bʌ miʼ chaʼlen subtʼan?
-
¿Chuqui tac mi caj i yʌqʼueñet a tijicñʌyel cheʼ bʌ maʼ sub jiñi wen tʼan?
Mejl bʌ a mel
-
Ti jiñi tempa bʌ cheʼ ti semana, qʼuele bajcheʼ miʼ mejlel a tech a chaʼlen tʼan.
-
Cʼajtiben jiñi woli bʌ i cʌntesañet chuqui miʼ mejlel a mel chaʼan maʼ ñusan jumpʼejl asignación yaʼ ti tempa bʌ. Jiñi asignación tac muʼ bʌ caj a wʌqʼuentel mi caj i coltañet chaʼan maʼañix maʼ wen chaʼlen bʌqʼuen cheʼ bʌ maʼ suben yambʌlob jiñi woli bʌ a cʌn majlel.
-
Cʼʌñʌ jiñi sección «An muʼ bʌ i yʌlob» yicʼot «An muʼ bʌ i cʼajtibeñoñobla» muʼ bʌ i tilel ti ili libro chaʼan maʼ chaʼlen ti ensayar bajcheʼ miʼ mejlel a jacʼ jiñi cʼajtiya tac muʼ bʌ i melbeñoñobla o jiñi ñʌmʌl bʌ i yʌlob jiñi lac piʼʌlob cheʼ bʌ mach yomobic i ñʌchʼtañob lac subtʼan.
AN MUʼ BɅ I CʼAJTIBEÑOÑOBLA: «¿Bajcheʼ a wilal?».
-
Cheʼ bʌ maʼ cʼajtibentel iliyi, ¿bajcheʼ miʼ mejlel a subeñob jiñi am bʌ a cʌñʌ tilel yaʼ ti Biblia?
TSAʼ BɅ LAJ CɅÑɅ
Cheʼ bʌ mi lac sub jiñi wen tʼan miʼ yʌqʼueñonla lac tijicñʌyel, i cheʼ mucʼʌch a tech a chaʼlen subtʼan tajol mach wen wocolic cheʼ bajcheʼ tsaʼ ñaʼta ti ñaxan.
¿Chuqui tsaʼ cʌñʌ?
-
¿Chuqui miʼ mejlel i ñijcan a pusicʼal chaʼan maʼ chaʼlen subtʼan?
-
¿Bajcheʼ miʼ mejlel a chaʼlen subtʼan ti wen jach bʌ tʼan?
-
¿Bajcheʼ miʼ mejlel a sʌt a bʌqʼuen?
CɅÑɅ YAN TAC BɅ
Qʼuele chʌnchajp bajcheʼ miʼ mejlel a cʼʌn ti a subtʼan jiñi tarjeta de contacto chaʼan jw.org.
¿Bajcheʼ miʼ mejlel la cʌcʼ jiñi tarjeta i chaʼan jw.org? (1:43)
Qʼuele chʌmpʼejl melbalʌl mejl bʌ i coltañet chaʼan maʼ sub jiñi wen tʼan.
«¿A wom ba sujtel ti xchuc wiñicob?» (Lac Tsictesʌbentel, septiembre i chaʼan 2020)
Qʼuele jumpʼejl relato am bʌ yaʼ ti Biblia muʼ bʌ i coltañonla lac taj lac chʼejlel chaʼan mi lac chaʼlen subtʼan anquese xcolelontola.
Qʼuele bajcheʼ miʼ mejlel a subeñob chaʼan bʌ Biblia jiñi a familiajob maxto bʌ i cʌñʌyobic Jehová.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
