Jiñi muʼ bʌ i pʌs i pecʼlel miʼ qʼuel ti ñuc yambʌlob. Maʼañic miʼ chanʼesan i bʌ i maʼañic miʼ pijtan chaʼan miʼ qʼuejlel ti ñuc. Jiñi am bʌ i pecʼlel miʼ mulan i coltan yambʌlob yicʼot miʼ cʌmben wem bʌ i melbal (chaʼleya).

An muʼ bʌ i ñaʼtañob chaʼan jiñi muʼ bʌ i pʌs i pecʼlel lajal bajcheʼ woli (choncol) i pʌs i cʼunlel. Tiʼ sujm jiñi lac pecʼlel miʼ coltañonla laj cʌn lac sajtemal yicʼot chaʼan pʼisbil jach chuqui miʼ mejlel lac mel.

• Mi caj i coltan i ñumen taj i yamigojob. Jiñi libro La epidemia del narcisismo miʼ yʌl chaʼan «jiñi añoʼ bʌ i pecʼlel ti ora miʼ tajob i yamigo i mach wocolic miʼ yajñel yicʼot yambʌlob».

• Mi caj i coltan a walobil chaʼan wen miʼ yajñel. Cheʼ miʼ tech i pʌs i pecʼlel jiñi a walobil ili ora, mach wocolic mi caj i taj i yeʼtel (troñel). Jiñi doctor Leonard Sax tiʼ tsʼijbu: «Jiñi xcolel i bajñel jach bʌ miʼ ñaʼtan i bʌ, mach utsʼatic mi caj i qʼuejlel cheʼ bʌ miʼ cʼajtin i yeʼtel. Pero jiñi muʼ bʌ i pʌs i pecʼlel cheʼ bʌ an chuqui miʼ subentel chaʼan jiñi eʼtel woli bʌ (yʌquel bʌ) i cʼajtin, tajol mucʼʌch i mejlel ti aqʼuentel». *

Subeñob chaʼan maʼañic miʼ bajñel ñaʼtañob i bʌ

PRINCIPIO AM BɅ TI BIBLIA: «Mi an majch miʼ lolon qʼuel i bʌ ti ñuc pero machʼan i ñuclel mucʼ jach i bajñel lotin i bʌ» (Gálatas 6:3, Jini wen bʌ tʼan).

• Mach a suben tʼan tac maʼan bʌ mi caj i coltan. «Miʼ mejlel a taj tiʼ pejtelel chuqui a wom». Tajol wen utsʼatax yubil ili tʼan, pero an qʼuiñil maʼañic miʼ tsʼʌctiyel. Cheʼ bʌ jiñi a walobilob miʼ chaʼleñob wersa i sʌclan jiñi muʼ bʌ i mejlel i tajob, tajol wen mi caj i yajñelob.

• Subeñob utsʼat bʌ tʼan cheʼ miʼ melob chuqui wem bʌ. Cheʼ maʼ suben a walobil chaʼan jiñʌch ñumen ñuc bʌ maʼañic mi caj i coltan i pʌs i pecʼlel. Suben chuqui wem bʌ miʼ mel.

• Tiqʼuiyob chaʼan pʼisbil jach miʼ cʼʌñob jiñi Internet. An i tajol jiñi lac piʼʌlob miʼ cʼʌñob Internet chaʼan miʼ yʌcʼob i bʌ ti qʼuejlel ti ñuc, miʼ subob chuqui yujiloʼ bʌ melol o chuqui tajbilob i chaʼan, pero ili maʼañic miʼ pʌs pecʼlel.

• Suben jiñi a walobilob chaʼan yom miʼ cʼajtiñob i ñusʌntel i mul. Cheʼ bʌ miʼ melob mach bʌ weñic, coltañob i cʌn chaʼan añobʌch i mul.

 Coltañob i qʼuel ti ñuc:

PRINCIPIO AM BɅ TI BIBLIA: «Subenla Dios wocolix i yʌlʌ» (Colosenses 3:15).

• Jiñi melbil tac bʌ. Jiñi xbiʼtalob yom miʼ qʼuelob ti ñuc jiñi melbil tac bʌ yicʼot chaʼan i cʼʌjñibalʌch ti laj cuxtʌlel. Jumpʼejl ejemplo, mi maʼañic icʼ, jaʼ yicʼot chuqui mi laj cʼux mi lac chʌmel (sajtel). Cheʼ miʼ cʼotel i cʌñob a walobil iliyi, mi caj a coltañob chaʼan miʼ qʼuelob ti ñuc jiñi melbil tac bʌ.

• Jiñi wen tac bʌ melbalʌl. Cʌntesan jiñi a walobilob chaʼan miʼ qʼuelob ti ñuc yambʌlob yicʼot miʼ lajibeñob wem bʌ i melbal.

• Cʌntesañob chaʼan miʼ yʌqʼuen wocolix i yʌlʌ yambʌlob. Suben chaʼan yom loqʼuem tiʼ pusicʼal cheʼ miʼ yʌqʼuen wocolix i yʌlʌ yambʌlob. Cheʼ miʼ melob bajcheʼ iliyi miʼ coltañob chaʼan miʼ pʌsob i pecʼlel.

Subeñob chaʼan ñuc i cʼʌjñibal mi laj coltan yambʌlob.

PRINCIPIO AM BɅ TI BIBLIA: «Yom pecʼ mi laʼ mel laʼ bʌ. Yom ñumen ñuc mi laʼ qʼuel laʼ piʼʌlob cheʼ bajcheʼ mi laʼ bajñel qʼuel laʼ bʌ. Mach jinic jach laʼ bajñel wenlel yom mi laʼ ñaʼtan pero i wenlel laʼ piʼʌlob jaʼel» (Filipenses 2:3, 4).

• Subeñob a walobilob chaʼan miʼ chaʼleñob coltaya ti otot. Cheʼ maʼañic maʼ yoque aqʼuen i yeʼtel a walobil, lajal bajcheʼ woli (yʌquel) a suben: «Jatet wen ñuc a cʼʌjñibal, ili eʼtel mach a chaʼañic». Ñaxan yom miʼ chaʼlen coltaya ti otot i ti wiʼil miʼ chaʼlen alas. Pʌsben chaʼan añʌch i wenlel cheʼ miʼ chaʼlen coltaya yicʼot chaʼan mi caj i qʼuejlel ti ñuc i yeʼtel.

• Pʌsbeñob chaʼan wen utsʼatax cheʼ mi laj coltan yambʌlob. Cheʼ bʌ jiñi a walobilob miʼ coltan yambʌlob mi caj i tajob majlel i colel tiʼ ñaʼtʌbal. Jin chaʼan, comol qʼuelela majqui yom coltʌntel i bajcheʼ miʼ mejlel i coltan. Suben utsʼat bʌ tʼan cheʼ bʌ miʼ coltan yambʌlob.