Chuqui miʼ mejlel i coltañet a cʌy jiñi cʼujts

«Tsaʼ bʌ i cʌyʌyob jiñi i ñucʼ cʼujts añʌch chuqui tsaʼ bʌ i ñijcayob chaʼan mucʼʌch i cʌyob» (Stop Smoking Now! [¡Deje de fumar ahora!]).

MI A wom a cʌy jiñi cʼujts, yomʌch chaʼan an chuqui miʼ ñijcañet. ¿I chuqui miʼ mejlel a bej mel chaʼan cheʼʌch maʼ ñaʼtan bajcheʼ jiñi? Ñaʼtan chuqui ti wenlel miʼ mejlel a taj mi tsaʼ cʌyʌ.

Maʼañic mi caj a wen jisan taqʼuin. Cheʼ bʌ jujumpʼejl qʼuin maʼ ñucʼ jumpʼejl caja cigarrro cabʌl taqʼuin miʼ mejlel a jisan. «Maʼañic qʼuelbil c chaʼan mi cabʌl taqʼuin mic jisan tiʼ caj jiñi cigarro» (Gyanu, chʼoyol bʌ ti Nepal).

Mi caj a ñumen ñusan a bʌ. «Miʼ mejlel j cʌl chaʼan cheʼ bʌ tsaʼ j cʌyʌ c ñucʼ cʼujts tsaʼ caji c ñumen ñusan c bʌ yicʼot wen chuqui tsaʼ caji c mel» (Regina, chʼoyol bʌ ti Sudáfrica). Cheʼ bʌ mi laj cʌy jiñi cʼujts mi lac ñumen ñusan lac bʌ ti chuqui mi laj cʼux yicʼot laj cujtsʼin, ñumen an lac pʼʌtʌlel yicʼot wen jiñi i ñiʼ lac wut.

Ñumen cʼocʼ mi caj a wajñel. «Cheʼ bʌ juntiquil miʼ cʌy cʼujts ora mi caj i tsictiyel chaʼan cʼoʼcʼʌch mach yʌlʌyic jaypʼejl i jabilel». (Centros para el Control y la Prevención de Enfermedades, de Estados Unidos).

Mi caj a ñop chaʼan añʌch chuqui miʼ mejlel a mel. «Tsaʼ j cʌyʌ jiñi cʼujts come mach comic chaʼan an chuqui chuculon i chaʼan mi cubin» (Henning, chʼoyol bʌ ti Dinamarca).

Jiñi a familia yicʼot a wamigojob mi caj i yʌqʼueñob i wenlel. «Cheʼ bʌ an majqui miʼ chaʼlen cʼujts, miʼ yʌcʼ ti wocol yambʌlob. Jiñi estudio tac an i pʌsʌ chaʼan i butsʼil jiñi cigarro muʼ bʌ i cʼotel tiʼ tojlel yambʌ jujumpʼejl jab an i yʌcʼʌ ti chʌmel yonlel lac piʼʌlob tiʼ caj miʼ yʌqʼueñob cáncer tiʼ pulmón o miʼ cʼamʼesʌbeñob i pusicʼal» (Sociedad Americana contra el Cáncer).

Mi caj a tijicñesan Dios. «Laʼ lac sʌqʼuesan lac bʌ tiʼ pejtelel muʼ bʌ i bibʼesan lac bʌcʼtal» (2 Corintios 7:1). Acʼʌla «jiñi laʼ bʌcʼtal bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios» (Romanos 12:1).

«Cheʼ bʌ tsaʼ j cʌñʌ chaʼan Dios mach weñic miʼ qʼuel chuqui muʼ bʌ i bibʼesan lac bʌcʼtal, tsaʼ j cʌyʌ jiñi cigarro» (Sylvia, chʼoyol bʌ ti España).

An i tajol mach jasʌl jach chaʼan añʌch chuqui muʼ bʌ i ñijcañonla laj cʌy, i cʼʌjñibalʌch i coltaya jiñi lac familia yicʼot la camigojob. ¿Chuqui miʼ mejlel i melob?