Carta i chaʼan Junmojt muʼ bʌ i pʌsob bij
Jehová yom chaʼan ‹mi la cochel ti xcʌntesa› (He. 5:12). ¡Ñaʼtancu! Jehová, jiñi ñumen wem bʌ xCʌntesa, woliʼ subeñonla chaʼan mi lac pʌs chuqui la cujil tiʼ tojlel. Jumpʼejlʌch ñuc bʌ eʼtel cheʼ mi lac pʌs i chaʼan bʌ Jehová ti lac familia, ti congregación yicʼot ti subtʼan, i yomʌch mi lac chʼʌm ti ñuc. Pero ¿bajcheʼ mi lac mejlel ti sujtel ti wem bʌ xcʌntesa?
Mi lac tajben i jacʼbal ti tsaʼ bʌ i sube Pablo jiñi Timoteo: «[Chʌn, TNM] pejcʌbeñob i tsʼijbujel Dios. Chaʼlen subtʼan yicʼot cʌntesa». Tsiʼ chaʼ alʌ: «Come cheʼ jini mi caj a coltan a bʌ yicʼot jini muʼ bʌ i yubiñob a tʼan» (1 Ti. 4:13, 16). Jiñi tʼan tac woli bʌ lac sub miʼ coltan quixtañujob. Jin chaʼan, wen ñuc i cʼʌjñibal cheʼ mi lac chaʼlen wersa chaʼan mi lac sujtel ti wem bʌ xcʌntesa yicʼot xpejcaya jun. Ili folleto mi caj i coltañet chaʼan maʼ mel ili. Laʼ laj qʼuel bajcheʼ melbil.
Miʼ cʼʌjñel jumpʼejl texto baqui miʼ tilel jumpʼejl principio o jumpʼejl ejemplo muʼ bʌ i taj i bʌ yicʼot jiñi cʌntesʌntel.
Jehová jiñʌch laj ‹caj cʌntesa› (Is. 30:20). Ili folleto mi caj i coltañet chaʼan maʼ ñumen weñʼesan a cʌntesa yicʼot bajcheʼ maʼ pejcan jun, pero yom maʼ cʼajtesan chaʼan jiñi muʼ bʌ lac sub tilem ti Jehová i jiñʌch muʼ bʌ i pʌy tilel jiñi quixtañujob (Jn. 6:44). Jin chaʼan, ti bele ora yom maʼ cʼajtiben i yespíritu. Cheʼ bʌ mucʼʌch i mejlel, cʼʌñʌ jiñi i Tʼan Dios. Ti bele ora yom maʼ pʌs chaʼan jiñʌch Jehová jiñi woli bʌ ti tʼan i mach jatetic. Chaʼlen wersa chaʼan jiñi woli bʌ i ñʌchʼtañetob miʼ cʼotel i wen cʼuxbiñob Jehová.
Dios tsiʼ pʌyʌyet chaʼan maʼ sub jiñi tʼan ñumen ñuc bʌ i cʼʌjñibal maʼañic bʌ tsictʌyem ila ti Pañimil. Cujil lojon chaʼan mi caj a mejlel mi mucʼʌch a ñop jiñi i ‹pʼʌtʌlel muʼ bʌ i yʌcʼ› Dios (1 P. 4:11).
Jiñi a piʼʌlob ti ili eʼtel chaʼan cʌntesa,
Junmojt muʼ bʌ i pʌsob bij i chaʼan i Testigojob Jehová
