Dios tsiʼ tempʌbe i pʼolbal Abraham ti jumpʼejl tejclum yicʼot tsiʼ yʌqʼue mandar tac. Tsiʼ yotsʌbe i cʼabaʼ bajcheʼ i tejclum «Israel», tsaʼ sujtiyob ti cojach bʌ i tejclum muʼ bʌ i chaʼleñob isujm bʌ chʼujutesaya yicʼot tsiʼ cʌntayob chaʼan maʼanic miʼ yochel mach bʌ isujmic cʌntesa yaʼ tiʼ sujm bʌ i Tʼan Dios (Salmo 147:​19, 20). Miʼ taj i coltʌntel tiʼ pejtelel jini winicob xʼixicob ili ora, chaʼan jini tsaʼ bʌ i meleyob Israel. Pejcan Génesis 22:​18.

Dios tsiʼ yajca jini israelob chaʼan miʼ sujtel bajcheʼ i testigo. Tsaʼ bʌ ujti wajali tiʼ tojlel Israel, miʼ pʌsbeñonla chaʼan mucʼʌch i coltañonla cheʼ mi lac jacʼben i Tʼan Dios (Deuteronomio 4:6). Jini i melbal i tejclum Israel, miʼ mejlel i coltan winicob xʼixicob ili ora, chaʼan miʼ cʌñob jini isujm bʌ Dios. Pejcan Isaías 43:​10, 12.

Ti wiʼil, jini israelob maʼanix tsaʼ caji i jacʼob tsaʼ bʌ subentiyob ti Dios, jin chaʼan Jioba tsiʼ sajcʌbe i qʼuexol, jiñʌch yambʌ xñoptʼañob (Mateo 21:​43; 23:​37, 38). Ili ora mach jiñix israelob muʼ bʌ i melbeñob i yeʼtel Jioba, jiñix isujm bʌ xñoptʼañob, jini i testigojob Jioba. Pejcan Hechos 15:​14, 17.

Jesús tsiʼ tempa xcʌntʼañob chaʼan miʼ chaʼleñob subtʼan yicʼot miʼ cʌntesañob winicob xʼixicob ti pejtelel pañimil (Mateo 10:​7, 11; 24:​14; 28:​19, 20). Jini eʼtel chaʼan bʌ wen tʼan, woliʼ mejlel tiʼ pejtelel pañimil, come lʌcʼʌlix i jilibal jontol bʌ winicob xʼixicob. Maʼanic melbil ili woli bʌ ti mejlel ili ora, Jioba woliʼ tempan bajcʼʌl winicob xʼixicob tiʼ pejtelel pañimil chaʼan jini isujm bʌ chʼujutesaya (Apocalipsis 7:​9, 10). Jini isujm bʌ xñoptʼañob miʼ tempañob i bʌ chaʼan miʼ coltañob i bʌ. Tiʼ pejtelel pañimil lajal chuqui miʼ qʼuelob yaʼ ti tempa bʌ chaʼan jini Biblia. Pejcan Hebreos 10:​24, 25.

Cheʼ ti jabil 1870, junmojt muʼ bʌ i pejcañob jini Biblia tsaʼ caji i ñaʼtañob majlel i sujmlel am bʌ ti Biblia, maʼanic bʌ ñaʼtʌbil wajali. Yujilobix chaʼan jiñʌch Jesús tsiʼ tempa jini xñoptʼañob chaʼan jini subtʼan, tsaʼ cajiyob ti subtʼan tiʼ pejtelel pañimil chaʼan jini yumʌntel. Ti 1931 tiʼ chʼʌmʌyob i cʼabaʼ bajcheʼ i testigojob Jioba. Pejcan Hechos 1:8; 2:​1, 4, yicʼot 5:​42.

Ti ñaxam bʌ siglo jini congregación chaʼan xñoptʼañob, cabʌl tejclum tac tsiʼ tajayob i coltʌntel ti jini junmojt muʼ bʌ i pʌsob bij, tsaʼ bʌ i cʌñʌyob Jesús bajcheʼ i Jol congregación (Hechos 16:​4, 5). Lajal bajcheʼ ili ora jini i testigojob Jioba miʼ tajob i coltʌntel yaʼ ti junmojt muʼ bʌ i pʌsob bij, ancianojob wen cabʌloʼ bʌ i ñaʼtʌbal. Jiñʌch muʼ bʌ i qʼuelob tiʼ pejtelel Betel am bʌ i chaʼañob i testigojob Jioba, yaʼ baqui miʼ mejlel eʼtel chaʼan miʼ mejlel ti yan tac bʌ tʼan jini jun tac loqʼuem bʌ ti Biblia, miʼ chaʼlentel ti imprimir yicʼot miʼ chajpʌntel chaʼan miʼ chojquel majlel ti yan tac bʌ tejclum ti 600 tʼan tac. Jini junmojt muʼ bʌ i pʌsob bij, miʼ yʌcʼob coltaya loqʼuem bʌ ti Biblia chaʼan tijicñʌyel yicʼot ticʼojel, ili miʼ mejlel ñumen ti 100,000 congregación tac, ti pejtelel pañimil. Ti jujumpʼejl congregación tac an winicob wem bʌ i melbalob chaʼan mi waʼchocontelob bajcheʼ ancianojob. Ili winicob miʼ cʌntañob i tiñʌmeʼ Dios. Pejcan 1 Pedro 5:​2, 3.

Jini i testigojob Jioba chajpʌbilob chaʼan miʼ chaʼleñob subtʼan chaʼan jini wen tʼan yicʼot chaʼan miʼ cʌntesañob winicob xʼixicob. Lajal bajcheʼ tsiʼ meleyob jini apóstolob, joñonla jaʼel mi lac chaʼlen subtʼan ti otot ti otot (Hechos 20:​20). Mi laj cʌntesan jini winicob xʼixicob muʼ bʌ i cʼuxbiñob i sujmlel loqʼuem bʌ ti Biblia. Mach cojach i testigojob Jioba miʼ tempañob i bʌ. Ochemonla ti jumpʼejl familia, am bʌ tiʼ tojlel juntiquil Tatʌl xcʼuxbiya bʌ, jiñʌch Jioba. Lac quermaño lac bʌ, muʼ bʌ lac lajal cʌntan lac bʌ (2 Tesalonicenses 1:3). Jini i tejclum Jioba tempʌbilob chaʼan miʼ tijicñesʌbeñob i pusicʼal yicʼot miʼ coltañob yañoʼ bʌ, ili jiñobʌch jumpʼejl familia wʌʼ ti pañimil wen tijicñayoʼ bʌ. Pejcan Salmo 33:​12 yicʼot Hechos 20:​35.