Ti lac familia yicʼot ti la camigojob
An cabʌl lac piʼʌlob wocol bʌ miʼ yubiñob chaʼan temel miʼ yajñelob yicʼot yambʌlob. Laʼ laj qʼuel principio tac am bʌ ti Biblia muʼ bʌ i coltañonla chaʼan wen mi la cajñel la quicʼot yambʌlob.
MACH A BAJÑEL ÑAʼTAN A BɅ
PRINCIPIO AM BɅ TI BIBLIA: «Mach jinic jach laʼ bajñel wenlel yom mi laʼ ñaʼtan pero i wenlel laʼ piʼʌlob jaʼel» (Filipenses 2:4).
¿CHUQUI YOM I YɅL ILI? Chaʼan wen mi la cajñel la quicʼot yambʌlob yom laj coltañob i mach cojach yom mi lac pijtan chaʼan mi laj coltʌntel. Cheʼ cojach mi lac bajñel ñaʼtan lac bʌ miʼ mejlel i yʌcʼ ti wocol bajcheʼ an la quicʼot yambʌlob. Jumpʼejl ejemplo, mi ti jumpʼejl ñujpuñel juntiquil jach miʼ bajñel ñaʼtan i bʌ tajol miʼ mejlel ti yajlel ti tsʼiʼlel. Cheʼ jaʼel, jiñi muʼ bʌ i cʌlʌx qʼuel i bʌ ti ñuc chaʼan chuqui yujil melol o chaʼan chuqui an i chaʼan miʼ mejlel i sʌt i yamigojob. Cheʼ bajcheʼ tiʼ tsictesa jiñi libro El camino del carácter, jiñi muʼ bʌ i bajñel ñaʼtan i bʌ miʼ yajlel ti wocol.
¿CHUQUI YOM MAʼ MEL?
-
Coltan yambʌlob. Juntiquil wem bʌ la camigo mi lac ñopben chuqui miʼ yʌl i yaʼan cheʼ bʌ la com coltʌntel. Cheʼ bajcheʼ miʼ yʌl jiñi estudio tac, jiñi muʼ bʌ i coltan yambʌlob maʼañic miʼ wen tajob cʌlʌx chʼijiyemlel yicʼot miʼ chʼʌmob i bʌ ti ñuc.
-
Chʼʌmben i sujm bajcheʼ yubil miʼ yubin yambʌlob. Ili yom i yʌl chaʼan mi lac chumtʌben i cʼuxel jiñi wocol woli (choncol) bʌ i ñusan juntiquil lac piʼʌl. Cheʼ mucʼʌch a chʼʌmben i sujm bajcheʼ yubil miʼ yubin yambʌlob maʼañic mi caj a wajleñob, maʼañic mi caj a cʼʌn tʼan tac muʼ bʌ i lowob yicʼot maʼañic mi caj a wʌqʼueñob i yubin i chʼijiyemlel.
Cheʼ jaʼel, mi caj i coltañet chaʼan maʼ qʼuelob ti ñuc. Jin chaʼan, ili melbalʌl (chaʼlibal) mi caj i coltañet chaʼan maʼañic maʼ tsʼaʼlen yambʌlob i chaʼan maʼ taj a wamigojob yʌñʌloʼ bʌ i cultura yicʼot chuqui ñusʌbil bʌ i chaʼañob.
-
Aqʼuen i yorajlel chaʼan maʼ wajñel a wicʼot yambʌlob. Junchajp muʼ bʌ i coltañonla lac ñumen cʌn yambʌlob jiñʌch cheʼ mi lac tem ajñel la quicʼotob. Chaʼan mi lac taj wem bʌ la camigojob yomʌch mi lac chaʼlen tʼan la quicʼotob. Jin chaʼan, ñʌchʼtan chuqui miʼ subeñet i qʼuele ti ñuc cheʼ miʼ yʌl i wocol tac. Jumpʼejl estudio tsaʼ jaxto bʌ mejli tsiʼ yʌlʌ chaʼan «jiñi lac piʼʌlob muʼ bʌ i chaʼleñob tʼan yicʼot yambʌlob miʼ wen ubiñob i tijicñʌyel».
SɅCLAN WEM BɅ A WAMIGOJOB
PRINCIPIO AM BɅ TI BIBLIA: «Jini jontoloʼ bʌ lac piʼʌlob miʼ bibʼesañob lac pusicʼal» (1 Corintios 15:33).
¿CHUQUI YOM I YɅL ILI? Jiñi muʼ bʌ lac yajcañob ti la camigo miʼ mejlel i coltañoñobla chaʼan mi lac mel chuqui wem bʌ o mach bʌ weñic. Cheʼʌch miʼ yʌlob jaʼel jiñi sociólogojob. Laʼ cu lac ñaʼtan iliyi, jiñi muʼ bʌ i ñusañob qʼuin yicʼot muʼ bʌ i ñucʼob cʼujts o woli (yʌquel) bʌ i chaʼleñob i bʌ ti divorciar an i tajol cheʼ miʼ cʼotel i melob jaʼel.
¿CHUQUI YOM MAʼ MEL? Sʌclan a wamigojob weñoʼ bʌ i melbal yicʼot muʼ bʌ a mulan a lajibeñob. Jumpʼejl ejemplo, sʌclan jiñi wen tsajaloʼ bʌ, muʼ bʌ i qʼuelob ti ñuc yambʌlob, muʼ bʌ i tʼoxob i chubʌʼan yicʼot muʼ bʌ i pʌyob tiʼ yotot yambʌlob.
YAMBɅ PRINCIPIO TAC AM BɅ TI BIBLIA
Qʼuele jiñi video tac loqʼuem bʌ ti Biblia ñaʼtʌbil bʌ chaʼan miʼ coltan jiñi xñujpuñelob, xcolelob yicʼot xbiʼtalob.
MACH A CʼɅN TʼAN TAC MUʼ BɅ I LOW YAMBɅLOB
«An winicob xʼixicob mach bʌ utsic i tʼan. Miʼ jecʼonla bajcheʼ espada» (PROVERBIOS 12:18).
TʼOXO A CHUBɅʼAN
«Jini mach bʌ chʌquic tiʼ chubʌʼan mi caj i chaʼ aqʼuentel» (PROVERBIOS 11:25).
MELE TIʼ TOJLEL YAMBɅLOB CHEʼ BAJCHEʼ A WOM MAʼ MELBENTEL
«Melela chuqui utsʼat tiʼ tojlel laʼ piʼʌlob mi laʼ wom chuqui utsʼat ti laʼ tojlel» (MATEO 7:12).