Jiñi weñoʼ bʌ i melbal (chaʼleya) i cʌñʌyob chuqui jiñi wem bʌ yicʼot mach bʌ weñic. Maʼañic miʼ qʼuextañob i melbal tiʼ caj jach chuqui miʼ ñusañob. Come yaʼʌch chuculob cheʼ bajcheʼ cʌntesʌbilob chaʼan jiñi wem bʌ yicʼot mach bʌ weñic.

Ti ili ora, jiñi xbiʼtalob cabʌl baqui miʼ yubiñob ti alol chaʼan jiñi wem bʌ yicʼot mach bʌ weñic, pero mach tojic bajcheʼ miʼ subentelob. Miʼ yubiñob tiʼ piʼʌlob ti escuela, ti cʼay tac, ti película o ti programa tac ti televisión. Pero ili miʼ mejlel i qʼuextʌbeñob i pensar jiñi xcolelob.

Ili jumpʼejlʌch ñuc bʌ wocol tiʼ tojlel jiñi xcolelob. Jiñi libro Beyond the Big Talk (Cheʼ miʼ chaʼlen «tʼan jiñi tatʌl yicʼot i yalobil»), miʼ yʌl: Jiñi xcolelob «yom chajpʌbilobix chaʼan maʼañic miʼ jacʼob i mel mach bʌ weñic tilem bʌ tiʼ yambʌ xcolelob o muʼ bʌ i qʼuelob ti televisión. Yom miʼ cʌn i yajcañob i mel jiñi wem bʌ anquese jiñi i yamigojob miʼ melob mach bʌ weñic». Ili miʼ yʌcʼ ti ñaʼtʌntel chaʼan yom miʼ cʌntesʌntelob cheʼ bʌ xbiʼtalobto.

Subeñob chuqui jiñi wem bʌ yicʼot mach bʌ weñic

PRINCIPIO AM BɅ TI BIBLIA: «Jiñi tsaʼix bʌ i tajayob i colel, cheʼ jiñi muqʼuix i cʌn jiñi wen bʌ yicʼot chuqui jiñi mach [bʌ] weñic» (Hebreos 5:14, Jiñi tsijiʼ bʌ wen tʼañ chaʼañ estudio).

• Cʼʌñʌ tʼan tac muʼ bʌ i yʌcʼ ti cʌjñel jiñi wem bʌ yicʼot mach bʌ weñic. Cʼʌñʌ muʼ bʌ i yujtel ti jujumpʼejl qʼuin chaʼan maʼ pʌsben jiñi wem bʌ melbalʌl yicʼot mach bʌ weñic. Laʼ lac ñaʼtan, «mi an majqui miʼ chaʼlen lot miʼ mejlel a suben a walobil chaʼan mach weñic jiñi lot. I cheʼ bʌ jiñi a walobil miʼ yʌl i sujmlel miʼ mejlel a suben chaʼan weñʌch chuqui tsiʼ mele». Mi an maʼañic bʌ miʼ coltan jiñi añix bʌ i jabilel suben a walobil: «Ili mach weñic come maʼañic tsiʼ pʌsʌ i yutslel». Pero mi jiñi a walobil miʼ coltan añix bʌ i jabilel suben chaʼan weñʌch tsaʼ bʌ i mele. Jiñi a walobil mi caj i cʌn majlel jiñi wem bʌ melbalʌl yicʼot mach bʌ weñic.

• Suben chucoch an wem bʌ melbalʌl yicʼot mach bʌ weñic. Coltan jiñi a walobil chaʼan miʼ cʌntesan majlel i conciencia. Melben cʼajtiya tac: «¿Chucoch mach weñic jiñi lot?», «¿Chucoch miʼ yʌqʼueñonla lac sʌt la camigojob?» o «¿Chucoch mach weñic jiñi xujchʼ?».

• Suben chuqui ti wenlel mi lac taj cheʼ wen lac melbal. Miʼ mejlel a suben: «Cheʼ maʼañic maʼ chaʼlen lot miʼ ñopbeñetob a tʼan» o «Cheʼ maʼ pʌs a wutslel mi caj i mulañob ajñel yicʼotet».

 Qʼuele mi woliʼ pʌsob wem bʌ i melbal jiñi a familia

PRINCIPIO AM BɅ TI BIBLIA: «Ñaʼtanla bajcheʼ añetla» (2 Corintios 13:5).

• Cheʼ miʼ pʌs wem bʌ i melbal a familia, mi caj i mejlel a wʌl:

  • «Maʼañic mi lac chaʼlen lot».

  • «Maʼañic mi lac chaʼlen jatsʼ yicʼot maʼañic mi lac chaʼlen tsʌts bʌ tʼan».

  • «Maʼañic mi lac mulan chaʼan mi lac low ti lac tʼan yambʌlob».

Cheʼ bajcheʼ ili, jiñi a walobil mi caj i qʼuel chaʼan mach jumpʼejl jach ticʼojel yom bʌ miʼ jacʼ, jiñʌch muʼ bʌ i yʌcʼ ti cʌjñel laʼ familia.

• Cʼʌñʌ muʼ bʌ yujtel ti jujumpʼejl qʼuin chaʼan maʼ suben a walobilob chaʼan bajcheʼ yilal i melbal laʼ familia. Miʼ mejlel a cʼʌn bajcheʼ yilal i melbal jiñi yambʌ xcolelob yicʼot chuqui muʼ bʌ i yʌjlel ti televisión. Cʼajtiben: «¿Chuqui tsaʼ mele cheʼ jatetic?» o «¿Chuqui tsiʼ mele cheʼ jiñic lac familia?».

Coltañob i mel chuqui wem bʌ

PRINCIPIO AM BɅ TI BIBLIA: «Ajñenla ti utsʼat [...] ti laʼ pusicʼal [o conciencia]» (1 Pedro 3:16).

• Tijicñesʌben i pusicʼal cheʼ bʌ miʼ mel chuqui wen. Cheʼ bʌ jiñi a walobil miʼ mel chuqui wem bʌ tijicñesʌben i pusicʼal yicʼot tsictesʌben chucoch weñʌch tsaʼ bʌ i mele. Miʼ mejlel a suben: «Mi cubin c tijicñʌyel come tsaʼ wʌlʌ i sujmlel». Mi jiñi a walobil miʼ subeñet chuqui mach bʌ weñic tsiʼ mele, ñaxan suben chaʼan weñʌch cheʼ maʼañic tsiʼ mucu i cheʼ jiñi aqʼuen jiñi ticʼojel.

• Tiqʼui cheʼ bʌ mach weñic chuqui miʼ mel. Coltan jiñi a walobil chaʼan miʼ cʌn chuqui mach bʌ weñic tsiʼ mele. Jiñi xcolelob yom miʼ ñaʼtañob chuqui mach bʌ weñic tsiʼ meleyob, i chucoch mach weñic miʼ qʼuel laʼ familia. An tatʌlob mach bʌ yomic i yʌqʼueñob i chʼijiyemlel i yalobil pero mi mucʼʌch i subeñob, mi caj i coltañob i cʌntesan i conciencia i miʼ cʌñob chuqui jiñi wem bʌ yicʼot mach bʌ weñic.