Dios yom chaʼan jini winicob xʼixicob miʼ chumtʌlob ti tijicña ila ti Pañimil. Jin chaʼan Dios tsiʼ mele tiʼ pejtelel chuqui am bʌ ila ti Pañimil, come miʼ wen cʼuxbin jini winicob xʼixicob. Mach jalix mi caj i jisan jini ilaya wocol chaʼan tijicñayix miʼ chumtʌlob jini winicob xʼixicob ti tal to bʌ qʼuin. Yicʼot mi caj i jisan jini muʼ bʌ i yʌqʼuen i yilan wocol winicob xʼixicob. Pejcan Jeremías 29:​11.

Mi juntiquilic yumʌl wʌʼ ti Pañimil an i jisa jini jontolil, cʼamʌjel yicʼot chʌmel. Pero añʌch jini wen tʼan tac. Dios mach jalix mi caj i jisan jini yumʌlob ila ti Pañimil chaʼan miʼ chʼʌm tilel i yumʌntel. Jini i tejclum mi caj i chumtʌl ti tijicña yicʼot maʼanix mi caj i cʼamʼañob. Pejcan Isaías 25:8; 33:​24 yicʼot Daniel 2:​44.

Come Dios mi caj i jisan jini ilaya wocol tac, cheʼ baqui ora miʼ jisan jini jontoloʼ bʌ winicob xʼixicob ila ti Pañimil (Sofonías 2:3). ¿Jala miʼ cajel ti ujtel iliyi? Jini i Tʼan Dios tsiʼ wʌn alʌ jini wocol woli bʌ yubiñob jini winicob xʼixicob ili ora. Jini woli bʌ ti ujtel yom yʌl chaʼan Dios lʌcʼʌlix mi caj i jisan jini wocol tac woli bʌ ti ujtel. Pejcan 2 Timoteo 3:​1-5.

Yom mi laj cʌn Dios cheʼ mi lac pejcʌben i tʼan am bʌ ti Biblia. Lajal bajcheʼ jumpʼejl carta muʼ bʌ i tsʼijbun juntiquil tatʌl wen yujil bʌ cʼuxbiya. Miʼ subeñonla bajcheʼ yom tijicña mi lac chumtʌl ili ora yicʼot chuqui yom mi lac mel, chaʼan mi lac taj laj cuxtʌlel mach bʌ anic miʼ jilel wʌʼ ti Pañimil. Tajol cheʼ jini winicob xʼixicob maʼ pejcʌben jini Biblia, mach pejtelic mi caj i mulañob. Pero jini, mach yom mi yʌqʼueñet a taj a chʼijiyemlel, come jini bendición tac muʼ bʌ caj a taj, wen ñucʌch. Pejcan Proverbios 29:⁠25 yicʼot Apocalipsis 14:​6, 7.