Jiñi cʌntesʌntel loqʼuem bʌ ti Biblia miʼ mejlel i qʼuextʌben i melbal jiñi wiñicob xʼixicob (quixtañujob). Laʼ laj qʼuel bajcheʼ tsiʼ colta Ricardo yicʼot Andrés.

RICARDO: Cheʼ bʌ an jaxto 15 c jabilel, tsaʼ caji c piʼlen ti xʌmbal junmojt jontoloʼ bʌ. Come wen chʼitoñonto, jiñi tsijiʼ bʌ camigojob mach wocolic tsiʼ qʼuextayob c pensar. Com bʌ ti cʌlʌ jiñʌch miʼ cajñel lujumpʼejl jab ti cárcel. Tajol lecojʌch ti ubintel, pero yaʼ baqui chumulon jiñi muʼ bʌ i yochelob ti cárcel miʼ qʼuejlelob ti ñuc. Cheʼ com mij qʼuejlel ti cʌlʌ.

Cabʌl jax tsʼiʼlel tsaʼ c mele (chaʼle), tsaʼ j cʼʌñʌ droga tac yicʼot wen jontolon. Ti jumpʼejl bʌ acʼʌlel tsaʼ c taja lojon j contrajob i tsaʼ caji c jul lon c bʌ. Tsaʼ c ñaʼta chaʼan mi caj i tsʌnsañoñob, pero tsaʼ mejliyon ti putsʼel. Cheʼ jiñi, tsaʼ caji c wen ñaʼtan chaʼan jiñi j cuxtʌlel yicʼot chuqui com bʌ c taj. Tsaʼ cʌlʌ chaʼan mi caj j qʼuextan c bʌ, pero ¿bajcheʼ mi caj c mel? ¿Majqui miʼ mejlel i coltañon?

Lʌcʼʌl tiʼ pejtelel jiñi c familiajob añob cabʌl i wocol yicʼot mach tijicñayobic, pero i familia juntiquil quichan yʌñʌlob. Cujil chaʼan wem bʌ lac piʼʌlob yicʼot chaʼan miʼ chumtañob muʼ bʌ i yʌl jiñi Biblia. Jiñʌch tsaʼ bʌ i subeyoñob chaʼan i cʼabaʼ Dios, jiñʌch Jehová. Jin chaʼan cheʼ bʌ tsaʼ ujti jiñi julbʌl, tsaʼ c melbe oración Jehová baqui tsaʼ c pejca tiʼ cʼabaʼ i tsaʼ j cʼajtibe chaʼan miʼ coltañon. Tiʼ yijcʼʌlel tsaʼ cʼoti juntiquil i testigo Jehová yaʼ ti cotot i toj sajtel c pusicʼal. Tsaʼ caji c chʼʌm estudio loqʼuem bʌ ti Biblia.

Mach jalic tsaʼ ñumi, tsaʼ caji c ñusan tsʌts bʌ wocol. Jiñi camigojoʼ bʌ ti ñaxan tsaʼ caji i pejcañoñob ti teléfono chaʼan mic chaʼ majlel yicʼotob. Wocolʌch tsaʼ cubi pero tsaʼ c subeyob chaʼan maʼañic. Tsaʼix cʌlʌ chaʼan maʼañic mi caj j cʌy estudio, i tijicñayon cheʼ tsaʼ c mele bajcheʼ jiñi. Tsaʼ yoque qʼuextʌyi j cuxtʌlel, ili ora wen tijicñayon.

Cʼajal c chaʼan cheʼ bʌ com ajñel lujumpʼejl jab ti cárcel chaʼan mij qʼuejlel ti ñuc tiʼ tojlel junmojt jontoloʼ bʌ. Jin chaʼan, tsaʼ j cʼajtibe Dios chaʼan miʼ yʌqʼueñon lujumpʼejl jab chaʼan mic pʌsben jiñi quixtañujob bajcheʼ miʼ coltañonla jiñi Biblia cheʼ bajcheʼ tsiʼ coltayon joñon. Dios tsiʼ jacʼbeyon coración come añix 17 jab j cajel ti subtʼan. Pero tiʼ sujm, maʼañic baʼ ora tsaʼ ochiyon ti cárcel.

Jiñi camigojoʼ bʌ ti ñaxan añix cabʌl jab añob ti cárcel, i yambʌlob chʌmeñobix (sajtemobix). Mi cʌqʼueñob wocolix i yʌlʌ jiñi Testigojoʼ bʌ c familia come yʌñʌlob yicʼot miʼ chumtañob muʼ bʌ i yʌl jiñi Biblia. Mic ñumen qʼuelob ti ñuc i maʼañic ba ora cheʼ tsaʼ j qʼuele jiñi junmojt camigojoʼ bʌ ti ñaxan. Pero mic ñumen aqʼuen wocolix i yʌlʌ Dios come tsiʼ cʌntesayon bajcheʼ yom mic chumtʌl ti wen.

 ANDRÉS: Yaʼ baqui tsaʼ quila pañimil (chʼocʼayon) yicʼot tsaʼ coliyon wen an pʼumpʼuñiyel, cabʌl jax droga, tsʌnsa, xujchʼ yicʼot muʼ bʌ i melob tsʼiʼlel. Jiñi c tat miʼ wen jap lembal yicʼot miʼ wen mulan cocaína. Jiñi c tat yicʼot c ñaʼ miʼ wen yʌlʼeñob i bʌ yicʼot miʼ jatsʼob i bʌ.

Wen chutonto cheʼ bʌ tsaʼ caji c jap lembal yicʼot j cʼʌn droga. Ñumen añon jach ti calle i mic chaʼlen xujchʼ i mic chon jiñi muʼ bʌ c xujchʼin. Jiñi c tat tsiʼ ñopo i lʌcʼtesan i bʌ tic tojlel pero tsaʼ jach i cʌntesayon c chʼʌm tilel droga tac yicʼot yan tac bʌ choñoñel mach bʌ añic i juñilel chaʼan mic wiʼil chon ti c tejclum. Mach jalic tsaʼ c taja cabʌl taqʼuin. Jumpʼejl bʌ qʼuin tsaʼ cʼoti jiñi policíajob ti cotot. Tsiʼ chucuyoñob i tsiʼ yotsayoñob joʼpʼejl jab ti cárcel tiʼ caj colel c chaʼlen tsʌnsa.

Jumpʼejl bʌ sʌcʼan tsaʼ luʼ pʌjyiyob jiñi xcʌjchelob chaʼan miʼ majlel i ñʌchʼtañob jumpʼejl cʌntesʌntel muʼ bʌ caj i yʌcʼob jiñi i testigojob Jehová, i tsaʼʌch majliyon. Añʌch i sujmlel jiñi tsaʼ bʌ i yʌlʌyob, jin chaʼan tsaʼ c jacʼʌ jumpʼejl estudio. Jiñi Testigojob maʼañic tsiʼ mucuyob muʼ bʌ i yʌl jiñi Biblia, tsaʼʌch i pʌsbeyoñob chuqui miʼ yʌl i mandar Dios.

Tsaʼ caji j qʼuel chaʼan an majqui yom miʼ coltañon j qʼuextan c melbal, ñumento cheʼ bʌ jiñi yambʌ xcʌjchelob tsiʼ chʼʌcʌyoñob come maʼañic tsiʼ mulayob cheʼ bʌ tsaʼ caji c pejcan majlel jiñi Biblia. Tsaʼ j cʼajtibe Jehová chaʼan miʼ yʌqʼueñon c chʼejlel yicʼot c ñaʼtʌbal. Wocolix i yʌlʌ Jehová tsaʼ mejli j coltan c bʌ cheʼ bʌ tsaʼ c subeyob jiñi yambʌ xcʌjchelob chuqui woli (choncol) j cʌn.

Cheʼ bʌ tsaʼ loqʼuiyon ti carcél tsaʼ cajiyon ti bʌqʼuen, ñumen wen cheʼ yaʼicto tsaʼ bej cʌleyon. Cheʼ bʌ wolix (yʌquelix) c loqʼuel majlel, jiñi yambʌ xcʌjchelob tsaʼ caji i pʌsbeñoñob i cʼʌb. Anto tsaʼ bʌ i subeyoñob, «chaʼ cucux ti a wotot, xcʌntesa».

Mic bʌcʼñan c ñaʼtan bajcheʼ yilal tsaʼ ujtiyon cheʼ machic tsaʼ cʌqʼue chaʼan miʼ cʌntesañon Dios. Mi cʌqʼuen wocolix i yʌlʌ chaʼan miʼ cʼuxbiñon yicʼot chaʼan tsiʼ coltayon. a