¿Muʼ ba a ñop chaʼan jiñi wiñicob xʼixicob mi caj i jisañob jiñi wocol tac muʼ bʌ i yʌqʼueñonla lac sʌt lac ñʌchʼtʌlel yicʼot muʼ bʌ i yʌcʼ ti wocol laj cuxtʌlel? Chaʼan miʼ mejlel ti tojʼesʌntel jiñi wocol, yom mi lac ñaʼtan baqui woli (choncol) i tilel.

Laʼ la cʌl jumpʼejl ejemplo. Juntiquil wiñic i cʼabaʼ Tom tsaʼ cʼamʼa i ti wiʼil tsaʼ chʌmi. ¿Chucoch tsaʼ chʌmi? «Cheʼ bʌ tsaʼ caji ti tejchel i cʼamʌjel, maʼañic majqui tiʼ sʌcla chuqui woli (yʌquel) i techben i cʼamʌjel», cheʼ tiʼ tsʼijbu jiñi doctor ti jiñi hospital cheʼ bʌ Tom tsʼitaʼ jax yom chaʼan miʼ chʌmel (sajtel). Jiñi tsaʼ bʌ i ñaxan qʼueleyob tsaʼ jach i yʌqʼueyob tsʼac tac chaʼan miʼ lʌmben i cʼuxel.

¿Cheʼ ba woliʼ yujtel tiʼ tojlel jiñi wocol tac am bʌ ila ti pañimil? Jumpʼejl ejemplo, jiñi yumʌlob miʼ yʌcʼob ley tac, miʼ yotsañob cámara tac yicʼot miʼ ñumen acʼob policía chaʼan miʼ ñop i jisañob jiñi xujchʼ. Anquese ili mucʼʌch i coltañonla, pero maʼañic miʼ jisan jiñi wocol, come jiñi muʼ bʌ i mulañob jiñi quixtañu, i melbalob yicʼot chuqui miʼ ñopob jiñʌch muʼ bʌ i yʌqʼueñob i mel chuqui jach yomob.

Daniel, chumul bʌ ti jumpʼejl país am bʌ ti Sudamérica baqui wen wocol ti tajol taqʼuin miʼ yʌl: «Ti wajali utsʼat bajcheʼ chumulon lojon. Maʼañic mi lon c bʌcʼñan chaʼan mi lon c chilbentel chuqui an lon c chaʼan, pero wʌle maʼañix baqui tijicña mi lac chumtʌl. Jiñi quixtañujob miʼ pʌsob chaʼan miʼ wen mulañob chubʌʼañʌl i maʼañix miʼ qʼuelbeñob ti ñuc i cuxtʌlel yambʌlob, mi jiñic to chuqui an i chaʼañob».

Juntiquil wiñic tsaʼ bʌ putsʼi cheʼ bʌ an wocol yaʼ ti Oriente Medio i ti wiʼil tsaʼ sujti ti Testigo tsiʼ yʌlʌ: «Yaʼ baqui chʼoyolon, jiñi familia tac, jiñi yumʌlob yicʼot jiñi ñopbalʌl tac miʼ wersa xicʼob jiñi xcolelob chaʼan miʼ majlelob ti guerra i miʼ sujtelob ti xcoltaya. I jiñi i contrajob cheʼʌch miʼ melob jaʼel. Tsaʼ cʼoti c ñaʼtan chaʼan mach yomic mi cʌcʼ c pijtaya tiʼ tojlel jiñi yumʌlob».

Qʼuele chuqui miʼ yʌl jiñi Biblia:

• «Jontol chuqui miʼ ñaʼtañob tiʼ pusicʼal cʼʌlʌ cheʼ chʼiton to» (Génesis 8:21).

• «Wen yujilob lot i pusicʼal wiñicob. Cabʌl i sajtemal. ¿Majqui miʼ luʼ cʌn?» (Jeremías 17:9).

• «Come chʼoyol tiʼ pusicʼal winic miʼ tilel jontol bʌ i ñaʼtʌbal, yicʼot tsʌnsa, yicʼot tsʼiʼlel, [...] yicʼot xujchʼ, yicʼot jopʼtʼan, yicʼot pʼajoñel» (Mateo 15:19).

Jiñi wiñicob xʼixicob (quixtañujob) maʼañic woliʼ mejlel i jisañob jiñi mach bʌ weñic pensar. Tiʼ sujm woli jach i ñumen asiyel, cheʼ bajcheʼ miʼ pʌs jiñi wocol tac tsaʼ bʌ la cʌlʌ ti yambʌ temaj (2 Timoteo 3:1-5). Anquese ti ili ora jiñi quixtañujob an cabʌl chuqui yujilob yicʼot cabʌl bajcheʼ miʼ mejlel lac taj jiñi la com bʌ lac ñaʼtan. Cheʼ jiñi, ¿chucoch maʼañic miʼ mejlel lac sujtesan ili Pañimil ti jumpʼejl ajñibʌl baqui an ñʌchʼtʌlel yicʼot baqui maʼañic chuqui bʌbʌqʼuen? ¿Woli ba lac mel mach bʌ añic ti lac wenta? ¿Woli ba lac ñop lac mel mach bʌ mejlic lac mel?

Laʼcu lac ñaʼtan chaʼan miʼ jisʌntel jiñi mach bʌ weñic i pensar jiñi wiñicob xʼixicob, pero ili pañimil (mulawil) maʼañic mi caj i tojʼan. ¿Chucoch? Come jiñi wiñicob xʼixicob pʼisbil jach chuqui miʼ mejlel i melob (chaʼleñob).

 Jiñi Biblia miʼ yʌl: «Maʼanic i ñaʼtʌbal winic chaʼan miʼ bajñel tojʼesan majlel [...] i bijlel» (Jeremías 10:23). Maʼañic tsaʼ mejliyonla chaʼan mi lac bajñel yuman lac bʌ. Cheʼ bajcheʼ maʼañic tsaʼ mejliyonla chaʼan mi lac chumtʌl tiʼ yebal jaʼ, cheʼ jaʼel maʼañic ti lac wenta mi lac bajñel yuman lac bʌ.

Ñaʼtancu iliyi: ¿Muʼ ba i mulan jiñi quixtañujob cheʼ bʌ miʼ subentelob bajcheʼ yom miʼ chumtʌlob? O ¿bajcheʼ yilal yom miʼ qʼuelob jiñi tsʼiʼlel, cheʼ bʌ miʼ yilol chocob i yalobil o i cʌntesʌntel i yalobilob? Ili jiñʌch jiñi cʼajtiya tac muʼ bʌ i yʌcʼ chaʼan miʼ tʼoxob i bʌ jiñi quixtañujob. Anquese wocol ti ñopol, pero muʼ bʌ i yʌl jiñi Biblia isujmʌch. Tiʼ sujm maʼañic lac ñaʼtʌbal yicʼot maʼañic ti lac wenta chaʼan mi lac bajñel yuman lac bʌ. Cheʼ jiñi, ¿majqui miʼ mejlel i coltañonla?

Cojach jiñi Dios, come jiñʌch tsaʼ bʌ i Meleyonla i maʼañic ñajʌyem i chaʼañonla, mach cheʼic bajcheʼ miʼ ñaʼtan yambʌlob. Jiñi wen tac bʌ ticʼojel muʼ bʌ lac taj ti Biblia miʼ pʌsbeñonla chaʼan mucʼʌch i wen qʼuelonla ti ñuc. Cheʼ mi lac wen chʼʌmben i sujm chuqui miʼ subeñonla ili utsʼatax bʌ libro, miʼ coltañonla lac ñaʼtan chaʼan pʼisbil jach chuqui miʼ mejlel lac mel yicʼot miʼ coltañonla lac chʼʌmben i sujm chucoch an cabʌl wocol cʼʌlʌl tiʼ tejchibal pañimil. Juntiquil filósofo chʼoyol bʌ ti Alemania tsiʼ yʌlʌ: «Jiñi yumʌlob yicʼot jiñi quixtañujob maʼañic woliʼ qʼuextañob i melbal come maʼañic chuqui cʌmbil i chaʼañob ti jiñi ujtem bʌ tilel».

Jesús, jiñi i Yalobil Dios tsiʼ yʌlʌ chaʼan «i ñaʼtʌbal Dios miʼ tsictiyel ti utsʼat ti pejtel i yalobilob», yom i yʌl, tiʼ melbal (Lucas 7:35). Laʼ laj qʼuel jumpʼejl ejemplo. Ti Salmo 146:3 miʼ yʌl: «Mach mi laʼ wʌcʼ laʼ pusicʼal yicʼot jini yumʌlob ti pañimil». Ili wem bʌ ticʼojel miʼ coltañonla chaʼan maʼañic mi lac ñop mach bʌ añic mi caj ti tsʼʌctiyel. Kenneth, chumul bʌ ti jumpʼejl tejclum am bʌ ti Norteamérica baqui an cabʌl xujchʼ miʼ yʌl: «Tiʼ pejtelel jiñi yumʌlob miʼ yʌlob chaʼan mi caj i tojʼesañob jiñi wocol, pero maʼañic miʼ tsʼʌctesañob. Ili miʼ pʌs chaʼan isujmʌch muʼ bʌ i yʌl jiñi Biblia».

Daniel, tsaʼix bʌ lac taja ti tʼan, tiʼ tsʼijbu: «Ti jujumpʼejl qʼuin miʼ cʼotel j qʼuel chaʼan mi juntiquilic wiñic miʼ mejlel ti sujtel ti wem bʌ yumʌl. Cheʼ bʌ an lac taqʼuin ti banco o muʼ bʌ la cʌqʼuentel cheʼ mi lac chaʼlen lac bʌ ti jubilar mach yomic i yʌl chaʼan utsʼat mi caj lac chumtʌl. Cʌmbil c chaʼan quixtañujob am bʌ i tajayob i chʼijiyemlel».

Jiñi Biblia mach cojic jach miʼ coltañonla chaʼan maʼañic mi lac ñop tʼan tac mach bʌ muqʼuic i tsʼʌctiyel, cheʼ jaʼel miʼ yʌqʼueñonla jumpʼejl pijtaya, cheʼ bajcheʼ mi caj lac bej qʼuel majlel.