CɅNTESɅNTEL 10
¿Bajcheʼ miʼ mejlel a cʌn jini isujm bʌ chʼujutesaya?
1. ¿Am ba jumpʼejl isujm bʌ ñopbalʌl?
«Chʌcʌ qʼuele laʼ bʌ chaʼan lot bʌ xʼaltʼañob.» (MATEO 7:15)
Jesús cojach tsiʼ pʌsbe jumpʼejl isujm bʌ ñopbalʌl jini xcʌntʼañob i chaʼan. Tsiʼ laja bajcheʼ jumpʼejl bij muʼ bʌ i pʌyonla majlel ti laj cuxtʌlel. Jesús tsiʼ yʌlʌ: «Tsʼitaʼ jax jini muʼ bʌ i yochelob» ti jini bij (Mateo 7:14). Dios cojach miʼ chʼʌm jini chʼujutesʌntel loqʼuem bʌ ti Biblia. Jini isujm bʌ xchʼujutesayajob tempʌbilob ti jumpʼejl jach ñopbalʌl. Pejcan Juan 4:23, 24; 14:6 yicʼot Efesios 4:4, 5.
Qʼuele jiñi video ¿Wem ba miʼ qʼuel Dios pejtelel ñopbalʌl tac?
2. ¿Chuqui tsiʼ yʌlʌ Jesús chaʼan jini mach bʌ isujmic xñoptʼañob?
«Miʼ lon alob añob ti Dios, pero leco i melbal. Sojquemob. Xñusa tʼañob.» (TITO 1:16)
Jesús tsiʼ wʌn alʌ chaʼan jini lot bʌ xʼaltʼañob mi caj i lotiñob jini isujm bʌ xñoptʼañob. Cheʼ mi laj qʼuelob, poj cheʼ bʌ isujm bʌ xchʼujutesayajob. Jini muʼ bʌ yajñelob yaʼ ti iglesia o ti templo, miʼ yʌlob i bʌ chaʼan isujm bʌ xñoptʼañob. Miʼ mejlel a cʌñob jini winicob xʼixicob cheʼ maʼ qʼuel chuqui miʼ melob. ¿Bajcheʼ? Cojach jini isujm bʌ ñopbalʌl miʼ yʌcʼ jini isujm bʌ xñoptʼañob yicʼot wen bʌ i melbalob. Pejcan Mateo 7:13-23.
3. ¿Bajcheʼ miʼ mejlel a cʌn jini isujm bʌ xchʼujutesayajob?
Qʼuele jini joʼchajp bajcheʼ miʼ mejlel a cʌn jini isujm bʌ xchʼujutesayajob:
-
Jini muʼ bʌ i chaʼleñob chʼujutesaya tiʼ sujmlel, miʼ qʼuelob ti ñuc jini Biblia bajcheʼ i tʼan Dios. Miʼ chaʼleñob wersa chaʼan miʼ chumtañob bajcheʼ woli i subob. Jini chaʼan, jini isujm bʌ ñopbalʌl mach lajalic bajcheʼ jini loqʼuem jach bʌ tiʼ ñaʼtʌbal winicob (Mateo 15:7-9). Jini isujm bʌ xchʼujutesayajob miʼ melob bajcheʼ woli i cʌntesañob i mel yañoʼ bʌ. Pejcan Juan 17:17 yicʼot 2 Timoteo 3:16, 17.
-
Jini woli bʌ i tsajcañob Jesús, miʼ qʼuelob ti ñuc jini i cʼabaʼ Dios, Jioba. Jesús tsiʼ qʼuele ti ñuc jini i cʼabaʼ Dios, cheʼ bʌ tsiʼ yʌcʼʌ ti cʌñol. Tsiʼ colta jini winicob xʼixicob chaʼan miʼ cʌñob Dios yicʼot jaʼel tsiʼ cʌntesayob i mel oración chaʼan miʼ chʼujutesʌntel i cʼabaʼ i tat (Mateo 6:9). Yaʼ baqui chumulet, ¿baqui bʌ ñopbalʌl miʼ yʌcʼ ti cʌñol i cʼabaʼ Dios? Pejcan Juan 17:26 yicʼot Romanos 10:13, 14.
-
Jini isujm bʌ xñoptʼañob, miʼ yʌcʼob ti cʌñol chaʼan jini i Yumʌntel Dios. Dios tsiʼ choco tilel Jesús chaʼan miʼ sub jini wen tʼan chaʼan jini Yumʌntel. Cojach an tiʼ Yumʌntel Dios i pijtaya jini winicob xʼixicob. Jesús tsiʼ chʌn subu iliyi cʼʌlʌ cheʼ tsaʼ chʌmi (Lucas 4:43; 8:1; 23:42, 43). Tsiʼ yʌlʌ chaʼan jini muʼ bʌ i tsajcañob majlel, mi caj i chʌn subob jaʼel iliyi. Mi an majqui miʼ subeñet jini wen tʼan chaʼan bʌ i Yumʌntel Dios, ¿baqui bʌ i ñopbal maʼ wʌl jini xsubtʼan? Pejcan Mateo 24:14.
-
Muʼ bʌ i tsajcañob Jesús, maʼanic miʼ yotsañob i bʌ tiʼ chaʼan bʌ pañimil. Miʼ mejlel a cʌñob, come maʼanic miʼ yotsañob i bʌ ti política, mi jinic cheʼ miʼ chaʼleñob leto winicob xʼixicob (Juan 17:16; 18:36). Mi jinic to miʼ melob jini i melbal yicʼot i pensar jini pañimil. Pejcan Santiago 4:4.
-
Jini isujm bʌ xcʌntʼañob, miʼ wen cʼuxbiñob i bʌ. Cʌntesʌbilob ti Tʼan Dios chaʼan yom miʼ qʼuelob ti ñuc jini yambʌ winicob xʼixicob mach bʌ lajalic bajcheʼob. Jini mach bʌ isujmic ñopbalʌl an yʌcʼʌyob i coltaya chaʼan jini guerra tiʼ tojlel yan tac bʌ tejclum, pero jini isujm bʌ xchʼujutesayajob maʼanic miʼ yotsañob i bʌ tiʼ melol jini (Miqueas 4:1-3). Jini isujm bʌ xcʌntʼañob miʼ coltañob yañoʼ bʌ yicʼot i taqʼuin yicʼot miʼ sʌclʌbeñob i qʼuiñilel chaʼan miʼ coltañob yañoʼ bʌ, anquese maʼanic chuqui miʼ cʼajtibeñob tiʼ qʼuexol. Pejcan Juan 13:34, 35 yicʼot 1 Juan 4:20.
4. ¿Muʼ ba mejlel a cʌn baqui bʌ jini isujm bʌ ñopbalʌl?
¿Baqui bʌ ñopbalʌl chucul bʌ i chaʼan ti Biblia jini cʌntesa muʼ bʌ i chaʼlen, miʼ qʼuel ti ñuc i cʼabaʼ Dios yicʼot miʼ yʌqʼuen ti cʌñol i Yumʌntel Dios, cojach bʌ i coltʌntel chaʼan jini winicob xʼixicob? ¿Baqui bʌ ñopbalʌl miʼ pʌsob i cʼuxbiya yicʼot maʼanic miʼ yotsañob i bʌ ti guerra? ¿Bajcheʼ maʼ ñaʼtan jatet? Pejcan 1 Juan 3:10-12.
