Jiñi chʼichʼ wen ñuc i cʼʌjñibal, mi maʼañic lac chʼichʼel mach cuxuloñicla. Come Dios tsiʼ meleyonla (pʌtʌyonla), jin miʼ mejlel i subeñonla bajcheʼ yom mi laj cʼʌn. ¿Chuqui miʼ yʌl Jehová chaʼan jiñi chʼichʼ? ¿Mejl ba laj cʼux o mejl ba lac chʼʌm jiñi chʼichʼ? ¿Chuqui mi caj i coltañet a ñaʼtan chuqui yom maʼ mel chaʼan jiñi chʼichʼ?

1. ¿Bajcheʼ yilal miʼ qʼuel Jehová jiñi chʼichʼ?

Jehová tiʼ subeyob i wiñicob ti wajali: «I cuxtʌlel pejtelel cuxul tac bʌ an tiʼ chʼichʼel» (Levítico 17:14). Tiʼ wut Jehová, jiñi chʼichʼ jiñʌch laj cuxtʌlel. Come jiñi laj cuxtʌlel jiñʌch lac majtan ti Dios, i chʼujul yicʼot miʼ qʼuel ti ñuc, jin chaʼan jiñi lac chʼichʼel mucʼʌch i qʼuel ti ñuc jaʼel.

2. ¿Yom ba Dios chaʼan mi laj cʼʌn jiñi chʼichʼ?

Cheʼ maxto añic jiñi congregación, Jehová tiʼ sube i wiñicob chaʼan mach yomic miʼ cʼuxob jiñi chʼichʼ (pejcan Génesis 9:4 yicʼot Levítico 17:10). Cheʼ bʌ añix jiñi congregación, Jehová tsiʼ chaʼ alʌ ili mandar. Come jiñi Junmojt muʼ bʌ i pʌsob bij, yom i yʌl, jiñi apóstolob yicʼot ancianojob muʼ bʌ i qʼuelob jiñi congregación, tsiʼ yʌqʼueyob ili ticʼojel jiñi xñoptʼañob: «Yom mi laʼ ticʼ laʼ bʌ [...] ti chʼichʼ» (pejcan Hechos 15:28, 29).

¿Chuqui yom i yʌl cheʼ mi lac ticʼ lac bʌ ti chʼichʼ? Mi jiñi doctor miʼ subeñet chaʼan mach yomic maʼ jap lembal, ¿muʼ ba caj a jap? Pero ¿muʼ ba caj a cʼux bʌlñʌcʼʌl am bʌ i chaʼan lembal o muʼ ba caj a jochʼ ochel ti a chijil? Maʼañic. Cheʼʌch miʼ yujtel jaʼel chaʼan jiñi chʼichʼ. Mi la com lac jacʼben i tʼan Dios, mach yomic mi laj cʼux o mi lac jap jiñi chʼichʼ, yicʼot mach yomic mi laj cʼux jiñi weʼel maʼañic bʌ tsaʼ locʼsʌbenti i chʼichʼel. Cheʼ jaʼel, mach yomic mi laj cʼux jiñi bʌlñʌcʼʌl tsaʼ bʌ otsʌbenti chʼichʼ.

¿Ixcu cheʼ mi laj cʼʌn jiñi chʼichʼ chaʼan mi lac tsʼʌcʌntel? Jiñi doctorob an tac bajcheʼ miʼ cʼʌñob jiñi chʼichʼ baqui muqʼuix i ñusan ti pʼis jiñi i mandar Dios. Jumpʼejl ejemplo, jiñʌch cheʼ mi la cotsʌbentel jiñi chʼichʼ ti lac bʌcʼtal o baqui jach bʌ jiñi chʌnchajp am bʌ i chaʼan: Glóbulos rojos, glóbulos blancos, plaqueta yicʼot plasma. An qʼuiñil mach wen tsiquilic mi woli (choncol) i ñusʌbentel jiñi i mandar Dios. Jumpʼejl ejemplo, jiñʌch cheʼ miʼ cʼʌjñel jiñi tsʼitaʼ loqʼuem tac bʌ ti jiñi chʌnchajp am bʌ i chaʼan jiñi chʼichʼ. An qʼuiñil jin jach miʼ chaʼ cʼʌmbentel i chʼichʼel jiñi cʼam bʌ. Jujuntiquil an tiʼ wenta miʼ ñaʼtan chuqui mi caj i mel (Gálatas 6:5). a

 LAʼ LAC ÑUMEN ÑAʼTAN

3. Mele muʼ bʌ i yʌqʼuen i tijicñʌyel Jehová

¿Chuqui miʼ mejlel i coltañet chaʼan jiñi muʼ bʌ a yajcan a mel miʼ pʌs chaʼan mucʼʌch a chʼʌm ti ñuc bajcheʼ yilal miʼ qʼuel Dios jiñi chʼichʼ? Qʼuelela jiñi VIDEO i cheʼ jiñi tem alʌla chucoch ñuc i cʼʌjñibal mi lac mel muʼ bʌ i yʌl ilayi.

• Cʼajtiben Dios ti oración chaʼan miʼ yʌqʼueñet a ñaʼtʌbal (Santiago 1:5).

• Sʌclan principio tac am bʌ ti Biblia i qʼuele bajcheʼ miʼ mejlel a cʼʌn (Proverbios 13:16).

• Qʼuele chuqui tac ti coltʌntel an yaʼ baqui chumulet.

• Qʼuele chuqui tac maʼañic bʌ miʼ mejlel a chʼʌm.

• Wen qʼuele jiñi muʼ bʌ caj a mel chaʼan maʼañic miʼ ticʼlan a conciencia (Hechos 24:16). b

• Wen ñaʼtan chaʼan maʼañic majqui miʼ mejlel i subeñet chuqui yom maʼ mel, mi jiñicto a ñoxiʼal, a wijñam, mi juntiquilic anciano mi jiñic jiñi woli bʌ i cʌntesañet. Jujuntiquil an ti lac wenta mi lac ñaʼtan (Romanos 14:12).

• Tsʼijbun ti jumpʼejl jun jiñi tsaʼ bʌ a ñaʼta.

4. Jiñi i testigojonbʌlon Jehová mi lon c sʌclan wem bʌ lon c tsʼʌcʌntel

Cheʼ mi lac jacʼben i tʼan Dios chaʼan jiñi chʼichʼ mach yomic i yʌl chaʼan maʼañic mi lac mejlel ti tsʼʌcʌntel ti wen. Qʼuelela jiñi VIDEO.

Pejcanla Tito 3:2 i tem alʌla iliyi:

• ¿Chucoch yom jach wen mi lac pejcañob jiñi doctorob?

 5. Jiñi an tac bʌ i chaʼan jiñi chʼichʼ

Jiñi chʼichʼ an chʌnchajp am bʌ i chaʼan: Glóbulos rojos, glóbulos blancos, plaqueta yicʼot plasma. I jujunchajp iliyi an chuqui tac yambʌ miʼ chʼʌm tilel. c An muʼ bʌ i cʼʌjñel chaʼan miʼ mejlel tsʼac tac.

Jujuntiquil an tiʼ wenta miʼ ñaʼtan chuqui mi caj i mel, mi mi caj i chʼʌm o maʼañic jiñi tsʼitaʼ loqʼuem tac bʌ ti jiñi chʌnchajp am bʌ i chaʼan jiñi chʼichʼ, jiñʌch bajcheʼ cʌntesʌbil i chaʼan i conciencia. An muʼ bʌ i ñaʼtañob chaʼan maʼañic mi caj i chʼʌmob jiñi tsʼac tac am bʌ i chaʼan jiñi tsʼitaʼ loqʼuem tac bʌ ti chʼichʼ. I an maʼañic bʌ i wocolel miʼ qʼuelob cheʼ miʼ chʼʌmob.

Cheʼ woli a ñaʼtan chuqui mi caj a mel, cʼajtiben a bʌ:

• ¿Bajcheʼ mi caj c tsictesʌben jiñi doctor chucoch mucʼʌch c chʼʌm o maʼañic jiñi tsʼac am bʌ i chaʼan tsʼitaʼ loqʼuem tac bʌ ti chʼichʼ?

 TSAʼ BɅ LAJ CɅÑɅ

Jehová yom chaʼan mi laj qʼuel ti ñuc jiñi chʼichʼ.

¿Chuqui tsaʼ cʌñʌ?

• ¿Chucoch Jehová miʼ qʼuel ti ñuc jiñi chʼichʼ?

• ¿Chucoch la cujil chaʼan jiñi mandar tsaʼ bʌ i yʌcʼʌ Dios chaʼan jiñi chʼichʼ yaʼ ochem jaʼel cheʼ mi la cotsʌbentel jiñi chʼichʼ ti lac chijil?

• ¿Chuqui mi caj i coltañet a ñaʼtan mi yomʌch maʼ chʼʌm jiñi chʼichʼ bajcheʼ tsʼac?