Dios miʼ suben tiʼ pejtelel jini winicob xʼixicob ti pañimil, chaʼan miʼ lʌcʼtesañob i bʌ ti oración tiʼ tojlel (Salmo 65:2). Pero maʼanic miʼ laj ñichʼtan jini oración, mi jinic to miʼ laj chʼʌm. Cheʼ bajcheʼ jini winic muʼ bʌ i ticʼlan i yijñam, maʼanic miʼ ñumel yoración baqui an Dios (1 Pedro 3:7). Cheʼ jaʼel, cheʼ bʌ jini israelob tsiʼ chʌn meleyob mach bʌ wenic, Dios maʼanic tsiʼ ñichʼtʌbeyob i yoración. Mach yom miʼ ñajʌyel lac chaʼan jini oración, come wen ñuc i cʼʌjñibal. Jini muʼ bʌ i mel tsʌts bʌ mulil, pero miʼ cʌy i mel, Dios mucʼʌch i ñichʼtʌben i yoración. Pejcan Isaías 1:​15; 55:7.

Qʼuele jiñi video ¿Muʼ ba i ñichʼtan Dios ti pejtelel jiñi oración tac?

Jini oración jiñʌch junchajp bajcheʼ mi lac chaʼlen chʼujutesaya, jin chaʼan cojach yom mi lac mel oración tiʼ tojlel jini tsaʼ bʌ i Meleyonla, Jioba (Mateo 4:​10; 6:9). Yicʼot jaʼel, come xmulilonla, yom mi lac mel oración tiʼ cʼabaʼ Jesús, come jiñʌch tsaʼ bʌ chʌmi tiʼ caj lac mul (Juan 14:6). Jioba mach yomic chaʼan jin jach mi lac chʌn al oración tsʼijbubil bʌ yicʼot ñopol jach bʌ lac chaʼan ti lac jol. Miʼ mulan cheʼ mi lac mel oración, loqʼuem bʌ ti lac pusicʼal. Pejcan Mateo 6:7 yicʼot Filipenses 4:​6, 7.

Jini tsaʼ bʌ i Meleyonla, miʼ ñichʼtan jini oración woli jax to bʌ lac ñaʼtan (1 Samuel 1:​12, 13). Jioba miʼ subeñonla mi lac mel oración tiʼ pejtelel ora, cheʼ mi lac tejchel, cheʼ mi lac wʌyel, cheʼ mi laj cʼux lac waj yicʼot cheʼ añonla ti wocol. Pejcan Salmo 55:​22 yicʼot Mateo 15:⁠36.

Wocol chaʼan mi lac sujtel ti yamigo Dios, come chumulonla ti jumpʼejl pañimil baqui an winicob xʼixicob maʼanic bʌ miʼ ñopob Dios yicʼot miʼ tseʼtañob jini muʼ bʌ yʌl Dios chaʼan chuqui mi caj i mel ila ti Pañimil (2 Timoteo 3:​1, 4; 2 Pedro 3:​3, 13).  Yom mi lac tempan lac bʌ yicʼot lac quermañojob chaʼan mi lac lajal coltan lac bʌ, joñonla com coltʌntel, cheʼob jaʼel. Pejcan Hebreos 10:​24, 25.

Cheʼ mi lac tempan lac bʌ yicʼot muʼ bʌ i cʼuxbiñob Dios, mi caj i coltañonla chaʼan mi lac ñumen lʌcʼtesan lac bʌ ti Dios. Jini tempa bʌ muʼ bʌ i melob i testigojob Jioba, jiñʌch baqui miʼ mejlel i coltañonla jaʼel chaʼan mi lac lajin jini yañoʼ bʌ chaʼan bajcheʼ ñopolob i chaʼan Dios. Pejcan Romanos 1:​11, 12.

Jatet miʼ mejlel a lʌcʼtesan a bʌ ti Dios, cheʼ maʼ chʌn ñaʼtan ñopol bʌ a chaʼan tiʼ tojlel. Ñaʼtan chuqui tsiʼ mele ti wajali, jini i ticʼojel tac yicʼot jini muʼ bʌ caj i mel ti talto bʌ qʼuin. Cheʼ maʼ mel oración yicʼot maʼ wen ñaʼtan ti a jol muʼ bʌ a pejcan ti Biblia, mi caj a ñaʼtan bajcheʼ cʼamel i cʼuxbiya yicʼot i ñaʼtʌbal Dios. Pejcan Josué 1:8 yicʼot Salmo 1:​1-3.

Mi mucʼʌch a ñop Dios yicʼot maʼ ñop chuqui mi caj i mel ti tal to bʌ qʼuin, cheʼ jach bajcheʼ jini mi caj a mejlel a lʌcʼtesan a bʌ tiʼ tojlel. Yom cʼajal a chaʼan, jini ñopol bʌ a chaʼan ti Dios, lajalʌch bajcheʼ juntejc pʌcʼʌbʌl, yom maʼ wʌqʼuen jaʼ chaʼan maʼanic miʼ chʌmel, cheʼ jaʼel jini ñopol bʌ a chaʼan ti Dios, yom maʼ chʌn pʼʌtʼesan chaʼan maʼanic miʼ chʌmel. Mi caʼ mel jini, jiñʌch cheʼ maʼ chʌn pejcan jini tsaʼ bʌ i coltayet a cʌn Dios, yicʼot chaʼan mucʼʌch a ñop muʼ bʌ i yʌl. Pejcan Mateo 4:4 yicʼot Hebreos 11:​1, 6.

Jioba i wentajʌch jini muʼ bʌ i cʼuxbin. Cheʼ jaʼel miʼ mejlel i coltañonla chaʼan maʼanic mi lac sʌt jini ñopol bʌ lac chaʼan tiʼ tojlel yicʼot jini lac pijtaya chaʼan bʌ chumtʌl ti pejtelel ora (Salmo 91:​1, 2, 7-​10). Cheʼ jaʼel, Dios miʼ subeñonla chuqui tac muʼ bʌ i mejlel yʌcʼonla ti cʼamʼan, maʼanic bʌ miʼ yʌqʼueñonla lac tijicñʌyel. Melelʌch, Jioba miʼ wen cʌntesañonla bajcheʼ yom tijicña mi lac chumtʌl. Pejcan Salmo 73:​27, 28 yicʼot Santiago 4:​4, 8.