Jini wen tʼan tilem ti Jioba, juntiquil Dios wen tijicña bʌ, cheʼ jaʼel yom chaʼan jini familia tac mi yajñelob ti wen tijicña (1 Timoteo 1:​11). Jiñʌch tsiʼ yʌcʼʌ jini ñujpuñel. Jini muʼ bʌ i ñujpuñelob bajcheʼ miʼ yʌl yumʌlob yaʼ baqui chumulob, wen mi caj i chumtʌlob yicʼot i yalobilob, cheʼ jaʼel mi caj i cʼuxbiñob i bʌ. Jini xñoptʼañob yom miʼ ñujpuñelob cheʼ bajcheʼ miʼ yʌl jini yumʌl yaʼ baqui chumulob. Pejcan Lucas 2:1, 4, 5.

¿Chuqui yom Dios tiʼ tojlel jini ñujpuñemoʼ bʌ? Yom chaʼan maʼanic miʼ cʌyob i bʌ. Jioba yom chaʼan jini ñujpuñemoʼ bʌ miʼ qʼuelob i bʌ ti xucʼul (Hebreos 13:4). Miʼ tsʼaʼlen jini muʼ bʌ i chaʼleñob i bʌ ti divorciar (Malaquías 2:​16). Jini xñoptʼañob miʼ mejlel i chaʼleñob i bʌ ti divorciar, cojach mi juntiquil tsiʼ piʼle yambʌ mach bʌ jinic ñujpuñem yicʼot. Pejcan Mateo 19:​3-6, 9.

Jioba tsiʼ mele jini winic yicʼot xʼixic chaʼan mach tiʼ bajñel jach mi yajñelob yicʼot chaʼan miʼ lajal coltañob i bʌ tiʼ ñujpuñel (Génesis 2:​18). Jini winic yom miʼ chaʼlen eʼtel chaʼan miʼ yʌqʼuen chuqui yom bʌ i familia yicʼot miʼ cʌntesan tiʼ chaʼan bʌ Dios. Jini winic yom miʼ yʌqʼuen i tijicñʌyel i yijñam, mach jinic jach miʼ bajñel sajcan i tijicñʌyel. Jini ñujpuñemoʼ bʌ yom miʼ cʼuxbiñob i bʌ yicʼot miʼ qʼuelob i bʌ ti ñuc. Come tiʼ pejtelel jini ñujpuñemoʼ bʌ xmulilob, jin chaʼan yom miʼ cʌn i ñusʌbeñob i bʌ i mul, chaʼan tijicña miʼ chumtʌlob tiʼ ñujpuñelob. Pejcan Efesios 4:​31, 32; 5:​22-​25, 33 yicʼot 1 Pedro 3:7.

Mi woli a ñusan wocol ti a ñujpuñel, ti laʼ chaʼticlel yom mi laʼ chaʼlen wersa chaʼan mi laʼ tojʼesan yicʼot cʼuxbiya (1 Corintios  13:​4, 5). Jini i Tʼan Dios miʼ yʌl chaʼan mach wenic cheʼ miʼ cʌyob i bʌ, chaʼan jach miʼ poj alob mach mejlic i tojʼesañob i wocol, muʼ bʌ i taj pejtelel xñujpuñelob. Pejcan 1 Corintios 7:​10-​13.

Jioba yom chaʼan tijicña maʼ chumtʌl. Jiñʌch miʼ yʌqʼueñet ticʼojel chaʼan tijicña maʼ chumtʌl cheʼ woli to a colel majlel. Jioba yom chaʼan jini cʌmbil bʌ i chaʼan a papá yicʼot a mamá, miʼ coltañet chaʼan wen maʼ chumtʌl (Colosences 3:​20). Come jiñʌch tsaʼ bʌ i meleyonla, jin chaʼan yom chaʼan maʼ taj a tijicñʌyel cheʼ maʼ melben i yeʼtel yicʼot chuqui mi yʌl i Yalobil. Pejcan Eclesiastés 11:9–​12:1 yicʼot Mateo 19:​13-​15; 21:​15, 16.

Yom mi laʼ chaʼlen eʼtel chaʼan mi laʼ wʌqʼuen i bʌl i ñʌcʼob, baqui miʼ chumtʌlob, yicʼot i pislelob (1 Timoteo 5:8). Chaʼan tijicña miʼ chumtʌlob a walobil, yom maʼ cʌntesañob i cʼuxbin Dios yicʼot chaʼan miʼ cʌñob (Efesios 6:4). Mi woliyʌch a cʼuxbin Jioba tiʼ pejtelel a pusicʼal, cheʼʌch mi caj i mel a walobilob jaʼel. Cheʼ loqʼuem tiʼ Tʼan Dios jini ticʼojel muʼ bʌ a suben a walobil, mi caj i mejlel a coltañob, chaʼan miʼ ñaʼtañob chuqui wem bʌ. Pejcan Deuteronomio 6:​4-7 yicʼot Proverbios 22:6.

Jini woliyoʼ bʌ ti colel mi caj i tajob i coltʌntel cheʼ mi lac subeñob chaʼan weñʌch chuqui woli bʌ i melob. Yom miʼ tijqʼuelob cheʼ miʼ melob chuqui mach bʌ wenic. Cheʼ maʼ mel iliyi, jiñʌch chaʼan maʼanic miʼ melob jontolil yicʼot chaʼan miʼ mejlelob ti chumtʌl ti tijicña (Proverbios 22:​15). Cheʼ maʼ jatsʼ a walobil chaʼan maʼ ticʼ, mach yomic maʼ ñusan a bʌ ti pʼis. Pejcan Colosences 3:​21.

Jini i Testigojob Jioba, an i pucuyob libro tac, baqui miʼ tajob i coltʌntel jini tatʌlob yicʼot i yalobilob. Tiʼ pejtelel yaʼ bʌ tsʼijbubil ti libro tac, loqʼuemʌch ti Biblia. Pejcan Salmo 19:​7, 11.