Jiñi Naciones Unidas yom chaʼan jiñi wiñicob xʼixicob (quixtañujob) miʼ tem coltañob i bʌ, chaʼan miʼ qʼuelob ti ñuc yambʌlob yicʼot chaʼan miʼ cʌntañob jiñi planeta. ¿Chucoch? Come cheʼ bajcheʼ tiʼ tsʼijbu Maher Nasser ti jiñi revista Crónica ONU baqui tsiʼ yʌlʌ chaʼan jiñi «clima wen yʌñʌlix, i cheʼ jaʼel an wen chajpʌbiloʼ bʌ chaʼan miʼ ticʼlañob lac piʼʌlob. Mach junlajalix miʼ qʼuelob i bʌ, an wocol tac mach bʌ tojʼesʌbilic, cheʼ jaʼel an muʼ bʌ i chojquelob loqʼuel tiʼ lumal, an terrorismo, an cabʌl cʼamʌjel yicʼot yan tac bʌ wocol, tiʼ pejtelel iliyi baqui jach an».

An yambʌ muʼ bʌ i ñaʼtañob chaʼan cojach yom miʼ waʼchocontel jumpʼejl yumʌl muʼ bʌ i chʼʌm tiʼ wenta pejtelel pañimil (mulawil). Jumpʼejl ejemplo, jiñʌch jiñi filósofo, poeta yicʼot yujil bʌ chaʼan política, i cʼabaʼ Dante chʼoyol bʌ ti Italia (1265-1321) yicʼot jiñi yujil bʌ chaʼan física Albert Einstein (1879-1955). Dante tsiʼ yʌlʌ chaʼan maʼañic baʼ ora mi caj lac chumtʌl ti ñʌchʼʌl mi ili pañimil tʼoxbil tiʼ caj política. Tsiʼ taja ti tʼan jiñi tsaʼ bʌ i yʌlʌ Jesús, «mi tsiʼ tʼoxoyob i bʌ ti leto i winicob juntiquil yumʌl, miʼ jilel i yumʌntel» (Lucas 11:17).

Cheʼ maxto wen añic ora i ñumel cheʼ bʌ tsaʼ cʼʌjñi jiñi chaʼpʼejl bomba atómica ti jiñi Segunda Guerra Mundial, Albert Einstein tsiʼ choco majlel jumpʼejl carta yaʼ ti Asamblea General de las Naciones Unidas. Ti jiñi carta tsiʼ yʌlʌ: «Jiñi Naciones Unidas ti ora yom miʼ waʼchocoñob jumpʼejl i sujm bʌ yumʌl muʼ bʌ mejlel i yʌcʼ ñʌchʼtʌlel tiʼ pejtelel pañimil».

Pero ¿chuqui miʼ yʌqʼueñonla lac ñaʼtan chaʼan jiñi yumʌl maʼañic mi caj i chanʼesan i bʌ, chaʼan maʼañic mi caj i chaʼlen xujchʼ o chaʼan mucʼʌch caj i tsʼʌctesan i yeʼtel? ¿Mach ba añic i cʼunlel bajcheʼ yambʌlob? Ili cʼajtiya tac miʼ cʼajtesʌbeñonla tsaʼ bʌ i yʌlʌ jiñi yujil bʌ i chaʼan historia chʼoyol bʌ ti Gran Bretaña i cʼabaʼ Lord Acton. Tsiʼ yʌlʌ: «Jiñi añoʼ bʌ i yeʼtel, ti wiʼil miʼ jejmelob majlel i pensar, i mi ñumen ñucob i yeʼtel bajcheʼ yambʌyob, ñumento miʼ jejmelob i pensar».

Chaʼan miʼ yajñelob tiʼ sujm bʌ ñʌchʼtʌlel, jiñi quixtañujob yom temel miʼ yajñelob. Pero ¿bajcheʼ miʼ mejlel i tajob? ¿Mejl ba lac ñop chaʼan mucʼʌch i cajel? Jiñi Biblia miʼ yʌl chaʼan mucʼʌch i mejlel. ¿Bajcheʼ? Mach tiʼ tojlelic i yumʌntel juntiquil wiñic mach bʌ tojic, mi caj i mel jiñi yumʌl waʼchocobil bʌ i chaʼan Dios. Ili yumʌntel mi caj i pʌs chaʼan cojach Dios an tiʼ wenta miʼ yuman ili pañimil. Ti jiñi Biblia miʼ yʌl bajcheʼ «i yumʌntel Dios» (Lucas 4:43).

Jesús jiñʌch woli (choncol) i taj ti tʼan jiñi yumʌntel cheʼ bʌ tsiʼ yʌlʌ ti jiñi padrenuestro: «Laʼ tilic a yumʌntel. Laʼ mejlic chuqui a wom ti pañimil» (Mateo 6:9, 10). Jiñi i Yumʌntel Dios miʼ caj i chʼʌm tiʼ wenta chaʼan miʼ tsʼʌctiyel jiñi ñaʼtʌbil i chaʼan Dios ila ti pañimil, i mach cheʼic bajcheʼ yom jiñi wiñicob xʼixicob mucʼ jach bʌ i bajñel ñaʼtañob i wenlel.

Jiñi i Yumʌntel Dios cʌmbil jaʼel bajcheʼ «i yumʌntel jini am bʌ ti panchan» (Mateo 5:3). ¿Chucoch? Come jiñi yumʌntel yaʼʌch mi caj i yajlel ti panchan pero mucʼʌch mi caj i yuman jaʼel ili pañimil. Ñaʼtancu chuqui yom i yʌl iliyi. Ili yumʌntel maʼañic mi caj i cʼajtin taqʼuin chaʼan miʼ coltʌntel. ¡Mi caj i yʌqʼuen i tijicñʌyel pejtelel quixtañujob!

Ti jiñi i Yumʌntel Dios, Jesucristo jiñʌch yumʌl, juntiquil Rey waʼchocobil bʌ ti Dios. Jiñʌch tsaʼ bʌ aqʼuenti tiʼ wenta chaʼan miʼ chaʼlen yumʌntel. Jiñi Biblia miʼ yʌl chaʼan Jesús:

• «Muʼ bʌ i chaʼlen yumʌl. [...] Mach jilic i yumʌntel tiʼ pejtelel ora» (Isaías 9:6, 7).

•   «Jini Winic tsaʼ aqʼuenti i pʼʌtʌlel, yicʼot i ñuclel yicʼot i yumʌntel. Pejtel winicob yujiloʼ bʌ tʼan ti chajp ti chajp tsaʼ caji i yumañob» (Daniel 7:14).

• «I yumʌntel tac pañimil tsaʼix ochi tiʼ wenta lac Yum yicʼot tiʼ wenta Cristo. Mi caj i chaʼlen yumʌl ti pejtelel ora» (Apocalipsis 11:15).

Jiñi i Yumʌntel Dios mi caj i chʼʌm tiʼ wenta chaʼan miʼ tsʼʌctiyel chuqui ñaʼtʌbil i chaʼan Dios ila ti Lum i cheʼ bajcheʼ jiñi, miʼ tsʼʌctiyel muʼ bʌ i yʌl jiñi padrenuestro. Jiñi pañimil wen utsʼat mi caj i yajñel come jiñi quixtañujob yujilobix bajcheʼ mi caj i cʌntañob.

Pero jiñi ñumen ñuc bʌ i cʼʌjñibal jiñʌch chaʼan jiñi i Yumʌntel Dios mi caj i cʌntesan jiñi quixtañujob. Tiʼ pejtelelob mi caj i qʼuelob ti ñuc i mandar Dios. Maʼañix mi caj i contrajiñob i bʌ yicʼot maʼañix tʼox bʌ. Isaías 11:9 (TNM) miʼ yʌl: «Maʼañic chuqui mi caj i chʌn ticʼlañob yicʼot i jisañob [...], come jiñi lum mi caj i bujtʼel ti wiñicob xʼixicob i cʌñʌyoʼ bʌ Jehová cheʼ bajcheʼ jiñi mar miʼ bujtʼel ti jaʼ».

Tiʼ pejtelel jiñi muʼ bʌ caj i chumtʌlob ila ti pañimil, juntemel mi caj i yajñelob yicʼot ñʌchʼʌl mi caj i chumtʌlob, ili maʼañic mejlem i mel jiñi Naciones Unidas. Ti Salmo 37:11 miʼ yʌl: «Tijicña mi caj i yubiñob cheʼ ñʌchʼʌlob i pusicʼal». Mi caj i cʼotel i yorajlel cheʼ bʌ maʼañix mi caj laj cʼʌn jiñi tʼan xujchʼ, i bibʼesʌntel pañimil, pʼumpʼuñiyel yicʼot guerra. Pero ¿jalaqui miʼ cajel iliyi? ¿Jala mi caj i tech i yuman ili pañimil jiñi i Yumʌntel Dios? ¿Bajcheʼ mi caj i mel? ¿Bajcheʼ miʼ mejlel a taj a wenlel jaʼel ti ili Yumʌntel? Mi caj laj qʼuel ti yambʌ temaj.