Jehová yom chaʼan tijicña mi lac chumtʌl yicʼot mi lac bixel mel jiñi qʼuiñijel tac. ¿Pero wem ba miʼ qʼuel Dios pejtelel jiñi qʼuiñijel? ¿Bajcheʼ miʼ mejlel lac pʌsben chaʼan mucʼʌch laj cʼuxbin yicʼot lac wentajʌch bajcheʼ yubil miʼ yubin i bʌ?

1. ¿Chucoch Jehová mach weñic miʼ qʼuel cabʌl qʼuiñijel?

Tajol toj sajtel a pusicʼal cheʼ miʼ cʼotel a ñaʼtan chaʼan cabʌl qʼuiñijel tac mach loqʼuemic ti Biblia o tilem ti mach bʌ i sujmic ñopbalʌl tac. Tajol ti jiñi qʼuiñijel tac yaʼ ochem i chaʼan bʌ xibajob yicʼot jiñi cʌntesa cheʼ bʌ an chuqui cuxul miʼ cʌytʌl lac chaʼan cheʼ mi lac chʌmel (sajtel). An lac pi’ʌlob muʼ bʌ i melob qʼuiñijel tac o yan tac bʌ come miʼ ñopob jiñi i cʌntesa lac ñojteʼelob chaʼan mi maʼañic mi lac mel mi caj i yujtel mach bʌ weñic. Jin chaʼan, Jehová miʼ yʌqʼueñonla ili ticʼojel: «Loqʼuenla [...], i cʌyʌ laʼ tʌl chuqui tac bibiʼ» (2 Corintios 6:17). a

2. ¿Bajcheʼ yilal miʼ qʼuel Jehová jiñi qʼuiñijel tac muʼ bʌ i mejlel chaʼan miʼ yʌqʼuentel i ñuclel wiñicob?

Jehová miʼ subeñonla chaʼan mach cheʼic yomonla bajcheʼ jiñi muʼ bʌ i lon ñaʼtañob i tajob i coltʌntel ti wiñicob, come lotintel jach (pejcan Jeremías 17:5). An qʼuiñijel tac muʼ bʌ i mejlel chaʼan miʼ yʌjqʼuel ti ñuc jiñi yumʌlob o soldadojob tsaʼ bʌ i coltayob i país, o chaʼan miʼ melbeñob i qʼuiñilel jiñi bandera o jumpʼejl país (1 Juan 5:21). I an muʼ bʌ i melbeñob i qʼuiñilel jiñi organización tac bajcheʼ i chaʼan bʌ política. Mi tsaʼ laj cʌlʌx acʼʌ ti ñuc juntiquil lac piʼʌl o jumpʼejl organización, ñumento mi jiñi muʼ bʌ i mel an tiʼ contra muʼ bʌ i yʌl Dios, ¿bajcheʼ yubil mi caj i yubin i bʌ Dios?

3. ¿Chuqui tiʼ caj mach weñic miʼ qʼuel Dios jumpʼejl qʼuiñijel?

Jiñi Biblia miʼ yʌl chaʼan Dios mach weñic miʼ qʼuel cʌlʌx jap lembal, jiñi qʼuiñijel tac ñumeñix bʌ ti pʼis yicʼot jiñi qʼuiñijel tac chaʼan bʌ miʼ jajpel lembal (1 Pedro 4:3). An qʼuiñijel tac baqui jiñi lac piʼʌlob muqʼuix i sojquelob yicʼot mach weñix chuqui miʼ melob. Mi la com bej ajñel tiʼ yamigo Jehová, mach yomic mi lac mel pejtelel jiñi mach tac bʌ weñic.

 LAʼ LAC ÑUMEN ÑAʼTAN

 5. Chaʼlen wersa chaʼan jiñi yambʌlob miʼ qʼuelob ti ñuc jiñi ñopol bʌ a chaʼan

6. Jehová yom chaʼan tijicñayonla

Jehová miʼ mulan cheʼ tijicña mi lac ñusan yicʼot lac familia yicʼot la camigojob. Pejcanla Eclesiastés 8:15 i tem alʌla iliyi:

• ¿Bajcheʼ miʼ pʌs ili versículo chaʼan Jehová yom chaʼan tijicñayonla?

Jehová yom jaʼel chaʼan jiñi i wiñicob tijicña miʼ ñusan yicʼot yambʌlob. Qʼuelela jiñi VIDEO chaʼan maʼ qʼuel chaʼan cheʼʌch miʼ yujtel ti colem tempa bʌ tac internacional bʌ.

Pejcanla Gálatas 6:10 i tem alʌla iliyi:

• ¿Wersa ba yom mi lac mel jumpʼejl qʼuiñijel chaʼan mi lac mel chuqui wem bʌ tiʼ tojlel yambʌlob?

• ¿Baqui bʌ miʼ ñumen aqʼueñet a tijicñʌyel, jimba cheʼ yom maʼ wersa acʼ jumpʼejl majtañʌl ti jumpʼejl qʼuiñijel o jin cheʼ maʼ wʌcʼ come cheʼʌch loqʼuem ti a pusicʼal?

• Cabʌl Testigojob an chuqui miʼ chajpʌbeñob jiñi i yalobilob i miʼ yʌqʼueñob i majtan. Mi jatet an a walobil, ¿chuqui tac miʼ mejlel a mel tiʼ tojlelob?

 TSAʼ BɅ LAJ CɅÑɅ

Jehová yom chaʼan tijicña mi lac ñusan la quicʼot lac familia yicʼot la camigojob, pero mach yomic chaʼan mi lac mel qʼuiñijel tac maʼañic bʌ miʼ mulan.

¿Chuqui tsaʼ cʌñʌ?

• ¿Chuqui ti cʼajtiya yom mi lac melben lac bʌ chaʼan mi lac ñaʼtan mi Jehová weñʌch miʼ qʼuel jumpʼejl qʼuiñijel o maʼañic?

• ¿Bajcheʼ miʼ mejlel laj coltan jiñi lac familiajob yicʼot la camigojob chaʼan miʼ chʼʌmbeñob i sujm chucoch maʼañic mi caj lac mel jumpʼejl qʼuiñijel?

• ¿Bajcheʼ la cujil chaʼan Jehová yom chaʼan tijicña mi lac ñusan?