CɅNTESɅNTEL 42
¿Chuqui miʼ yʌl jiñi Biblia chaʼan jiñi i bajñelobto bʌ yicʼot jiñi ñujpuñemoʼ bʌ?
An cultura tac baqui jiñi lac piʼʌlob miʼ yʌlob chaʼan mi la com tijicñayonla yom mi lac ñujpuñel. Pero mach tiʼ pejtelelobic jiñi ñujpuñemoʼ bʌ luʼ tijicñayob, i mach tiʼ pejtelelobic jiñi i bajñelobto bʌ chʼijyem miʼ yubiñob i bʌ. Jiñi Biblia miʼ yʌl chaʼan cheʼ lac bajñelto o cheʼ ñujpuñemonla jumpʼejlʌch lac majtan tilem bʌ ti Dios.
1. ¿Baqui tac bʌ i wenlel cheʼ lac bajñelto?
Jiñi Biblia miʼ yʌl: «Jiñi muʼ bʌ i ñujpuñel wen chuqui miʼ mel, pero jiñi mach bʌ añic miʼ ñujpuñel ñumen wen chuqui miʼ mel» (pejcan 1 Corintios 7:32, 33, 38). ¿Chuqui yom i yʌl cheʼ «ñumen wen chuqui miʼ mel» jiñi mach bʌ añic miʼ ñujpuñel? Jiñi xñoptʼañob i bajñelobto bʌ maʼañic miʼ ñaʼtañob bajcheʼ mi caj i cʌntañob i ñoxiʼal o i yijñam. Jin chaʼan ñumen librejobto. An muʼ bʌ i mejlel i ñumen melbeñob i yeʼtel Jehová, jumpʼejl ejemplo, miʼ mejlelob ti majlel ti subtʼan ti yambʌ tejclum. I cheʼ jaʼel, miʼ mejlel i ñumen aqʼueñob i yorajlel chaʼan miʼ ñumen lʌcʼtesañob i bʌ ti Jehová.
2. ¿Baqui bʌ i wenlel cheʼ mi lac ñujpuñel ti wen?
Cheʼ ñujpuñemonla añʌch i wenlel jaʼel. Jiñi Biblia miʼ yʌl chaʼan «cheʼ chaʼtiquilonla cabʌl miʼ mejlel», yom i yʌl, chaʼan ñumen wen (Eclesiastés 4:9). Ili cheʼʌch miʼ yujtel tiʼ tojlel jiñi xñujpuñelob muʼ bʌ i jacʼob jiñi principio tac am bʌ ti Biblia. Jiñi muʼ bʌ i ñujpuñelob ti wen, miʼ yʌqʼueñob i bʌ i tʼan chaʼan mi caj i cʼuxbiñob i bʌ, mi caj i qʼuelob i bʌ ti ñuc i chaʼan wen mi caj i cʌntañob i bʌ. Jin chaʼan, ñumen wen miʼ yajñelob cheʼ bajcheʼ jiñi lajal chumuloʼ bʌ pero mach bʌ ñujpuñemobic. Cheʼ jaʼel, jiñi i yalobilob cʌntʌbil mi caj i yubiñob i bʌ.
3. ¿Chuqui miʼ ñaʼtan Jehová chaʼan jiñi ñujpuñel?
Cheʼ bʌ Jehová tsiʼ mele jiñi ñaxam bʌ xñujpuñel, tsiʼ yʌlʌ: «Jini chaʼan winicob miʼ cʌyob i tat i ñaʼ. Miʼ chʌn ajñelob yicʼot i yijñam» (Génesis 2:24). Jehová yom chaʼan jiñi wiñic yicʼot i yijñam miʼ cʼuxbiñob i bʌ yicʼot temel miʼ chʌn ajñelob. I cojach miʼ yʌl chaʼan miʼ mejlel i chaʼleñob i bʌ ti divorciar mi juntiquil miʼ piʼlen yambʌ mach bʌ i piʼʌlic. Mi cheʼ miʼ yujtel bajcheʼ jiñi, Jehová miʼ cʌyben tiʼ wenta jiñi wiñic o xʼixic maʼañic bʌ i mul chaʼan miʼ ñaʼtan mi mucʼʌch caj i chaʼlen i bʌ ti divorciar (Mateo 19:9). a Jehová mach yomic i qʼuel chaʼan juntiquil xñoptʼan cabʌl majqui miʼ ñujpuñel yicʼot (1 Timoteo 3:2).
LAʼ LAC ÑUMEN ÑAʼTAN
Laʼ laj qʼuel bajcheʼ miʼ mejlel a wubin a tijicñʌyel yicʼot a wʌqʼuen i tijicñʌyel Jehová mach yʌlʌyic mi a bajñelto o mi ñujpuñemetix.
4. Cabʌl chuqui miʼ mejlel a mel cheʼ a bajñelto
Jesús tsiʼ yʌlʌ chaʼan jumpʼejlʌch lac majtan cheʼ lac bajñelto (Mateo 19:11, 12). Pejcanla Mateo 4:23 i tem alʌla iliyi:
-
Come Jesús maʼañic tsiʼ pʌyʌ i yijñam, ¿bajcheʼ tsaʼ mejli i melben i yeʼtel Jehová yicʼot i coltan yambʌlob?
Jiñi xñoptʼañob i bajñelobto bʌ cabʌl chuqui miʼ mejlel i melob muʼ bʌ i yʌqʼueñob i tijicñʌyel cheʼ bajcheʼ Jesús. Qʼuelela jiñi VIDEO i tem alʌla iliyi:
-
¿Chuqui miʼ mejlel i melob jiñi xñoptʼañob i bajñelobto bʌ?
¿A wujilix ba?
Jiñi Biblia maʼañic miʼ yʌl jaypʼejl la cabilel yom mi lac ñujpuñel. Pero mucʼʌch i yʌl chaʼan mach yomic cheʼ cʌlʌx pecʼto la cabilel, yom i yʌl, cheʼ bʌ wen la com piʼleya mi la cubin, come jiñi lac bʌcʼtal miʼ mejlel i lotiñonla (1 Corintios 7:36).
5. Wen qʼuele majqui mi caj a ñujpuñel a wicʼot
Junchajp wen ñuc bʌ i cʼʌjñibal yom mi lac ñaʼtan jiñʌch majqui mi caj lac ñujpuñel la quicʼot. Pejcanla Mateo 19:4-6, 9 i tem alʌla iliyi:
-
¿Chucoch yom mi lac ñaxan wen ñaʼtan mi la com ñujpuñel?
Jiñi Biblia mi caj i coltañet a ñaʼtan bajcheʼ yilal yom i melbal juntiquil wem bʌ ñoxiʼal o ijñamʌl, pero sʌclan juntiquil muʼ bʌ i cʼuxbin Jehová. b Pejcanla 1 Corintios 7:39 yicʼot 2 Corintios 6:14. Cheʼ jiñi tem alʌla iliyi:
-
Mi juntiquil i sujm bʌ xñoptʼan yom ñujpuñel, ¿chucoch yom miʼ sʌclan juntiquil lajal bʌ i ñopbal bajcheʼ i chaʼan?
-
Mi tsaʼ ñujpuñiyonla yicʼot juntiquil maʼañic bʌ miʼ cʼuxbin Jehová, ¿bajcheʼ yubil mi caj i yubin i bʌ Jehová maʼ wʌl?
Mi chaʼcojt añimal mach bʌ lajalobic miʼ yʌqʼuentelob i cuch, mi caj i yubiñob wocol. Lajal jaʼel, mi juntiquil xñoptʼan miʼ ñujpuñel yicʼot mach bʌ xñoptʼañic, mi’ tajob cabʌl wocol.
6. Qʼuele jiñi ñujpuñel cheʼ bajcheʼ miʼ qʼuel Jehová
Ti wajali yaʼ ti Israel, an muʼ bʌ i cʌyob i yijñam tiʼ caj mach bʌ ñuc taquic i cʼʌjñibal. Pejcanla Malaquías 2:13, 14, 16 i tem alʌla iliyi:
-
¿Chucoch Jehová miʼ tsʼaʼlen cheʼ bʌ juntiquil miʼ chaʼlen i bʌ ti divorciar cheʼ bʌ mach chuculic ti Biblia chucoch yom miʼ mel?
Cheʼ bʌ juntiquil miʼ piʼlen yambʌ mach bʌ i piʼʌlic yicʼot miʼ chaʼlen i bʌ ti divorciar, miʼ wen ticʼlan jiñi i piʼʌl yicʼot i yalobilob.
Qʼuelela jiñi VIDEO i tem alʌla iliyi:
-
Mi ñujpuñemet a wicʼot juntiquil maʼañic bʌ miʼ cʼuxbin Jehová, ¿chuqui yom maʼ mel chaʼan tijicña maʼ wajñel ti a ñujpuñel?
7. Jacʼʌ muʼ bʌ i yʌl Jehová chaʼan jiñi ñujpuñel
An wen wocol bʌ miʼ yubiñob chaʼan miʼ jacʼbeñob i tʼan Jehová chaʼan jiñi ñujpuñel. c Pero jiñi muʼ bʌ i chaʼleñob wersa i jacʼ, Jehová mi caj i yʌqʼueñob i bendición. Qʼuelela jiñi VIDEO.
Pejcanla Hebreos 13:4 i tem alʌla iliyi:
-
¿Añʌch ba i sujmlel maʼ wʌl jiñi muʼ bʌ i yʌl Jehová chaʼan jiñi ñujpuñel? ¿Chucoch cheʼ maʼ ñaʼtan bajcheʼ jiñi?
Jehová miʼ pijtan chaʼan jiñi muʼ bʌ i ñujpuñelob miʼ melob ti juez, i mi yom miʼ chaʼleñob i bʌ ti divorciar cheʼʌch miʼ melob jaʼel, come lʌcʼʌ tiʼ pejtelel tejclum jiñʌch muʼ bʌ i cʼajtiñob jiñi yumʌlob. Pejcanla Tito 3:1 i tem alʌla iliyi:
-
Mi jatet ñujpuñemetix, ¿añʌch ba i juñilel jiñi a ñujpuñel yicʼot cʌmbilʌch ti yumʌlob?
AN MUʼ BɅ I CAJTIBEÑOÑOBLA: «¿Chucoch yom mic ñujpuñel? ¿Wersa ba yom an c chaʼan jumpʼejl jun?».
-
¿Bajcheʼ mi caj a jacʼ?
TSAʼ BɅ LAJ CɅÑɅ
Cheʼ lac bajñelto o cheʼ ñujpuñemoñixla jumpʼejlʌch lac majtan tilem bʌ ti Jehová. Jiñi i bajñelobto bʌ yicʼot jiñi ñujpuñemobix bʌ tijicña miʼ mejlelob ti chumtʌl mi mucʼʌch i jacʼbeñob i tʼan Jehová.
¿Chuqui tsaʼ cʌñʌ?
-
¿Chuqui tac miʼ mejlel i mel juntiquil cheʼ i bajñelto?
-
¿Chucoch miʼ yʌl jiñi Biblia chaʼan jiñi xñoptʼañob cojach yom miʼ ñujpuñelob yicʼot juntiquil lajal bʌ i ñopbal yicʼot?
-
Cheʼ bajcheʼ miʼ yʌl jiñi Biblia, ¿chuqui tiʼ caj miʼ mejlel i chaʼlen i bʌ ti divorciar jumpʼejl xñujpuñel?
CɅÑɅ YAN TAC BɅ
¿Chuqui yom i yʌl cheʼ cojach yom mi lac ñujpuñel «ti lac Yum»?
«Jiñi xpejcaya juñob miʼ cʼajtibeñob i bʌ» (Lac Tsictesʌbentel, 1 i chaʼan julio, 2004)
Qʼuele chaʼpʼejl video muʼ bʌ mejlel i coltañet a ñaʼtan chuqui yom maʼ mel mi woli a ñaʼtan a taj a novio o a novia o mi woli a ñaʼtan ñujpuñel.
¿Bajcheʼ miʼ mejlel a chajpan a bʌ chaʼan jiñi ñujpuñel? (11:53)
Qʼuele chucoch juntiquil hermano miʼ ñop chaʼan Jehová an chuqui wen ñuc bʌ tsiʼ yʌqʼue bajcheʼ jiñi tsaʼ bʌ i cʌyʌ.
Tsaʼ c lon ñaʼta chaʼan mi caj i mulan i cʌn jiñi i sujmlel (1:56)
Mi juntiquil xñoptʼan woliʼ ñaʼtan i chaʼlen i bʌ ti divorciar o i cʌy i piʼʌl, ¿chuqui yom miʼ ñaxan ñaʼtan?
«Laʼ laj qʼuel ti ñuc ‹muʼ bʌ i tempan Dios›» (Lac Tsictesʌbentel, diciembre i chaʼan 2018)
a Yaʼ ti nota 4 mi caj i ñumen taj ti tʼan chaʼan jiñi cʌy bʌ (mi jiñi ñoxiʼal o ijñamʌl maʼañic tsiʼ piʼle yambʌ mach bʌ i piʼʌlic).
b An cultura tac baqui jin jiñi tatʌl ñaʼʌlob miʼ yajcañob majqui mi caj i ñujpuñel yicʼot jiñi i yalobil o i yixicʼal. Pero muʼ bʌ i qʼuelob jin mi mucʼʌch i cʼuxbin Jehová, mach jiñic mi wen an i taqʼuin o maʼañic.
c Mi jatet añix majqui chumul a wicʼot pero mach ñujpuñemeticla, an ti a wenta maʼ ñaʼtan mi mucʼʌch caj a ñujpuñel o mi yom maʼ cʌy.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
