I cʼʌñol ti wen jiñi taqʼuin
Cabʌl lac piʼʌlob muʼ bʌ i chʼʌmob ti ñuc jiñi ticʼojel tac am bʌ Biblia maʼañix miʼ wen tajob wocol tiʼ caj taqʼuin.
ÑAʼTAN CHUQUI MI CAJ A MEL
PRINCIPIO AM BɅ TI BIBLIA: «Jini bʌx bʌ ti eʼtel muʼ bʌ i ñaʼtan chuqui yom i mel miʼ yʌcʼ ti pʼojlel i chubʌʼan. Pero pejtel muʼ bʌ i ñaʼtañob i toʼol tajob i chubʌʼan mi caj i yochelob ti pobre» (Proverbios 21:5).
¿CHUQUI YOM I YɅL ILI? Chaʼan wen miʼ loqʼuel chuqui mi lac ñaʼtan lac mel, yom la cujil bajcheʼ mi caj lac mel i mi lac tsʼʌctesan. Cʼajtesan chaʼan mach mejlic a laj mʌn chuqui a wom. Jin chaʼan, pʼisbil jach yom maʼ cʼʌn a taqʼuin.
¿CHUQUI YOM MAʼ MEL?
-
Cʼʌñʌ a taqʼuin cheʼ bajcheʼ ñaʼtʌbil jach a chaʼan. Mele jumpʼejl lista chaʼan jujunchajp chuqui mi caj a mʌn i qʼuele jaypʼejl taqʼuin mi caj a cʼʌn. Mi maʼañic tsaʼ jastiyi chaʼan chuqui woli (choncol) bʌ a ñaʼtan a mʌn, tsʼitaʼ chʼʌmʌ ti yambʌ. Jumpʼejl ejemplo, mi cʌlʌxix tsaʼ jisa a taqʼuin tiʼ mʌñol gasolina, miʼ mejlel a tsʼitaʼ chʼʌm jiñi tsaʼ bʌ a lon ñaʼta a cʼʌn chaʼan mi laʼ majlel ti uchʼel.
-
Mach a wotsan a bet. Mi maʼañic i cʼʌjñibal a chaʼan, mach a chaʼlen bet. Ñumen wen cheʼ maʼ ñaxan tempʌben i tojol chuqui a wom a mʌn. Mi tsaʼ cʼʌñʌ a tarjeta de crédito chaʼan maʼ chaʼlen bet, ñopo a toj majlel ti jujumpʼejl uw chaʼan maʼañic miʼ letsel majlel i jol. Pero mi tsaʼix a wotsaʼ a bet, ñaʼtan bajcheʼ mi caj a toj i tsʼʌctesan.
Jumpʼejl estudio tsaʼ bʌ mejli tsiʼ yʌlʌ chaʼan jiñi muʼ bʌ i chaʼleñob mʌñoñel yicʼot tarjeta de crédito ñumen cabʌl miʼ yotsañob i bet. Jin chaʼan, cʼʌñʌ ti wen.
SɅCLAN WEM BɅ A MELBAL
PRINCIPIO AM BɅ TI BIBLIA: «Jini tsʼuʼ bʌ maʼanic miʼ chaʼlen cholijel cheʼ i yorajlelix. Miʼ lon cʼajtin tac ñumel cheʼ tiʼ yorajlel cʼajbal» (Proverbios 20:4).
¿CHUQUI YOM I YɅL ILI? Mi maʼañic maʼ mulan eʼtel (troñel), maʼañic chuqui an a chaʼan. Jin chaʼan, chaʼlen eʼtel yicʼot cʌntan a taqʼuin chaʼan miʼ mejlel a taj chuqui a wom.
¿CHUQUI YOM MAʼ MEL?
-
Chaʼlen eʼtel. Jiñi a yum ti eʼtel mi caj mulan cheʼ bʌ miʼ qʼuel chaʼan bʌxetʌch ti eʼtel i maʼañic mi caj i chilbeñet a weʼtel.
-
Mach a chaʼlen xujchʼ. Jiñi muʼ bʌ i chaʼleñob xujchʼ tiʼ yeʼtel mach utsʼatix mi caj i qʼuejlelob yicʼot wocolix chaʼan miʼ chaʼ tajob yambʌ i yeʼtel.
-
Mach a wen mulan taqʼuin. Cheʼ bʌ a wom a ñumen sʌclan jiñi taqʼuin miʼ mejlel i yʌcʼ ti wocol a cʼocʼlel yicʼot bajcheʼ an a wicʼot yambʌlob. Cʼajtesan chaʼan jiñi taqʼuin mach jiñic ñumen ñuc bʌ i cʼʌjñibal ti laj cuxtʌlel.
YAMBɅ PRINCIPIO TAC AM BɅ TI BIBLIA
Pejcan jiñi Biblia yaʼ ti jw.org. Am bʌ ti cabʌl tʼan tac.
MACH A TOʼOL JISAN A TAQʼUIN TI MACH BɅ WEÑIC ÑUSAQʼUIN
«Come miʼ yochelob ti pobre jini xyʌcʼʌjelob yicʼot woʼob jax bʌ tiʼ weʼelʌl. Jini muʼ bʌ i mulañob cabʌl wʌyel mi caj i lʌpob tsucul pisil» (PROVERBIOS 23:21).
MACH A CɅLɅX CʼOJOʼTAN JIÑI TAQʼUIN
«Mach mi laʼ mel laʼ pusicʼal chaʼan laʼ cuxtʌlel wʌʼ ti pañimil, mi chaʼan chuqui mi laʼ cʼux, mi chaʼan chuqui mi laʼ jap, mi chaʼan chuqui mi laʼ xoj» (MATEO 6:25).
MACH A MULɅBEN I CHUBɅʼAN YAMBɅLOB
«Jini woʼatax bʌ ti chubʌʼañʌl miʼ sebun i bʌ chaʼan miʼ yochel ti rico. Maʼanic miʼ wis ñaʼtan mi mux caj i chaʼ ochel ti pobre» (PROVERBIOS 28:22).