Tsictesʌbeñon lojon bajcheʼ tsaʼ coliyet.

Tsaʼ quila pañimil ti Italia cheʼ ti 1943. Jiñi querañob yicʼot joñon tsaʼ coliyon lon ti jumpʼejl alʌ tejclum. Jiñi c papá miʼ pʌcʼ chuqui jach yicʼot xjucʼteʼ. Jiñi c papá yicʼot c mamá tsiʼ pʌyʌyon lojon majlel ti iglesia católica.

¿Chucoch tsaʼ ochiyet ti sacerdote?

Cheʼ bʌ alobonto mic wen mulan majlel ti misa come mic wen mulan muʼ bʌ i yʌl jiñi sacerdote yicʼot chuqui muʼ bʌ i mel tac yaʼi. Jiñʌch tsaʼ i ñijcayon chaʼan mic sujtel ti sacerdote. Cheʼ bʌ an 13 c jabilel, jiñi c mamá tsiʼ pʌyʌyon majlel baqui miʼ wen chajpʌntelob jiñi alobob chaʼan miʼ mejlelob ti sujtel ti sacerdote.

Cheʼ bʌ woli a chajpan a bʌ, ¿tsaʼ baʼ pejca jiñi Biblia?

Maʼañic tsaʼ c wen pejca. Cheʼ bʌ an 15 c jabilel juntiquil muʼ bʌ i cʌntesañon tsiʼ yʌqʼueyon jumpʼejl libro muʼ bʌ i chʼʌm tilel jiñi Evangelio tac, baqui miʼ yʌl chaʼan i cuxtʌlel Jesús i mach junsujtel jach tsaʼ c pejca. Cheʼ bʌ an 18 c jabilel tsaʼ majliyon ti chumtʌl ti Roma chaʼan mic chajpan c bʌ ti jiñi universidad am bʌ tiʼ wenta jiñi papa. Yaʼi tsaʼ j cʌñʌ latín, griego, historia, filosofía, psicología yicʼot teología. Anquese mucʼʌch cʌleʼ lojon versículo tac yicʼot mic ñʌchʼtan lojon ti pejcʌntel jiñi Biblia yaʼ ti misa cheʼ ti domingo, pero maʼañic mic chʼʌmben lojon i sujm come maʼañic mic bajñel pejcan lojon.

Cheʼ bʌ an ti a wenta jiñi seminario, ¿tsaʼ baʼ chaʼle cʌntesa jaʼel?

Jiñi queʼtel jiñʌch chaʼan mij qʼuel chuquito yom yaʼ ti seminario, pero tsaʼʌch cʌcʼʌ cʌntesa tac chaʼan Concilio Vaticano II.

¿Chucoch tsaʼ yʌjñi a pensar ti jiñi Iglesia?

Añʌch uxchajp: Tsaʼ caji j qʼuel chaʼan jiñi Iglesia miʼ yotsan i bʌ ti política, maʼañic chuqui miʼ suben jiñi sacerdotejob yicʼot jiñi i wiñicob cheʼ an chuqui mach bʌ weñic miʼ melob, i cheʼ jaʼel tsaʼ caji j qʼuel chaʼan jiñi i cʌntesajob maʼañic i sujmlel. Jumpʼejl ejemplo, ¿bajcheʼqui an cheʼ juntiquil Dios yujil bʌ cʼuxbiya miʼ ticʼlan juntiquil lac piʼʌl chʌmeñix bʌ? ¿Yom ba jaʼel chaʼan mi laj cʼʌn jumpʼejl ujʌl o rosario chaʼan junsujm jach muʼ bʌ la cʌl ti jiñi la coración? *

¿Chuqui tsaʼ ñaʼta a mel?

Yicʼot i yaʼlel c wut tsaʼ j cʼajtibe Dios ti wocol tʼan chaʼan miʼ coltañon. Tsaʼ c mʌñʌ jumpʼejl c libro jiñi Biblia de Jerusalén, tsaʼto bʌ poj loqʼui ti italiano i tsaʼ caji c pejcan. Ti jumpʼejl domingo ti sʌcʼan cheʼ bʌ ujtel j cʌcʼ misa, wolix c jocʼchocon jiñi pʌl bʌ c bujc tsaʼ cʼoti chaʼtiquil wiñicob yaʼ ti seminario i tiʼ subeyoñob chaʼan i testigojob Jehová i tsaʼ cajiyon lojon ti tʼan. Ñumen ti jumpʼejl hora tsaʼ cʌlʌ lojon chaʼan bʌ Biblia yicʼot chuqui miʼ yʌl chaʼan bʌ jiñi i sujm bʌ ñopbalʌl.

¿Chuqui tsaʼ taja a qʼuel tiʼ tojlel jiñi i testigojob Jehová?

Tsaʼ c wen mulaj chaʼan mucʼʌch i ñopob chuqui miʼ yʌlob i bajcheʼ miʼ sʌclañob jiñi texto tac ti Biblia católica. Ti wiʼil, juntiquil Testigo i cʼabaʼ Mario, tsaʼ caji i julaʼtañon. Tsiʼ wen pʌsʌ i pijt, ti jujumpʼejl sábado anquese mucʼ jaʼal, an chajc o chuqui tac jach miʼ yujtel, ti alas nueve en punto yaʼix an i julaʼtañon.

¿Chuqui tsiʼ yʌlʌyob jiñi yambʌ sacerdotejob cheʼ miʼ julaʼtañetob jiñi Testigojob?

Tsaʼ c subeyob chaʼan miʼ yajñel yicʼoton lojon, pero mi juntiquilic tsiʼ chʼʌmʌyob ti ñuc jiñi estudio chaʼan Biblia. Pero joñon tsaʼʌch c wen mulaj come woli j cʌn chuqui wen utsʼat bʌ, tsaʼ j cʌñʌ chucoch Dios miʼ yʌcʼ ti ujtel jontolil, wocol tac, i jiñʌch com bʌ c ñaʼtʌben i sujmlel.

¿Tsiʼ subeyetob jiñi añoʼ bʌ i yeʼtel yaʼ ti a ñopbal chaʼan maʼ cʌy jiñi estudio?

Tsaʼʌch, ti 1975 tsaʼ majliyon ti Roma chaʼan mic subeñob chuqui woli bʌ j cʌn. Pero jiñi ñucoʼ bʌ i yeʼtel tiʼ subeyoñob chaʼan mach utsʼatic woli bʌ j cʌn, pero mi juntiquilic tsiʼ cʼʌñʌ jiñi Biblia. Jin chaʼan, ti 9 chaʼan enero ti 1976 tsaʼ c tsʼijbu jumpʼejl carta baqui mi cʌl chaʼan mach comix ajñel yaʼ ti Iglesia i tsaʼ c choco majlel ti Roma. Tsaʼ ñumi chaʼpʼejl qʼuin tsaʼ loqʼuiyon yaʼ ti seminario, cheʼ jiñi tsajñon ti ñaxam bʌ c tempa bʌ yicʼotob jiñi i testigojob Jehová. Jiñʌch jiñi colem tempa bʌ baqui miʼ muchʼqʼuiñob i bʌ cabʌl congregación. ¡Wen yʌñʌlʌch! Jujuntiquil añob i Biblia i miʼ sʌclañob jiñi texto tac muʼ bʌ i yʌlob jiñi xñusa discursojob.

¿Wem ba tsiʼ qʼuele a familia tsaʼ bʌ a mele?

Lʌcʼʌ tiʼ pejtelelob tsaʼ michʼayob. Pero tsaʼ cʼoti cubin chaʼan juntiquil queran woli ti estudio yicʼot jiñi Testigojob ti Lombardía, jumpʼejl tejclum am bʌ tiʼ nortejlel Italia. Tsaʼ majli c julaʼtan i jiñi Testigojob yaʼi tsiʼ coltayoñob chaʼan mic sʌclan queʼtel yicʼot baqui mic chumtʌl. Ti jimbʌ jabil tsaʼ sujtiyon bajcheʼ i testigo Jehová.

¿Muʼ baʼ chaʼ ñaʼtan jiñi tsaʼ bʌ a cʌyʌ?

¿Mic chaʼ ñaʼtan c bʌ? ¡Maʼañic! Wʌle, ñumen lʌcʼʌlix mi cubin c bʌ tiʼ tojlel Dios, come jiñʌch jiñi Biblia tsiʼ cʌntesayon majqui jiñi Dios, mach jiñic jiñi filosofía mi jiñicto muʼ bʌ i ñopob jiñi católicojob. Wʌle, muqʼuix i mejlel j cʌntesan jiñi quixtañujob come cujil chaʼan i sujmlelʌch woli bʌ j cʌl.