Cheʼ bʌ jiñi alumnojob tsaʼ majliyob ti jumpʼejl viaje, an chʼitoñob tsaʼ bʌ tajbentiyob i mul chaʼan tsiʼ piʼleyob yambʌ chʼiton i piʼʌloʼ bʌ ti clase. Ili xcolelob woliyob (choncolob) ti qʼuejun ti jumpʼejl escuela tojbil bʌ am bʌ yaʼ ti Canadá. Cheʼ bʌ tsaʼ ujti ili wocol, Leonard Stern tiʼ tsʼijbu ti jiñi periódico Ottawa Citizen baqui tsiʼ yʌlʌ: «Anquese jiñi xcolelob wen añob i ñaʼtʌbal, wen chajpʌbilob yicʼot añob i taqʼuin, maʼañic miʼ coltan chaʼan maʼañic miʼ melob (chaʼleñob) mach bʌ weñic».

Ti jiñi tsaʼ bʌ i tsʼijbu, Stern tsiʼ chaʼ alʌ: «Jiñi ñumen ñuc bʌ i cʼʌjñibal jiñʌch chaʼan jiñi tatʌlob miʼ cʌntesañob i yalobil ti chuqui wem bʌ yicʼot mach bʌ weñic. Pero tiʼ sujm, muʼ bʌ i ñumen cʼojoʼtañob jiñʌch chaʼan jiñi i yalobilob miʼ locʼsañob wem bʌ calificación yicʼot chaʼan miʼ tajob i yeʼtel (troñel) baqui wen miʼ tojtʌlob».

Tiʼ sujm añʌch i cʼʌjñibal jiñi qʼuejun, pero maʼañic miʼ mejlel i coltan wiñicob xʼixicob (quixtañujob) chaʼan miʼ cʌyob jiñi i tsucul pensar. ¿Baqui bʌ cʌntesʌntel miʼ mejlel i coltañonla chaʼan mi lac mel chuqui wen?

Jiñi Biblia lajalʌch bajcheʼ jumpʼejl espejo. Cheʼ mi lac pejcan, miʼ cʼotel laj cʌn baqui bʌ laj cʼunlel yicʼot mach bʌ mejlic lac mel (Santiago 1:23-25). Cheʼ jaʼel, miʼ coltañonla laj qʼuextan laj cuxtʌlel yicʼot miʼ coltañonla lac taj wem bʌ lac melbal muʼ bʌ i yʌcʼ ñʌchʼtʌlel yicʼot chaʼan muchʼul mi laj cajñel, bajcheʼ jiñi i yutslel lac pusicʼal, jiñi pijt, i ticʼol lac bʌ yicʼot jiñi cʼuxbiya. Jiñi Biblia miʼ yʌl chaʼan jiñi cʼuxbiya miʼ yʌcʼonla ‹ti tem ajñel ti jumpʼejl lac pusicʼal› (Colosenses 3:14). ¿Chucoch ñuc i cʼʌjñibal jiñi cʼuxbiya? Laʼ laj qʼuel chuqui miʼ yʌl jiñi Biblia chaʼan ili melbalʌl.

• «Jini yujil bʌ cʼuxbiya jal miʼ cuchben i mul yañoʼ bʌ, wen uts i pusicʼal. Jini yujil bʌ cʼuxbiya mach tsʌytsʌyñayic i pusicʼal cheʼ miʼ qʼuel i wenlel i piʼʌlob. Maʼanic miʼ sub i bʌ ti ñuc. Maʼanic miʼ mel i bʌ ti chan tiʼ tojlel i piʼʌlob. Jini yujil bʌ cʼuxbiya mach lecojic i melbal. Maʼanic miʼ sajcan chuqui yom tiʼ bajñel pusicʼal. Maʼanic miʼ bʌcʼ michʼan, maʼanic miʼ lot tiʼ pusicʼal i contrajintel. Mach tijicñayic miʼ yubin cheʼ miʼ ticʼlʌntel jini toj bʌ. Tijicña miʼ yubin cheʼ utsʼat miʼ loqʼuel jini toj bʌ. Miʼ ñusan pejtel wocol, [...] miʼ ñusan ti utsʼat pejtelel chuqui tac miʼ yujtel. Mach jilic i cʼuxbiya ti pejtelel ora» (1 Corintios 13:4-8).

• «Jini muʼ bʌ i cʼuxbin i piʼʌlob maʼanic chuqui miʼ chaʼlen tiʼ contrajob» (Romanos 13:10).

• «Yom mi laʼ wen cʼuxbin laʼ bʌ. Jiñʌch ñumen ñuc bʌ, come cheʼ mi laj cʼuxbin lac piʼʌlob mi laj cuch cabʌl mulil» (1 Pedro 4:8).

Cheʼ bʌ an la quicʼot jiñi muʼ bʌ i cʼuxbiñoñobla, tijicña mi la cubin i maʼañic chuqui mi lac bʌcʼñan, come la cujil chaʼan yomob chuqui wen ti lac tojlel yicʼot maʼañic baʼ ora mi caj i ñop i ticʼlañoñobla.

Jiñi cʼuxbiya miʼ ñijcañonla chaʼan mi laj cʌy lac mel mach bʌ weñic yicʼot mi laj qʼuextan bajcheʼ chumulonla. Jumpʼejl ejemplo, juntiquil wiñic i cʼabaʼ George wen yom ajñel yicʼot i buts (mam) tsaʼ jaxto bʌ i yila pañimil (chʼocʼa). Pero an jumpʼejl wocol, George miʼ wen ñucʼ cʼujts, i jiñi i ñijʼal mach yomic chaʼan miʼ ñucʼ i cʼujts cheʼ bʌ yaʼan yicʼot jiñi  alʌl. ¿Chuqui tsiʼ mele George? Anquese añix 50 jab i cajel ti ñucʼ cʼujts, tsiʼ cʌyʌ chaʼan miʼ mejlel ti ajñel yicʼot i buts. ¡Cabʌl chuqui miʼ mejlel i mel jiñi cʼuxbiya!

Jiñi cʼuxbiya jiñʌch jumpʼejl melbalʌl muʼ bʌ i mejlel laj cʌn. Jiñi tatʌlob jiñʌch muʼ bʌ i ñumen mejlel i cʌntesañob i yalobil chaʼan miʼ pʌsob cʼuxbiya. Miʼ yʌqʼueñob i bʌl i ñʌcʼ, miʼ cʌntañob yicʼot miʼ coltañob cheʼ bʌ miʼ lojwelob o miʼ cʼamʼañob. Jiñi wem bʌ tatʌl miʼ chaʼleñob tʼan yicʼot i yalobilob i miʼ cʌntesañob. Cheʼ jaʼel, miʼ tojʼesañob i miʼ coltañob chaʼan miʼ cʌñob chuqui jiñi wem bʌ yicʼot mach bʌ weñic. Jiñi tatʌlob miʼ pʌsob wem bʌ ejemplo chaʼan miʼ lajiñob jiñi i yalobilob.

Chʼijiyem tic jax, pero an tatʌlob mach bʌ añic miʼ tsʼʌctesañob ili eʼtel. Pero ¿yom ba i yʌl chaʼan jiñi i yalobilob maʼañic miʼ mejlelob ti sujtel ti wem bʌ quixtañu? Mach cheʼiqui. Cabʌl añobix bʌ i jabilel tsaʼ bʌ coliyob ti jumpʼejl familia baqui wen an wocol, an i qʼuextayob i melbal i tsaʼix sujtiyob ti uts bʌ lac piʼʌlob yicʼot miʼ ñopbentelob i tʼan. Cheʼto jaʼel, jiñi cʌmbiloʼ bʌ bajcheʼ mach bʌ mejlobix ti qʼuextʌyel an i tojʼesayob i melbal, cheʼ bajcheʼ mi caj laj qʼuel ti yambʌ temaj.