Sʌclan a coltʌntel

«Mi an i piʼʌl mi caj i coltan. Cheʼ jini miʼ mʌjlel i chaʼañob cheʼ chaʼtiquilob» (Eclesiastés 4:12).

CHEʼ bʌ an laj coltʌntel ti yambʌlob, mach wocolic chaʼan mi lac mʌlben baqui jach bʌ laj contra. Jin chaʼan, mi a wom a cʌy a ñucʼ cigarro yom maʼ cʼajtiben i coltaya a familia yicʼot a wamigojob o yambʌ majqui yom bʌ i coltañet.

¿Chucoch maʼañic maʼ pejcan juntiquil am bʌ i cʌyʌ i ñucʼ cigarro? Mi caj i ñaʼtan bajcheʼ yubil maʼ wubin yicʼot mi caj i coltañet. Torben, juntiquil xñoptʼan chumul bʌ ti Dinamarca, miʼ yʌl: «Wen ñuc tsaʼ j qʼuele cheʼ bʌ an majqui tsiʼ coltayon». Abraham, chumul bʌ ti India, miʼ yʌl: «I cʼuxbiya c familia yicʼot i chaʼan jiñi hermanojob tsiʼ coltayon j cʌy jiñi cʼujts». An i tajol mach jasʌlic miʼ coltañet jiñi a familia yicʼot a wamigojob.

Juntiquil wiñic i cʼabaʼ Bhagwandas, miʼ yʌl: «Veintisiete jab tsaʼ c ñucʼu cigarro, pero cheʼ bʌ tsaʼ j cʌñʌ muʼ bʌ i yʌl jiñi Biblia chaʼan chuqui muʼ bʌ i bibʼesan lac bʌcʼtal tsaʼ c ñaʼta j cʌy. Cʼunteʼ cʼunteʼ tsaʼ j cʌyʌ majlel. Tsaʼ j cʌyʌ jiñi ñaxam bʌ camigojob i tsaʼ c sʌcla j coltʌntel ti doctorob, pero maʼañic chuqui tsiʼ coltayon. Jinto cheʼ bʌ ti jumpʼejl acʼʌlel tsaʼ c pejca Jehová i ti wocol tʼan tsaʼ c sube chaʼan miʼ coltañon j cʌy jiñi cigarro. Cheʼ jach bajcheʼ jiñi tsaʼ mejli j cʌy».

Cheʼ jaʼel, ñuc i cʼʌjñibal chaʼan maʼ wʌn chajpan a bʌ cheʼ bʌ an chuqui miʼ mʌctañet chaʼan a wom cʌy jiñi cʼujts. Ti jiñi yambʌ temaj mi caj laj qʼuel baqui tac bʌ jiñi.

[Recuadro]

¿YOM BA MIJ CʼɅN TSʼAC TAC?

Jiñi tsʼac tac muʼ bʌ i mejlel i coltañet chaʼan maʼ cʌy cʼujts bajcheʼ jiñi parche chaʼan nicotina, mucʼʌch i wen locʼsan cabʌl taqʼuin. Pero cheʼ bʌ maʼ ñaʼtan a cʼʌn yom a wujil iliyi.

¿Baqui bʌ i wenlel? Jiñi doctorob muʼ bʌ i yʌlob chaʼan miʼ cʼʌjñel iliyi miʼ yʌlob chaʼan miʼ coltan jiñi lac piʼʌl chaʼan mach cʼamic miʼ yubin i bʌ cheʼ bʌ yom i cʌy jiñi cʼujts. Pero cheʼ jaʼel an yambʌ lac piʼʌlob muʼ bʌ i yʌlob chaʼan maʼañic miʼ wen coltañob jiñi tsʼac.

¿Baqui tac bʌ i wocolel? An tac ili tsʼac muʼ bʌ i yʌcʼ wocol bajcheʼ xej, cʌlʌx pensal o muʼto i yʌqʼueñob i ñaʼtan chaʼan yom i tsʌnsañob i bʌ. Yom miʼ cʼajtesan chaʼan, anquese miʼ poj cʼʌn yambʌ tsʼac lajal jach bajcheʼ woliʼ chaʼ otsʌben i bʌ jiñi nicotina come mucʼʌch i yʌcʼ ti wocol jiñi i cuxtʌlel. Anquese miʼ poj qʼuextan jiñi tsʼac tac bej woli jach i mulan nicotina.

¿Chuqui yambʌ miʼ mejlel lac mel? Tsaʼ melbentiyob jumpʼejl encuesta jiñi tsaʼ bʌ i cʌyʌyob i ñucʼ cʼujts i jiñi 88% tsiʼ yʌlʌ chaʼan maʼañic tsiʼ cʼʌñʌyob tsʼac.