Jiñi i Yumʌntel Dios, jiñi yumʌl añix bʌ ora i cajel lac pijtan, lʌcʼʌlix mi caj i chʼʌm tilel ñʌchʼtʌlel yicʼot chaʼan juntemel mi laj cajñel. Cheʼ bajcheʼ miʼ yʌl Salmo 72:7 miʼ cajel «ñʌchʼtʌlel» ila ti Pañimil. Pero ¿jala miʼ caj i tech i yuman ili Pañimil jiñi i Yumʌntel Dios? ¿Bajcheʼ mi caj i mel? Yicʼot ¿bajcheʼ miʼ mejlel a taj a wenlel jaʼel ti ili Yumʌntel?

Jiñi Biblia tsiʼ wʌn alʌ chuqui mi caj i ‹pʌstʌl› cheʼ bʌ lʌcʼʌlix mi caj i tilel jiñi i Yumʌntel Dios. Ti jiñi señal yaʼʌch ochem jiñi guerra tac tiʼ pejtelel pañimil (mulawil), wiʼñal, cʼamʌjel, yujquel lum yicʼot i ñumen pʼojlel jontolil (Mateo 24:3, 7, 12; Lucas 21:11; Apocalipsis 6:2-8).

Yambʌ profecía miʼ yʌl: «Ti cojix bʌ qʼuin tac tal i yorajlel bʌbʌqʼuen tac bʌ. Come jujuntiquil mi caj i bajñel cʼuxbin i bʌ. Mi caj i mulañob taqʼuin [...]. Mi caj i ñusʌbeñob i tʼan i tat i ñaʼ. Maʼanic miʼ subeñob Dios wocolix i yʌlʌ. Mach i cʌñʌyobic Dios. Mach yujilobic cʼuxbiya mi pʼuntaya. Xʼuʼyajob. Maʼanic miʼ ticʼob i pusicʼal. Wen jontolob. Miʼ tsʼaʼleñob chuqui utsʼat [...]. Cʼax ñuc miʼ pʌsob i bʌ. Miʼ mulañob pejtel chuqui tac yom i pusicʼal. Maʼanic miʼ cʼuxbiñob Dios» (2 Timoteo 3:1-4). Tiʼ sujm, cʼʌlʌl ti wajali añʌch lac piʼʌlob cheʼ bʌ i melbalob bajcheʼ ili, pero wʌle ñumen añix.

Ili profecía tac tsaʼ tejchi ti tsʼʌctiyel cheʼ ti 1914. Jiñi yujiloʼ bʌ chaʼan historia, política yicʼot xtsʼijbaya juñob tsaʼ cʼoti i laja ñaʼtañob chaʼan tsaʼ wen qʼuextʌyi ili pañimil ti jiñi jabil. Jumpʼejl ejemplo, jiñi yujil bʌ chaʼan historia Peter Munch chʼoyol bʌ ti Dinamarca, tiʼ tsʼijbu: «Cheʼ tsaʼ tejchi jiñi guerra ti 1914 yaʼʌch baqui tsaʼ caji ti qʼuextʌyel ili pañimil. Anquese lon wen bajcheʼ añonla, [...] pero ti wiʼil tsaʼ caji laj qʼuel cabʌl wocol, chuqui bʌbʌqʼuen jax bʌ yicʼot tsʼaʼleya mach bʌ añix miʼ yʌcʼ tijicñʌyel».

Pero añʌch wem bʌ tʼan jaʼel. Cheʼ bʌ miʼ ñumel jumpʼejl wocol, wersa miʼ tilel tijicñʌyel. Jiñi señal tsaʼix bʌ la cʌlʌ miʼ pʌs chaʼan jiñi Yumʌntel tsʼitaʼ jax yom chaʼan miʼ mel (chaʼlen) i yeʼtel ila ti Pañimil. Jesús tsiʼ yʌlʌ jaʼel jumpʼejl wem bʌ señal muʼ bʌ caj i pʌstʌl: «Jini wen tʼan chaʼan i yumʌntel Dios mi caj i sujbel tiʼ pejtelel pañimil chaʼan miʼ yubintel tiʼ pejtelel pañimil. Ti jim bʌ ora mi caj i tilel i jilibal» (Mateo 24:14).

Ili wen tʼan jiñʌch ñuc bʌ i cʼʌjñibal muʼ bʌ i subob ñumel jiñi i testigojob Jehová. Jin chaʼan, i cʼabaʼ jiñi i revista ñumen cʌmbil bʌ jiñʌch Lac Tsictesʌbentel chaʼan i Yumʌntel Jehová. Miʼ tsictesan chuqui mi caj i mel jiñi i Yumʌntel Dios ila ti Pañimil yicʼot tiʼ tojlel quixtañujob.

Chaʼan mi lac jacʼ ili cʼajtiya, laʼ laj qʼuel chʌnchajp ñuc bʌ i cʼʌjñibal muʼ bʌ caj ti ujtel:

1. Jiñi i Yumʌntel Dios maʼañic mi caj i cʼʌn miʼ juntiquilic yumʌl añoʼ bʌ wʌle.

2. Jiñi ñaxam bʌ miʼ yʌcʼob i bʌ ti política añoʼ bʌ tiʼ wenta pejtelel pañimil maʼañic mi caj i mulan i cʌyob i yumʌntel i mi caj i contrajiñob jiñi i Yumʌntel Dios (Salmo 2:2-9).

3. Jiñi i Yumʌntel Dios mi caj i jisan jiñi yumʌlob come mach yomobic i cʌyob i yumʌntel (Daniel 2:44; Apocalipsis 19:17-21). Jiñi Biblia miʼ yʌl chaʼan i cʼabaʼ ili cojix bʌ guerra jiñʌch Armagedón (Apocalipsis 16:14, 16).

4.   Jiñi yomoʼ bʌ i coltan i Yumʌntel Dios, cuxul mi caj i ñumelob ti Armagedón i tijicña mi caj i chumtʌlob ti jumpʼejl tsijiʼ bʌ pañimil. Jiñi Biblia miʼ yʌl chaʼan yaʼ ochemob yonlel «winicob xʼixicob» chʼoyoloʼ bʌ tiʼ pejtelel tejclum (Apocalipsis 7:9, 10, 13, 14).

Junchajp yom bʌ mi lac mel chaʼan mi laj coltʌben i Yumʌntel Dios jiñʌch cheʼ mi laj cʌñeʼ jiñi mero Dios. Cheʼ bʌ Jesús tsiʼ pejca Dios ti oración, tsiʼ yʌlʌ: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3).

Cheʼ bʌ mi laj cʌn jiñi Dios cabʌl bajcheʼ miʼ mejlel i coltañonla. Laʼ laj qʼuel chaʼchajp. Ñaxam bʌ, miʼ coltañonla lac taj pʼʌtʌl bʌ lac ñopoñel. Come jiñi lac ñopoñel añʌch baqui chucul, jin chaʼan mucʼʌch lac ñop chaʼan isujmʌch jiñi i Yumʌntel Dios yicʼot chaʼan lʌcʼʌlix mi caj i tilel (Hebreos 11:1). I chaʼpʼejlel, miʼ coltañonla chaʼan mi lac ñumen cʼuxbin Dios yicʼot lac piʼʌlob. Jiñi laj cʼuxbiya ti Dios miʼ ñijcañonla chaʼan mi lac jacʼben i tʼan tiʼ pejtelel lac pusicʼal. Jiñi laj cʼuxbiya tiʼ tojlel lac piʼʌlob miʼ ñijcañonla chaʼan mi lac jacʼ jiñi ticʼojel tsaʼ bʌ i yʌlʌ Jesús: «Melbenla chuqui utsʼat winicob xʼixicob cheʼ bajcheʼ laʼ wom miʼ melbeñetla» (Lucas 6:31).

Lajal bajcheʼ juntiquil wem bʌ tatʌl, jiñi tsaʼ bʌ i Meleyonla yom wem bʌ ti lac tojlel. Yom chaʼan mi lac taj jiñi laj «cuxtʌlel mach bʌ yujilic jilel» (1 Timoteo 6:16). Jiñi am bʌ lac chaʼan ili ora mach jiñic i sujm bʌ laj cuxtʌlel. Come an yonlel quixtañujob wen wocol jax bʌ miʼ ñusañob ti jujumpʼejl qʼuin. ¿Bajcheʼ yilal miʼ cajel jiñi i sujm bʌ laj cuxtʌlel? Laʼ laj qʼuel chuqui utsʼatax bʌ mi caj i chʼʌm tilel jiñi i Yumʌntel Dios tiʼ tojlel jiñi wiñicob xʼixicob.