CɅNTESɅNTEL 15
¿Chucoch yom maʼ ñumen cʌn majlel i chaʼan bʌ Dios?
1. ¿Bajcheʼ mi caj i coltañet cheʼ maʼanic maʼ cʌy a pejcan jini Biblia?
Jini cʌmbil bʌ a chaʼan ti Biblia tsiʼ pʼʌtʼesa jini a cʼuxbiya tiʼ tojlel Jioba. Jin chaʼan mach yomic maʼ cʌy a pʼʌtʼesan a cʼuxbiya (1 Pedro 2:2). Jini a pijtaya chaʼan maʼ chumtʌl ti pejtelel ora ila ti Pañimil, mi caj a taj cheʼ maʼanic maʼ cʌy a lʌcʼtesan a bʌ ti Dios yicʼot maʼ pejcʌben i Tʼan am bʌ ti Biblia. Pejcan Juan 17:3 yicʼot Judas 21.
Cheʼ maʼ ñumen cʌn Dios, jini ñopol bʌ a chaʼan tiʼ tojlel mi caj i ñumen pʼʌtʼan majlel. Jini ñopol bʌ a chaʼan ti Dios, mi caj i coltañet a tijicñesʌben i pusicʼal (Hebreos 11:1, 6). Mi caj i coltañet chaʼan maʼ mel chuqui wem bʌ, chaʼan ñumen wen maʼ chumtʌl. Pejcan Hechos 3:19.
2. ¿Bajcheʼ miʼ mejlel i coltan yañoʼ bʌ, ñopol bʌ a chaʼan ti Dios?
Maʼ mejlel a ñumen lʌcʼtesan a bʌ ti Jioba
Tajol mi caj a mulan a suben yañoʼ bʌ chuqui cʌmbil a chaʼan tiʼ tojlel Dios, come tijicña mi lac cubin cheʼ mi lac sub chuqui wen bʌ. Mi maʼanic maʼ cʌy a pejcan jini Biblia, mi caj i coltañet a tsictesʌben yañoʼ bʌ chaʼan jini ñopol bʌ a chaʼan ti Jioba yicʼot tiʼ subol jini wen tʼan. Pejcan Romanos 10:13-15.
Cabʌl winicob xʼixicob miʼ tech yʌcʼob ti cʌñol jini wen tʼan tac yaʼ tiʼ yamigojob yicʼot tiʼ familiajob. Ñaxan chajpan chuqui mi caj a subeñob. Cheʼ jini, subeñob muʼ bʌ caj i mel Dios, i maxto jinic maʼ subeñob chaʼan mach isujmic ñopol bʌ i chaʼañob. Yom cʼajal a chaʼan, muʼ bʌ i ñumen qʼuelob ti a tojlel, jiñʌch a melbal i mach jinic chuqui maʼ wʌl. Pejcan 2 Timoteo 2:24, 25.
3. ¿Bajcheʼ maʼ mejlel ti sujtel tiʼ yamigo Dios?
Cheʼ maʼ pejcʌben i Tʼan Dios, mi caj i ñumen pʼʌtʼan majlel a ñaʼtʌbal. Maʼ mejlel ti ñumen ajñel ti lʌcʼʌl yicʼot Jioba. Yicʼot maʼ mejlel ti ochel bajcheʼ i familia. Pejcan 2 Corintios 6:18.
4. ¿Bajcheʼ maʼ mejlel a ñumen ñop i chaʼan bʌ Jioba?
Miʼ mejlel a ñumen cʌn majlel Dios, cheʼ maʼanic maʼ cʌy a pejcʌben i Tʼan (Hebreos 5:13, 14). Suben jini i testigojob Jioba, chaʼan miʼ cʌntesañetob, cheʼ mi laʼ pejcan jini libro ¿Chuqui miʼ cʌntesañonla tiʼ sujmlel jiñi Biblia? Cheʼ maʼ ñumen cʌn jini tʼan tilem bʌ ti Dios, ñumen tijicña mi caj a chumtʌl. Pejcan Salmo 1:1-3 yicʼot 73:27, 28.
Yom cʼajal a chaʼan, jini wen tʼan tilem ti Jioba, Dios wen tijicña bʌ. Miʼ mejlel a lʌcʼtesan a bʌ tiʼ tojlel, cheʼ mucʼʌch a ñumen lʌcʼtesan a bʌ tiʼ tejclum (Hebreos 10:24, 25). Cheʼ maʼ chaʼlen wersa a tijicñesʌben i pusicʼal Jioba, woli a chaʼlen wersa a taj jini i sujmlel bʌ cuxtʌlel, cuxtʌlel mach bʌ anic miʼ jilel. Cheʼ maʼ lʌcʼtesan a bʌ ti Dios, jiñʌch ñumen wem bʌ miʼ mejlel a mel. Pejcan 1 Timoteo 1:11; 6:19.
Miʼ mejlel a qʼuel jaʼel iliyi
TEMPA BɅ TAC
¿Chuqui miʼ mejlel yaʼ ti i Yotlel Tempa bʌ?
Maʼ mejlel ti majlel yaʼ baqui mic tempan lojon bʌ chaʼan maʼ qʼuel chuqui mic mel lojon yaʼi
CHAʼAN JOÑON LOJON
¿Chucoch yom mi lac pejcan jiñi Biblia? (tsʼʌcʌl bʌ)
Jiñi Biblia woliʼ coltan cabʌl quixtañujob tiʼ petol pañimil chaʼan miʼ tajbeñob i jacʼbal jiñi cʼajtiya tac wen ñuc bʌ i cʼʌjñibal. ¿Muʼ ba a mulan a tajben i jacʼbal jaʼel?
