Mele oración yicʼot wen chajpan a bʌ. Cʼajtin a coltʌntel ti oración chaʼan jin maʼ wʌcʼ ti a ñaʼtʌbal jiñi muʼ bʌ caj a sub i mach jatetic maʼ ñaʼtan a bʌ. Yom cʼajal a chaʼan baqui bʌ jiñi ñuc tac bʌ i cʼʌjñibal yom bʌ maʼ tsictesan. Ti a bajñel tʼan yom maʼ wʌl, mach jin jach maʼ chʌcʌ al jujumpʼejl tʼan am bʌ yaʼ ti jun.

Yom loqʼuem ti a pusicʼal chuqui maʼ wʌl. Ñaʼtan chucoch yomʌch miʼ yubiñob chuqui woli a wʌl. Acʼʌ a ñaʼtʌbal tiʼ tojlelob. Cheʼ jiñi, mi caj a pʌs a cʼuxbiya yicʼot a wutslel ti bajcheʼ maʼ ñijcan tac a cʼʌb, bajcheʼ añet yicʼot bajcheʼ maʼ mel a ñiʼ a wut.

Qʼuele jiñi woli bʌ i ñʌchʼtañetob. Mi mach lecojic ti qʼuelol, yom maʼ qʼuelob tiʼ wut. Cheʼ bʌ woli a ñusan jumpʼejl discurso, qʼuele juntiquil quixtañu, cheʼ jiñi qʼuele yambʌ. Mach cheʼic jach yom maʼ pam qʼuelob jiñi yaʼ bʌ tempʌbilob.