Qʼuele baqui tac bʌ ñuc bʌ i cʼʌjñibal. Jiñi Biblia miʼ subeñonla chaʼan yom mi laj qʼuel chuqui tac jiñi ñumen ñuc bʌ i cʼʌjñibal (Filipenses 1:10). Mele jumpʼejl lista tiʼ pejtelel chuqui yom maʼ mel. Tajol luʼ ñucʌch i cʼʌjñibal, pero an tacʌch ñumen ñuc bʌ i cʼʌjñibal i tajol ñumen ora bʌ yom miʼ mejlel bajcheʼ jiñi yan tac bʌ. Qʼuele baqui bʌ i ñaxan mele. Pero mach ñajʌyic a chaʼan chaʼan an tacʌch chuqui ñuc bʌ i cʼʌjñibal pero tajol mach ti orajic yom miʼ mejlel, bajcheʼ jiñi mʌñoñel. O tajol ti orajʌch yom mi lac mel pero mach wen ñuquic i cʼʌjñibal, cheʼ bajcheʼ jiñi qʼuel televisión. *

Wen ñaʼtan jiñi muʼ bʌ caj a mel. Eclesiastés 10:10 miʼ yʌl: «Cheʼ maʼanic i yej a machit, jal miʼ tujqʼuel chuqui maʼ tsep. Cheʼ jay i yej mach wocolic eʼtel. Jini am bʌ i pusicʼal lajalʌch bajcheʼ am bʌ i machit jay bʌ i yej. Utsʼat miʼ caj ti loqʼuel i yeʼtel». Cheʼ bajcheʼ jiñi lac machit yom mi lac ñaxan jucʼ cheʼ muʼto caj laj cʼʌn, yom mi lac ñaxan wen ñaʼtan chuqui mi caj lac mel chaʼan wen mi laj cʼʌn jiñi ora am bʌ lac chaʼan. Mi an mach bʌ wen ñuquic i cʼʌjñibal cʌyʌ ti wiʼil chaʼan wen maʼ cʼʌn jiñi ora am bʌ a chaʼan. Mi ti orajach tsaʼ ujti a mel jiñi tsaʼix bʌ a wʌn ñaʼta, ¿chucoch maʼañic maʼ tech a mel jiñi yan tac bʌ? Mi mucʼʌch a wʌn ñaʼtan chuqui tac mi caj a mel, lajalet bajcheʼ jiñi wiñic am bʌ i ñaʼtʌbal muʼ bʌ i jucʼ i machit cheʼ muʼto caj i cʼʌn, ñumen on chuqui mi caj a mel ti jiñi ora am bʌ a chaʼan.

Pʼisi chuqui mi caj a mel. Alʌ chaʼan maʼañic mi caj a mel jiñi mach bʌ wen ñuquic i cʼʌjñibal mucʼ jach bʌ i chilbeñet jiñi ora am bʌ a chaʼan. Mi cabʌl jax chuqui maʼ ñaʼtan a mel o maʼ jacʼ a mel mi caj i wen aqʼuet ti pensar i mi caj i chilbeñet a tijicñʌyel.

Mach a cʌy ti wiʼil jiñi yom bʌ maʼ mel i mach a putun ñaʼtan mi mucʼʌch caj a mel o maʼañic. Eclesiastés 11:4 miʼ yʌl: «Mux caj i toʼol ñumel i yorajlel pacʼ mi woli jach a chʌcʌ qʼuel jini icʼ. Mi wolaʼ chʌcʌ qʼuel tocal, mach muqʼuic a chaʼlen cʼajbal». Juntiquil wiñic mucʼ jach bʌ i teñe al chaʼan mi caj i chaʼlen pacʼ i maʼañic miʼ mel, woli jach i yʌcʼ ti ñumel jiñi ora. Maʼañic baʼ ora mi caj i chaʼlen pacʼ i maʼañic baʼ ora mi caj i chaʼlen cʼajbal. Cheʼʌch miʼ yujtel jaʼel cheʼ an chuqui la com lac mel i mucʼ jach la cʌcʼ ti ñumel i yorajlel, maʼañic baʼ ora mi caj lac mel. O tajol ñaxan la com lac wen cʌn jiñi muʼ bʌ caj lac mel. Isujmʌch, yomʌch mi lac ñaxan wen ñaʼtan cheʼ an chuqui la com lac mel wen ñuc bʌ i cʼʌjñibal. Jin chaʼan, Proverbios 14:15 miʼ yʌl chaʼan jiñi cʌntesʌbil bʌ o muʼ bʌ i cʼʌn i ñaʼtʌbal miʼ ñaxan wen ñaʼtan cheʼ an chuqui mi caj i mel. Pero tiʼ sujm, mucʼʌch lac tsʼitaʼ pensarin cheʼ an chuqui mi caj lac mel (Eclesiastés 11:6).

Mach a ñaʼtan chaʼan luʼ wen yom miʼ loqʼuel. Proverbios 11:2 miʼ yʌl: «An wen bʌ i ñaʼtʌbal jini muʼ bʌ i peqʼuesan i bʌ». Utsʼatʌch cheʼ la com chaʼan wen miʼ loqʼuel jiñi muʼ bʌ lac mel. Pero an i tajol mach cheʼic miʼ yujtel, i jiñi miʼ yʌqʼueñonla lac chʼijyemlel. Jumpʼejl ejemplo, juntiquil woli bʌ i cʌn yambʌ tʼan mi caj i ñajʌyel, i yom miʼ ñaʼtan chaʼan cheʼʌch mi caj i yujtel. Pero juntiquil luʼ toj bʌ yom i mel, mi caj i bʌcʼñan chaʼan mach cheʼic bajcheʼ mi caj i yʌl, i jiñi maʼañic mi caj i coltan. Jin chaʼan yomʌch mi lac pʌs lac pecʼlel i mach ñumeñic ti pʼis chuqui mi lac pijtan. Juntiquil am bʌ i pecʼlel mach ti orajic miʼ michʼan mi mach weñic chuqui tsiʼ mele, i tajol mucʼ jach i tseʼtan.

Pʼisbil jach bajcheʼ yom maʼ qʼuel a weʼtel yicʼot jiñi ñusaqʼuin. «Utsʼat mi lac tsʼitaʼ cʼaj la co cheʼ jasʌlonla. Mach utsʼatic mi lac chʌn bajben eʼtel chaʼan jach lac woʼlel ti chubʌʼañʌl» (Eclesiastés 4:6.) Jiñi woʼ jax bʌ ti eʼtel cʌlʌxix miʼ chaʼlen eʼtel i maʼañix i pʼʌtʌlel miʼ cʌytʌl mi muqʼuic i tajben i yorajlel chaʼan miʼ mel yan tac bʌ. Pero juntiquil tsʼuʼlel jach bʌ yom cheʼ jach miʼ ñusan qʼuin, maʼañic chuqui miʼ mel i puru wʌyel yom. Jiñi Biblia miʼ subeñonla chaʼan yom pʼisbilon jachla. Miʼ subeñonla chaʼan yom mi lac chaʼlen tsʌts bʌ eʼtel, pero chaʼan yom mi la cubin lac tijicñʌyel jaʼel chaʼan jiñi la queʼtel, «jiñʌch lac majtan ti Dios» (Eclesiastés 5:19).

Yom wen maʼ wʌyel. Juntiquil tsaʼ bʌ i tsʼijbu jiñi Biblia tsiʼ yʌlʌ: «Tiʼ ñʌchʼtʌlel c pusicʼal mi caj c ñoltʌl. Mij caj ti wʌyel» (Salmo 4:8). Jiñi ñucoñixbʌla yom mi lac wʌyel 8 hora chaʼan mi lac chaʼ taj lac pʼʌtʌlel, chaʼan tijicñayonla yicʼot miʼ mejlel la cʌcʼ lac pensar ti chuqui mi lac mel. Jin chaʼan, cheʼ wen mi lac wʌyel woli laj cʼʌn ti wen jiñi ora am bʌ lac chaʼan, come miʼ coltañonla chaʼan junsujm lac pensar yicʼot chaʼan ñumento mi laj cʌn. Pero mi mach weñic mi lac wʌyel mi lac taj cabʌl wocol, miʼ mejlel ti ujtel jumpʼejl accidente, mi lac wen ñajʌyel i ora jach mi lac michʼan.

Mach a mulan a taj jiñi mach bʌ a tajayic. «Anquese tsʼitaʼ lac chubʌʼan yom tijicñayonla yicʼot jini am bʌ lac chaʼan. Mach yomic mi laj cabʌl pensalin chuqui anto yom lac chaʼan» (Eclesiastés 6:9). ¿Chuqui yom i yʌl iliyi? Chaʼan jiñi am bʌ i ñaʼtʌbal mach jin jach miʼ ñaʼtan chuqui yom, ñumento mi yujil chaʼan mach mejlic i taj. Jin chaʼan, mach orajic miʼ waʼ mulan chuqui miʼ taj i qʼuel o mi an chuqui an ti oferta. Jasʌl jach miʼ yubin yicʼot jiñi mucʼʌch bʌ i mejlel i taj.

Wen ñaʼtan chuquiyes jiñi wen tac bʌ maʼ qʼuel. Ñaʼtan chuquiyes jiñi ñuc tac bʌ i cʼʌjñibal chaʼañet. Mi jiñi ñuc bʌ i cʼʌjñibal jiñʌch chuqui wen tac bʌ, mi caj i coltañet chaʼan wen muʼ bʌ a yajcan a mel i chaʼan wen maʼ cʼʌn jiñi ora am bʌ a chaʼan. ¿I bajcheʼ miʼ mejlel lac ñaʼtan chuquiyes jiñi ñumen ñuc tac bʌ i cʼʌjñibal? Cabʌl lac piʼʌlob miʼ yʌlob chaʼan jiñi Biblia jiñʌch jiñi libro muʼ bʌ i chʼʌm tilel jiñi ñumen wen tac bʌ ticʼojel (Proverbios 2:6, 7).

Jiñi cʼuxbiya jiñʌch ñumen ñuc bʌ i cʼʌjñibal ti laj cuxtʌlel. Colosenses 3:14 miʼ yʌl chaʼan «jiñi cʼuxbiya mucʼʌch i tem lac piʼʌlob tiʼ sujm». Mi maʼañic cʼuxbiya ti lac familia maʼañic tijicñʌyel i mach weñic mi caj lac chumtʌl. Jiñi maʼañic bʌ miʼ jacʼob ili ticʼojel i cojach miʼ wen qʼuelob ti ñuc jiñi taqʼuin o jiñi i yeʼtelob maʼañic mi caj i tajob i tijicñʌyel. Jin chaʼan, jiñi Biblia mach junsujtel jach miʼ taj ti tʼan jiñi cʼuxbiya i miʼ yʌl chaʼan jiñʌch jiñi ñumen ñuc bʌ i cʼʌjñibal (1 Corintios 13:1-3; 1 Juan 4:8).

Aqʼuen i yorajlel chaʼan maʼ cʌn Dios. Juntiquil wiñic i cʼabaʼ Geoff utsʼat chumul yicʼot i yijñam, an chaʼtiquil i yalobilob, a wem bʌ i yamigojob yicʼot wen i yeʼtel bajcheʼ doctor. Pero yaʼ tiʼ yeʼtel ti bele ora miʼ qʼuel bajcheʼ miʼ yubin wocol jiñi lac piʼʌlob yicʼot bajcheʼ miʼ wen chʌmelob. Jin chaʼan miʼ cʼajtiben i bʌ: «¿Cheʼʌch ba yom mi lon c chumtʌl bajcheʼ iliyi?». Pero ti jumpʼejl bʌ qʼuin tsiʼ pejca jiñi jun tac loqʼuem bʌ ti Biblia i chaʼan i testigojob Jehová i tsiʼ tajbe i jacʼbal jiñi i cʼajtiya.

Geoff tiʼ tsictesʌbe i yijñam yicʼot i yalobilob jiñi tsaʼ bʌ i pejca i tsiʼ mulayob i ñumen cʌn. Tiʼ pejtelelob tsaʼ cajiyob ti estudio, i jiñi tsiʼ yʌqʼueyob i sujmlel i cuxtʌlel i tsiʼ cʌñʌyob bajcheʼ miʼ mejlel i cʼʌñob ti wen jiñi ora añoʼ bʌ i chaʼan. Cheʼ jaʼel, tsiʼ tajayob i pijtaya chaʼan miʼ mejlelob ti chumtʌl tiʼ pejtelel ora ti jumpʼejl pañimil baqui maʼañix wocol (Apocalipsis 21:3, 4).

Jiñi tsaʼ bʌ i ñusa Geoff miʼ cʼajtesʌbeñonla tsaʼ bʌ i yʌlʌ Jesucristo ti Mateo 5:3: «Tijicñayob jiñi muʼ bʌ i ñaʼtañob chaʼan i cʼʌjñibalʌch i chaʼañob Dios». ¿Muʼ ba caj a wʌqʼuen i yorajlel chaʼan maʼ ñumen cʌn Dios? Maʼañic yambʌ muʼ bʌ caj i yʌqʼueñet a ñaʼtʌbal chaʼan maʼ mel chuqui wen ti jujumpʼejl qʼuin ti a cuxtʌlel.