Cheʼ bʌ añonla la quicʼot jiñi la quermañujob, lajal mi la cubin lac bʌ bajcheʼ jiñi rey David. Tsiʼ yʌlʌ: «Utsʼatax cheʼ tijicña miʼ tem ajñelob hermanojob» (Salmo 133:1). Temel añonla come ti lac pejtelel mi lac chaʼlen wersa, machiqui mach cheʼic añonla.

1. ¿Chuqui jiñi muʼ bʌ a mulan tiʼ tejclum Dios?

Muqʼuic a majlel ti jumpʼejl congregación ti yambʌ país, tajol maʼañic mi caj a chʼʌmben i sujm jiñi tʼan yujiloʼ bʌ. Pero lajal bajcheʼ añet ti a wotot mi caj a wubin a bʌ. ¿Chucoch? Come mach yʌlʌyic baqui maʼ majlel, mi caj a qʼuel chaʼan jiñi i testigojonbʌlon Jehová junlajal jach jiñi jun muʼ bʌ j cʼʌn lojon chaʼan mi lon j cʌñeʼ jiñi Biblia. Cheʼ jaʼel, mic chaʼlen lojon wersa chaʼan mic pʌsben lon c bʌ cʼuxbiya. I mach yʌlʌyic baqui chumulon lojon, ti lon c pejtelel com lojon c pejcan Jehová tiʼ cʼabaʼ yicʼot chaʼan comol mi lon c chʼujutesan (Sofonías 3:9).

2. ¿Bajcheʼ maʼ mejlel ti coltaya chaʼan temel miʼ yajñel jiñi congregación?

«Ti jujuntiquil pʌsben laʼ bʌ cʼuxbiya loqʼuem bʌ ti laʼ pusicʼal» (1 Pedro 1:22). ¿Bajcheʼ maʼ mejlel a jacʼ ili ticʼojel? Mach a qʼuel jiñi mach tac bʌ weñic chuqui miʼ melob jiñi yambʌlob, qʼuele jiñi wen tac bʌ i melbalob (chaʼlibalob). Mach cojach yom maʼ ñochtan jiñi lajaloʼ bʌ cheʼ bajcheʼet. Chaʼlen wersa a cʌn jiñi chʼoyoloʼ bʌ ti yambʌ tejclum yicʼot qʼuexeloʼ bʌ i cultura. Cheʼ jaʼel, chaʼlen wersa a choc loqʼuel ti a pusicʼal jiñi tsʼaʼleya tiʼ tojlel yambʌlob (pejcan 1 Pedro 2:17). a

3. ¿Chuqui mi caj a mel cheʼ bʌ miʼ yujtel jumpʼejl wocol a wicʼot yambʌ hermano?

I sujmʌch, juntemel añonla, pero ti lac pejtelel xmulilonla, an qʼuiñil an chuqui mi lac mel muʼ bʌ i yʌqʼuen i chʼijyemlel o muʼ bʌ i low yambʌlob. Jin chaʼan jiñi i Tʼan Dios miʼ subeñonla: «Chʌn [...] ñusʌben laʼ bʌ laʼ mul». I miʼ bej al: «Jehová tsiʼ ñusʌbeyetla laʼ mul tiʼ pejtelel i pusicʼal, jin chaʼan cheʼʌch yom mi laʼ mel jaʼel» (pejcan Colosenses 3:13). Joñonla mi lac wen lowben i pusicʼal Jehová, pero mucʼʌch i ñusʌbeñonla lac mul. Jin chaʼan, miʼ pijtan chaʼan mi lac ñusʌben i mul jaʼel jiñi la quermañujob. Mi tsaʼ qʼuele chaʼan an majqui tsaʼ lowbe i pusicʼal, chaʼlen wersa chaʼan maʼ tojʼesan jiñi wocol (pejcan Mateo 5:23, 24). b

 LAʼ LAC ÑUMEN ÑAʼTAN

4. Choco loqʼuel jiñi tsʼaʼleya ti a pusicʼal

La com lac pʌsben cʼuxbiya pejtelel jiñi hermanojob. Pero an i tajol wocol mi la cubin chaʼan mi lac mel, tajol cheʼ bʌ an mach bʌ lajalobic mi laj qʼuel cheʼ bajcheʼ joñonla. ¿Chuqui miʼ mejlel i coltañonla? Pejcanla Hechos 10:34, 35 i tem alʌla iliyi:

• Jehová miʼ chʼʌm bajcheʼ i Testigojob pejtelel lac piʼʌlob mach yʌlʌyic baqui chʼoyolob. Cheʼ mi lac ñaʼtan iliyi, ¿bajcheʼ yilal yom maʼ qʼuelob jiñi lac piʼʌlob mach bʌ lajalobic bajcheʼet?

• Ixcu yaʼ baqui chʼoyolet, ¿bajcheʼ yilal miʼ qʼuelob i bʌ jiñi lac piʼʌlob? ¿Chucoch mach cheʼic yom maʼ mel jaʼel bajcheʼ jiñi yambʌlob?

Pejcanla 2 Corintios 6:11-13 i tem alʌla iliyi:

• ¿Chuqui miʼ mejlel a mel chaʼan maʼ ñumen cʼuxbin pejtelel jiñi hermanojob yicʼot hermanajob?

5. Ñusʌben i mul yambʌlob i tojʼesan laʼ wocol

Anquese joñonla maʼañic baʼ ora yom mi caj lac ñusʌben i mul Jehová, mucʼʌch i ñusʌbeñonla lac mul tiʼ pejtelel i pusicʼal. Pejcanla Salmo 86:5 i tem alʌla iliyi:

• ¿Chuqui miʼ cʌntesañonla ili versículo chaʼan bajcheʼ miʼ ñusʌbeñonla lac mul Jehová?

• ¿Muʼ baʼ qʼuel ti ñuc cheʼ Jehová miʼ ñusʌbeñonla lac mul? ¿Chucoch?

• ¿Baqui ora wocol miʼ mejlel la cubin chaʼan wen mi la cajñel la quicʼot yambʌlob?

¿Chuqui yom mi lac mel chaʼan mi lac lajin Jehová, i cheʼ bajcheʼ jiñi chʌn temel mi la cajñel la quicʼot jiñi hermanojob? Pejcanla Proverbios 19:11 i tem alʌla iliyi:

• Cheʼ bʌ an majqui miʼ mel maʼañic bʌ maʼ mulan, ¿chuqui miʼ mejlel a mel chaʼan miʼ tojʼan jiñi wocol?

 An i tajol joñonla muʼ bʌ lac low jiñi yambʌlob. Mi cheʼ miʼ yujtel bajcheʼ jiñi, ¿chuqui yom mi lac mel? Qʼuelela jiñi VIDEO i tem alʌla iliyi:

• ¿Chuqui tsiʼ mele jiñi hermana yaʼ ti video chaʼan miʼ tojʼan jiñi wocol yicʼot yambʌ hermana?

 TSAʼ BɅ LAJ CɅÑɅ

Mi jatet mucʼʌch a ñusʌben i mul a wermañujob yicʼot maʼ pʌsbeñob cʼuxbiya, mi caj a chaʼlen coltaya chaʼan chʌn temel miʼ yajñel jiñi congregación.

¿Chuqui tsaʼ cʌñʌ?

• ¿Bajcheʼ miʼ mejlel a cʌy a tsʼaʼlen yambʌlob?

• ¿Chuqui mi caj a mel cheʼ bʌ miʼ yujtel jumpʼejl wocol a wicʼot yambʌ hermano?

• ¿A wom baʼ ñusʌben i mul yambʌlob cheʼ bajcheʼ miʼ mel Jehová? ¿Chucoch?