CɅNTESɅNTEL 5
¿Chuqui mi caj i mel Dios ila ti Pañimil?
1. ¿Chucoch tsiʼ mele Dios ili Pañimil?
Jioba tsiʼ mele ili Pañimil chaʼan winicob xʼixicob. Jiñʌch lac chumlib. Jini ñaxam bʌ winic yicʼot ñaxam bʌ xʼixic, Adán yicʼot Eva, tsaʼ mejliyob mach chaʼanic miʼ chumtʌlob ti panchan, come Dios tsiʼ mele ángelob chaʼan miʼ chumtʌlob yaʼi (Job 38:4, 7). Cheʼ jini, Dios tsiʼ yʌcʼʌ jini winic tiʼ tʼojol jax bʌ Pʌcʼʌbʌl i cʼabaʼ Edén (Génesis 2:15-17). Jioba tsiʼ sube jini winic chaʼan miʼ pʼojlel yicʼot chaʼan miʼ chumtʌl tiʼ pejtelel ora wʌʼ ti Pañimil. Pejcan Salmo 37:29; 115:16.
Ti ñaxan, cojach jini Pʌcʼʌbʌl i cʼabaʼ Edén jumpʼejlʌch Paraíso. Jini Adán yicʼot Eva tsaʼ mejliyob chaʼan miʼ butʼob jini Pañimil ti yalobilob. Ti wiʼil tsaʼ aqʼuentiyob i cʌntañob tiʼ pejtelel Pañimil chaʼan miʼ sujtesañob ti jumpʼejl Paraíso (Génesis 1:28). Jini Pañimil maʼanic baqui ora mi caj i jisʌntel. Tsaʼ mejli chaʼan miʼ chumtʌlob jini winicob xʼixicob. Pejcan Salmo 104:5.
Qʼuele jiñi video ¿Chucoch tsiʼ mele Dios ili Pañimil?
2. ¿Chucoch mach jumpʼejlix Paraíso wʌle ora ili Pañimil?
Jini Adán yicʼot Eva maʼanic tsiʼ jacʼbeyob i mandar Dios, jin chaʼan tsaʼ chojquiyob loqʼuel yaʼ ti tʼojol jax bʌ Pʌcʼʌbʌl. Wʌle ora maʼanix jini Paraíso, come maʼanic majqui tsaʼ mejli i chaʼ mel. Jini Biblia mi yʌl chaʼan tiʼ pejtelel Pañimil tsaʼix ajqʼui tiʼ wenta jontoloʼ bʌ (Job 9:24). Pejcan Génesis 3:23, 24.
¿Yom ba i yʌl iliyi chaʼan Jioba maʼanix mi caj i mel jini yom bʌ i mel ti ñaxan? ¡Maʼanic! Jiñʌch juntiquil Dios mach bʌ anic i pʼisol i pʼʌtʌlel. Tiʼ pejtelel muʼ bʌ i yʌl, miʼ tsʼʌctesan (Isaías 45:18). Mi caj yʌcʼ ti chumtʌl jini winicob xʼixicob bajcheʼ chumulob Adán yicʼot Eva wajali. Pejcan Salmo 37:11, 34.
3. ¿Bajcheʼ mi caj i chaʼ sujtel ti Paraíso ili Pañimil?
Jini Pañimil mi caj i sujtel ti Paraíso cheʼ yumʌlix Jesús bajcheʼ Rey yaʼ tiʼ Yumʌntel Dios. Yaʼ ti guerra i cʼabaʼ Armagedón, Jesús yicʼot jini ángelob mi caj i jisañob jini muʼ bʌ i contrajiñob Dios. Jesús mi caj i cʌch Satanás 1,000 jab. Jini i tejclum Dios, maʼanic mi caj i jisʌntelob, come Jesús mi caj i coltan yicʼot mi caj i cʌntan. Wen tijicña mi caj i chumtʌlob ti Paraíso wʌʼ ti Pañimil. Pejcan Apocalipsis 20:1-3; 21:3, 4.
4. ¿Baqui ora mi caj i jilel jini ilaya wocol?
¿Baqui bʌ ora mi caj i jisan Dios jini jontolil wʌʼ ti Pañimil? Jesús tsiʼ yʌcʼʌ jumpʼejl señal cheʼ lʌcʼʌlix mi caj i yujtel jini cojix bʌ qʼuin. Jini wocol woli bʌ ti ujtel tiʼ tojlel jini winicob xʼixicob, miʼ pʌsbeñonla chaʼan lʌcʼʌlix «miʼ caj ti ujtel pejtelel jini». Pejcan Mateo 24:3, 7-14, 21, 22.
Cheʼ mi caj i chaʼlen yumʌntel Jesús ti 1,000 jab ti Pañimil, xucʼu xucʼul mi caj i lajmel majlel jini wocol (Isaías 9:6, 7; 11:9). Yicʼot jaʼel, Jesús mi caj i mel i yeʼtel bajcheʼ rey, bajcheʼ ñuc bʌ motomaj yicʼot mi caj i jisan mulil tiʼ tojlel muʼ bʌ i cʼuxbiñob Dios. Cheʼʌch bajcheʼ jini, Jesús mi caj i cʼʌjñel ti Dios, chaʼan maʼanix mi laj cʼamʼan, maʼanix mi lac ñoxʼan yicʼot maʼanix mi lac chʌmel. Pejcan Isaías 25:8; 33:24.
5. ¿Majqui mi caj i chumtʌl ti talto bʌ Paraíso?
Yaʼ tiʼ Yotlel Tempa bʌ, mi caj i mejlel a cʌn winicob xʼixicob muʼ bʌ i cʼuxbiñob Dios yicʼot woli bʌ i cʌñob chuqui miʼ mulan
Jini winicob xʼixicob muʼ bʌ i jacʼbeñob i tʼan Dios, mi caj i chumtʌlob ti Paraíso (1 Juan 2:17). Jesús tsiʼ choco majlel jini xcʌntʼañob i chaʼan, chaʼan miʼ sajcañob jini utsoʼ bʌ i pusicʼal, chaʼan miʼ cʌntesañob bajcheʼ miʼ mejlel i lʌcʼtesañob i bʌ ti Dios. Wʌle ora, Jioba woliʼ chajpan cabʌl winicob xʼixicob chaʼan miʼ chumtʌlob ti pejtelel ora ti Paraíso wʌʼ ti Pañimil (Sofonías 2:3). Yaʼ tiʼ Yotlel Tempa bʌ, jini winicob xʼixicob tsaʼix bʌ ñujpuñiyob, mi caj i cʌntesʌntelob bajcheʼ miʼ mejlelob ti chumtʌl ti wen tijicña yicʼot bajcheʼ mi caj i wen cʼuxbiñob i yalobil. Jini tatʌlob yicʼot i yalobilob temel mi caj i chʼujutesañob Dios yicʼot mi caj i cʌñob bajcheʼ jini wen tʼan mi caj i pʌsbeñob bajcheʼ miʼ mejlelob ti chumtʌl ti wen tijicña. Pejcan Miqueas 4:1-4.
