Jiñʌch jumpʼejl melbalʌl (chaʼleya) muʼ bʌ i coltañonla lac lʌtʼ wocol o chaʼan maʼañic mi la cubin lac chʼijiyemlel cheʼ bʌ mach weñic miʼ loqʼuel chuqui mi lac mel. Ili melbalʌl mi lac taj cheʼ bʌ an chuqui mi lac ñusan tilel. Lajal bajcheʼ juntiquil alʌl miʼ yajlel tac cheʼ bʌ miʼ cʌn xʌmbal, cheʼ jaʼel, jiñi xbiʼtalob mi caj i ñusañob wocol cheʼ miʼ tajob majlel i colel.

An xbiʼtalob muʼ bʌ i yubiñob i chʼijiyemlel cheʼ bʌ miʼ ñusañob wocol, cheʼ miʼ yʌqʼuentelob ticʼojel o cheʼ bʌ mach weñic miʼ loqʼuel chuqui miʼ ñaʼtañob i mel. I an yambʌlob mach bʌ añix miʼ chʌn chaʼleñob wersa. Pero an chuqui yom bʌ miʼ ñaʼtañob:

• Mach tiʼ pejtelel ora mi caj i loqʼuel ti wen chuqui mi lac mel (Santiago 3:2).

• Ti lac pejtelel miʼ mejlel lac ñusan wocol tac (Eclesiastés 9:11, 12).

• Yom mi lac tijqʼuel chaʼan mi lac tojʼesan lac bʌ (Proverbios 9:9).

Cheʼ bʌ jiñi a walobil miʼ cʌn i lʌtʼ wocol mi caj i coltan i cuch chuqui jach miʼ tilel tiʼ tojlel.

Cheʼ miʼ mel mach bʌ weñic

PRINCIPIO AM BɅ TI BIBLIA: «Anquese mi wucyajl miʼ yajlel jini toj bʌ mux i chaʼ chʼojyel» (Proverbios 24:16).

Cʌntesan chuqui yom miʼ mel cheʼ bʌ an jumpʼejl wocol. Jumpʼejl ejemplo, ¿chuqui miʼ mejlel i mel cheʼ maʼañic miʼ ñusan jiñi examen? ¿Muʼ ba caj i yʌl chaʼan maʼañic chuqui wen miʼ loqʼuel i chaʼan?

Coltan i qʼuel chuqui miʼ mejlel i mel chaʼan mach cheʼix miʼ yujtel bajcheʼ ti ñaxan. Cheʼ bajcheʼ ili mi caj i tojʼesan i wocol i miʼ yubin i tijicñʌyel.

Mach a tojʼesʌben i wocol. Cʌntesan chaʼan jiñʌch miʼ tojʼesan. Miʼ mejlel a cʼajtiben: «¿Chuqui miʼ mejlel a mel chaʼan maʼ ñumen chʼʌmben i sujm jiñi cʌntesʌntel ti escuela?».

Cheʼ miʼ yujtel tsʌts bʌ wocol

PRINCIPIO AM BɅ TI BIBLIA: «Mach laʼ wujilic chuqui miʼ caj ti ujtel ijcʼʌl» (Santiago 4:14).

Mach tsiquilic miʼ tajonla wocol. Jiñi taqʼuin yicʼot laj cʼocʼlel miʼ mejlel lac sʌt ti bajcheʼ jach ora. Jiñi  Biblia miʼ yʌl: «Mach jinic wen yujil bʌ ajñel muʼ bʌ i cʼotel ñaxan. Mach jinic wen pʼʌtʌl bʌ muʼ bʌ i mʌjlel i chaʼan [...]. Maʼanic majqui yujil baqui ora mi caj i chujquel ti wocol» (Eclesiastés 9:11, 12).

Weñʌch cheʼ a wom a cʌntan a walobil chaʼan maʼañic chuqui miʼ chaʼlen. Pero mach mejlic a cʌntan tiʼ pejtelel jiñi wocol.

Tiʼ sujm, jiñi a walobil maxto añic i jabilel chaʼan miʼ taj wocol tiʼ caj taqʼuin o miʼ sʌt i troñel, pero tajol miʼ ñusan yan tac bʌ wocol, cheʼ bʌ miʼ cʌy juntiquil i yamigo o miʼ chʌmel (sajtel) juntiquil ti a familia. *

Cheʼ miʼ subentel chaʼan miʼ tojʼesan i melbal

PRINCIPIO AM BɅ TI BIBLIA: «Ñichʼtan wen bʌ tʼan [...]. Cheʼ jini mux a taj cabʌl a pusicʼal» (Proverbios 19:20).

Cheʼ miʼ subentel a walobil chaʼan yom miʼ tojʼesan i melbal chaʼañʌch i wenlel i mach i ticʼlʌntelic.

Cheʼ maʼ cʌntesan i miʼ jacʼ jiñi ticʼojel mi caj i lajal coltañetla. Juntiquil tatʌl i cʼabaʼ John, tsiʼ yʌlʌ: «Cheʼ maʼ tojʼesʌben i wocol tiʼ pejtelel ora, maʼañic mi caj i cʌn i bajñel tojʼesan. I cheʼ bʌ miʼ taj wocol jatet mi caj a coltan tiʼ pejtelel ora. Iliyi mi caj i laja aqʼueñetla laʼ chʼijiyemlel».

¿Bajcheʼ miʼ mejlel a coltan a walobil chaʼan wen jach miʼ chʼʌm jiñi ticʼojel? Cheʼ bʌ miʼ tijqʼuel ti escuela o baqui jach, mach a suben chaʼan mach i wentʌlel miʼ yʌqʼuentel jiñi ticʼojel. Melben ili cʼajtiya tac:

• «¿Chucoch tsaʼ aqʼuentiyet jiñi ticʼojel?».

• «¿Bajcheʼ miʼ mejlel a tojʼesan a melbal?».

• «¿Chuqui mi caj a mel mi tsaʼ chaʼ ujtiyet bajcheʼ jiñi?».

Cheʼ miʼ subentel a walobil chaʼan miʼ tojʼesan i melbal mi caj i coltan tiʼ cuxtʌlel.