CɅNTESɅNTEL 7
¿Chuqui jini i Yumʌntel Dios?
1. ¿Chuqui jini i Yumʌntel Dios?
¿Bajcheʼ miʼ yʌjqʼuel ti cʌjñel Jesús chaʼan jiñʌch wem bʌ miʼ yumañonla? (MARCOS 1:40-42)
Jini i Yumʌntel Dios, jiñʌch jumpʼejl yumʌl am bʌ ti panchan. Mi caj i yochel tiʼ qʼuexol jini yumʌlob wʌʼ ti pañimil yicʼot mi caj i mel yom bʌ Dios ti Pañimil cheʼ bajcheʼ ti panchan. Weñʌch jini muʼ bʌ i yʌjlel chaʼan jini i Yumʌntel Dios. Mach jalix jini i Yumʌntel Dios mi caj yʌqʼuen chuqui yom jini winicob xʼixicob. Mi caj i tempan tiʼ pejtelel cuxul bʌ wʌʼ ti Pañimil. Pejcan Daniel 2:44 yicʼot Mateo 6:9, 10; 24:14.
Ti jumpʼejl yumʌntel cʼʌñʌl an juntiquil rey. Jioba tsiʼ waʼchoco i yalobil i cʼabaʼ Jesucristo, chaʼan mi yochel bajcheʼ Rey ti jini i Yumʌntel. Pejcan Apocalipsis 11:15.
Qʼuele jiñi video ¿Chuqui jini i Yumʌntel Dios?
2. ¿Chucoch Jesús jiñʌch wem bʌ miʼ yochel bajcheʼ Rey?
Jini i yalobil Dios jiñʌch wem bʌ chaʼan mi yochel bajcheʼ Rey, come mach jontolic, wen an i pʼʌtʌlel yicʼot wen i melbal (Mateo 11:28-30). Cheʼ jaʼel, añʌch cabʌl i pʼʌtʌlel chaʼan miʼ coltan winicob xʼixicob, come jiñʌch mi caj i chaʼlen yumʌntel wʌʼ ti Pañimil anquese yaʼan ti panchan. Cheʼ tsaʼ tejchi chʼojyel Jesús, tsaʼ cʼʌjqui majlel ti panchan, tsaʼ buchle ti pijt yaʼ tiʼ ñoj Jioba (Hebreos 10:12, 13). Ti wiʼil Dios tsiʼ yʌqʼue i pʼʌtʌlel chaʼan miʼ tech yumʌntel. Pejcan Daniel 7:13, 14.
3. ¿Majqui mi caj ti yumʌntel yicʼot Jesús?
Junmojt i cʼabaʼ «chʼujuloʼ bʌ» miʼ cajelob ti yumʌntel yicʼot Jesús (Daniel 7:27). Jini ñaxan chʼujuloʼ bʌ tsaʼ bʌ yajcʌntiyob jiñobʌch xucʼuloʼ bʌ i yápostolob Jesús. Jioba woli to i chʌn yajcan ili ora winicob xʼixicob chaʼan mi yochelob bajcheʼ chʼujuloʼ bʌ. Lajal bajcheʼ Jesús, mi caj i chʼojyelob tejchel bajcheʼ espíritu. Pejcan Juan 14:1-3 yicʼot 1 Corintios 15:42-44.
¿Jaytiquil winicob xʼixicob mi caj i majlelob ti panchan? Jesús tsiʼ yʌlʌ «mach bʌ cabʌleticla» (Lucas 12:32). Mi caj i cʼotel i yorajlel cheʼ miʼ tsʼʌctʌyelob ti 144,000. Jiñʌch muʼ bʌ caj i chaʼleñob yumʌntel tiʼ tojlel Pañimil yicʼot Jesús. Pejcan Apocalipsis 14:1.
4. ¿Chuqui tsaʼ ujti cheʼ tsiʼ teche yumʌntel Jesús?
Jini i Yumʌntel Dios tsiʼ teche yumʌntel ti 1914. * Tsaʼ bʌ i ñaxan mele Jesús cheʼ bʌ tsaʼix ochi bajcheʼ Rey, jiñʌch cheʼ bʌ tsiʼ choco jubel Satanás yicʼot i xibajob wʌʼ ti Pañimil. Satanás tsaʼ wen michʼa, jin chaʼan tsaʼ caji i tech cabʌl wocol wʌʼ ti Pañimil (Apocalipsis 12:7-10, 12). Jin chaʼan, woli ti ñumen pʼojlel majlel cabʌl wocol ila ti Pañimil. Jini guerra tac, wiʼñal tac, cʼamʼan muʼ bʌ i pam pujquel, yicʼot yujquel tac, iliyi jiñʌch jumpʼejl «señal» yom bʌ yʌl chaʼan jini i Yumʌntel Dios lʌcʼʌlix mi caj i chʼʌm tiʼ wenta tiʼ pejtelel ili Pañimil. Pejcan Lucas 21:7, 10, 11, 31.
5. ¿Chuqui woli i mel i Yumʌntel Dios?
Tiʼ pejtelel Pañimil woliyix i sujbel chaʼan jini i Yumʌntel Dios, woliyix i tempan «winicob xʼixicob» chʼoyoloʼ bʌ tiʼ pejtelel tejclum tac. Bajcʼʌl winicob xʼixicob utsoʼ bʌ i pusicʼal, woliyix i jacʼbeñob i tʼan Jesús. Jini i Yumʌntel Dios mi caj i coltan utsoʼ bʌ i pusicʼal, cheʼ miʼ jisan jini jontoloʼ bʌ. Jin chaʼan tiʼ pejtelel jini yom bʌ i tajob i coltʌntel tiʼ Yumʌntel Dios, yom miʼ cʌn i jacʼbeñob i tʼan Jesús. Pejcan Apocalipsis 7:9, 14, 16, 17.
Cheʼ bʌ añonixla tiʼ yorajlel jini 1,000 jab, jini Yumʌntel mi caj i tsʼʌctesan jini yom bʌ Dios ti ñaxan chaʼan jini winicob xʼixicob. Jini Pañimil mi caj i sujtel ti jumpʼejl Paraíso. Ti wiʼil, Jesús mi caj i chaʼ aqʼuen i Tat jini Yumʌntel (1 Corintios 15:24-26). ¿Am ba majqui a wom a suben chaʼan jini i Yumʌntel Dios? Pejcan Salmo 37:10, 11, 29.
^ parr. 6 Mi a wom a ñumen cʌn chuqui miʼ yʌl jini Biblia chaʼan jini profecía chaʼan jini jabil 1914, qʼuele jini libro ¿Chuqui miʼ cʌntesañonla tiʼ sujmlel jiñi Biblia? yaʼ ti iyopol 215-218.
