Jiñʌch jumpʼejl melbalʌl (chaʼleya) muʼ bʌ i coltañonla chaʼan:

• Yom la cujil pijt chaʼan mi lac ñusan lac bʌ ti chuqui la com

• Mi lac ticʼ lac bʌ tiʼ melol chuqui jach

• Mi lac tsʼʌctesan jiñi eʼtel (troñel) mach bʌ añic mi lac mulan

• Mi lac ñaxan ñaʼtan yambʌlob

Jiñi xbiʼtalob yujiloʼ bʌ i bajñel ticʼol i bʌ maʼañic miʼ jacʼob i mel mach bʌ weñic anquese wen utsʼatax yilal. Pero jiñi mach bʌ yujilobic i bajñel ticʼol i bʌ:

• Wen jontolob

• Miʼ tajob cʌlʌx chʼijiyemlel

• Miʼ ñucʼob cʼujts, miʼ cʼʌñob droga yicʼot miʼ japob lembal

• Miʼ tech i cʼuxob chuqui jach

Jumpʼejl estudio tsaʼ bʌ mejli, tsiʼ yʌlʌ chaʼan jiñi xbiʼtalob yujiloʼ bʌ i bajñel ticʼol i bʌ maʼañic miʼ wen tajob wocol tiʼ caj taqʼuin, tiʼ tojlel yumʌlob i maʼañic miʼ wen cʼamʼañob cheʼ tsaʼix i tajayob i colel. Ili estudio tsiʼ yʌqʼue i ñaʼtan jiñi xmaestra Angela Duckworth, am bʌ ti jiñi Universidad ti Pensilvania «chaʼan ñumen wen cheʼ la cujil i ticʼol lac bʌ».

Cheʼ maʼ wʌl maʼañic, mach a chaʼ sutqʼuin a tʼan

PRINCIPIO AM BɅ TI BIBLIA: «Mi tsaʼ wʌlʌ chaʼan an chuqui mi caj a mel, yom maʼ mel, mi tsaʼ wʌlʌ chaʼan maʼañic chuqui mi caj a mel, yom maʼ tsʼʌctesan» (Mateo 5:37, TNM).

An qʼuiñil, jiñi xbiʼtalob miʼ wen chaʼleñob uqʼuel yicʼot michʼ tiʼ caj chaʼan maʼañic miʼ yʌqʼuentelob chuqui yomob, i miʼ melob baqui an cabʌl lac piʼʌlob. Mi jiñi tatʌlob miʼ yʌqʼueñob ti ora chuqui miʼ cʼajtin i yalobil, mi caj i ñʌmʼañob i cheʼ mi caj i melob tiʼ pejtelel ora.

Mi jiñi tatʌl miʼ yʌl chaʼan maʼañic mi caj i yʌqʼuen i miʼ tsʼʌctesan i tʼan, jiñi xbiʼtal mi caj i chʼʌmben i sujm chaʼan mach tiʼ pejtelelic ora mi caj i yʌqʼuentel chuqui yom. Jiñi doctor David Walsh tiʼ tsʼijbu: «Jiñi yujiloʼ bʌ i bajñel ticʼol i bʌ miʼ wen tajob i tijicñʌyel. Pero mi tsaʼ lac ñʌmtesa lac luʼ aqʼueñob chuqui yomob la calobilob, mach utsʼatic chuqui mi lac mel tiʼ tojlelob». *

 Cheʼ maʼ suben a walobil chaʼan maʼañic, mi caj i coltan i ticʼ i bʌ cheʼ miʼ subentel jiñi droga, jiñi piʼleya cheʼ bʌ maxto ñujpuñemic yicʼot jiñi melbalʌl tac muʼ bʌ i mejlel i ticʼlan.

Subeñob chaʼan luʼ añʌch i tojol chuqui mi lac mel

PRINCIPIO AM BɅ TI BIBLIA: «Pejtelel chuqui jach miʼ pʌcʼ winic mi caj i cʼaj» (Gálatas 6:7).

Yom miʼ cʌn jiñi a walobil chaʼan añʌch i wocolel cheʼ mach yujilic i ticʼol i bʌ. Jumpʼejl ejemplo, mi ora miʼ michʼan cheʼ bʌ an chuqui maʼañic miʼ mulan, mach cabʌlic i yamigo mi caj i taj. Pero mi yujil i ñʌchʼtʌntel cheʼ bʌ an majqui woli (choncol) ti tʼan, jiñi yambʌlob mi caj i mulan ajñel yicʼotob. Coltan i ñaʼtan jiñi a walobil chaʼan ñumen tijicña mi caj i yajñel mi yujil i bajñel ticʼol i bʌ.

Subeñob chuqui jiñi ñumen ñuc bʌ i cʼʌjñibal

PRINCIPIO AM BɅ TI BIBLIA: Yajcanla «chuqui ñumen wen» (Filipenses 1:10).

Cheʼ la cujil i bajñel ticʼol lac bʌ mach yomic jach i yʌl chaʼan maʼañic mi lac mel mach bʌ weñic, yom i yʌl jaʼel chaʼan mi lac tsʼʌctesan jiñi am bʌ ti lac wenta mi lac mel, anquese maʼañic mi lac wen mulan. Jiñi a walobil yom miʼ cʌn i yʌcʼ ti ñaxan jiñi ñumen ñuc bʌ i cʼʌjñibal. Jumpʼejl ejemplo, yom miʼ ñaxan mel i tarea chaʼan ti wiʼil miʼ majlel ti alas.

Acʼʌ wem bʌ ejemplo

PRINCIPIO AM BɅ TI BIBLIA: «Tsac pʌsbeyetla chuqui wen chaʼan cheʼʌch yom mi laʼ mel jatetla jaʼel cheʼ bajcheʼ tsac melbeyetla» (Juan 13:15).

Jiñi xbiʼtalob miʼ qʼuelob chuqui miʼ melob i tat cheʼ bʌ añob ti wocol. Jin chaʼan, pʌsben jiñi a walobil chaʼan añʌch i wenlel cheʼ la cujil i bajñel ticʼol lac bʌ. Cʼajtiben a bʌ: ¿Chuqui mic mel cheʼ bʌ jiñi calobil miʼ mel mach bʌ weñic? ¿Ti ora ba mic michʼan o mic ticʼ c bʌ?