Jini wen tʼan tac muʼ bʌ lac taj yaʼ ti Biblia, miʼ yʌqʼueñonla j cʌn chaʼan mi caj lac chumtʌl ti pejtelel ora wʌʼ ti Pañimil (Salmo 37:​29). Jini Biblia miʼ chʼʌm tilel 66 yalob libro tac. Dios tsiʼ cʼʌñʌ 40 xtsʼijbujelob chaʼan miʼ tsʼijbuñob jini Biblia. Jini ñaxam bʌ joʼpʼejl yalob libro tac, anix ñumen lʌcʼʌl 3,500 jab tsaʼ i tsʼijbu Moisés. Jini cojix bʌ alʌ libro, anix ñumen lʌcʼʌl 1,900 jab tsaʼ i tsʼijbu jini apóstol Juan. ¿Majqui i ñaʼtʌbal tsaʼ bʌ tsʼijbunti yaʼ ti Biblia? Dios tsiʼ cʼʌñʌ jini chʼujul bʌ i yespíritu tiʼ tojlel jini winicob tsaʼ bʌ i tsʼijbuyob jini Biblia (Hechos 1:​16). Tiʼ tsʼijbuyob i ñaʼtʌbal Dios i mach jinic i ñaʼtʌbalob. Jioba jiñʌch tsaʼ bʌ yʌcʼʌ ti tsʼijbuntel jini Biblia. Pejcan 2 Timoteo 3:​16 yicʼot 2 Pedro 1:​20, 21.

Qʼuele jiñi video ¿Majqui tsiʼ yʌcʼʌ ti tsʼijbuntel jiñi Biblia?

Joñonla j cujilʌch chaʼan jini Biblia tilemʌch ti Dios, come miʼ wʌn subeñonla chuqui miʼ caj ti ujtel ti tal to bʌ qʼuin. Maʼanic juntiquil winic muʼ bʌ mejlel i mel jini (Josué 23:​14). Cojach Dios mach bʌ anic i pʼisol i pʼʌtʌlel, miʼ mejlel i ñaʼtan muʼ bʌ caj ti ujtel ti talto bʌ qʼuin. Pejcan Isaías 42:​9; 46:​10.

Maʼanic yambʌ libro lajal bʌ bajcheʼ jini tilem bʌ ti Dios. Cabʌl Biblia an pujquem ti cabʌl tʼan tac. Anquese wajalix tsʼijbunti jini Biblia, lajalʌch mi yʌl bajcheʼ yujilob jini científicojob. Cheʼ jaʼel, jini 40 xtsʼijbujelob maʼanic juntiquil yʌñʌl bʌ chuqui tsiʼ tsʼijbuyob. * Cheʼ jaʼel, yaʼ ti Biblia miʼ pʌs chaʼan Dios wen añʌch i cʼuxbiya, yicʼot miʼ cʼʌn i pʼʌtʌlel chaʼan miʼ tojʼesan bajcheʼ miʼ chumtʌlob jini winicob xʼixicob. Jin chaʼan bajcʼʌl winicob xʼixicob miʼ ñopob chaʼan jini Biblia i Tʼañʌch Dios. Pejcan 1 Tesalonicenses 2:⁠13.

Qʼuele jiñi video ¿Bajcheʼ mi lac ñaʼtan chaʼan isujmʌch muʼ bʌ i yʌl jiñi Biblia?

Jini Biblia miʼ yʌl chuqui mi caj i mel Dios tiʼ tojlel jini winicob xʼixicob. Jini tsʼijbujel miʼ cʌntesañonla bajcheʼ jini ñaxam bʌ winic tsiʼ sʌtʌ jini Paraíso, yicʼot miʼ subeñonla bajcheʼ mi caj i chaʼ sujtel ti Paraíso ili Pañimil. Pejcan Apocalipsis 21:​4, 5.

Yaʼ tiʼ tʼan Dios mi lac taj mandar tac yicʼot ticʼojel tac. Cheʼ jaʼel, jini Biblia miʼ yʌl bajcheʼ yilal miʼ qʼuel Dios jini winicob xʼixicob, yicʼot miʼ pʌsbeñonla bajcheʼ yilal i melbal Dios. Jini Biblia miʼ subeñonla bajcheʼ miʼ mejlel laj cʌn Dios. Miʼ subeñonla jaʼel bajcheʼ miʼ mejlel lac sujtel ti yamigo Dios. Pejcan Salmo 19:​7, 11 yicʼot Santiago 2:​23; 4:8.

Chaʼan miʼ tsictesan i sujmlel jini tsʼijbubil bʌ ti Biblia, Jesús tsiʼ cʼʌñʌ cabʌl versículo tac, cheʼ jini miʼ tsictesʌben i sujmlel. Ili folleto mi caj i cʌntesañet bajcheʼ tsiʼ mele Jesús chaʼan maʼ chʼʌmben isujm jini loqʼuem bʌ ti Biblia. Pejcan Lucas 24:​27, 45.

Maʼanic yambʌ ñumen ñuc bʌ bajcheʼ jini wen tʼan tilem bʌ ti Dios. Pero an lamital winicob xʼixicob maʼanic bʌ miʼ qʼuelob ti ñuc jini wen tʼan, an yañoʼ bʌ muʼ bʌ i michʼañob cheʼ miʼ subentelob jini wen tʼan. Pero iliyi mach yomic miʼ yʌqʼueñet a chʼijiyemlel. Jini Biblia miʼ yʌl cheʼ mi lac ñumen cʌn jini Dios, mi caj lac mejlel ti chumtʌl ti pejtelel ora wʌʼ ti Pañimil. Pejcan Juan 17:3.